Kubaluleke Ngani Kufuna Seluleko?

1. Yini lesingayenta kuze sente tincumo letihlakaniphile futsi kuphumelele loko lesikuhlelile? (Taga 13:10; 15:22)

SONKHE sifuna kwenta tincumo letihlakaniphile futsi sonkhe sifuna kuphumelela kuloko lesikuhlelile. LiVi laNkulunkulu liyasitjela kutsi singakwenta njani loko.​—Fundza Taga 13:10; 15:22.

2. Yini Jehova letsembisa kusentela yona?

² UMuntfu lokahle kakhulu lesingaya kuye kuze sitfole kuhlakanipha neseluleko nguBabe wetfu Jehova. Wetsembisa kusisita, utsi: “Ngitakweluleka, liso lami lingesuki kuwe.” (Hla. 32:8) Lamavi ayakhombisa kutsi Jehova wenta lokungetulu nje kwekusinika seluleko, unendzaba nemuntfu ngamunye futsi uyasisita kuze sisebentise seluleko sakhe.

3. Sitawucoca ngani kulesihloko?

³ Kulesihloko, sitawusebentisa liVi laNkulunkulu kuze siphendvule nayi imibuto lemine: (1) Ngubuphi buntfu lokufanele ngibe nabo nangifuna singisite seluleko lesikahle? (2) Ngubani longanginika seluleko lesikahle? (3) Yini lengingayenta kuze ngibe nengcondvo levulekile nangifuna seluleko? (4) Kubaluleke ngani kutsi ngigweme kucela labanye kutsi bangentele tincumo?

NGUBUPHI BUNTFU LOKUFANELE NGIBE NABO?

4. Ngubuphi buntfu lokufanele sibe nabo kuze sisitakale nasitfola seluleko lesikahle?

⁴ Kufanele sitfobeke kuze sisitakale nasitfola seluleko lesikahle. Kufanele sivume kutsi kungenteka site lwati lolunganani kuze sikhone kutentela sincumo lesihlakaniphile. Nangabe singakatfobeki, Jehova angeke akhone kusisita. Ngenca yaloko, nobe ngusiphi seluleko lesisitfolako nasifundza liVi laNkulunkulu kutawuba ngatsi kutselwa emanti emhlane welidada. (Mik. 6:8; 1 Phet. 5:5) Kodvwa nasitfobekile, sitawushesha kusilalela seluleko lesisekelwe eBhayibhelini lesisivako futsi sisitakale kuso.

5. Ngutiphi tintfo letafezwa yiNkhosi Davide lebetingenta kutsi itigcabhe?

⁵ Cabanga ngaloko lesingakufundza esibonelweni seNkhosi Davide. Tintfo letafezwa ngulenkhosi betingayenta itigcabhe. Kusasele iminyaka leminyenti ngaphambi kwekutsi abe yinkhosi, Davide bekadvume ngelikhono lakhe lekudlala umculo. Waze wacelwa yinkhosi kutsi ayidlalele umculo. (1 Sam. 16:18, 19) Ngemuva kwekutsi Davide agcotjwe nguJehova kutsi abe yinkhosi lelandzelako, wamniketa umoya wakhe longcwele. (1 Sam. 16:11-13) Bekadvumile ka-Israyeli ngenca yekutsi bekancobe titsa tawo, lokufaka ekhatsi sidlakela lesingumFilisti lokunguGoliyathi. (1 Sam. 17:37, 50; 18:7) Indvodza letigcabhako nalephumelele ngalendlela beyingatitjela kutsi ayikudzingi kulalela seluleko salabanye. Kodvwa Davide bekangasinjalo.

