Ciniseka Kutsi Jehova Uyakutsandza

1. Yini leyakwenta watinikela kuJehova? (Buka nesitfombe.)

UYAKHUMBULA yini ngesikhatsi utinikela kuJehova? Lesincumo wasenta ngobe besewumati futsi umtsandza. Wametsembisa kutsi utawenta intsandvo yakhe ite kucala ekuphileni kwakho nekutsi utawuchubeka umtsandza ngenhlitiyo yakho yonkhe, ngemphefumulo wakho wonkhe, nangengcondvo yakho yonkhe, nangemandla akho onkhe. (Mak. 12:30) Kusukela ngaleso sikhatsi, indlela lomtsandza ngayo yachubeka ikhula. Ngako-ke ungamphendvula njani umuntfu nakangakubuta atsi: “Uyaciniseka yini kutsi uyamtsandza Jehova?” Ungamphendvula ngekushesha utsi: “Ngimtsandza kwendlula nobe ngubani nobe kwendlula nobe ngabe yini!”

2-3. Yini Jehova lafuna siciniseke ngayo, futsi sitawucoca ngani kulesihloko? (Jeremiya 31:3)

² Kodvwa ungamphendvula njani umuntfu longakubuta atsi: “Uyaciniseka yini wena kutsi Jehova uyakutsandza?” Ungangabata yini kuphendvula, mhlawumbe ucabanga kutsi awukufaneli kutsandvwa nguJehova? Lomunye dzadze lowakhula kamatima watsi: “Ngiyati kutsi ngiyamtsandza Jehova, futsi angikungabati loko. Lengihlale ngikungabata kutsi Jehova uyangitsandza yini.” Jehova utiva njani vele ngawe?

³ Jehova ufuna uciniseke kutsi uyakutsandza. (Fundza Jeremiya 31:3.) Liciniso likutsi wakudvonsela kuye. Ngetulu kwaloko, ngesikhatsi utinikela kuye futsi ubhajatiswa, watfola intfo leligugu kakhulu, lokulutsandvo lwakhe lolucotfo. Lolu lutsandvo lolujulile, loluhlala lukhona. Lwenta kutsi atitsatse ‘njengemphahla yakhe leligugu’ tikhonti takhe letetsembekile, lokufaka ekhatsi nawe. (Mal. 3:17, umbhalo longentasi) Jehova ufuna uciniseke kutsi uyakutsandza, njengobe nemphostoli Pawula bekaciniseka kutsi Jehova uyamtsandza. Kungako Pawula abhala watsi: “Ngiyaciniseka kutsi ngisho nekufa, kuphila, tingilosi, babusi, tintfo letikhona nyalo naleto letitako, emandla, kuphakama, kujula, ngisho nanobe nguyiphi indalo, ngeke kukwati kusehlukanisa nelutsandvo Nkulunkulu lasikhombisa lona.” (Rom. 8:38, 39) Kulesihloko, sitawucoca ngekutsi kubaluleke ngani kutsi siciniseke kakhulu kutsi Jehova uyasitsandza, kanye naloko lokungasisita kuze sikwente loko.

KUBALULEKE NGANI KUTSI SICINISEKE KUTSI JEHOVA UYASITSANDZA?

4. Yini lesingayenta kuze simelane nalelinye lichinga laSathane?

⁴ Nasiciniseka kutsi Jehova uyasitsandza, singakhona kulwa nalelinye ‘lichinga’ laSathane. (Ef. 6:11) Sathane utawenta nobe ngabe yini kuze asivimbele kutsi sikhonte Jehova. Lelinye lichinga lakhe kusakata emanga ekutsi Jehova akasitsandzi. Ungakhohlwa kutsi Sathane ungena ngelinceba. Uvame kusihlasela nasibutsakatsaka, mhlawumbe nasicindzeteleke kakhulu ngenca yaloko lokwentekile esikhatsini lesendlulile, tinkinga lesibhekene nato ngaleso sikhatsi, nobe nasikhatsateke ngelikusasa. (Taga 24:10) Sathane unjengelibhubesi lelifuna kubamba inyamatane lengakavikeleki. Ngako ubamba ematfuba ngalesikhatsi sicindzetelekile kuze etame kusenta siyekele kukhonta Jehova. Kodvwa nangabe sichubeka siciniseka kakhulu kutsi Jehova uyasitsandza, singakhona kumelana naye kanye “nemachinga” akhe.​—1 Phet. 5:8, 9; Jak. 4:7.

