I-Kingdom News No. 38 Itawuhanjiswa Nga-November!
1. Bantfu banayiphi imibuto ngalabafile, futsi lemibuto itawuphendvulwa njani ngaNovember?
1 Kufa kusitsa sebantfu bonkhe, nanobe banetinkholelo tabo. (1 Khor. 15:26) Bantfu labanyenti bayatibuta kutsi labafile bakuphi nekutsi batawuphindze bababone yini. Ngako-ke emabandla aboFakazi BaJehova emhlabeni wonkhe atawuhlanganyela emkhankasweni wekuhambisa i-Kingdom News No. 38 lenesihloko lesitsi, “Vele Bangaphindze Baphile Yini Bantfu Labafile?” Lomkhankaso lokhetsekile utawucala nga-November 1. Nasewuphelile lomkhankaso, le-Kingdom News No. 38 itawuhanjiswa ensimini njengalamanye emapheshana lavamile.
2. I-Kingdom News No. 38 ihleleke njani?
2 Indlela Lelihlelwe Ngayo: I-Kingdom News No. 38 ihlelwe ngendlela yekutsi ikhone kugoceka kute likhasi lekucala livete sihloko lesikhangako lesihambisana nemagama latsi, “Ungatsi . . . yebo? cha-ke? mhlawumbe?” Nakavula le-Kingdom News, umfundzi utawubona indlela liBhayibheli leliwuphendvula ngayo lombuto losihloko kanye naloko setsembiso seliBhayibheli lesikushoko kuye. Utawuphindze atfole netizatfu tekwetsemba liBhayibheli. Likhasi lekugcina lale-Kingdom News libuta umfundzi umbuto langacabanga ngawo, limkhutsate nekutsi afundze kabanti ngaleyo ndzaba.
3. Itawuhanjiswa njani i-Kingdom News No. 38?
3 Indlela Letawuhanjiswa Ngayo: Lomkhankaso utawufanana naleminye imikhankaso yekuhambisa timemo teSikhumbuto netemhlangano wesigodzi. Labadzala belibandla ngibo labanika ticondziso tekutsi ingahlanganiswa njani insimi yelibandla, ngekuvumelana nalokushiwo yincwadzi labayitfolile ya-April 1, 2013. Emabandla lenensimi lencane angakhetsa kusita emabandla labomakhelwane lanensimi lenkhulu. Nawutsatsa linani lemakhophi e-Kingdom News No. 38, tsatsa kuphela linani lawo lotalihambisa ngeliviki linye. Nakusachubeka lomkhankaso, emakhophi ayo angahanjiswa nasemsebentini wekushumayela etitaladini ngemuva kwekutsi emasimi emuti nemuti asahlanganiswe onkhe. Nangabe onkhe emakhophi alo aphela inyanga ingakapheli, kungahanjiswa sipho senyanga. NgeMgcibelo wekucala enyangeni ya-November, sitawube simatasatasa ngalomkhankaso lokhetsekile esikhundleni sekutsi sicalise tifundvo teliBhayibheli. Ngetimphelasontfo kufanele sibahambise nabomagazini nangabe sikhona. Wena sewutihlelile yini timo takho kuze uhlanganyele kulomkhankaso lokhetsekile?