6. Sati njani kutsi Davide bekasemukela seluleko? (Buka nesitfombe lesisekhasini lekucala.)

⁶ Ngemuva kwekutsi Davide abe yinkhosi, wachubeka atihlanganisa nemadvodza lebekameluleka. (1 Khr. 27:32-34) Loko akumangalisi ngobe Davide bekanemlandvo lomuhle wekulalela seluleko lesikahle. Bekangagcini nje ngekulalela seluleko lasinikwa ngemadvodza, wasilalela neseluleko sa-Abigayili. Abigayili bekangumfati walenye indvodza lengahloniphi, lengabongi futsi letigcabhako lokutsiwa nguNabali. Ngekutfobeka Davide wasilalela seluleko sakhe lesihle, loko kwamsita wagwema kwenta liphutsa lelibuhlungu.​—1 Sam. 25:2, 3, 21-25, 32-34.

7. Yini lesingayifundza esibonelweni saDavide? (Umshumayeli 4:13) (Buka netitfombe.)

⁷ Kukhona lesingakufundza kuDavide. Sibonelo nje, kungenteka sinelikhono lelitsite nobe ligunya lelitsite. Nobe kunjalo, akukafaneli sititjele kutsi sati konkhe futsi asisidzingi seluleko. NjengaDavide, kufanele sihlale sikulungele kulalela seluleko lesikahle, ngisho nobe sisinikwa ngubani. (Fundza Umshumayeli 4:13.) Nasenta njalo, sitawugwema kwenta emaphutsa lamakhulu langavisa tsine buhlungu kanye nalabanye.

NGUBANI LONGANGINIKA SELULEKO LESIKAHLE?

8. Yini leyenta Jonathani wakhona kweluleka Davide?

⁸ Cabanga ngalesinye sifundvo lesingasifundza kuDavide. Wasilalela seluleko lasitfola kubantfu lebebanebuhlobo lobuhle naJehova futsi lebebayicondza kahle inkinga lebekabhekene nayo. Sibonelo nje, ngesikhatsi afuna kwati kutsi angakhona yini kulungisa budlelwane bakhe neNkhosi Sawula, Davide walalela seluleko saJonathani, loyindvodzana yaSawula. Yini leyenta Jonathani wakhona kumnika seluleko lesikahle? Kungenca yekutsi Jonathani bekanebuhlobo lobuhle naJehova futsi amati kahle Sawula. (1 Sam. 20:9-13) Singasisebentisa njani lesifundvo?

9. Ngubani lokufanele siye kuye nasifuna seluleko? Chaza. (Taga 13:20)

⁹ Nasidzinga seluleko, senta kahle ngekuya kumuntfu lonebuhlobo lobuhle naJehova futsi loyatiko lendzaba lesidzinga lusito kuyo.a (Fundza Taga 13:20.) Ase sitsi umzalwane losemusha ufuna dzadze lokahle langashada naye. Ngubani longamnika seluleko lesikahle? Umngani wakhe longakashadi kungenteka abe lusito nangabe seluleko sakhe asisekela etimisweni teliBhayibheli. Kodvwa manyenti ematfuba ekutsi atfole seluleko lesicondzile nalesilusito nangabe aya kulabashadene labavutsiwe labamati kahle futsi lesekuphele iminyaka bajabulile emshadweni wabo.

10. Yini lesitawucoca ngayo nyalo?

¹⁰ Sesicocile ngebuntfu lokufanele sibe nabo nekutsi bobani labangasinika seluleko lesikahle. Nyalo ase sicoce ngekutsi kubaluleke ngani kutsi sibe nengcondvo levulekile nasifuna seluleko nekutsi kufanele yini sicele labanye kutsi basentele tincumo.

YINI LENGINGAYENTA KUZE NGIBE NENGCONDVO LEVULEKILE NANGIFUNA SELULEKO?

11-12. (a) Yini lesingahle siyente ngalesinye sikhatsi? (b) Yini iNkhosi Rehobhowamu leyayenta ngesikhatsi kufanele yente sincumo lesibalulekile?

