Kusita Labo Labasengakakulungeli Kufundza Incwadzi Letsi Lokufundziswa LiBhayibheli
1. Incwadzi letsi Lokufundziswa LiBhayibheli ingabakhanga yini bonkhe bantfu ekucaleni? Chaza.
1 Kute umuntfu abe sikhonti saJehova, kufanele afundze loko lokufundziswa liBhayibheli. Nobe kunjalo, labanye basenkholweni lengesiyo yebuKhristu futsi liBhayibheli abalitsatsi njengeliVi laNkulunkulu. Labanye abakholelwa kuNkulunkulu futsi abakuhloniphi lokushiwo liBhayibheli. Ngutiphi tintfo letibe lusito kulabo ekucaleni labangazange bayemukele incwadzi letsi Lokufundziswa LiBhayibheli? Lemibono lelandzelako ivetwe bamemeteli basemaveni lehlukene langu-20.
2. Nangabe umuntfu atsi akakholelwa kuNkulunkulu, yini lokufanele setame kuyitfola futsi kungani?
2 Bantfu Labangakholelwa KuNkulunkulu: Nangabe umuntfu atsi akakholelwa kuNkulunkulu, kubalulekile kutfola sizatfu saloko. Kungenteka yini kutsi ukholelwa ekutigucukeleni kwemvelo? Kungenteka yini kutsi akasakholelwa kuNkulunkulu ngenca yekungalungi lokusemhlabeni nobe kutentisa lokusetinkholweni? Kungenteka yini kutsi uvela eveni lapho bantfu bakhona bangakholelwa kuNkulunkulu? Mhlawumbe akaphiki kutsi Nkulunkulu ukhona kodvwa akake asibone sidzingo sekukholelwa kuYe. Bamemeteli labanyenti bakutfole kuphumelela kubuta umbuto lotsi: “Bewusolo ungakholelwa yini kuNkulunkulu?” lokubese kwenta umuntfu kutsi achaze. Lalela futsi ungamngeni emlonyeni. Nasesicondza kutsi kungani loyo muntfu angakholelwa kuNkulunkulu, sitawuyati indlela lokufanele simphendvule ngayo nencwadzi lokufanele simnike yona.—Taga 18:13.
3. Singakukhombisa njani kuhlonipha umuntfu lesicoca naye naloko lakukholelwako?
3 Nasewuphendvula, cikelela kutsi awenti lomuntfu abone shengatsi uhlasela umbono wakhe. Lombono lolandzelako uvela eMelika: “Kubaluleke kakhulu kuhlonipha inkhululeko yemuntfu yekutikhetsela loko lakukholelwako. Kunekuzama kumkhombisa kutsi uyati, kuncono kakhulu kubuta imibuto letawenta kutsi loyo lococa naye acabange futsi atitsatsele yena sincumo.” Ngemuva kwekuva loyo lacoca naye asho loko lakukholelwako lomunye umbonisi lojikeletako uvame kuphendvula ngekubuta umbuto lotsi: “Uke wacabanga yini kutsi loko vele kungenteka?”
4. Singabasita njani labo labangemaBhuda?
4 Kubantfu labangemaBhuda, ayatiwa indzaba yekukholelwa kuNkulunkulu. Labanye bamemeteli eBritain batsandza kusebentisa incwajana letsi “Lasting Peace and Happiness—How to Find Them” nabafakaza kulolo hlobo lwebantfu. Ngemuva kwekukhulumela imibuto lesesigabeni sekucala esihlokweni lesisekucaleni, babese bacoca ngesihloko lesitsi “Is There Really a Most High Creator?” kanye nesihloko lesitsi “A Guidebook for the Blessing of All Mankind.” Ngemuva kwaloko, mhlawumbe sebangakhona kwetfula incwadzi letsi Lokufundziswa LiBhayibheli futsi batjele labacoca naye kutsi: “Nanobe ungakholelwa kuNkulunkulu, kufundza liBhayibheli kuyazuzisa ngobe lineticondziso letinyenti lesingatisebentisa ekuphileni.” Lihlahlandlela laseMelika lelishumayela lapho kuhlala khona emaShayina litsi: “Bantfu labanyenti kulendzawo bayakutsandza kufundza. Bavame kuyifundza yonkhe incwadzi lesibanikete yona ngaphambi kwekuba sibuyele kubo. Kodvwa kungenteka bangacondzi kutsi kungani kufanele bachutjelwe sifundvo seliBhayibheli. Ngitsandza kubaniketa incwajana letsi Tindzaba Letimnandzi nangicala kucoca nabo ngobe ibhalwe ngendlela yekutsi nicocisane.” Umbonisi wesifundza esifundzeni sesiShayina lesiseMelika ubika kutsi kungenteka uyetfule incwadzi letsi Lokufundziswa LiBhayibheli nanicala kucoca nalotsite. Nobe kunjalo, kungaba ncono kutsi nicale kufundza esehlukweni 2, lesikhuluma ngeliBhayibheli kunekucala esehlukweni 1 lesikhuluma ngaNkulunkulu.
