Lutsandvo LwaNkulunkulu Luhlala Lukhona

1-2. Nguyiphi inkinga emaKhristu lamanyenti labhekana nayo?

CABANGA ngesikebhe lesiselwandle kube kunesivunguvungu lesikhulu. Emagagasi asiyisa lena nalena. Lesikebhe singaya nobe ngukuphi lamagagasi lasiyisa khona, ngaphandle nangabe lotsite asebentisa lihhuka lemkhumbi. Lelihhuka litasisimisa lesikebhe singayi lapho kungakafaneli siye khona.

² Nangabe ubeketelela inkinga lematima, ungeva ngatsi ufana nalesikebhe. Indlela lotiva ngayo ingashintjashintja. Ngalelinye lilanga utive uciniseka kutsi Jehova uyakutsandza futsi uyakusekela; kodvwa ngelilanga lelilandzelako utibute kutsi uyakubona yini loko lobhekene nako. (Hla. 10:1; 13:1) Mhlawumbe umngani wakho uyakudvudvuta, futsi utive uncono kwesikhashana. (Taga 17:17; 25:11) Kodvwa lokungabata kuphindze kubuye. Ungahle utibute kutsi Jehova akasenandzaba yini nawe. Yini lengafana nalelihhuka njengobe ubhekene nalenkinga? Ngalamanye emagama, yini lengakucinisekisa, futsi ikwente uhlale uciniseka kutsi Jehova uyakutsandza futsi uyakusekela?

3. Lusho kutsini “lutsandvo lolucotfo,” njengobe kukhulunywa ngalo kuTihlabelelo 31:7 nakusehluko 136:1, futsi yini lengenta sitsi Jehova uhamba embili ekulukhombiseni? (Buka nesitfombe.)

³ Lokunye lokungakusita nawubhekene nenkinga kukhumbula lutsandvo lwaJehova lolucotfo. (Fundza Tihlabelelo 31:7; 136:1.) Ligama lelitsi “lutsandvo lolucotfo” lisho lutsandvo lolujulile nalelingapheli umuntfu lanalo ngalomunye. Jehova uhamba embili ekukhombiseni lutsandvo lolucotfo. Ecinisweni, liBhayibheli litsi ‘uchichima lutsandvo lolucotfo.’ (Eks. 34:6, 7) Liphindze litsi ngaJehova: ‘Bonkhe labakhala kuwe ubakhombisa lutsandvo lolukhulu lolucotfo.’ (Hla. 86:5, umbhalo longentasi) Cabanga nje kutsi loko kusho kutsini: Akwenteki Jehova atilahle tikhonti takhe letetsembekile! Kukhumbula kutsi Jehova wetsembekile kungakusita nawubhekene nenkinga lematima.​—Hla. 23:4.

KHUMBULA KUTSI LUTSANDVO LWAJEHOVA LUYIMFUNDZISO YELIBHAYIBHELI LESISEKELO

4. Niketa tibonelo tetimfundziso teliBhayibheli letisisekelo, futsi chaza kutsi yini leyenta sitikholelwe ngalokucinile.

⁴ Lokunye lokungakusita nawubhekene nenkinga kukhumbula kutsi lutsandvo lwaJehova luyimfundziso yeliBhayibheli lesisekelo. Asho kutsini kuwe emavi latsi “imfundziso yeliBhayibheli lesisekelo”? Mhlawumbe ucabanga ngetimfundziso lotifundze eVini laNkulunkulu. Sibonelo nje, ufundzile kutsi ligama laNkulunkulu nguJehova, kutsi Jesu yiNdvodzana yaNkulunkulu lekuphela kwayo, kutsi labafile abati lutfo nekutsi umhlaba utawuba lipharadisi lapho bantfu batawuhlala khona kuze kube phakadze. (Hla. 83:18; Shu. 9:5; Joh. 3:16; Semb. 21:3, 4) Ngemuva kwekutsi sewutemukele letimfundziso, wabese awusadukiseki. Ngasiphi sizatfu? Ngenca yekutsi wabona kutsi tisekelwe ecinisweni. Ase sibone kutsi kutsatsa lutsandvo lwaJehova njengemfundziso yeliBhayibheli lesisekelo kungakusita njani kutsi ukhweshise umcabango wekutsi Jehova akakuboni loko lobhekene nako nobe wekutsi akanandzaba.

