Fundza Kubamemeteli Lasebanelwati Lolunyenti

Bamemeteli lasebanelwati lolunyenti ebandleni baligugu kakhulu kitsi. Labanye kubo sebakhonte Jehova iminyaka leminyenti. Mhlawumbe labanye babo basandza kutfola emakhono lamasha emsebentini wekushumayela. Labamemeteli bayibonile indlela Jesu lacondzisa ngayo libandla lebuKhristu kulamalanga ekugcina ngekwandzisa umsebenti wekushumayela newekwenta bantfu babe bafundzi. (Mat. 28:19, 20) Ngekuba nesandla kulomsebenti wekushumayela, batfole “emandla lamakhulu kakhulu” nabahlangabetana netinkhatsato tekuphila kanye netilingo. (2 Khor. 4:7) Kunyenti lesingakufundza kulabamemeteli lasebanelwati lolunyenti kulomsebenti. Nabaniketwa litfuba, bayakujabulela kufundzisa labanye loko bona lasebakufundzile. (Hla. 71:18) Ngako-ke kufanele sitinike litfuba lekufundza kubo. Singakwenta njani loko?

Ensimini. Bamemeteli labasha nobe labanelwati loluncane emsebentini wekushumayela badzinga kuceceshwa kuze babe bafundzisi labaphumelelako. Singafundza lokunyenti nasibuka indlela bamemeteli labavutsiwe labawenta ngayo umsebenti wekushumayela. (Fundza sihloko lesiku-Sicongosekulindza saFebruary 15, 2015 lesitsi “Hlale Uwukhutsalele Umsebenti Wekushumayela” sigaba sesitsatfu ngephansi kwesihlokwana lesitsi “Sita Labo Labasandza Kuba Bamemeteli.”) Uzuze njani ngekusebenta nebantfu labanjalo ensimini?

Ungamcela yini ummemeteli losanesikhatsi lesidze kulomsebenti kutsi ahambe nawe ensimini? Nangabe lommemeteli abutsakatsaka, ungase uchubele sifundvo sakho seliBhayibheli emtini wakhe ngaletinye tikhatsi. Ngemuva kwesifundvo cela lommemeteli asho loko lakubonile longatfutfukisa kuko.

Citsa Sikhatsi Unabo: Nawucitsa sikhatsi sakho unabo utawubati kancono bamemeteli labanesikhatsi lesidze kulomsebenti. Mema munye wabo kutsi abe khona ekukhonteni kwemndeni bese nicoca naye. Nangabe lommemeteli abutsakatsaka emphilweni, angentiwa yini emalungiselelo ekutsi kukhonta kwemndeni kuchutjelwe kakhe? Mbute kutsi walitfola njani liciniso. Ngutiphi tibusiso latitfolile? Nguyiphi intfutfuko layibonile ebandleni? Ngutiphi tintfo latijabulele ekukhonteni Jehova?

Ungalindzeli lokungetulu kwaloko labangakhona kukusita kuko. Njengatsi sonkhe, bamemeteli lasebanesikhatsi lesidze nabo banemakhono lehlukehlukene emsebentini wekushumayela. (Rom. 12:6-8) Labanye kubo bakhulile ngeminyaka futsi loko kunganciphisa sikhatsi labangasicitsa natsi. Nobe kunjalo, singafundza lokunyenti kubo ngenca yesikhatsi sabo lesidze bakhonta Jehova ngekwetsembeka.