Jehova ‘Ungumtfombo Wenjabulo Yetfu Lenkhulu’

1-2. (a) Ngusiphi simo bantfu labanyenti lababhekene naso lamuhla? (b) Sitawucoca ngani kulesihloko?

BANTFU labanyenti lamuhla bakhatsateka kakhulu ngekutsi yini labangayenta kuze bajabule. Nanobe kunjalo, abayitfoli injabulo lehlala njalo. Labanyenti bahlale beva shengatsi kukhona lokushodako ekuphileni kwabo futsi beva buhlungu. Nebantfu baJehova baba nayo imiva lenjalo. Ngenca yekutsi siphila “emalangeni ekugcina,” sikulindzele kubhekana netimo kanye nemiva ‘lokumatima kubhekana nayo.’​—2 Thim. 3:1.

² Kulesihloko, sitawucoca ngetintfo letingasenta singajabuli nekutsi yini lesingayenta kuze siphindze sijabule nangabe singasajabuli. Kodvwa sitawucale sicoce ngekutsi ngubani longuMtfombo wenjabulo mbamba.

UMTFOMBO WENJABULO MBAMBA

3. Indalo isifundzisani ngaJehova? (Buka netitfombe.)

³ Jehova bekasolo ajabula, futsi ufuna natsi sijabule. Ngako akumangalisi kutsi injabulo yakhe siyibona kuloko lakudalile, lokungumhlaba wetfu lomuhle, imibalabala leminyenti kakhulu leyehlukahlukene, tilwane natidlala, nekudla lokunyenti kakhulu lokumnandzi. Nkulunkulu usitsandza mbamba futsi ufuna sikujabulele kuphila!

Baby elephant: Image © Romi Gamit/Shutterstock; penguin chicks: Vladimir Seliverstov/500px via Getty Images; baby goats: Rita Kochmarjova/stock.adobe.com; two dolphins: georgeclerk/E+ via Getty Images

4. (a) Yini leyenta Jehova achubeke ajabula ngisho nobe abona kuhlupheka emhlabeni? (b) Ngusiphi sipho Jehova lasiphe sona? (Tihlabelelo 16:11)

⁴ Nanobe Jehova ‘anguNkulunkulu lojabulako,’ ubati kahle buhlungu kanye nekuhlupheka lokulamhlabeni. (1 Thim. 1:11) Kodvwa akakuvumeli loko kucedze injabulo yakhe. Uyati kutsi konkhe kuhlupheka kwesikhashana, futsi yena matfupha usibekile sikhatsi latakucedza ngaso. Ngetulu kwaloko, uyachubeka abeketela ngesineke kuze kube lilanga lapho atabucedza khona bonkhe buhlungu nekuhlupheka kuze kube phakadze. Kepha kwanyalo Jehova uyakwati loko lesibhekana nako futsi uyafuna kusisita. Usisita njani? Lokunye lakwentako kutsi usiniketa sipho lesiyinjabulo. (Fundza Tihlabelelo 16:11.) Naka kutsi wamniketa njani Jesu lesipho.

5-6. Yini leyenta Jesu ajabule?

⁵ Kuyo yonkhe indalo yaJehova, Jesu uhamba embili ngekujabula. Ngasiphi sizatfu? Cabanga nganati tizatfu letimbili. (1) ‘Ungumfanekiso waNkulunkulu longabonakali’ futsi ubulingisa ncamashi buntfu baBabe wakhe ngato tonkhe tindlela. (Khol. 1:15) (2) Jesu ucitse sikhatsi lesinyenti kakhulu naBabe wakhe, longuMtfombo wenjabulo.

⁶ Jesu bakasolo akujabulela kwenta nobe ngabe yini Babe wakhe lamcela kutsi ayente. (Taga 8:30, 31; Joh. 8:29) Ngenca yekutsi bekasolo etsembekile, Jehova uyamtsandza futsi uyamemukela.​—Mat. 3:17.

