Yini Lesingayenta Kuze Siwujabulele Kakhudlwana Umsebenti Wekushumayela?

1. Labanye bativa njani ngekwenta umsebenti wekushumayela? (Buka nesitfombe.)

NJENGOBE sibantfu baJehova, sishumayela labanye ngenca yekutsi siyamtsandza Babe wetfu wasezulwini futsi sifuna kubasita kutsi bamati. Bamemeteli labanyenti bakujabulela mbamba kwenta umsebenti wekushumayela. Kodvwa labanye abayitfoli injabulo nabashumayela. Bentiwa yini? Labanye kungenteka banemahloni kakhulu futsi abatetsembi. Labanye abakhululeki ngekuya emakhaya ebantfu bangakamenywa. Labanye besaba kutsi kungenteka bangalalelwa. Labanye kungenteka bafundziswa kutsi bakugweme kucabana nebantfu. Nanobe bamtsandza kakhulu Jehova, labomnaketfu nabodzadze bakutfola kumatima kucoca nebantfu labangabati ngetindzaba letimnandzi. Nobe kunjalo, bayati kutsi lomsebenti ubalulekile futsi bahlale bawenta. Jehova ujabula kakhulu ngaloko!

2. Sisho ngani kutsi akukafaneli udvumateke nawuhle ungawujabuleli umsebenti wekushumayela?

² Uhle ungajabuli yini ngekwenta umsebenti wekushumayela ngenca yaletizatfu lesisandza kutibala? Nangabe kunjalo, ungadvumateki. Kungatetsembi kwakho kungahle kusho kutsi utfobekile futsi awufuni kunakwe wena kakhulu, kanye nekutsi awufuni kuphikisana nebantfu. Kute umuntfu lotsandza kutfukutselisa labanye, ikakhulukati nangabe etama kubentela lokuhle. Babe wakho wasezulwini utati kahle tinkinga lobhekene nato futsi ufuna kukusita. (Isa. 41:13) Kulesihloko, sitawucoca ngetintfo letisihlanu letingakusita nawubhekene naletimo nekutsi yini longayenta kuze uwujabulele umsebenti wekushumayela.

VUMELA LIVI LANKULUNKULU LIKUCINISE

3. Yini leyasita umphrofethi Jeremiya kutsi ashumayele labanye?

³ Kusukela kadzeni, umlayeto lovela kuNkulunkulu ucinise bantfu bakhe nakufanele bente umsebenti lomatima. Cabanga ngalokwenteka kumphrofethi Jeremiya. Bekesaba ngesikhatsi Jehova amniketa umsebenti wekushumayela. Jeremiya watsi: “Mine angikwati kukhuluma, ngisengumfanyana nje.” (Jer. 1:6) Yini leyamsita kutsi abe nesibindzi? Waciniswa liVi laNkulunkulu. Watsi: “Livi lakhe laba njengemlilo lovutsako lovalelwe ematsanjeni ami, futsi bengingasakhoni kulivalela ngekhatsi kimi.” (Jer. 20:8, 9) Nanobe Jeremiya bekashumayela bantfu labangalaleli, umlayeto lebekatfunywe kutsi awushumayele wamniketa emandla ekutsi ente lomsebenti lebekufanele awente.

4. Yini leyentekako nasifundza liVi laNkulunkulu futsi sicabangisisa ngalo? (KubaseKholose 1:9, 10)

⁴ EmaKhristu aciniswa ngumlayeto loseVini laNkulunkulu. Ngesikhatsi umphostoli Pawula abhalela libandla laseKholose, watsi kungenisa lwati lolungulonalona bekutawubenta ‘bahambe ngendlela lefanele embikwaJehova’ njengobe bachubeka batsela “titselo kuyo yonkhe imisebenti lemihle.” (Fundza KubaseKholose 1:9, 10.) Lemisebenti lemihle ifaka ekhatsi kushumayela tindzaba letimnandzi. Ngako nasifundza liVi laNkulunkulu futsi sicabangisisa ngalo, kukholwa kwetfu kuJehova kuyacina futsi kubaluleka kakhulu kitsi kucocela labanye umlayeto weMbuso.