5. Chaza kutsi ungatiyekela njani timfundziso temanga.

⁵ Nawucala kudadisha liBhayibheli, yini leyakusita kutsi uyekele timfundziso temanga? Kungenteka wasitwa kucatsanisa loko bewufundziswa kona esontfweni lakho naloko lokufundziswa yimiBhalo. Cabanga nganasi sibonelo: Ase sitsi bewukholelwa kutsi Jesu unguNkulunkulu Somandla. Kodvwa njengobe bewudadisha liBhayibheli, watibuta: ‘Iliciniso yini vele lemfundziso?’ Ngemuva kwekuhlolisisa bufakazi lobusemiBhalweni, waphendvula lombuto nga-cha. Ngako wayiyekela lemfundziso yemanga, esikhundleni saloko wakholelwa liciniso leliseBhayibhelini lelitsi: Jesu ‘ulitibulo layo yonkhe indalo,’ futsi ‘uyiNdvodzana yaNkulunkulu lekuphela kwayo.’ (Khol. 1:15; Joh. 3:18) Kuliciniso kutsi timfundziso temanga ‘tingembelwa ticine’ futsi kube matima kutiyekela. (2 Khor. 10:4, 5) Kodvwa ngemuva kwekutiyekela, awuzange ubuyele emuva kuloko lebesewukushiyile.​—Fil. 3:13.

6. Yini lekwenta uciniseke kutsi “lutsandvo [lwaJehova] lolucotfo luhlala kuze kube phakadze”?

⁶ Ungenta lokufanako mayelana naloko liBhayibheli lelikufundzisako ngelutsandvo lwaJehova. Nawubhekene nenkinga futsi ucale kungabata kutsi Jehova uyakutsandza, tibute: ‘Kunengcondvo yini loku lengikucabangako?’ Catsanisa kungabata kwakho lutsandvo lwaJehova nemavi lakuTihlabelelo 136:1, lokungumbhalo lokusekelwe kuwo lesihloko. Yini leyenta Jehova wachaza lutsandvo lwakhe ngekutsi “lucotfo”? Yini leyenta emavi latsi “lutsandvo lwakhe lolucotfo luhlala kuze kube phakadze” aphindvwe tikhatsi letingu-26 kulesihlabelelo? Njengobe sesibonile, lutsandvo lolucotfo Jehova lanalo ngebantfu bakhe luyimfundziso yeliBhayibheli lebalulekile, iyafana naletinye timfundziso lesewutemukele letiseVini laNkulunkulu. Umbono wekutsi awukabaluleki kuJehova nobe wekutsi akakutsandzi, ungemanga. Wulahle lowo mbono, njengobe bewungenta nangalenye imfundziso yemanga!

7. Shano lamanye emavesi lakucinisekisako kutsi Jehova uyakutsandza.

⁷ LiBhayibheli linalamanye emavi lamanyenti lasicinisekisako kutsi Jehova uyasitsandza. Sibonelo nje, Jesu watjela balandzeli bakhe watsi: “Nine nibaluleke kwendlula bojolwane labanyenti.” (Mat. 10:31) Jehova matfupha watjela bantfu bakhe watsi: “Ngitakucinisa, nome kanjani ngitakusita, nakanjani ngitakubamba ngesandla sami sangesekudla sekulunga.” (Isa. 41:10) Lamavi asicinisekisa mbamba! Jesu akazange atsi: ‘Kungenteka nibaluleke kwendlula bojolwane labanyenti,’ futsi Jehova akazange atsi: ‘Kungenteka ngitakusita.’ Kunaloko, batsi: “Nine nibaluleke kwendlula bojolwane labanyenti” futsi “Ngitakusita.” Nakwenteka ungabata kutsi Jehova uyakutsandza nawunenkinga, imibhalo lefana nalena angeke igcine nje ngekukusita kutsi utive uncono, kepha itakwenta uciniseke mbamba kutsi Jehova uyakutsandza. Lamavesi akhuluma liciniso. Kuthantaza bese uyacabangisisa ngawo kutakwenta uvumelane nemavi laku-1 Johane 4:16 latsi: “Tsine siyati kutsi Nkulunkulu uyasitsandza futsi siyakukholelwa loko.”a