5. Kungani kubeketela kubalulekile?
5 Kutsatsa sikhatsi kutsi umuntfu akholelwe kuNkulunkulu, ngako kubalulekile kutsi sibeketele. Nasicala kucoca nemuntfu kungenteka singakhoni kumsita aze avumelane nekutsi ukhona uMdali. Kodvwa mhlawumbe ngekuhamba kwesikhatsi angase avume kutsi kungenteka ukhona, nome angase acondze kutsi kungani labanye bakukholelwa loko.
6. Yini lengabangela labanye bantfu bangalitsandzi liBhayibheli?
6 Labo Labete Umdlandla Wekufundza LiBhayibheli Nome Labangaletsembi: Kuvamile kutsi umuntfu lovumako kutsi kungenteka ukhona Nkulunkulu abe bete umdlandla kuloko lokufundziswa liBhayibheli ngobe angakholelwa kutsi liliVi laNkulunkulu. Kungenteka kutsi uhlala eveni lelingasilo lebuKhristu ngenca yaloko ucabanga kutsi liBhayibheli liyincwadzi yetinkholo tebuKhristu. Nome kungenteka uhlala eveni lelatiwa ngekutsi lebuKhristu kodvwa libe linebantfu labanganendzaba nenkholo futsi angase angacabangi kutsi liBhayibheli lingamsita. Singabasita njani bantfu labanjalo kutsi balitsandze liBhayibheli futsi bagcine bavuma kuchutjelwa sifundvo ngencwadzi letsi Lokufundziswa LiBhayibheli?
7. Ngalokuvamile, nguyiphi indlela lekahle yekukhutsata bantfu kutsi bafundze liBhayibheli?
7 Lihhovisi leligatja laseGreece labhala latsi: “Indlela lencono kakhulu yekusita bantfu labangalitsandzi liBhayibheli kuvele ulivule futsi ubakhombise loko lelikucuketse. Bamemeteli labanyenti babonile kutsi umlayeto weliBhayibheli unemandla lamakhulu etinhlitiyweni tebantfu kwendlula loko labangase bakusho ngemlomo. (Heb. 4:12) Kubona libito laNkulunkulu eBhayibhelini kusite labanyenti baba nesifiso sekulifundza.” Lihhovisi leligatja laseNdiya labhala latsi: “Liciniso lelimayelana nekuphila nekufa likhanga emaHindu lamanyenti. Siyawakhanga nesetsembiso seliBhayibheli semhlaba lotawube sewute lubandlululo.” Kukhulumela tinkinga letikhatsata bantfu endzaweni kuniketa bamemeteli litfuba lekukhuluma ngaloko lokushiwo liBhayibheli mayelana nendlela uMbuso waNkulunkulu lotatilungisa ngayo.