¹¹ Ngalesinye sikhatsi kungabonakala ngatsi umuntfu ufuna seluleko kodvwa ecinisweni abe afuna kubona kutsi labanye banembono lofanako yini ngesincumo lasavele asentile. Umuntfu lonjalo ute ingcondvo levulekile. Kufanele akutsatse njengesecwayiso loko lokwenteka eNkhosini Rehobhowamu.

¹² Rehobhowamu waba yinkhosi lelandzelako ka-Israyeli ngemuva kweNkhosi Solomoni. Ngesikhatsi Rehobhowamu aba yinkhosi, lesive besinetintfo letinyenti letinhle, kodvwa labantfu bebeva ngatsi Solomoni bekabasebentisa kakhulu. Baya kuRehobhowamu futsi bamcela kutsi awunciphise lomsebenti. Wabacela kutsi bamnikete sikhatsi kuze acabangisise ngalendzaba. Ekucaleni wenta kahle ngobe wacela seluleko emadvodzeni lamadzala lebekasite Solomoni. (1 Khos. 12:2-7) Nobe kunjalo, akazange asitsatse seluleko sawo. Yini lokungenteka yamenta wangasitsatsi leseluleko? Kungenteka yini kutsi besekavele akuncumile loko latawukwenta futsi amane nje afuna umuntfu lotawuvumelana naye? Nangabe kunjalo, wakutfola loko kuleseluleko lasinikwa bangani bakhe labasebasha. (1 Khos. 12:8-14) Watjela labantfu loko labangani bakhe labameluleka kutsi akwente. Ngenca yaloko, kusukela lapho lesive sehlukana ekhatsi, futsi Rehobhowamu besekahlala anetinkinga.​—1 Khos. 12:16-19.

13. Singati njani kutsi sinengcondvo levulekile?

¹³ Yini lesingayifundza esibonelweni saRehobhowamu? Nasicela seluleko, kufanele sibe nengcondvo levulekile. Singati njani kutsi sinengcondvo levulekile? Singatibuta: ‘Ngicela seluleko yini bese angisasemukeli ngenca yekutsi asisiko loko lengifuna kukuva?’ Cabanga nganasi sibonelo.

14. Yini lokufanele siyikhumbule nasitfola seluleko? Fanekisa. (Buka nesitfombe.)

¹⁴ Ase sitsi umzalwane wetsenjiswa umsebenti loholela kahle. Ngaphambi kwekutsi awemukele, ucela seluleko kulomdzala welibandla. Lomzalwane uyasho kutsi lomsebenti utawenta abe khashane nemndeni wakhe sikhatsi lesidze. Lolomdzala welibandla ukhumbuta lomzalwane ngesimiso seliBhayibheli lesitsi intfo lebaluleke kakhulu lokufanele ayente kusita umndeni wakhe kutsi ube nebuhlobo lobuhle naJehova. (Ef. 6:4; 1 Thim. 5:8) Ase sitsi lomzalwane akasitsandzi leseluleko, futsi bese ubuta labanye bazalwane ngalendzaba aze atjelwe loko lafuna kukuva. Lomzalwane bekasifuna mbamba yini seluleko, nobe besekavele asentile sincumo futsi afuna lotsite longavumelana naye? Kufanele sikhumbule kutsi inhlitiyo yetfu iyakhohlisa. (Jer. 17:9) Ngalesinye sikhatsi, seluleko lesisidzinga kakhulu nguleso lesingafuni kusiva.

KUFANELE YINI NGICELE LABANYE BANGENTELE TINCUMO?

15. Yini lokufanele sicaphele kutsi singayenti, futsi ngasiphi sizatfu?

¹⁵ Ngamunye wetfu kufanele atentele yena tincumo. (Gal. 6:4, 5) Njengobe sesicocile, umuntfu lohlakaniphile utawufuna seluleko eVini laNkulunkulu nakumaKhristu lavutsiwe ngaphambi kwekutsi ente sincumo. Nobe kunjalo, kufanele sicaphele singabaceli labanye kutsi basentele tincumo. Labanye bangakwenta ngalokucondzile loko ngekutsi babute umuntfu labamhloniphako batsi: “Bewungenta njani kube bewusesimeni sami?” Labanye bangahle bakwente loko ngetindlela letibhacile, ngekutsi balingise loko lokwentiwa ngulotsite bangakacabangisisi ngalendzaba.