8. Yini longayenta nangabe uhle ungabata kutsi Jehova uyakutsandza?

⁸ Kodvwa kutsiwani nangabe uhle ungabata kutsi Jehova uyakutsandza? Catsanisa indlela lotiva ngayo naloko lokwatiko. Angeke uhlale uyetsemba indlela lotiva ngayo kwendlula liciniso, kodvwa lutsandvo lwaJehova lesifundza ngalo eBhayibhelini liliciniso. Kungakunaki loko kufana nekunganaki buntfu baJehova lobubalulekile, lokulutsandvo lwakhe.​—1 Joh. 4:8.

CABANGISISA NGEKUTSI JEHOVA ‘UYAKUTSANDZA’

9-10. Asho kutsini emavi aJesu latsi “Babe ngekwakhe uyanitsandza,” njengobe abhalwe kuJohane 16:26, 27? (Buka nesitfombe.)

⁹ Singafundza lokunyenti ngelutsandvo lwaJehova nasibuka loko Jesu lakutjela balandzeli bakhe nakatsi: “Babe ngekwakhe uyanitsandza.” (Fundza Johane 16:26, 27.) Jesu akazange asho loko kuze ajabulise bafundzi bakhe. Ecinisweni, emavesi langaphambi kwalawa akhombisa kutsi bekangakhulumi ngemiva yebafundzi bakhe ngaleso sikhatsi. Kepha bekakhuluma ngendzaba leyehlukile, lokungumthantazo.

¹⁰ Jesu bekasandza kutjela bafundzi bakhe kutsi kufanele bathantaze ngaye kodvwa hhayi kuye. (Joh. 16:23, 24) Bekubalulekile kutsi bakwati loko. Ngemuva kwekuvuswa kwakhe, kungenteka labafundzi bebangafuna kuthantaza kuJesu. Kube kufanele, ngobe besebamtsatsa njengemngani wabo. Mhlawumbe bebangacabanga kutsi indlela labatsandza ngayo ingenta alalele ticelo tabo futsi atendlulisele kuBabe wakhe. Nobe kunjalo, Jesu watsi akukafaneli bacabange ngalendlela. Ngasiphi sizatfu? Wabatjela watsi: “Babe ngekwakhe uyanitsandza.” Leliciniso liyincenye yemfundziso yeliBhayibheli lesisekelo lemayelana nemthantazo. Cabanga nje kutsi loko kusho kutsini ngawe: Ngekudadisha liBhayibheli, ubese uyamati Jesu futsi wamtsandza. (Joh. 14:21) Kodvwa njengalabafundzi, ungathantaza ngesibindzi kuNkulunkulu, wati kutsi yena ‘ngekwakhe uyakutsandza.’ Usuke ukhombisa kutsi uyawetsemba lamavi njalo nawuthantaza kuJehova.​—1 Joh. 5:14.

YATI KUTSI YINI LEYENTA UNGABATE

11. Yini lengenta Sathane ajabule kube besingangabata kutsi Jehova uyasitsandza?

¹¹ Yini leyenta singabate kutsi Jehova uyasitsandza? Kungenteka utsi nguSathane, futsi likhona liciniso kuloko. Develi ‘ufuna kusishwabadzela,’ futsi angajabula nangabe singalungabata lutsandvo lwaJehova. (1 Phet. 5:8) Ngetulu kwako konkhe, lutsandvo lwaJehova lwamenta wasipha inhlawulo, lokuyintfo Sathane lafuna sitive singakufaneli kuyitfola. (Heb. 2:9) Kodvwa ngubani lositakalako nangabe silungabata lutsandvo lwaJehova? NguSathane. Kufezeka yabani injongo nangabe siyekela kukhonta Jehova nasibhekene netinkinga? YaSathane. Sathane ufuna sicabange kutsi Jehova akasitsandzi, kodvwa siyati kutsi loko akusilo liciniso. NguSathane longatsandvwa nguJehova. Nanobe kunjalo, lelinye ‘lemachinga’ akhe lelihamba embili kwetama kusenta sicabange kutsi ngitsi lesingatsandvwa nguJehova futsi losilahlile. (Ef. 6:11) Nasikubona loko sitsa setfu lesetama kukwenta, singatimisela kakhulu ‘kumelana naDeveli.’​—Jak. 4:7.

