‘Wufeze Umsebenti Wakho’
1. Ngusiphi sibonelo lesihle Pawula lasibekela sona emsebentini wekushumayela?
1 ‘Wufeze umsebenti wakho.’ (2 Thim. 4:5) Umphostoli Pawula wakhutsata Thimothi nganembeza lomuhle. Ecinisweni emkhatsini wa-47 na-56 C.E., Pawula besalucedzile luhambo lwakhe lwekuba sitfunywa selivangeli. Incwadzi yeMisebenti ikusho kanyenti kutsi Pawula ‘wafakaza.’ (Imis. 23:11; 28:23) Tsine singafakaza njani lamuhla?
2. Singawentisisa njani umsebenti wekushumayela emtini ngemuti?
2 Emtini Ngemuti: Kuze sitfole banikati bemakhaya labangakase bative tindzaba letimnandzi, kungase kudzingeke siye kubo ngetikhatsi letehlukehlukene. Umnumzane welikhaya kungenteka uba khona kakhe ngetikhatsi tantsambama nobe ngetimphelasontfo. Kufanele setame kukhuluma nalotsite emtini nemuti lesingena kuwo futsi sibuyele kanyenti lasingakabatfoli khona. Kutsiwani nangabe imetamo yakho ingaphumeleli? Mhlawumbe kubhala incwadzi nobe kushaya lucingo kungaba nemiphumela lemihle.
3. Ngumaphi ematfuba lonawo ekufakaza etindzaweni tawonkhe wonkhe nobe nawungakakuhleli?
3 Etindzaweni Tawonkhe Wonkhe Nanawungakahleli: Bonkhe bantfu labalalela tinceku taJehova lamuhla tiyabasita kutsi bakwati “kuhlanipha.” Ngaletinye tikhatsi, loku tikwenta “etitaladini” nobe ‘etimakethe.’ (Taga 1:20, 21) Nasenta imisebenti yetfu yamalanga onkhe, siyakuphaphamela yini kufakaza? Kungashiwo yini kutsi ‘sitinikela ngalokuphelele ekushumayeleni nasekufakazeni?’ (Imis. 18:5) Nasenta njalo, sitawube ‘siyawufeza umsebenti wetfu.’—Imis. 10:42; 17:17, NW; 20:20, 21, 24.
4. Umthantazo nekuzindla kusifaka njani sandla ekufakazeni ngekutimisela?
4 Ngaletinye tikhatsi, ngenca yebutsakatsaka betfu nobe ngemahloni singase sitigodle singafakazi. Siyaciniseka kutsi Jehova uyaticondza timo tetfu. (Hla. 103:14) Nasisemeni lesinjalo, singathantaza kuye simcele asiphe sibindzi sekukhuluma. (Imis. 4:29, 31) Ngesikhatsi sitichubela sifundvo nanasizindla ngeliVi laNkulunkulu, kuhle kunaka kakhulu kujulisa etinhlitiyweni tetfu kubaluleka kwetindzaba letimnandzi. (Fil. 3:8) Loko kutasenta sifakaze ngekutimisela.
5. Singahlanyela njani ekugcwalisekeni kwesiphrofetho saJoweli?
5 Siphrofetho saJoweli sasho kutsi nalisengakafiki lilanga lelikhulu nalelesabekako laJehova, bantfu bakhe ‘batawuhamba bacondze embili’ futsi bangavumeli lutfo kutsi lubaphazamise ekushumayeleni. (Jow. 2:2, 7-9) Shengatsi singenta konkhe lokusemandleni etfu kulomsebenti wekushumayela longeke uphindze wentiwe.