Tingoma Letinsha Tekudvumisa Nkulunkulu!
1 Emhlanganweni wemnyaka losandza kwendlula we-Watch Tower Bible and Tract Society of Pennsylvania, lobewubanjwe nga-October 4, 2014, kwamenyetelwa kutsi liculo lesinalo litawubuketwa. Leto bekutindzaba letimnandzi sibili! Bonkhe lebebakhona bakhunjutwa ngendzima lebalulekile tingoma teMbuso letinayo ekukhonteni kwetfu.—Hla. 96:2.
2 Kungenteka uyatibuta kutsi yini leyente kwadzingeka kutsi leliculo libuketwe. Tinyenti tizatfu letibangela loko. Kwekucala nje, indlela lesicondza ngayo imiBhalo iyachubeka itfutfuka, futsi loko kuyawatsintsa emagama lasetingomeni tetfu. (Taga 4:18) Nasi lesinye sizatfu salokubuketa: Lamanyenti emavi kanye nemishwana lesetjentiswe eculweni lesinalo atsetfwe ehumushweni lakucala le-“New World Translation.” Leto tintfo sekufanele tilungiswe kute tihambisane nemagama latfolakala ehumushweni lelibuketiwe leliBhayibheli. Ngesizatfu sekutsi munyenti umsebenti lowentiwa kute kulungiswe emagama lakuleliculo, kwancunywa kutsi kwengetwe letinye tingoma.
3 Kutawudzingeka simele kushicilelwa kweliculo lelisha yini ngaphambi kwekutsi sicale kuhlabela tingoma letinsha? Cha. Siyajabula kunatisa kutsi etinyangeni letimbalwa letitako, letingoma letinsha titawutfolakala ku-Web site yetfu i-jw.org. Nangabe ingoma lensha seyitfolakala, itawufakwa ekugcineni kweluhlelo lweMhlangano Wemsebenti, ibhalwe kutsi “ingoma lensha.”
4 Indlela Yekufundza Letingoma Letinsha: Kungase kube lukhuni kufundza ingoma lensha. Kodvwa-ke, njengemhlabeli, asifuni ‘kubindza’ emihlanganweni, kodvwa sifuna kuhlabela ngawo onkhe emaphimbo etfu. (Hla. 30:12) Kute ufundze ingoma lensha, yenta naku lokulandzelako.
Wulalele kanyenti umculo wetinsimbi waleyo ngoma, njengobe utawube ufakwe ku-Web site. Kuwulalela kwakho kanyenti lomculo wetinsimbi, kutawukwenta kube melula kuyibamba.
Tadisha emagama alengoma, futsi wetame kuwabamba ngenhloko.
Yihlabele ngemagama lengoma uhambisana netinsimbi. Chubeka wenta kanjalo uze uyati kahle.
Tihlabeleni ekukhonteni kwemndeni letingoma, umndeni wakho uze utetayele.
5 Etinyangeni letitako, nangabe ingoma lensha kutawuphetfwa ngayo uMhlangano Wemsebenti, libandla litawucale lilalele tinsimbi tayo. Ngemuva kwaloko litawubese liyayihlabela lengoma lihambisana naletinsimbi, njengobe sihlale senta kuletinye tingoma.
6 Nawucabanga ngako, kuhlabela emihlanganweni yetfu kusiletsela injabulo letfolakala ngekuhlabela ndzawonye sidvumisa Jehova. Ngako-ke, kufanele ungasingeni umkhuba wekuphuma ngisho kungakadzingeki nakwetfulwa ingoma emihlanganweni yebuKhristu.
7 Kunalenye indlela lesingakhombisa ngayo kubonga ngetingoma tetfu letingcwele. Emihlanganweni yetfu lemincane nalemikhulu, kuba nemculo lodlalwako ngaphambi kwekucala kweluhlelo ngalunye. Kabili ngemnyaka, bazalwane nabodzadze labatinikele labavela emhlabeni wonkhe bacitsa timali tabo baye ePatterson eNew York, kute bayokwenta lomculo lomnandzi lesiwusebentisa ekukhonteni kwetfu. Ngako nasicelwa kutsi sihlale phansi kute silalele umculo lolungiselelwe, kufanele sente njalo. Kwenta kwetfu kanjalo kutawusisita kutsi silungise tinhlitiyo tetfu kuze titfole lemfundvo lesuke itawulandzela.—Ezra 7:10.
8 Lamuhla sitawephetsa imihlangano yetfu ngekuhlabela ingoma lensha letsi “The Kingdom Is in Place—Let It Come!” Lengoma leyahlatjelwa emhlanganweni wemnyaka losandza kwengca, yacanjwa kuze kuvetwe kutsi uMbuso waNkulunkulu sewuneminyaka lelikhulu wacala kubusa.
9 Asingabati kutsi letingoma letinsha ‘titintfo letinhle’ letivela kuJehova. (Mat. 12:35a) Asikwenteni umgomo wetfu kutifundza kanye nekutihlabela ngalokusuka enhlitiyweni letingoma, sinikete Nkulunkulu wetfu inkhatimulo neludvumo lolumfanele!—Hla. 147:1.