Nkulunkulu Unendzaba Yini Nekuhlupheka Kwetfu?

ANGAKUVUMELA NJANI LOKU KUTSI KWENTEKE?

Calisile: Lamuhla, ngihambe ngicoca nebantfu labahlala kulendzawo ngekwatiswa lokukunali lipheshana. Linesihloko lesitsi Ungatsandza Yini Kwati liciniso? Ngicela utsatse nali lakho.

Takhona: Likhuluma ngetintfo telisontfo yini?

Calisile: Yebo. Ngicela ubuke nayi imibuto lesitfupha lebhalwe lapha ekucaleni. Ngumuphi kulemibuto—

Takhona: Ngicela sowume khona lapho. Kutawufana nekutsi ucitsa sikhatsi sakho nawukhuluma nami.

Calisile: Yini lekwenta usho njalo?

Takhona: Ecinisweni, ngiyatingabata kutsi ngiyakholelwa kuNkulunkulu.

Calisile: Uyati ngiyajabula ngalokutsi wetsembeke, ungitjele loku. Ngicela kubuta, bowuvele utiva kanjalo kusukela ekucaleni yini?

Takhona: Chake, ngikhule ngihamba lisontfo. Kodvwa senginesikhatsi lesidze ngayekela.

Calisile: Ngiyabona. Hawu, asengitetfule phela. Ligama lami ngingu-Calisile.

Takhona: Mine ngingu-Takhona.

Calisile: Ngiyajabula kukwati-ke Takhona.

Takhona: Nami ngalokufanako.

Calisile: Angiketeli kutokuphocelela kutsi wemukele loko mine lengikukholelwako. Ngifisa kwati kodvwa kutsi kukhona yini lokwakubangela wabese uyangabata kutsi Nkulunkulu ukhona?

Takhona: Yebo kukhona. Eminyakeni lengu-17 leyendlulile, indvodzakati yami yatfola ingoti yemoto.

Calisile: Awu, kwaze kwaba buhlungu kuva loko. Walima yini?

Takhona: Yebo, solo waba yinkhubela kusukela lapho.

Calisile: Maye kwaze kwaba kubi. Kuyobe sikuphatsa kabi kakhulu lesimo.

Takhona: Ungasasho mntfwanebantfu. Loko ngiko phela lokungenta ngitibute kutsi nangabe Nkulunkulu akhona, angayivumela njani intfo lenjena kutsi yenteke? Nkulunkulu angasiyekelelani sihlupheke ngalendlela?

KUBI YINI KUBUTA KUTSI NKULUNKULU UKUVUMELE LENI KUHLUPHEKA?

Calisile: Kute lokubi ngalendlela lotiva ngayo kanye nangalemibuto lonayo. Kungulokuvamile kutsi nasiphatseke kabi sitibute kutsi kubangelwa yini loko. Ecinisweni, loko bekutikhatsata ngisho naletinye tetinceku taNkulunkulu letetsembekile tangesikhatsi kusabhalwa liBhayibheli.

Takhona: Usho njalo?

Calisile: Yebo. Ngingakukhombisa yini sibonelo saloko eBhayibhelini?

Takhona: Ngingajabula kakhulu.

Calisile: Ngicela unake kutsi kuHabakhuki, sehluko 1, livesi 2 na-3, Habakhuki, umphrofethi lowetsembekile, wabuta Nkulunkulu watsi: “Awu, Simakadze, kuyawudzimate kube ngunini solo ngikhala ngicela lusito, kodvwa wena solomane ungalaleli? Kuyawudzimate kube ngunini ngimemeta ngikhala kuwe ngitsi: ‘Budlwangudlwangu!’ kodvwa wena ungasindzisi? Wentelani kutsi ngibone bubi lobungaka?” Lemibuto ivakala ifanana yini naleyakho?

Takhona: Iyafanana.

Calisile: Nkulunkulu akazange amtsetsise Habakhuki ngekubuta kwakhe lemibuto, futsi akazange amane atjele Habakhuki kutsi kudzingeka akholwe kakhulu.

Takhona: Kuyamangalisa-ke loko

JEHOVA UYAKWENYANYA KUHLUPHEKA

Calisile: LiBhayibheli lifundzisa kutsi Nkulunkulu uyakubona kuhlupheka lesibhekana nako futsi unendzaba.

Takhona: Usho kutsini?

Calisile: Asengikukhombise nasi sibonelo lesilapha ku-Eksodusi 3:7. Ungakujabulela kuwufundza?