5. Kubaluleke ngani kutsi siluve lutsandvo lwaJehova?

⁵ Nasiciniseka kutsi Jehova uyasitsandza, singasondzelana kakhulu naye. Cabanga kutsi singakusho ngani loko. Jehova wasidala saba nesidzingo sekutsandza nesekutsandvwa. Nangabe sitsandvwa, kubese kuyatentakalela kutsi sitsandze. Ngako nasichubeka siluva lutsandvo lwaJehova, natsi sitawuchubeka simtsandza. (1 Joh. 4:19) Njengobe lutsandvo lwetfu ngaye lukhula, itawukhula nendlela lasitsandza ngayo. LiBhayibheli lisho ngalokucondzile litsi: “Sondzelani kuNkulunkulu, naye utawusondzela kini.” (Jak. 4:8) Kodvwa yini lesingayenta kuze siciniseke kakhulu kutsi Jehova uyasitsandza?

YINI LENGASISITA SICINISEKE KUTSI JEHOVA UYASITSANDZA?

6. Yini lesingayithantazela kuze siciniseke kutsi Jehova uyasitsandza?

⁶ Chubeka uthantaza kuJehova umcele akusite ubone kutsi yini leyenta akutsandze. (Luk. 18:1; Rom. 12:12) Cela Jehova tikhatsi letinyenti ngelilanga nakudzingekile kutsi akusite utibone ngendlela lakubona ngayo. Kuliciniso kutsi ngaletinye tikhatsi ungativa ungakabaluleki uze ukutfole kumatima kwetsemba kutsi Jehova uyakutsandza. Kodvwa khumbula kutsi Jehova mkhulu kunenhlitiyo yakho. (1 Joh. 3:19, 20) Ukwati kancono kunendlela wena lotati ngayo; ubona loko lokungenteka wena awukuboni. (1 Sam. 16:7; 2 Khr. 6:30) Ngako ungesabi ‘kumtjela konkhe lokusenhlitiyweni’ yakho, umcele akusite uciniseke kutsi uyakutsandza. (Hla. 62:8) Ngemuva kwaloko, yenta ngekuvumelana nemithantazo yakhe, ngekutsi wente naku lokulandzelako.

7-8. Tihlabelelo tisicinisekisa njani kutsi Jehova uyasitsandza?

⁷ Kwetsembe loko Jehova lakushoko. Waphefumulela babhali beliBhayibheli kutsi bamchaze njengobe anjalo. Naka kutsi umhlabeleli Davide wamchaza kahle kanjani Jehova. Watsi: “Jehova usedvute nalabo labephuke tinhlitiyo; uyabasindzisa labadvumatekile.” (Hla. 34:18, umbhalo longentasi) Nawuva buhlungu kakhulu, ungahle uve ngatsi uwedvwa. Kodvwa Jehova wetsembisa kutsi etikhatsini letinjalo, udvutane kakhulu nawe ngobe uyabona kutsi usuke umdzinge kakhulu. Kulesinye sihlabelelo, Davide wabhala watsi: “Yetsa tinyembeti tami esikhwameni sakho sesikhumba.” (Hla. 56:8) Jehova uyabona nawuva buhlungu. Unendzaba mbamba nawe naloko lobhekene nako. Njengobe abaluleke kakhulu emanti lasesikhwameni sesikhumba semuntfu loselugwadvule, netinyembeti takho tibaluleke kakhulu kuJehova futsi utikhumbula tonkhe tikhatsi nawuva buhlungu futsi ukhala. Tihlabelelo 139:3 titsi: “[Jehova] utati tonkhe tindlela tami.” Jehova utibona tonkhe tindlela takho, kodvwa unaka kakhulu lokuhle lokwentako. (Heb. 6:10) Ngasiphi sizatfu? Ngobe kuligugu kakhulu kuye konkhe lokwentako kuze umjabulise.a

