“Kusondzela KuNkulunkulu” Kuyasisita!

1-2. (a) Yini lokufanele uyente kuze wakhe bungani nemuntfu lotsite? (b) Sitawucoca ngani kulesihloko?

UNAYE yini umngani lomkhulu? Nabakha njani bungani benu? Mhlawumbe nacitsa sikhatsi ndzawonye, wakutjela loko lokwenteke ekuphileni kwakhe, futsi watati tintfo latitsandzako nalatenyanyako. Watfola kutsi unebuntfu lobuhle longatsandza kubulingisa. Wabese uyamtsandza lomngani wakho.

² Kufanele ucitse sikhatsi nalotsite kuze wakhe bungani naye futsi kudzingeka ufake emandla. Kudzingeka wente lokufanako kuze usondzelane naJehova Nkulunkulu. Kulesihloko, sitawucoca ngekutsi singasondzela njani kuNkulunkulu wetfu nangekutsi kutasisita ngani kwenta kanjalo. Asesicale ngekucoca ngekutsi kuhle ngani kusondzela kuMngani wetfu lomkhulu Jehova.

3. Kubaluleke ngani kucabangisisa ngekutsi kusisita ngani kusondzela kuJehova? Fanekisa.

³ Siyaciniseka kutsi uyavuma kutsi kusondzela kuJehova kuhle. Kodvwa kucabangisisa ngekutsi kuhle kanganani kungasikhutsa kutsi sichubeke sisondzela kuye. (Hla. 63:6-8) Sibonelo nje, siyati kutsi kudla kudla lokunemaseko lamatsatfu, kushukumisa umtimba, kulala ngalokwanele nekunatsa emanti ngalokwanele kuyawujabulisa umtimba. Nanobe kunjalo, bantfu labanyenti abanendzaba naloku futsi abayinaki imphilo yabo. Kodvwa nasicabanga ngekutsi kusisita ngani kwenta letintfo, manyenti ematfuba ekutsi sichubeke sitenta. Ngendlela lefanako, kungenteka sesiyati kutsi kusondzela kuJehova kuyasisita, kodvwa kucabangisisa ngekutsi kusisita ngani kwenta loko, kungasikhutsata kutsi sichubeke sisondzela kakhulu kuMngani wetfu.​—Hla. 119:27-30.

4. Umhlabeleli bekativa njani njengobe kuvetiwe kuTihlabelelo 73:28?

⁴ Fundza Tihlabelelo 73:28. Umbhali weTihlabelelo 73 bekangumLevi lonikwe umsebenti wekuhlabela ethempelini laJehova. Kungenteka besekuphele iminyaka leminyenti akhonta Jehova ngekwetsembeka. Nanobe kunjalo, abesolo eva shengatsi kunesidzingo sekutikhumbuta yena kanye nalabanye kutsi “kusondzela kuNkulunkulu” bekumsita futsi kubasita nabo. Kusita ngani kusondzela kuNkulunkulu?

“KUSONDZELA KUNKULUNKULU” KWENTA SIJABULE

5. (a) Yini leyenta kusondzela kakhulu kuJehova kusijabulise? (b) Kuhlakanipha kwaJehova kungakusita njani futsi kukuvikele njani? (Taga 2:6-16)

⁵ Njengobe sichubeka sisondzela kakhulu kuJehova sitawujabula kakhulu. (Hla. 65:4) Tinyenti tizatfu letenta sijabule. Lesinye sato kutsi kuyasisita kusebentisa kuhlakanipha lokutfolakala eVini lakhe liBhayibheli. Lokuhlakanipha kuyasivikela etintfweni letingasilimata kanye nasekwenteni emaphutsa lamakhulu. (Fundza Taga 2:6-16.) Kungako liBhayibheli litsi: “Uyajabula umuntfu lotfola kuhlakanipha, uyajabula nemuntfu lotfola kucondza.”​—Taga 3:13.