7. Singayitfola njani injabulo mbamba?

⁷ Natsi singayitfola injabulo mbamba ngekutsi sisondzelane naJehova, longuMtfombo wenjabulo. Nasicitsa sikhatsi lesinyenti sifundza ngaJehova futsi simlingisa, sitawujabula kakhulu. Singaphindze siyitfole injabulo ngekwenta intsandvo yaNkulunkulu nangekwati kutsi uyasemukela.a (Hla. 33:12) Kodvwa kutsiwani nangabe sihle singajabuli nobe singasajabuli sanhlobo? Loko kusho kutsi Nkulunkulu akasasemukeli yini? Cha! Sinesono futsi ngalesinye sikhatsi siva buhlungu, sibe lusizi futsi sicindzeteleke. Jehova uyakucondza loko. (Hla. 103:14) Asesicoce ngekutsi yini lengasenta singajabuli nekutsi yini lesingayenta kuze siphindze sijabule.

UNGAVUMELI LUTFO KUTSI LUKWENTE UNGAJABULI

8. Tingasitsintsa njani tinkinga tekuphila?

⁸ Tinkinga Tekuphila. Uyahlupheka yini ngenca yekutsi uphatfwa kabi, ngenca yesehlakalo semvelo, weswele, uyagula nobe ukhulile ngeminyaka? Kungaba melula kuphelelwa yinjabulo nasibhekene naletinkinga, ikakhulukati nangabe kukuncane lesingakwenta ngato nobe kute sanhlobo. LiBhayibheli liyasho kutsi “lusizi luyawephula umoya.” (Taga 15:13) Lomunye lomdzala welibandla lokutsiwa nguBabis, lowashonelwa ngubhuti wakhe nebatali bakhe kungakapheli iminyaka lemine, utsi: “Ngativa ngingedvwa futsi ngingenabani. Ngaletinye tikhatsi bengiva buhlungu kakhulu ngenca yekutsi bekukunyenti lebekufanele ngikwente, futsi angikhonanga kucitsa sikhatsi lesinyenti nebatali bami nabhuti wami ngaphambi kwekutsi bashone.” Tinkinga tekuphila tingasicedza emandla futsi tisivise buhlungu.

9. Yini lengasisita kutsi siphindze sijabule? (Jeremiya 29:4-7, 10)

⁹ Yini lengasisita kutsi siphindze sijabule? Singaphindze sijabule nangabe sibuka tintfo njengobe tinjalo futsi sibonga. Lelive likhutsata kutsi kuze sijabule, kufanele sibe bete tinkinga. Kodvwa loko akusilo liciniso. Sibonelo nje, Jehova watjela emaJuda lebekatfunjwe eBhabhulona kutsi emukele simo sawo lesisha sekuba tigcili eveni lelingasilo lawo futsi ente konkhe langakwenta kuze ajabule ngisho abhekene netimo letimatima. (Fundza Jeremiya 29:4-7, 10.) Yini lesiyifundzako? Yetama kwemukela simo lokuso, futsi ubonge ngetintfo letinhle lonato ekuphileni. Khumbula, Jehova utakusita. (Hla. 63:7; 146:5) Effie, lowatfola ingoti leyamshiya akhubatekile, utsi: “Jehova, umndeni wami kanye nelibandla bangisite kakhulu futsi bangisekela. Ngako ngabona kutsi ngitabe ngikhombisa kutsi angibongi nangingahlala ngingajabuli. Ngifuna kukhombisa kutsi ngiyabonga kuJehova nakubangani bami ngelusito lolukhulu labanginikete lona.”

10. Sisho ngani kutsi singajabula ngisho sinetinkinga?

¹⁰ Ngisho nobe tintfo tingasihambeli kahle ekuphileni nobe kwenteka tintfo letimbi kitsi nobe kumalunga emndeni yetfu, singachubeka sijabula.b (Hla. 126:5) Sisho ngani? Ngenca yekutsi injabulo yetfu ayiyi ngetimo tetfu. Lomunye dzadze lolihlahlandlela lokutsiwa nguMaria, utsi: “Nawubhekene netinkinga, kuhlala ujabulile akusho kutsi ufela ngekhatsi. Kunaloko, kusho kutsi awukatikhohlwa tetsembiso taJehova. Babe wetfu utasisita kutsi sichubeke sijabulile.” Khumbula, ngisho nobe timo timatima kanganani nyalo, tonkhe tinkinga tetfu tesikhashana kuhle kwetinyatselo letisesihlabatsini nalihhusha. Ngekushesha titawunyamalala, kube ngatsi atikake tibe khona.