Takhona: Kute inkinga. Utsi: “Simakadze wakhuluma watsi: ‘Sengikubone ngempela kuhlushwa kwebantfu bami labaseGibhithe. kSengikuvile nekukhala kwabo ngekucindzetelwa nguletindvuna tabo temisebenti. Ngikwati kahle kuhlupheka kwabo’”

Calisile: Ngiyabonga. Ngekusho kwalomBhalo, Nkulunkulu uyakubona yini kuhlupheka kwetfu?

Takhona: Kubonakala kanjalo.

Calisile: Akusho kutsi unelwati nje loluncane ngaloku. Ngicela uphindze ubuke incenye yekugcina yalelivesi. Nkulunkulu watsi: ‘Ngikwati kahle kuhlupheka kwabo.’ Engabe lawo mavi avakala njengalavela kuNkulunkulu longenandzaba nebantfu noma longenabungani nabo yini?

Takhona: Cha, akusinjalo.

Calisile: Liciniso lelo. Nkulunkulu akagcini ngekubona tinkinga tetfu kodvwa kuphindze kumvise buhlungu kusibona sikuleso simo.

Takhona: Ucinisile.

Calisile: Sisenaloko etingcondvweni, asesifundze ngalokunye kukhatsateka bantfu baNkulunkulu labake babhekana nako. Kubhalwe ngako ku-Isaya 63:9. Incenye yekucala yalelivesi itsi: “Kuko konkhe kukhatsateka kwabo naye abekhatsatekile.” Ungasho yini kutsi bekumtsintsa Nkulunkulu kubona bantfu bakhe bakhatsatekile?

Takhona: Yebo, kuvakala kanjalo.

Calisile: Takhona, liciniso lalendzaba likutsi Nkulunkulu usikhatsalela kakhulu, futsi kuyamcansula kusibona sihlupheka. Nasikhala, ukhala kanye natsi.

UBANJWE YINI KUTSI ATSATSE SINYATSELO?

Calisile: Ngisengakahambi, kuneliphuzu lelilodvwa lengitsandza kucoca ngalo nawe.

Takhona: Kulungile.

Calisile: Caphela kutsi lisifundzisani liBhayibheli mayelana nemandla aNkulunkulu. LomBhalo lenginawo engcondweni nguJeremiya 10:12. Ngicela uwufundze?

Takhona: Kulungile. Utsi: “Kodvwa Nkulunkulu wawudala umhlaba ngemandla akhe lamakhulu; wesekela umhlaba ngekuhlakanipha kwakhe, weneka emazulu ngekucondza kwakhe”

Calisile: Ngiyabonga. Asesizindle sikhashana ngalelivesi. Kwadzingeka emandla lamanyenti yini kuze Nkulunkulu adale emazulu, umhlaba kanye nako konkhe lokukuwo?

Takhona: Kunjalo.

Calisile:Nangabe Nkulunkulu anemandla ekudala konkhe lokukhona, angeke yini sesilindzele kutsi angaphindze abe nawo emandla ekucondzisa indalo yakhe?

Takhona: Yebo, loko singakulindzela.

Calisile: Asewuphindze ucabange ngendvodzakati yakho. Yini lekwenta ukhatsateke nawuyibona isebumatimeni?

Takhona: Kubangelwa kutsi ngiyayitsandza. Ngoba ngumntfwanami.

Calisile: Kube namuhla bowunemandla ekucedza lokuhlupheka labhekene nako bowungakucedza yini?

Takhona: Noma kanjani bengingakucedza.

Calisile: Asewucabange kutsi loko kusho kutsini. LiBhayibheli lifundzisa kutsi Nkulunkulu uyakubona kuhlupheka kwetfu, uyasivela, futsi unemandla lamakhulu. Ungacabanga-ke kutsi Nkulunkulu udzinga kutibamba lokunganani kuze akhone kuhlala angangeneli, acedze lokuhlupheka ngekushesha?

Takhona: Angikaze sengiyicabange ngaleyondlela lendzaba.

Calisile: Akusho yini kutsi unesizatfu lesiphatsekako sekungangeneli kwanyalo, acedze lokuhlupheka kwetfu?a

Takhona: Ya-a, ngicabanga kutsi kungenteka unaso.

Calisile: Ngiva lucingo lwakho luyakhala, kuncono ngibuye ngalesinye sikhatsi, kuze sitowucoca kabanti ngalesihloko.

Takhona: Ngiyabonga. Ngingakujabulela loko.b