6. Yini leyenta umhlabeleli waphelelwa yinjabulo?

⁶ Kuliciniso kutsi ngisho nebangani baJehova bahle beva buhlungu. Umbhali weTihlabelelo 73 waphelelwa yinjabulo ngesikhatsi acabanga ngetintfo letimdvumatako. Wacansuka futsi waba nemona ngesikhatsi acabanga kutsi bekubahambela kahle bantfu lababi lebebangenandzaba naNkulunkulu nobe timiso takhe. Wacabanga kutsi bantfu labanebudlova nalabatigabatisako bebahlale banjingile, baphilile emtimbeni futsi bangahlupheki. (Hla. 73:3-7, 12) Lomhlabeleli wakhatsateka kakhulu kangangekutsi ngalesinye sikhatsi watibuta kutsi bekadlale ngemandla akhe yini ngekukhonta Jehova. Asebuhlungwini watsi: “Kuyacaca kutsi akukangisiti ngalutfo kugcina inhlitiyo yami imsulwa, nekugeza tandla tami kuze ngikhombise kutsi ngimsulwa.”​—Hla. 73:13.

7. Yini lesingayenta nasiva buhlungu? (Buka sitfombe lesisekhasini lekucala.)

⁷ Nanobe lomhlabeleli bekeva buhlungu kakhulu, kodvwa akazange avume kutsi bumncobe. ‘Wangena endzaweni lengcwele yaNkulunkulu,’ lapho Jehova alungisa khona indlela lebekacabanga ngayo. (Hla. 73:17-19) Nasiva buhlungu, Jehova longuMngani wetfu lomkhulu usuke abona. Nasithantaza kuye kuze asicondzise futsi semukela lusito lasinika lona ngeliVi lakhe nangelibandla, sitawuba nemandla ekubeketelela buhlungu. Ngisho nobe sikhatsateke kakhulu, Jehova utasidvudvuta futsi asente sitive sincono.​—Hla. 94:19.a

“KUSONDZELA KUNKULUNKULU” KUSENTA SATI KUTSI SIPHILELANI FUTSI KUSINIKA LITSEMBA

8. Kusondzela kuNkulunkulu kusisita ngatiphi letinye tindlela letibalulekile?

⁸ Kusondzela kuNkulunkulu kuphindze kusisite nangaletinye tindlela letimbili. Kwekucala, kusenta sati kutsi siphilelani. Kwesibili, kusenta sibe nelitsemba lelicinile ngelikusasa. (Jer. 29:11) Asesicoce kabanti ngaloku.

9. Kusondzela kuJehova kusisita njani sati kutsi siphilelani?

⁹ Kusondzela kuJehova kusenta sati kutsi siphilelani. Bantfu labanyenti lamuhla labaphikako kutsi Nkulunkulu ukhona abati kutsi siphilelani futsi bacabanga kutsi kutawugcine kute bantfu emhlabeni. Kodvwa kudadisha liVi laNkulunkulu kusisite saciniseka kutsi Nkulunkulu “ukhona nekutsi ubanika umvuzo labo labamfuna ngekutimisela.” (Heb. 11:6) Ngisho nalamuhla kuphila kwetfu kuyajabulisa ngobe senta loko lesadalelwa kutsi sikwente, lokukukhonta Babe wetfu wasezulwini Jehova.​—Dut. 10:12, 13.

10. Ngekusho kweTihlabelelo 37:29, yini Jehova layetsembisa labo labetsembele kuye?

¹⁰ Bantfu labanyenti bete litsemba ngelikusasa​—bati kutsi kufanele basebente, bashade, babe nebantfwana futsi babekele eceleni lokutsite lokutabasita nasebatsetse umhlalaphansi. Abacabangi ngaNkulunkulu. Ngakulokunye, bantfu labakhonta Jehova babeka litsemba labo kuye. (Hla. 25:3-5; 1 Thim. 6:17) Siyametsemba loNkulunkulu lesisondzelene naye futsi siyakwetsemba loko lasetsembise kona. Litsemba letfu lifaka ekhatsi kumkhonta kuze kube phakadze ePharadisi.​—Fundza Tihlabelelo 37:29.