⁸ Asebentisa lemibhalo ledvudvutako leseVini lakhe leliphefumulelwe, kuba ngatsi Jehova utsi: “Ngifuna wati kutsi ngikutsandza kanganani nekutsi nginendzaba nawe.” Kodvwa njengobe sesifundzile, Sathane usakata emanga ekutsi Jehova akakutsandzi. Ngako nangabe ungabata kutsi Jehova uyakutsandza, mani kancane futsi utibute: “Ngitawetsemba bani, ‘babe wemanga’ yini nobe ‘Nkulunkulu lowetsembekile’?”​—Joh. 8:44; Hla. 31:5.

9. Jehova ubacinisekisa ngani labo labamtsandzako? (Eksodusi 20:5, 6)

⁹ Cabanga ngendlela Jehova lativa ngayo ngalabo labamtsandzako. Naka loko Jehova lakutjela Mosi nema-Israyeli. (Fundza Eksodusi 20:5, 6.) Wetsembisa kutsi utawuchubeka abakhombisa lutsandvo lolucotfo labo labamtsandzako. Lamavi ayasicinisekisa kutsi Nkulunkulu wetfu lowetsembekile akayuze emukele lutsandvo etikhontini takhe letetsembekile kodvwa yena bese akasatitsandzi. (Neh. 1:5) Ngako nangabe uhle udzinga kucinisekiswa kutsi Jehova uyakutsandza, mani kancane futsi utibute: ‘Ngiyamtsandza yini Jehova?’ Ngemuva kwaloko cabanga nganaku: Nangabe umtsandza futsi wenta konkhe lokusemandleni akho kuze umjabulise, ciniseka kutsi ukutsandza kakhulu. (Dan. 9:4; 1 Khor. 8:3) Ngalamanye emavi, nangabe uciniseka kutsi uyamtsandza Jehova, ungabatelani-ke kutsi uyakutsandza? Ungaciniseka ngalokuphelele kutsi utawuhlale akutsandza futsi akayuze akushiye.

10-11. Jehova ufuna uyitsatse njani inhlawulo? (KubaseGalathiya 2:20)

¹⁰ Cabangisisa ngenhlawulo. Inhlawulo yaJesu Khristu isipho lesikhulu kakhulu Jehova lasiphe bantfu. (Joh. 3:16) Kodvwa isipho lesicondzene nawe yini? Yebo! Cabanga ngaloko lokwenteka kumphostoli Pawula. Khumbula kutsi bekente tono letinkhulu ngaphambi kwekutsi abe ngumKhristu futsi bekahlale alwa nebutsakatsaka bakhe. (Rom. 7:24, 25; 1 Thim. 1:12-14) Nobe kunjalo, watsatsa inhlawulo njengesipho lesivela kuJehova. (Fundza KubaseGalathiya 2:20.) Khumbula kutsi Jehova waphefumulela Pawula kutsi awabhale lamavi. Ngetulu kwaloko, konkhe lokuseBhayibhelini kwentelwe kutsi kufundzise tsine. (Rom. 15:4) Emavi aPawula akhombisa indlela Jehova lafuna kutsi wena uyibuke ngayo inhlawulo, ufuna uyibuke njengesipho lesicondzene nawe lesivela kuye. Nawuyibuka ngalendlela inhlawulo, utawuciniseka kakhulu kutsi Jehova uyakutsandza.

