Emalunga Lamasha Lamabili Esigungu Lesibusako
NGA-OCTOBER 5, 2024, kwentiwa simemetelo lesikhetsekile emhlanganweni wemnyaka: UMzalwane Jody Jedele neMzalwane Jacob Rumph babekwa kutsi babe ngemalunga eSigungu Lesibusako saBoFakazi BaJehova. Bobabili labazalwane sebakhonte Jehova ngekwetsembeka iminyaka leminyenti.
Jody Jedele nemkakhe Damaris
UMzalwane Jedele watalelwa eMissouri, eMelika futsi watalelwa ecinisweni. Umndeni wakubo bewuhlala ensimini lengasetjentwa njalo. Ngako wahlangana nebazalwane labanyenti bakulamanye emave lebebeta kutosita ngemsebenti wekushumayela kulendzawo. Lutsandvo lwabo kanye nebunye lebebanabo kwamtsintsa kakhulu. Wabhajatiswa nakasandza kungena eminyakeni yekutfomba nga-October 15, 1983. Bekawutsandza umsebenti wekushumayela, futsi nakacedza esikolweni, waba lihlahlandlela lelivamile ngaSeptember 989.
Ngesikhatsi uMzalwane Jedele asemncane, batali bakhe bebavakashisa yena nasisi wakhe eBethel. Loko kwenta kutsi labantfwana batibekele umgomo wekuyosebenta eBethel, lokwaba ngumgomo labagcine bawufinyelele. UMzalwane Jedele wefika eBethel yaseWallkill ngaSeptember 1990. Wacale wasebenta eTiko Letekuhlanta futsi ngekuhamba kwesikhatsi wasebenta Etikweni Lelibuke Tindzaba Tekwelapha.
Ngaso leso sikhatsi, emabandla ladvutane lakhuluma Spanish bekakhula futsi adzinga bazalwane. Ngako uMzalwane Jedele waya kulelinye lawo futsi wacala kufundza Spanish. Ngekushesha ngemuva kwaloko, wahlangana naDamaris, lebekalihlahlandlela kuleso sigodzi. Ekugcineni bashada futsi naye waya eBethel.
Nga-2005 bahamba eBethel kuze bayonakekela batali babo. Ngaleso sikhatsi, baba ngemahlahlandlela lavamile. UMzalwane Jedele bekasita ekufundziseni eSikolweni Semahlahlandlela, futsi bekaphindze asebente neKomidi Yekubonisana Netibhedlela neKomidi Yekwakhiwa KwemaHholwa EMbuso.
Nga-2013, uMzalwane naDzadze Jedele baphindze bacelwa kutsi babuye eBethel kuze bayosita emsebentini wekwakha eWarwick. Kusukela ngaleso sikhatsi, basebente nasePatterson naseWallkill. UMzalwane Jedele uphindze wasebenta ne-Local Design/Construction Department neliHhovisi Lelinakekela Tindzaba Tetibhedlela. NgaMarch 2023, wabekwa kutsi abe ngumsiti eKomidini Yemsebenti. Nakabuka emuva etabelweni latitfolile, utsi: “Nawutfola sabelo lesisha, ungativa wesaba. Kodvwa kulapho lakufanele ukhumbule khona kwetsembela kuJehova ngenca yekutsi nguye lobangela kutsi kube khona.”
Jacob Rumph nemkakhe Inga
UMzalwane Rumph watalelwa eCalifornia, eMelika. Nakasemncane, make wakhe waphelelwa ngumdlandla wekukhonta Nkulunkulu, kodvwa beketama kumfundzisa liciniso leliseBhayibhelini. Ngetulu kwaloko, njalo ngemnyaka bekavakashela gogo wakhe lebekanguFakazi lowetsembekile. Wamsita kutsi alitsandze liciniso, futsi ngesikhatsi aneminyaka lengu-13 wacela kufundzelwa liBhayibheli. Wabhajatiswa ngaSeptember 27, 1992, nakaseminyakeni yekutfomba. Lokuhle kutsi makwakhe waphindze wacala kukhonta Nkulunkulu ngemdlandla, futsi onkhe emalunga emndeni wakubo acala kutfutfuka futsi abhajatiswa.
Nakasemusha, uMzalwane Rumph wabona indlela emahlahlandlela lebekajabule ngayo. Ngako ngemuva kwekucedza sikolwa, waba lihlahlandlela ngaSeptember 1995. Nga-2000, watfutsela e-Ecuador lapho bekunesidzingo lesikhulu khona sebamemeteli. Nakalapho, wahlangana na-Inga, lebekalihlahlandlela eCanada, futsi bashada. Ngemuva kwekushada, bahlala edolobheni lase-Ecuador lebelinelicembu lelincane lebamemeteli. Lamuhla, kunelibandla lelivutsako kulendzawo.
Ngekuhamba kwesikhatsi, uMzalwane naDzadze Rumph baba ngemahlahlandlela lakhetsekile futsi babese benta umsebenti wekujikeleta. Nga-2011 bamenywa eklasini lesi-132 laseGileyadi. Ngemuva kwekuphotfula, babelwa emaveni lehlukahlukene benta nemisebenti leyehlukahlukene, njengekusebenta eBethel, kuba titfunywa telivangeli nemsebenti wekujikeleta. UMzalwane Rumph wafundzisa naseSikolweni Sebavangeli BeMbuso.
Ngenca ye-COVID-19, uMzalwane naDzadze Rumph babuyela eMelika. Basebenta eBethel yaseWallkill, lapho uMzalwane Rumph aceceshwa khona eTiko Letemsebenti. Ngekuhamba kwesikhatsi, batfunyelwa egatjeni lase-Ecuador, lapho khona uMzalwane Rumph aba lilunga leKomidi Yeligatja. Nga-2023 batfunyelwa eWarwick. NgaJanuary 2024, uMzalwane Rumph wabekwa kutsi abe ngumsiti eKomidini Yemsebenti. Nakacabanga ngetindzawo lasebente kuto, utsi: “Lokwenta sabelo sikhetseke, akusiyo lendzawo, kepha ngulabantfu losebenta nabo.”
Sibabonga kakhulu labazalwane labasebenta kamatima futsi ‘siyachubeka sibaphatsa ngenhlonipho bantfu labanjengabo.’—Fil. 2:29.