8. Singatsini kulabo labanembono longasiwo ngeliBhayibheli ngenca yaloko lokwenteka eTinkholweni Letitsi TebuKhristu?
8 Nangabe umuntfu lotsite anembono longasiwo ngeliBhayibheli ngenca yaloko lokwenteka eTinkholweni Letitsi TebuKhristu, mtjele kutsi leto tinkholo atilimeleli kahle liBhayibheli naloko lelikufundzisako. Lihhovisi leligatja laseNdiya labhala latsi: “Ngaletinye tikhatsi kudzingeka sisite bantfu babone kutsi liBhayibheli alisiyo incwadzi yemasontfo.” Babika kutsi ngalokuvamile emaHindu ajatjuliswa yincenye 4 yencwajana letsi “Iyini Injongo Yokuphila? Ungayithola Kanjani?” (letfolakala ngesiZulu), lechaza indlela emasontfo letame ngayo kuhlambalata nekucedza liVi laNkulunkulu. Lihlahlandlela laseBrazil nalikhuluma nebantfu litsi: “Ungete watsandza yini kufundza kabanti ngaloko lokucuketfwe liBhayibheli? Bantfu labanyenti bayakwenta loko hhayi ngenjongo yekutsi bafuna kuba ngemalunga enkholo letsite, ngako nawe kungahle kukujabulise longakufundza.”
9. Kungani kufanele ungapheli emandla nangabe lotsite ekucaleni anganendzaba naloko lokufundziswa liBhayibheli?
9 Jehova ubuka inhlitiyo yemuntfu ngamunye. (1 Sam. 16:7; Taga 21:2) Udvonsa labo labanesifiso sekumkhonta. (Joh. 6:44) Labanyenti labadvonswako abazange sebafundziswe ngaNkulunkulu nobe basuke banelwati loluncane ngeliBhayibheli. Umsebenti wetfu wekushumayela ubaniketa litfuba lekutsi ‘basindziswe, batfole nelwati lolungulonalona lweliciniso.’ (1 Thim. 2:4) Ngaleso sizatfu, nangabe labanye ekucaleni bangenandzaba naloko lokufundziswa liBhayibheli, ungapheli emandla. Sebentisa tincwadzi letikhona ngelulwimi lwakho kute ubente batsandze liBhayibheli. Ngekuhamba kwesikhatsi, ungakhona kwetfula incwadzi leyinhloko yekuchuba tifundvo teliBhayibheli, letsi Lifundzisani Mbambambamba LiBhayibheli?
[Libhokisi ekhasini 4]
Nangabe lococa naye atsi akakholelwa kuNkulunkulu, yetama loku:
• Kute utfole sizatfu saloko, ungambuta utsi: “Bewusolo ungakholelwa yini kuNkulunkulu?”
• Nangabe angumBhuda sebentisa incwajana letsi “Lasting Peace and Happiness—How to Find Them,” emakhasini 9-12.
• Nangabe akholelwa ekutigucukeleni kwemvelo, loku lokulandzelako kungaba lusito:
Luchungechunge lwetihloko te-“Phaphama!” letitsi “Ingabe Kwaklanywa?”
I-video letsi “The Wonders of Creation Reveal God’s Glory”
Incwajana letsi “A Satisfying Life—How to Attain It,” incenye 4; Kwaba Khona Njani Kuphila?; naletsi “The Origin of Life—Five Questions Worth Asking”
• Nangabe angasakholelwa kuNkulunkulu ngenca yekungalungi nekuhlupheka, loku lokulandzelako kungaba lusito:
Incwadzi letsi “Is There a Creator Who Cares About You?,” sehluko 10
Incwajana letsi “Ingabe UNkulunkulu Uyasikhathalela Ngempela?,” incenye 6, naletsi “Iyini Injongo Yokuphila?,” incenye 6
• Shintja usebentise incwadzi letsi Lokufundziswa LiBhayibheli ngekushesha loyo lococa naye nakacondza kutsi ukhona Nkulunkulu. Kungaba kuhle kucala ngesehluko 2 nobe lesinye sihloko lesifanele loyo lococa naye.
[Libhokisi ekhasini 5]
Yetama loku lokulandzelako nangabe lococa naye angakholelwa eBhayibhelini:
• Ungasebentisa sehluko 17 na-18 sencwadzi letsi “Life—How Did It Get Here? By Evolution or by Creation?”
• KumaHindu, sebentisa incwajana letsi “Why Should We Worship God in Love and Truth?”
• KumaJuda, sebentisa incwajana letsi “Will There Ever Be a World Without War?,” emakhasi 3-11.