¹¹ Siyambonga Jehova ngekutfumela Jesu emhlabeni kutsi atosifela. Kodvwa lesinye sizatfu lesenta Jesu weta emhlabeni kutjela labanye liciniso ngaNkulunkulu. (Joh. 18:37) Leliciniso lifaka ekhatsi indlela Jehova lativa ngayo ngebantfwana bakhe.

INDLELA JESU LASISITA NGAYO SICINISEKE KUTSI JEHOVA UYASITSANDZA

12. Yini leyenta siyetsembe indlela Jesu lamchaza ngayo Jehova?

¹² Ngesikhatsi Jesu alamhlabeni, ngekutitsandzela waveta kutsi Jehova unjani. (Luk. 10:22) Site sizatfu sekuyingabata indlela Jesu lamchaza ngayo Jehova. Kube kufanele, ngobe Jesu besekaphile naJehova ezulwini sikhatsi lesidze kakhulu ngaphambi kwekutsi ete emhlabeni. (Khol. 1:15) Watibonela yena matfupha kutsi Jehova uwatsandza kangakanani emadvodzana nemadvodzakati akhe letsembekile. Jesu ubasita njani labanye baciniseke kutsi Nkulunkulu uyabatsandza?

13. Jesu ufuna simtsatse njani Jehova?

¹³ Jesu ufuna sibone Jehova ngendlela yena lambona ngayo. EmaVangelini, Jesu wabita Jehova “ngaBabe” tikhatsi letingetulu kwa-160. Ngetulu kwaloko, nakakhuluma nebalandzeli bakhe, wasebentisa emavi latsi “Babe wenu” nobe “Babe wenu losemazulwini.” (Mat. 5:16; 6:26) Liphuzu lelicwaningiwe laMatewu 5:16 litsi: “Tikhonti taNkulunkulu tasesikhatsini lesendlulile betisebentisa ticu letinyenti letihloniphekile kuze tichaze Jehova nalapho tikhuluma naye, lokufaka ekhatsi sicu lesitsi ‘Somandla,’ ‘Lophakeme Kakhulu,’ nalesitsi ‘Mdali Lophakeme.’ Kodvwa kusisebentisa kanyenti kwaJesu sicu lesimelula nalesivamile lesitsi ‘Babe’ kukhombisa lutsandvo lolukhulu Nkulunkulu lanalo ngetikhonti takhe.” Kusebaleni kutsi Jesu ufuna sibone Jehova ngendlela lambona ngayo, simtsatse njengaBabe lonelutsandvo lobatsandza kakhulu bantfwana bakhe. Ase sicoce ngetibonelo letimbili lapho Jesu asisebentisa khona lesicu lesitsi “Babe.”

14. Jesu wakhombisa njani kutsi umuntfu ngamunye uligugu kuBabe wetfu wasezulwini? (Matewu 10:29-31) (Buka nesitfombe.)

¹⁴ Kwekucala, cabanga ngemavi aJesu lakuMatewu 10:29-31. (Fundza.) Bojalwane tinyoni letincane letingayuze timtsandze Jehova nobe timkhonte. Nobe kunjalo, jolwane munye uligugu kakhulu kuBabe wetfu kangangekutsi uyati nakawela emhlabatsini. Cabanga-ke kutsi sikhonti ngasinye lesimkhonta ngobe simtsandza siligugu kangakanani kuye! Mayelana nemavi lakuvesi-30 latsi “kini kubalwe tonkhe tinwele letisetinhloko tenu,” liphuzu lelicwaningiwe lalelivesi litsi: “Lokutsi nje Jehova wati ngisho nentfo lencane ngatsi kuyasicinisekisa kutsi unendzaba kakhulu nemlandzeli ngamunye waKhristu.” Kusebaleni kutsi Jesu ufuna siciniseke kutsi umuntfu ngamunye uligugu kuBabe wetfu wasezulwini.