16. Ngusiphi simo lesavela ebandleni laseKhorinte mayelana nekudla inyama lenikelelwe tithico, futsi ngubani lebekancuma kutsi lenyama itawudliwa yini nobe cha? (1 KubaseKhorinte 8:7; 10:25, 26)

¹⁶ Cabanga ngesimo lesavela kumaKhristu ekucala eKhorinte lesimayelana nenyama lokungenteka beyinikelelwe tithico. Pawula wabhalela lamaKhristu watsi: “Siyati kutsi sithico asisilutfo, nekutsi Nkulunkulu munye, futsi kute lomunye.” (1 Khor. 8:4) Banaloko engcondvweni, labanye ebandleni bancuma kuyidla inyama lebeyitsengiswa emakethe ngemuva kwekutsi inikelelwe tithico. Labanye bancuma kutsi ngeke bayidle lenyama ngobe nabayidla nembeza wabo bewutawubahlupha (Fundza 1 KubaseKhorinte 8:7; 10:25, 26.) Lesi bekusincumo semuntfu ngamunye. Pawula akazange eluleke emaKhristu aseKhorinte kutsi entele labanye tincumo nobe akope loko lokwentiwa ngulabanye. Ngenca yekutsi ngamunye wabo ‘Nkulunkulu bekatamehlulela kuye ngekwaloko lakwentile.’​—Rom. 14:10-12.

17. Yini lengenteka nangabe sivele nje silingise loko lokwentiwa ngulabanye? Niketa sibonelo. (Buka netitfombe.)

¹⁷ Singatitfola njani sisesimeni lesifanako lamuhla? Cabanga ngendzaba yetincenyana tetakhi tengati. UmKhristu ngamunye kufanele atentele sincumo nakutiwa endzabeni yekutsi utatemukela yini nobe cha letincenyana tetakhi tengati.b Kungahle kube matima kucondza lendzaba, kodvwa kwenta sincumo lesifana nalesi kuyincenye yemtfwalo umuntfu ngamunye lokufanele atetfwalele wona. (Rom. 14:4) Kube besingenta loko lomunye lancume kukwenta, besingenta bonembeza betfu babe butsakatsaka. Singawucecesha futsi siwente usebente kancono nembeza wetfu ngekutsi siwusebentise. (Heb. 5:14) Ngako kunini lakufanele sicele khona seluleko kumKhristu lovutsiwe? Ngemuva kwekutsi sesicwaningile kodvwa satfola kutsi solo sidzinga lusito kuze sicondze indlela timiso teliBhayibheli letisebenta ngayo esimeni lesikuso.

CHUBEKA UFUNA SELULEKO

18. Yini Jehova lasentele yona?

¹⁸ Jehova ukhombisile kutsi usetsemba kakhulu ngekutsi asivumele kutsi sitentele tincumo. Usinikete liVi lakhe liBhayibheli. Uphindze wasinika bangani labahlakaniphile labangasisita kutsi sicondze indlela yekusebentisa timiso teliBhayibheli. Uyidlalile indzima yakhe njengobe anguBabe wetfu. (Taga 3:21-23) Singakhombisa njani kutsi siyabonga?

19. Yini lesingachubeka siyenta kuze sijabulise Jehova?

¹⁹ Cabanga nganaku: Batali bayajabula nababona bantfwana babo baba ngemaKhristu lavutsiwe, futsi bafundza kucabanga, bahlakanipha futsi baba lusito. Ngendlela lefanako, Jehova uyajabula nakasibona sichubeka siba ngemaKhristu lavutsiwe, sifuna seluleko futsi senta tincumo letimdvumisako.