12-13. Sono singasenta njani singabate kutsi Jehova uyasitsandza?

¹² Kunalokunye lokungasenta singabate kutsi Jehova uyasitsandza. Yini? Sono. (Hla. 51:5; Rom. 5:12) Sono sasehlukanisa neMdali wetfu. Siphindze salimata indlela lesicabanga ngayo, lesitiva ngayo kanye nemphilo yetfu.

¹³ Sono singasenta sitive singasimnandzi, sisente sitive sinelicala, sikhatsatekile, sesaba futsi sihlazekile. Singativa ngaleyondlela nasente sono. Kodvwa singaphindze sitive ngaleyondlela ngenca yekutsi sihlale sicabanga ngekutsi sinesono, lokusimo lesingazange sidalelwe kutsi sibe kuso. (Rom. 8:20, 21) Njengobe imoto lenelisondvo lelite umoya ingakhoni kuhamba kahle, natsi njengobe sinesono asikhoni kutenta kahle tintfo, sitente ngendlela lesadalwa ngayo. Ngako akumangalisi kutsi ngalesinye sikhatsi sihle singabata kutsi Jehova uyasitsandza. Nangabe loko kwenteka, kufanele sikhumbule kutsi Jehova ‘nguNkulunkulu lomkhulu nalowesabekako, lobakhombisa lutsandvo lolucotfo labo labamtsandzako nalabagcina imiyalo yakhe.’​—Neh. 1:5.

14. Kucabanga ngenhlawulo kungasisita njani sisuse umcabango wekutsi Jehova akayuze asitsandze? (KubaseRoma 5:8) (Buka nelibhokisi lelitsi “Gadza ‘Kuyenga Kwesono.’”)

¹⁴ Kuliciniso kutsi singahle sitive singakufaneli kutsandvwa nguJehova. Liciniso likutsi vele asikufaneli, futsi nguloko lokwenta lutsandvo lwakhe lukhetseke kakhulu kitsi. Asilutfoli lutsandvo lwaJehova ngenca yekutsi silusebentele. Nobe kunjalo, inhlawulo imbonya tono tetfu, futsi Jehova usinike yona ngenca yekutsi uyasitsandza. (1 Joh. 4:10) Khumbula nekutsi Jesu weta emhlabeni kuze asindzise toni, hhayi bantfu labete sono. (Fundza KubaseRoma 5:8.) Kute kitsi lotenta kahle tonkhe tintfo, futsi Jehova akakulindzeli loko. Nasicondza kutsi kuba nesono lokusenta singabate kutsi Jehova uyasitsandza, kungasenta sitimisele kakhulu kulwisana nako.​—Rom. 7:24, 25.

KHETSA KUHLALA WETSEMBEKILE

15-16. Nasihlala setsembekile kuJehova, yini lesingaciniseka ngayo, futsi ngasiphi sizatfu? (2 Samuweli 22:26)

¹⁵ Jehova ufuna sente sincumo lesikahle ngekutsi ‘sinamatsele kuye.’ (Dut. 30:19, 20) Nasenta njalo, singaciniseka kutsi naye utawuhlale etsembekile kitsi. (Fundza 2 Samuweli 22:26.) Nangabe nje sihlala setsembekile kuye, singaciniseka kutsi utasisita nasibhekana nanobe ngusiphi simo ekuphileni.

¹⁶ Njengobe sesicocile, sinato tonkhe tizatfu tekungesabi nasibhekana netinkinga. Siyati kutsi Jehova uyasitsandza futsi utasisekela. Nguloko liBhayibheli lelikufundzisako. Nakwenteka singabata kutsi uyasitsandza, singacabanga ngaloko lesatiko kutsi kuliciniso kunekutsi sicabange ngaloko lesiva ngatsi kuliciniso. Shengatsi singaletsemba liciniso leliseBhayibhelini lelitsi lutsandvo lwaJehova lolucotfo luhlala kuze kube phakadze.