Indlela Yekufinyelela Tinhlitiyo Tebantfu Lesibafundzisako
1. Kufundzisa kwaJesu kwaba namuphi umphumela kulabo lebebamlalele?
1 Jesu Khristu wafinyelela tinhlitiyo tebantfu lebebamlalele. Ngalelinye lilanga, tinhlitiyo tebafundzi bakhe ‘tatsintseka’ ngemuva kwekubachazela kahle imiBhalo. (Luk. 24:32) Njengobe kulalela Nkulunkulu kufanele kusuke enhlitiyweni, singabasita njani labo lesibafundzisako kute bente lushintjo ekuphileni kwabo?—Rom. 6:17.
2. Libaluleke ngani likhono lekungacansuli kanye nekucondza ekufinyeleleni inhlitiyo yemuntfu?
2 Sebentisa Likhono Lekungacansuli Kanye Nekucondza: Bantfu labanyenti kumane ubatjele nje kutsi yini lekahle nobe lekabi ngeke kubente kutsi bashintje. Empeleni, kuhlasela tinkholelo tabo ngemibhalo leminyenti kungase kubente bangafuni kulalela. Kute sente umuntfu asilalele, kufanele sicale sicondze tizatfu taloko lakukholelwako nekutsi yini lementa ente ngendlela lenta ngayo. Imibuto lekhetfwe kahle lementa avete loko lakucabangako itamsita kutsi atfulule sifuba sakhe. (Taga 20:5) Nasesikwati lakucabangako singabese siyakhona kukhetsa imibhalo lengamfinyelela inhlitiyo. Ngako-ke, kufanele simnake futsi sibe nesineke. (Taga 25:15) Khumbula kutsi lizinga lebantfu lekutfutfuka alifani. Vumela umoya waJehova longcwele kutsi utsintse imicabango yabo ubasite nakuloko labakwentako.—Mak. 4:26-29.
3. Singabasita njani labo lesifundza nabo kutsi bavete buntfu lobuhle?
3 Basite Kutsi Bavete Buntfu Lobuhle: Imibhalo yeliBhayibheli lekhuluma ngebuhle baJehova kanye nelutsandvo lwakhe ingasita labo lesifundza nabo kutsi bavete buntfu lobuhle. Singasebentisa imibhalo lefana neTihlabelelo 139:1-4 nobe Lukha 12:6, 7 kute simkhombise indlela Nkulunkulu lasikhatsalela ngayo. Nangabe bantfu bakhombisa kubonga lokusuka enhlitiyweni ngemusa waJehova, lutsandvo lwabo kanye nekutinikela kuyacina. (Rom. 5:6-8; 1 Joh. 4:19) Ngisho nalapho batfola kutsi indlela labatiphatsa ngayo ayimjabulisi Jehova, bangase bakhutsateke kutsi bente ngendlela letamjabulisa futsi imdvumise.—Hla. 78:40, 41; Taga 23:15.
4. Singakhombisa njani kutsi siyayihlonipha inkhululeko yebantfu yekutikhetsela nasibafundzisa emsebentini wekushumayela?
4 Jehova akaphoceleli muntfu kutsi alalele imitsetfo yakhe. Kunaloko, usita bantfu kutsi bamlalele ngekutsi abakhombise tinzuzo tekumlalela. (Isa. 48:17, 18) Silingisa Jehova nasifundzisa ngendlela letawusita bantfu kutsi batitfolele loko lokufanele bakwente. Nangabe bantfu sebatibonela kutsi kufanele bente lushintjo ekuphileni kwabo, loko kungaba nemiphumela lemihle. (Rom. 12:2) Kuphindze kubente basondzele kakhulu kuJehova ‘lovivinya tinhlitiyo tebantfu.’—Taga 17:3.