5. Yini lesingayenta kuze sitfole lokunyenti nasifundza liBhayibheli futsi silidadisha?

⁵ Kuze sikhone kutfola lokunyenti eVini laNkulunkulu, kufanele sikugweme kugijima nasilifundza, nasilidadisha nalapho sicabangisisa ngalo. Tinike sikhatsi. Nangabe uhlangana nelivesi longalicondzi, ungaleci. Kunaloko, sebentisa i-Watch Tower Publications Index nobe Lithulusi Lekucwaninga LaBoFakazi BaJehova kuze utfole inchazelo yalo. Nangabe utinika sikhatsi nawudadisha utawetsemba kakhulu kutsi loko lokushiwo liVi laNkulunkulu kuliciniso. (1 Thes. 5:21) Nawuciniseka mbamba kutsi loko lokushiwo liBhayibheli kuliciniso, utakujabulela kakhulu kucocela labanye loko lokufundzile.

WULUNGISELELE KAHLE UMSEBENTI WEKUSHUMAYELA

6. Kubaluleke ngani kutsi siwulungiselele kahle umsebenti wekushumayela?

⁶ Nangabe uwulungiselela kahle umsebenti wekushumayela, utawukhululeka nawucoca nalabanye. Ngaphambi kwekutsi Jesu atfume bafundzi bakhe kutsi bayowenta umsebenti wekushumayela, wabasita kutsi bawulungele. (Luk. 10:1-11) Ngenca yekutsi labafundzi bakhe bakwenta loko Jesu labafundzisa kona, bajabula kakhulu ngenca yaloko labakufeza.​—Luk. 10:17.

7. Yini lesingayenta kuze silungele umsebenti wekushumayela? (Buka nesitfombe.)

⁷ Yini lesingayenta kuze silungele umsebenti wekushumayela? Kufanele sicabange kutsi loko lesifuna kukusho singakusho njani ngendlela lesivame kukhuluma ngayo nangemavi etfu. Kuyasita nekucabanga kutsi yini bantfu labangahle bayente nobe bayisho, nekutsi yini tsine lesitayisho. Ngemuva kwaloko nasesikhuluma nabo, kufanele setame kwehlisa umoya, simoyitele futsi sibe nebungani.

8. EmaKhristu afana njani netitja telubumba umphostoli Pawula lakhuluma ngato?

⁸ Umphostoli Pawula watjela bazalwane bakhe watsi: “Sinalomcebo etitjeni telubumba.” (2 Khor. 4:7) Uyini lomcebo? Ngumsebenti losindzisa kuphila wekushumayela umlayeto weMbuso. (2 Khor. 4:1) Tiyini letitja telubumba? Timelela tinceku taNkulunkulu leticocela labanye tindzaba letimnandzi. Ngesikhatsi saPawula, labo labatsengisako bebasebentisa titja telubumba kuze betfwale ngato tintfo tabo letiligugu letinjengekudla, liwayini nemali. Ngendlela lefanako, Jehova usinikete umsebenti lobalulekile wekushumayela tindzaba letimnandzi. Ngekusitwa nguye, singakhona kuba nemandla lesiwadzingako ekushumayela lomlayeto ngekwetsembeka.

THANTAZELA SIBINDZI

9. Yini lesingayenta kuze sincobe kwesaba bantfu nobe kunganakwa? (Buka nesitfombe.)

⁹ Ngaletinye tikhatsi kungenteka sesabe bantfu nobe sesabe kunganakwa. Singayincoba njani lenkinga? Cabanga ngaloko baphostoli labakuthantazela ngesikhatsi batjelwa kutsi bangashumayeli. Kunekutsi besabe, bacela Jehova kutsi abasite ‘bachubeke bakhuluma livi lakhe ngesibindzi.’ Jehova wawuphendvula ngekushesha umthantazo wabo. (Imis. 4:18, 29, 31) Nangabe natsi sihle sesaba bantfu, kufanele sithantaze sicele Jehova asisite. Mcele akusite kutsi ubatsandze kakhulu bantfu kuze ungabesabi.