15. Emavi aJesu lakuJohane 6:44 akutjelani ngaBabe wakho wasezulwini?

¹⁵ Naka nasi sibonelo sesibili lapho khona Jesu asebentisa lesicu lesitsi “Babe.” (Fundza Johane 6:44.) Babe wakho wasezulwini nguye matfupha lowakudvonsa, nobe wakwenta walitsandza liciniso. Yini leyamenta wakudvonsa? Kungenca yekutsi kuwe wabona inhlitiyo lekahle. (Imis. 13:48) Liphuzu lelicwaningiwe laJohane 6:44 litsi kungenteka loko Jesu lakusho bekakutsatsele emavini aJeremiya, langumbhalo lokusekelwe kuwo lesihloko latsi: “Bengisolo ngetsembekile kini futsi nganidvonsela kimi [nobe, ngakutsandza ngelutsandvo lolucotfo].” (Jer. 31:3; umbhalo longentasi; catsanisa naHoseya 11:4.) Cabanga kutsi kusho kutsini loko. Babe wetfu wasezulwini uyachubeka abona lokuhle kuwe lokungenteka wena awukuboni.

16. (a) Kufana nekutsi utsini Jesu, futsi ngusiphi sizatfu lesenta simetsembe? (b) Yini longayenta kuze uciniseke kakhulu kutsi Jehova unguBabe lomdzingako? (Buka libhokisi lelitsi “Babe Lesimdzinga Sonkhe.”)

¹⁶ Ngekutsi Jesu achaze Jehova ngekutsi nguBabe wetfu, bekufana nekutsi utsi: “Jehova akasuye nje Babe wami kuphela; unguBabe wakho nawe. Ciniseka kutsi uyakutsandza futsi unendzaba kakhulu nawe.” Ngako nangabe uhle ungaciniseki kutsi Jehova uyakutsandza yini, mani kancane futsi utibute: ‘Akukafaneli yini ngiwetsembe emavi eNdvodzana lemati kahle Babe wetfu futsi lehlale ikhuluma liciniso?’​—1 Phet. 2:22.

CHUBEKA UCINISEKA KAKHULU KUTSI JEHOVA UYAKUTSANDZA

17. Kubaluleke ngani kutsi sichubeke siciniseka kakhulu kutsi Jehova uyasitsandza?

¹⁷ Kufanele sichubeke siciniseka kakhulu kutsi Jehova uyasitsandza. Njengobe sesifundzile, sitsa setfu lesinebucili lokunguSathane, angeke siyekele kwetama kusiyekelisa kukhonta Jehova. Sitawuchubeka setama kusenta singabate kutsi Nkulunkulu uyasitsandza kuze setame kusicedza emandla. Asingamvumeli Sathane aphumelele!​—Jobe 27:5.

18. Yini longayenta kuze uciniseke kakhulu kutsi Jehova uyakutsandza?

¹⁸ Kuze uchubeke uciniseka kakhulu kutsi Jehova uyakutsandza, chubeka uthantazela kutsi utibuke ngendlela yena lakubuka ngayo. Cabangisisa ngekutsi babhali beliBhayibheli labaphefumulelwe baluchaza njani lutsandvo lwaJehova. Cabanga ngendlela lenta ngayo nakatsandvwa; akayuze emukele lutsandvo bese uyehluleka kumtsandza loyo lomtsandzako. Cabangisisa ngesizatfu lesingakwenta ubuke inhlawulo njengesipho sakho matfupha. Ngetulu kwaloko, wetsembe emavi aJesu latsi Jehova unguBabe wakho. Nawenta njalo, nakwenteka umuntfu akubuta atsi: “Uyaciniseka yini kutsi Jehova uyakutsandza?” utawuphendvula ngesibindzi lesikhulu utsi: “Yebo uyangitsandza! Nami ngenta konkhe lokusemandleni ami onkhe malanga kuze ngikhombise kutsi ngiyamtsandza!”