11. Sibonelo semphostoli Pawula sikukhutsata njani?

¹¹ Kutsiwani nangabe sesicala kutibuta kutsi tinkinga tetfu tisho kutsi Jehova akasasemukeli yini? Kungasisita kucabanga ngaletinye tikhonti taJehova letetsembekile letabhekana netimo letimatima kakhulu. Cabanga ngesibonelo semphostoli Pawula. Wakhetfwa nguJesu kutsi ashumayele liciniso “kubantfu betive, nasemakhosini kanye nasemadvodzaneni aka-Israyeli.” (Imis. 9:15) Lona bekungumsebenti lobalulekile! Nobe kunjalo, kuphila kwaPawula bekugcwele tinkinga. (2 Khor. 11:23-27) Tinkinga letinyenti Pawula labhekana nato betisho kutsi Jehova akasamemukeli yini? Cha! Ngalokwehlukile, kucinisela kwakhe kwakhombisa kutsi Jehova bekambusisa. (Rom. 5:3-5) Nyalo cabanga ngesimo sakho. Uyachubeka ucinisela ngisho ubhekene nato tonkhe letinkinga. Ngako nawe ungaciniseka kutsi Jehova uyakwemukela.

12. Ingasiphelela njani injabulo nangabe kungenteki loko lesikulindzele?

¹² Nangabe kungenteki loko lesikulindzele. (Taga 13:12) Lutsandvo lesinalo ngaJehova kanye nekumbonga kwenta kutsi sitibekele imigomo emsebentini wakhe. Nanobe kunjalo, nangabe lemigomo lesitibekele yona singakhoni kuyifinyelela ngenca yetimo tetfu, singadvumateka. (Taga 17:22) Lomunye dzadze lolihlahlandlela lokutsiwa nguHolly utsi: “Bengifuna kuya eSikolweni Sebavangeli BeMbuso, ngiyosebentela Jehova kulelinye live, nobe ngiyosita emsebentini wekwakha eRamapo. Kodvwa timo tami tashintja, futsi angizange ngisakhona kuyifinyelela lemigomo. Ngadvumateka. Kubuhlungu nangabe ufuna kufeza tintfo letitsite, kodvwa ungakhoni.” Labanyenti bativa ngaleyondlela.

13. Nangabe timo tetfu tenta singakhoni kwenta loko lesifise kukwenta, ngumiphi imigomo lesingatibekela yona?

¹³ Yini lengasisita kutsi siphindze sijabule? Khumbula kutsi Jehova akalindzeli lokungetulu kwemandla etfu, futsi kubaluleka kwetfu kuye akuyi ngaloko lesikhona kukwenta emsebentini wakhe. Jehova ufuna sitfobeke futsi setsembeke. (Mik. 6:8; 1 Khor. 4:2) Unendzaba kakhulu naloko lesingiko ngekhatsi kunaloko lesikwentako. Kungaba kahle yini kulindzela lokungetulu kwaloko Jehova lakulindzele kitsi?c Cha! Nangabe timo takho tenta kutsi ungakhoni kwenta loko lofise kukwenta emsebentini waJehova, yetama kwenta loko lokhona kukwenta. Ungakhona yini kucecesha labasebasha nobe ukhutsate lasebakhulile? Ungatibekela yini umgomo wekukhutsata lotsite buso nebuso, ngelucingo nobe umbhalele umlayeto? Jehova utakubusisa ngekutsi akunikete injabulo njengobe wetama kufinyelela lemigomo lemihle nalongakhona kuyifinyelela! Ngetulu kwaloko, hlale ukhumbula kutsi ngekushesha sitawuba nematfuba lamanyenti kakhulu eveni lelisha laJehova ekumentela tintfo letinyenti nalebesingaticabangi ngisho nekuticabanga! Nguloko lokwakhutsata Holly lesike sakhuluma ngaye, utsi: “Nangitiva ngidvumatekile, ngiyema futsi ngikhumbule kutsi ngitawuphila phakadze. Ngitawukhona kwenta loko lengifuna kumentela kona Jehova eveni lelisha ngelusito lwakhe.”