10. Jehova usisita njani kutsi sifakaze ngaye? (Isaya 43:10-12)

¹⁰ Jehova usikhetsile kutsi sibe boFakazi bakhe futsi wetsembisa kusisita sibe nesibindzi. (Fundza Isaya 43:10-12.) Naka nati tindlela letine latisebentisako kuze asisite. Kwekucala, Jesu uhlale anatsi nasishumayela tindzaba letimnandzi. (Mat. 28:18-20) Kwesibili, Jehova utfume tingilosi kutsi tisisite. (Semb. 14:6) Kwesitsatfu, Jehova usiphe umoya wakhe longcwele kuze usikhumbute loko lesikufundzile. (Joh. 14:25, 26) Kwesine, Jehova usiphe bazalwane nabodzadze kuze siwente kanye nabo lomsebenti. Ngekusitwa nguJehova nangekusekelwa bazalwane betfu nabodzadze, sinako konkhe lesikudzingako kuze siphumelele.

VUMELANA NETIMO FUTSI UBE NEMBONO LOFANELE

11. Yini longayenta kuze utfole bantfu labanyenti nawushumayela? (Buka nesitfombe.)

¹¹ Uyadvumateka yini nawutfola bantfu labambalwa emakhaya? Tibute: ‘Bantfu basendzaweni lengishumayela kuyo bakuphi nyalo?’ (Imis. 16:13) ‘Basemsebentini yini nobe basetitolo?’ Nangabe kunjalo, ungatfola bantfu labanyenti yini ngekushumayela etitaladini? Lomunye umzalwane lokutsiwa nguJoshua utsi: “Ngitfole bantfu labanyenti nangishumayela etindzaweni letinetitolo letinyenti nalapho kupaka khona timoto.” Yena nemkakhe Bridget, baphindze batfole bantfu labanyenti nababavakashela emakhaya abo ntsambama nangemasontfo ntsambama.​—Ef. 5:15, 16.

12. Singakutfola njani loko bantfu labakukholelwako nobe loko lokubakhatsatako?

¹² Nangabe bantfu bangenandzaba nemlayeto wetfu, yetama kutfola kutsi yini labayikholelwako nobe kutsi yini lebakhatsatako. Joshua naBridget basebentisa umbuto losekhasini lekucala lelipheshana nabacalisa incociswano. Sibonelo nje, nabasebentisa lipheshana lelitsi Ngumuphi Umbono Lonawo NgeliBhayibheli? batsi: “Labanye bantfu batsi liBhayibheli livela kuNkulunkulu kantsi labanye abakukholelwa loko. Wena ucabangani?” Loku kuvame kwenta kutsi bacoce naloyo muntfu.

13. Yini lesenta sitsi siyaphumelela emsebenti wekushumayela ngisho bantfu bangasilaleli? (Taga 27:11)

¹³ Kuphumelela kwetfu emsebentini wekushumayela akuyi ngemiphumela lesiyitfolako. Ngasiphi sizatfu? Ngenca yekutsi sente loko Jehova neNdvodzana yakhe labafuna kutsi sikwente, lokukuniketa bufakazi. (Imis. 10:42) Ngisho nobe singamtfoli umuntfu lesingacoca naye nobe umlayeto wetfu ungemukelwa, siyajabula ngobe siyati kutsi sijabulisa Babe wetfu wasezulwini.​—Fundza Taga 27:11.

