Lokuhlangenwe Nako
◼ E-Australia: Indvodza lesifundziswa lenguJohn, yacala kuya esontfweni isengumntfwana kodvwa yase “ishisekela imfundziso yekutsi akekho Nkulunkulu.” Lihlahlandlela lamshiyela incwajana letsi Kwaba Khona Njani Kuphila? latsi nalibuyela kuye lamshiyela incwajana letsi “Origin of Life.” Lelihlahlandlela lachubeka litfutfukisa inshisekelo yakhe ngekutsi limletsele bomagazini bamuva labanetihloko letikhuluma ngendalo nobe ngetiphrofetho teliBhayibheli. Latsi nalibona kutsi John sewulungele, lase limniketa incwadzi letsi “IBhayibheli—Izwi LikaNkulunkulu Noma Elomuntu?” Ngemuva kwekuyifundza, John watsi akasaciniseki kutsi Nkulunkulu ukhona yini nobe cha. Lelihlahlandlela lase letfula incwadzi letsi Lokufundziswa LiBhayibheli lamkhombisa sigaba 8 ekhasini 20 netigaba 13-16 emakhasini 23-24. Imibhalo lekhonjiwe lekuletigaba yamjabulisa kakhulu John kangangekutsi watsi: “Mhlawumbe kudzingeka ngiphindze ngilifundze liBhayibheli.”
◼ EMexico: Lenye indvodza yatjela ummemeteli kutsi ayikholelwa kutsi liBhayibheli laphefumulelwa nguNkulunkulu. Lommemeteli watsi utayikhombisa bufakazi bekutsi liBhayibheli liphefumulelwe. Ngemuva kwekucoca nayo tikhatsi letimbalwa, loko leyakufundza eBhayibhelini kwayitsintsa inhlitiyo yayo. Yatsintseka kakhulu nayifundza ngetimiso taNkulunkulu. Yatjela lommemeteli kutsi: “Ekucaleni mine nawe nasifundza liBhayibheli, kwakuba shengatsi sifundza seluleko lesivela kulenye nje incwadzi futsi bekungangitsintsi loko lebesikufundza. Kodvwa nyalo nasilifundza, ikakhulukati seluleko salo ngekutiphatsa, ngidliwa ngunembeza.”
◼ EMelika: Ngesikhatsi balingani bemshado basemsebentini wekushumayela etindzaweni letiphitsitelako, bahlangana newesifazane waseTaiwan lobekakholelwa kuNkulunkulu kodvwa acabanga kutsi liBhayibheli lebantfu baseNshonalanga. Weta lapho bebabeke khona tincwadzi ngobe abetiva angasilutfo kantsi abengumuntfu lome kahle kutemnotfo. Abenelitsemba lekutsi liBhayibheli litamsita atfole injongo yekuphila. Labalingani bemshado bacalisa sifundvo naye basebentisa incwadzi letsi Lokufundziswa LiBhayibheli kanye nencwajana letsi “Lasting Peace and Happiness—How to Find Them.” Esikhundleni sekutsi bafundze sehluko 2 salencwadzi, bacoca ngesihloko lesitsi “A Guidebook for the Blessing of All Mankind” kulencwajana. Nasebafundze tigaba letisitfupha tekucala kulencenye, lowesifazane wamangala kutsi liBhayibheli lehlukile nawulicatsanisa naletinye tincwadzi tenkholo. Ngemuva kwekufundza tiphrofetho teliBhayibheli lesetigcwalisekile, watsi: “Kute lenye incwadzi lengingayicabanga lenembe njengeliBhayibheli!”
◼ EJapan: Nanobe loyo ummemeteli lamtfola ekhaya amtjela kutsi akakholelwa kuNkulunkulu, lommemeteli wachubeka amvakashela kafishane acoca naye ngetihloko te-“Phaphama!” letitsi “Ingabe Kwaklanywa?” Kancane kancane, lendvodza yawushintja umbono wayo futsi yacala kuvuma kutsi kungenteka ukhona uMdali. Nyalo iyakholelwa kutsi ukhona Nkulunkulu futsi lommemeteli ufundza nayo incwajana letsi Tindzaba Letimnandzi Letivela KuNkulunkulu.
◼ ECanada: Dzadze lotsite wamniketa magazini wamuva lomunye wesifazane lobekaphuma endlini yakhe aya emotweni. Ngesikhatsi abuyela kuye, lona wesifazane wamtjela kutsi akatsandzi futsi akakholelwa kuNkulunkulu. Lodzadze akaphelelwanga ngemandla, wamletsela incwajana letsi “A Satisfying Life—How to Attain It.” Watsi lodzadze nakamtfola ekhaya, wamtjela kutsi nanobe ati kutsi akakholelwa kuNkulunkulu, abecabanga ngaye ngobe uyati kutsi ungumtali lokhulisa bantfwana yedvwa. Wamkhombisa sigaba 6 ekhasini 4 kulencwajana, lesikhuluma ngekutsi ungasitfolaphi seluleko lesikahle. Ngemuva kwaloko, wamkhutsata kutsi afundze sifundvo 2 lesikhuluma ngaloko langakwenta mayelana nekukhulisa bantfwana. Lona wesifazane wakujabulela kakhulu kutsatsa lencwajana.