Sebentisa I-jw.org Emsebentini Wakho Wekushumayela

I-Web site yetfu ilithuluzi lelihle kakhulu lelisisita sikhone kusakata tindzaba letimnandzi kuto “tonkhe tincenye temhlaba.” (Imis. 1:8) Bantfu labanyenti abakhoni kuyitfola i-jw.org. Kodvwa bayibona ngemuva kwekutsi ummemeteli asabakhombise yona. Nobe kunjalo, ngaphambi kwekutsi usebentise nome nguyiphi intfo yakho yebucwephesha ensimini, cabanga ngekutsi kutawube kuphephile yini kwenta njalo. Kufanele ucaphele ngaso sonkhe sikhatsi nawusetindzaweni letinebugebengu lobunyenti. Nangabe ute intfo yebucwephesha, ngekuhlakanipha ungacela umnikati welikhaya kutsi umkhombise i-jw.org kuyakhe intfo yebucwephesha.

Lomunye umbonisi lojikeletako wafaka le-video letsi Kungani Kufanele Ufundze LiBhayibheli? elucingweni lwakhe futsi uyidlalela bantfu kunobe nguliphi litfuba lalitfolako. Nakashumayela emtini ngemuti uvamise kutsi: “Ngivakashela bantfu nje kafishane kuze ngibasite batfole timphendvulo talemibuto lemitsatfu lebalulekile: Kungani kugcwele tinkinga letingaka lapha emhlabeni? Nkulunkulu utatilungisa njani? Kwanyalo singatibeketelela njani? Le-video lemfishane iyayiphendvula lemibuto.” Ngemuva kwaloko uyayidlala bese uyambuka kuze abone kutsi utiva njani. Le-video iyamdvonsa umuntfu, kangangekutsi bantfu labanyenti abakhoni kususa emehlo abo kuyo ize iphele. Lombonisi lojikeletako ubese utsi: “Utivele mosi kutsi ungakhona kucela sifundvo seliBhayibheli usebentisa i-Internet. Njengobe ngilapha, ngingakukhombisa ngekushesha kutsi sichutjwa njani.” Nangabe umnikati welikhaya avuma, lomzalwane uyamkhombisa kutsi sifundvo sichutjwa njani asebentisa incwajana letsi Tindzaba Letimnandzi. Nangabe lomuntfu ete sikhatsi, uhlela kutsi aphindze abuye kute amkhombise. Nakaphumula esitolo lesitsengisa likhofi, uvamise kusho intfo lefanako kumuntfu losuke ahleti edvute naye ngemuva kwekutsi asacalise incociswane lemnandzi naye. Wena uyayisebentisa yini i-jw.org emsebentini wakho wekushumayela?