Emalunga Lamabili ESigungu Lesibusako Lamasha
NGALESITSATFU, January 18, 2023, kwaba nesimemetelo ku jw.org, lesitsi uMzalwane Gage Fleegle neMzalwane Jeffrey Winder sebangemalunga lamasha eSigungu Lesibusako saBoFakazi BaJehova. Bobabili labazalwane sebakhonte Jehova ngekwetsembeka sikhatsi lesidze.
Gage Fleegle nemfati wakhe Nadia
UMzalwane Fleegle wakhulela enshonalanga yePennsylvania, eMelika futsi wakhuliswa batali bakhe labakhonta Jehova. Nakaseminyakeni yekutfomba, yena nemndeni wakubo batfutsela edolobheni lelincane lelisemakhaya lapho bekunesidzingo lesikhulu khona sebamemeteli. Ngekushesha ngemuva kwaloko, wabhajatiswa ngaNovember 20, 1988.
Batali beMzalwane Fleegle bebahlale bamkhutsata kutsi angenele umsebenti wasikhatsi sonkhe. Bebavame kumema babonisi betigodzi netisebenti taseBethel ekhaya labo. UMzalwane Fleegle bekabona kutsi labazalwane nabodzadze bebajabule mbamba. Kungakapheli sikhatsi lesidze abhajatisiwe, waba lihlahlandlela lelivamile ngaSeptember 1, 1989. Ngemuva kweminyaka lemibili, wafinyelela umgomo wakhe lebekatibekele wona nakaneminyaka lengu-12 wekuyosebenta eBethel. Wacala kusebenta eBethel leseBrooklyn nga-October 1991.
EBethel, uMzalwane Fleegle wasebenta lakuhlanganiswa khona tincwadzi iminyaka lengu-8, ngemuva kwaloko wasebenta eTikweni Lemsebenti. Kuleso sikhatsi, bekasebandleni lesiRussia futsi kwaphela iminyaka alapho. Nga-2006 washada naNadia, futsi naye wabese ucala kusebenta eBethel. Babe sebandleni lesiPutukezi, futsi kwaphela iminyaka lengetulu kwalengu-10 basebandleni leSpanish. Ngemuva kweminyaka leminyenti uMzalwane Fleegle aseKomidini Yemsebenti, wabese usebenta eHhovisini yeKomidi Yekufundzisa ngemuva kwaloko wasebenta eHhovisini yeKomidi Yemsebenti. NgaMarch 2022 waba ngumsiti eKomidini Yemsebenti YeSigungu Lesibusako.
Jeffrey Winder nemfati wakhe Angela
UMzalwane Winder wakhulela eMurrieta, eCalifornia, eMelika. Wakhuliswa batali labakhonta Jehova futsi wabhajatiswa ngaMarch 29, 1986. Enyangeni lelandzelako, waba lihlahlandlela lelisitako. Wakujabulela kakhulu loko kangangekutsi wafuna kuchubeka. Ngemuva kwetinyanga solo alihlahlandlela lelisitako, wacala kuba lihlahlandlela lelivamile nga-October 1, 1986.
Nakaseminyakeni yekutfomba, uMzalwane Winder wavakashela bobhuti bakhe labadzala lababili lebebasebenta eBethel ngaleso sikhatsi. Loko kwamenta wafuna kuyosebenta khona nasekamdzala. NgaMay 1990, wacelwa kutsi ayosebenta eBethel leseWallkill.
EBethel, uMzalwane Winder usebente ematikweni lehlukahlukene lafaka ekhatsi Litiko Lekuhlanta, Litiko Letekulima Nekunakekela Imfuyo kanye nase-Bethel Office. Washada na-Angela nga-1997, futsi solo basebenta eBethel kuze kube ngunyalo. Nga-2014, batfunyelwa eWarwick kuze uMzalwane Winder asite nakwakhiwa indlunkhulu. Nga-2016 batfutsela eWatchtower Educational Center ePatterson, futsi uMzalwane Winder wasebenta etikweni laka-Audio/Video Services. Ngemuva kweminyaka lemine, babuyela emuva eWarwick, futsi uMzalwane Winder wasebenta eHhovisini Lekomidi Yetisebenti. NgaMarch 2022 waba ngumsiti eKomidini Yetisebenti YeSigungu Lesibusako.
Sithantazela kutsi Jehova atibusise kakhulu ‘letipho letibantfu’ njengobe tichubeka tisebenta kamatima tenta umsebenti weMbuso.—Ef. 4:8.