11. Kusondzela kuNkulunkulu kusisita njani, futsi yena utiva njani?

¹¹ Kusondzela kuNkulunkulu kusisita nangaletinye tindlela letinyenti. Sibonelo nje, Jehova wetsembisa kucolela tono talabo labaphendvukako labasondzele kuye. (Isa. 1:18) Ngenca yaloko, akudzingeki sihlale sitiva sinelicala ngenca yetono lesatenta esikhatsini lesendlulile. (Hla. 32:1-5) Ngetulu kwaloko, siyajabula ngenca yekutsi sijabulisa Jehova. (Taga 23:15) Ungacabanga nangaletinye tindlela lokusisita ngato kusondzela kuNkulunkulu. Kodvwa yini longayenta kuze uchubeke usondzela kakhulu kuNkulunkulu?

YINI LOKUFANELE UCHUBEKE UYENTA KUZE ‘USONDZELANE NANKULUNKULU’?

12. Yini loyentile kuze usondzele kakhulu kuNkulunkulu?

¹² Nangabe ungumKhristu lobhajatisiwe, sewente lokunyenti kuze usondzele kuJehova. Ufundze emaciniso lamanyenti ngaJehova Nkulunkulu nangaJesu Khristu, waphendvuka etonweni lotente esikhatsini lesendlulile, waba nekukholwa lokucinile kuNkulunkulu futsi watimisela kwenta intsandvo yakhe. Nanobe kunjalo, kuze sisondzele kakhulu kuNkulunkulu, kufanele sichubeke sitenta letintfo.​—Khol. 2:6.

13. Ngutiphi tintfo letintsatfu lesingatenta kuze sichubeke sisondzela kakhulu kuJehova?

¹³ Yini letasisita kutsi sichubeke sisondzela kakhulu kuNkulunkulu? (1) Kufanele sichubeke sifundza liBhayibheli futsi silidadisha. Nasisenta loko, umgomo wetfu akukafaneli nje kube kufundza kuphela emaciniso lasisekelo lamayelana naNkulunkulu. Kunaloko, kufanele setame kutfola loko lokuyintsandvo yaNkulunkulu ngatsi futsi sicondziswe timiso lasibekele tona eVini lakhe. (Ef. 5:15-17) (2) Kufanele sicinise kukholwa kwetfu ngekutsi sicabangisise ngebufakazi lobunyenti bekutsi uyasitsandza. (3) Kufanele sichubeke sitenyanya tintfo letimphatsa kabi Jehova, futsi sikugweme kuba bangani bebantfu labatentako.​—Hla. 1:1; 101:3.

14. Ngekuvumelana nalokushiwo ngu-1 KubaseKhorinte 10:31, ngutiphi letinye tintfo lesingatenta malanga onkhe kuze sijabulise Jehova? (Buka netitfombe.)

¹⁴ Fundza 1 KubaseKhorinte 10:31. Kubaluleke kakhulu kutsi sichubeke senta tintfo letijabulisa Jehova. Loko kusho kwenta lokungetulu nje kwekushumayela nekuya emihlanganweni yelibandla. Tintfo letikahle letijabulisa Jehova tifaka ekhatsi loko lesikwenta malanga onkhe. Sibonelo nje, senta Jehova ajabule nangabe setsembekile kuto tonkhe tintfo futsi sihlephulelana loko lesinako. (2 Khor. 8:21; 9:7) Ufuna nekutsi sikhombise kutsi sisitsatsa njengalesibaluleke kakhulu sipho sekuphila. Sisondzela kakhulu kuMuphi wekuphila nangabe sinaka kutsi sidla kangakanani futsi sinatsa kangakanani nangekwenta letinye tintfo letitasigcina siphilile. Konkhe lesikwentako kuze sijabulise Jehova, ngisho nobe kubonakala kukuncane kangakanani, kutamenta asitsandze kakhulu.​—Luk. 16:10.