14. Yini lenye lengasenta singajabuli?

¹⁴ Kutijabulisa. Labanye basebentisa tinhlelo tekuchumana kuze bakhutsate umbono wekutsi injabulo mbamba nekwenetiseka kutfolakala ngekutijabulisa. Bantfu bakhutsatwa kutsi banake kakhulu tintfo letinjengekutsenga, kuvakasha nekwenta tintfo labatitsandzako. Akusikubi kwenta letintfo. Jehova wasidala ngendlela yekutsi sitijabulele tintfo letinhle. Nanobe kunjalo, labanyenti batfole kutsi loko lebebacabanga kutsi kutabaniketa injabulo ngiko kanye lokubente bangajabuli. Lomunye dzadze lolihlahlandlela lokutsiwa ngu-Eva, utsi: “Nangabe unake kakhulu kutijabulisa wena, aweneli.” Kufuna kutijabulisa kungasishiya siva buhlungu futsi sidvumatekile.

15. Yini lesingayifundza eNkhosini Solomoni?

¹⁵ Singafundza kulokwenteka eNkhosini Solomoni mayelana nemiphumela lebuhlungu yekufuna kutijabulisa. Solomoni wetama kutfola injabulo ngekutsi enetise tifiso takhe, letinjengekudla kudla lokumnandzi, kulalela umculo lomnandzi kanye nekuba nato tonkhe tintfo letinhle imali lebeyingatitsenga ngesikhatsi sakhe. Kodvwa akazange enetiseke. Watsi: “Liso alidzinwa kubuka; nendlebe ayidzinwa kuva.” (Shu. 1:8; 2:1-11) Imibono lekulelive lemayelana naloko lokuletsa injabulo mbamba ifana nemali mbumbulu. Ingabonakala ingiyo; kodvwa awukutfoli loko lowetsenjiswe kona.

16. Kupha labanye kungasisita njani kutsi siphindze sijabule? (Buka netitfombe.)

¹⁶ Yini lengasisita kutsi siphindze sijabule? Jesu wasifundzisa kutsi “kunenjabulo lenkhulu ekupheni kunasekwemukeleni.” (Imis. 20:35) Lomunye lomdzala welibandla lokutsiwa ngu-Alekos utsi: “Nginaka kwentela labanye tintfo letincane. Nangichubeka ngipha, angicabangi kakhulu ngaloko lengikufunako, futsi loko kungenta ngijabule.” Yini wena longayentela labanye? Nangabe ubona lotsite lodvonsa kamatima, yetama kumkhutsata. Kungenteka ungakhoni kucatulula tinkinga takhe, kodvwa ungamdvudvuta ngekutsi ube neluvelo nawumlalela, ube nemusa futsi umkhumbute kutsi alahlele umtfwalo wakhe kuJehova. (Hla. 55:22; 68:19) Ungaphindze umkhumbute kutsi Jehova akamshiyi. (Hla. 37:28; Isa. 59:1) Ungacela nekumentela lokutsite, njengekumphekela kudla nobe kumcela kutsi nelule tinyawo. Mcele kutsi nente umsebenti wekushumayela ndzawonye, lokungamsita kutsi ajabule. Vuma kuba lithulusi etandleni taJehova. Kunaka kakhulu labanye kunekutinaka tsine kungasisita kutsi sijabule mbamba!​—Taga 11:25.

17. Yini lokufanele siyente nangabe sifuna kujabula mbamba? (Tihlabelelo 43:4)

¹⁷ Singajabula mbamba nangabe sichubeka sisondzela kuBabe wetfu wasezulwini. LiBhayibheli liyasicinisekisa kutsi Jehova ‘ungumtfombo wenjabulo yetfu lenkhulu.’ (Fundza Tihlabelelo 43:4.) Ngako ngisho kwentekani ekuphileni kwetfu, singativa siphephile. Shengatsi singachubeka sinake Jehova, longuMtfombo wenjabulo yetfu lengapheli!​—Hla. 144:15.