14. Yini lesenta sijabule nangabe ummemeteli atfola umuntfu lokutsandzako kufundza endzaweni lesishumayela kuyo?

¹⁴ Siphindze sijabule nangabe ummemeteli atfola umuntfu lokutsandzako kufundza endzaweni lesishumayela kuyo. Sicongosekulindza safananisa umsebenti wetfu nekufuna umntfwana lolahlekile. Baba banyenti bantfu labamfunako, basuke kulenye indzawo baye kulenye. Lomntfwana nakatfolakala, akujabuli nje kuphela lona lomtfolile kodvwa bonkhe bayajabula. Ngendlela lefanako, kuyabanjiswana kulomsebenti wekwenta bafundzi. Sonkhe siyadzingeka kuze sishumayele bonkhe bantfu labasendzaweni lesishumayela kuyo futsi sonkhe siyajabula nangabe lotsite acala kuta emihlanganweni.

NAKA KAKHULU INDLELA LOMTSANDZA NGAYO JEHOVA NABOMAKHELWANE BAKHO

15. Umbhalo waMatewu 22:37-39 ungasisita njani kuze siwujabulele kakhudlwana umsebenti wekushumayela? (Buka nesitfombe lekucala.)

¹⁵ Singawujabulela kakhulu umsebenti wekushumayela nasinaka kakhulu indlela lesimtsandza ngayo Jehova nabomakhelwane betfu. (Fundza Matewu 22:37-39.) Cabanga nje kutsi Jehova ujabula kangakanani nakasibona senta lomsebenti nekutsi bantfu batawujabula kangakanani nabacala kudadisha liBhayibheli! Khumbula nekutsi labo labakhetsa kulalela umlayeto wetfu futsi bancume kukhonta Jehova bangaphila phakadze.​—Joh. 6:40; 1 Thim. 4:16.

16. Yini lesingayenta kuze siwujabulele umsebenti wetfu wekushumayela nangabe sivaleleke ekhaya? Niketa tibonelo.

¹⁶ Uvaleleke ekhaya yini ngenca yetizatfu letitsite? Nangabe kunjalo, naka loko longakhona kukwenta kuze ukhombise kutsi uyamtsandza Jehova nabomakhelwane bakho. Ngesikhatsi se-COVID-19, Samuel naDania bavaleleka ekhaya labo. Kuleso sikhatsi lesimatima, bebavame kushumayela ngelucingo, babhala tincwadzi futsi badadisha liBhayibheli nebantfu basentisa Zoom. Samuel bekashumayela labo bekahlangana nabo esibhedlela lapho bekalashelwa khona mdlavuza. Utsi: “Nasibhekene netinkinga singativa sesaba, sidziniwe futsi nekukholwa kwetfu kungavivinywa. Kodvwa kufanele sitfole injabulo ekukhonteni Jehova.” Kuleso sikhatsi, Dania wawa futsi wahlala embhedzeni tinyanga letintsatfu. Ngemuva kwaloko, wasebentisa i-wheelchair tinyanga letisitfupha. Utsi: “Ngenta konkhe lebengingakwenta kulesimo lebengikuso. Ngakhona kushumayela lomunye nesi lebekangivakashele, futsi bengicoca nalabo bebasiletsela tintfo ekhaya. Ngaphindze ngacoca kahle nalomunye sisi elucingweni lebekasebentela lenye inkapani letsengisa tintfo tasesibhedlela.” Nanobe Samuel naDania bebangasakhoni kwenta loko lebebakwenta ngaphambili, benta konkhe labangakwenta futsi loko kwabenta bajabula.

17. Yini longayenta kuze kukusite kakhulu loku lesicoce ngako kulesihloko?

¹⁷ Loku lesicoce ngako kulesihloko kusebenta kahle nangabe kusetjentiswa kanye kanye. Intfo ngayinye lesicoce ngayo kulesihloko injengesinongo lesenta kudla kube mnandzi. Nangabe tonkhe tinongo tifakiwe ekudleni, lokudla kuba mnandzi kakhulu. Nasikusebentisa konkhe loku lesicoce ngako kulesihloko, sitakuncoba kungayitfoli injabulo nasishumayela futsi sitawujabulela kakhulu lomsebenti.