15. Jehova ulindzele kutsi sibaphatse njani labanye?

¹⁵ Jehova unemusa kulabalungile nakulabangakalungi. (Mat. 5:45) Ulindzele kutsi natsi sente lokufanako. Sibonelo nje, kufanele ‘singakhulumi kabi nganobe ngubani, singatsandzi kulwa, sikhombise kuba nemoya lophansi kubo bonkhe bantfu.’ (Thit. 3:2) Sinaloko engcondvweni, asibabukeli phansi labanye ngenca nje yekutsi abasibo boFakazi. (2 Thim. 2:23-25) Sisondzela kakhulu kuJehova ngekutsi sihlale sibaphatsa ngemusa bonkhe bantfu futsi sibacabangele.

‘SINGASONDZELA KUNKULUNKULU’ NGISHO NOBE SENTA EMAPHUTSA

16. Umbhali weTihlabelelo 73 wacala kutiva njani ngemuva kwesikhatsi?

¹⁶ Kutsiwani nangabe sewucala kuva shengatsi alukufaneli lutsandvo lwaJehova? Njengobe kuke kwavetwa, kwenteka intfo lefanako nakumbhali weTihlabelelo 73. Walila watsi: “Tinyawo tami tacishe taphambuka; kwasala kancane kutsi tishelele.” (Hla. 73:2) Wavuma kutsi bekeva “buhlungu,” ‘angenangcondvo’ futsi ‘afana nesilwane lesingacabangi’ embikwaJehova. (Hla. 73:21, 22) Weva shengatsi Jehova bekangasamtsandzi yini futsi angeke amcolele ngenca yeliphutsa lalenta?

17. (a) Kubonakala shengatsi yini umhlabeleli layenta ngesikhatsi advumatekile? (b) Yini lesingayifundza kuloko lokwenteka kuye? (Buka netitfombe.)

¹⁷ Nangabe umhlabeleli weva shengatsi Jehova umshiyile, kungenteka wativa kanjalo kwesikhashana. Ngesikhatsi advumatekile, kubonakala ngatsi lomhlabeleli wasibona sidzingo sekusondzela kuNkulunkulu njengobe kuvetiwe kulamavi akhe latsi: “Kodvwa nyalo sengihlale nginawe [Jehova]; wena ubambe sandla sami sangesekudla. Uyangicondzisa ngeseluleko sakho, futsi ekugcineni utangentela umusa.” (Hla. 73:23, 24) Natsi kufanele sicele Jehova asicinise nasiphelelwa ngemandla nobe nasidvumatekile. (Hla. 73:26; 94:18) Ngisho nobe tinyawo tetfu tingaphambuka kwesikhashana, singabuyela kuJehova sibe siciniseka kutsi ‘uhlale akulungele kutsetselela.’ (Hla. 86:5) Nasidvumatekile kulapho-ke lakufanele sisondzele kakhulu khona kuNkulunkulu wetfu.​—Hla. 103:13, 14.

“KUSONDZELA KUNKULUNKULU” KUZE KUBE PHAKADZE

18. Sisho ngani kutsi singachubeka sisondzela kuJehova kuze kube phakadze?

¹⁸ Angeke kuze kushiwo kutsi sewusondzele kakhulu kuJehova futsi sewati konkhe ngaye. LiBhayibheli litsi “ngeke size siticondze” tindlela taJehova, kuhlakanipha kwakhe kanye nelwati lwakhe.​—Rom. 11:33.

19. Tisicinisekisa ngani leTihlabelelo?

¹⁹ Tihlabelelo 79:13 titsi: “Tsine bantfu bakho lesitimvu telidlelo lakho, sitakubonga kuze kube phakadze; futsi ludvumo lwakho sitalumemetela kuto tonkhe titukulwane.” Njengobe uchubeka usondzela kuNkulunkulu, nawe ungaciniseka kutsi utawutfola tibusiso kuze kube phakadze, futsi ngesibindzi utsi: “Nkulunkulu . . . ulidvwala lami nesabelo sami kuze kube phakadze.”​—Hla. 73:26.