• Coca ngetinzuzo tekulalela timiso teliBhayibheli. Ungasebentisa naku lokulandzelako kute ukhombise lotsite tinzuzo tekusebentisa liBhayibheli ekuphileni:
Luchungechunge lwetihloko te-“Phaphama!” letitsi “Usizo Lomkhaya”
I-video letsi “The Bible—Its Power in Your Life”
Incwajana letsi Tindzaba Letimanandzi Letivela KuNkulunkulu tifundvo 9 na-11; “Incwadi Yabo Bonke Abantu,” emakhasi 22-26; naletsi “A Satisfying Life—How to Attain It,” incenye 2
KumaBhuda, sebentisa incwajana letsi “The Pathway to Peace and Happiness,” emakhasi 3-7.
KumaMoslem sebentisa incwajana letsi “Real Faith—Your Key to a Happy Life,” incenye 3.
Nangabe ushumayela endzaweni lapho bantfu bakhona bangalifuni liBhayibheli, kungase kube ncono kungaliveti kuze kube ngulapho sewubuyele tikhatsi letinyentana.
• Chaza indlela letigcwaliseke ngayo tiphrofetho teliBhayibheli. Ungasebentisa loku:
I-video letsi “The Bible—Accurate History, Reliable Prophecy”
Incwajana letsi “Incwadi Yabo Bonke Abantu,” emakhasi 27-29
• Shintja usebentise incwadzi letsi Lokufundziswa LiBhayibheli ngekushesha nangabe umuntfu abuta loko lokufundziswa liBhayibheli etindzabeni letitsite.
[Libhokisi ekhasini 6]
Nangabe lococa naye atsi: “Angikholelwa KuNkulunkulu,” yetama loku lokulandzelako:
• “Ngicela kukuchazela kafishane kutsi yini mine lokungisite kutsi ngikholelwe kuMdali.” Coca naye ngemaphuzu lasencwadzini “Ukubonisana” emakhasini 87-89, nome uhlele kumletsela incwadzi lojabulele kuyifundza.
• “Kodvwa nangabe Nkulunkulu ukhona, bewungatsandza kutsi abe njani?” Bantfu labanyenti lesicoca nabo bavame kutsi bona bangakhangwa nguNkulunkulu lonelutsandvo, lolungile, lonemusa futsi longakhetsi. Usebentisa liBhayibheli, mkhombise kutsi Nkulunkulu unjalo. (Kungenteka nekutsi nikhone kusebentisa sehluko 1 sencwadzi letsi Lokufundziswa LiBhayibheli, nicale ngesigaba 6.)
Nangabe lococa naye atsi: “Angikholelwa eBhayibhelini,” ungase usho loku lokulandzelako:
• “Banyenti bantfu labatsi abakholelwa eBhayibhelini. Labanye batsi liBhayibheli alikhulumi ngesayensi nome timiso talo atisebenti ekuphileni kwetfu. Uke walifundza yini liBhayibheli ekuphileni kwakho? [Lindzela imphendvulo. Mkhombise setfulo lesisekhasini 3 sencwajana letsi “Incwadi Yabo Bonke Abantu” bese umniketa yona nangabe ikhona esitokweni selibandla nobe uyiphrinte ku-Watchtower Library.] Bantfu labanyenti abasakholelwa eBhayibhelini ngobe tinkholo atikwenti loko lelikufundzisako. Nangibuya ngitawutsandza kutsi sicoce ngesibonelo lesisekhasini 4 na-5.”
• “Bantfu labanyenti banembono lofana newakho. Ngicela kukukhombisa lokutsite lokungijabulisako ngeliBhayibheli. [Fundza Jobe 26:7 nobe Isaya 40:22 lekhombisa kutsi lokushiwo liBhayibheli ngesayensi kunembile.] LiBhayibheli liphindze libe nemavi lahlakaniphile lasita imindeni. Nangibuya, ngingatsandza kukukhombisa sibonelo saloko.”
• “Ngiyabonga ngekungitjela loko. Kube Nkulunkulu wabhalela bantfu incwadzi, ucabanga kutsi beyingakhuluma ngani?” Ngemuva kwaloko, mkhombise lokutsite lokuseBhayibhelini lokuhambisana nemphendvulo yakhe.