Indlela Yekutfutfukisa Emakhono Ekucoca Nebantfu

KUMELULA yini ngawe kucocisana nalabanye bantfu? Bantfu labanyenti kuyabetfusa kucabanga nje ngekucoca, ikakhulukati kucoca nemuntfu labangamati. Kungenteka kutsi bantfu labanjalo banemahloni. Mhlawumbe basuke batibuta: ‘Yini nje lengingacoca ngayo? Ngingacala njani kucocisana nalabanye? Yini lengingayenta kute lokucocisana kuchubeke?’ Bantfu labatetsembako futsi labatsandza kucoca kuvame kutsi kube ngibo labakhuluma kakhulu nakucocwa. Inkinga yabo kutsi abakhoni kwenta labanye bakhulume nekutsi nabo bafundze kulalela nakukhulunywa. Ngako-ke sonkhe, nome ngabe sinemahloni nobe sitsandza kucoca, kudzingeka silitfutfukise likhono lekucoca nalabanye.

Cala Ekhaya

Kute utfutfukise emakhono akho ekucoca, kungani ungacali kukwenta ekhaya? Kucocisana lokwakhako kungenta wonkhe umndeni ujabule.

Lokubaluleke kakhulu ekucocisaneni lokunjalo kubakhatsalela kakhulu labanye. (Dut. 6:6, 7; Taga 4:1-4) Nangabe sibakhatsalela labanye, sitawucocisana nabo, futsi sitawubalalela nangabe bafuna kukhuluma. Lokunye lokubalulekile kutsi ukhulume ngetintfo letizuzisako. Nangabe sineluhlelo lwekufundza liBhayibheli njalo kanye nelwesifundvo lesitichubela sona, kungaba nalokunyenti lesingacoca ngako. Kumsebentisa kahle bhukwana lotsi Kuhlolisisa ImiBhalo Malanga Onkhe, kungasikhutsata kutsi sicoce. Kungenteka kutsi sitfole lokuhlangenwe nako lokujabulisako emsebentini wekushumayela. Mhlawumbe singase sifundze ngentfo lenesifundvo lesitsite nobe lehlekisako. Kufanele sikwetayele kucocela emalunga emindeni yetfu ngaletintfo nasindzawonye. Loku kungaphindze kusisite kutsi sikwati kucoca nalabanye labangasiwo emalunga emindeni yetfu.

Kucocisana Nemuntfu Longamati

Bantfu labanyenti bayesaba kucoca nemuntfu labangamati. Kodvwa ngenca yekutsi BoFakazi BaJehova batsandza Nkulunkulu nabomakhelwane babo, benta imetamo yekufundza kucocisana nalabanye kute babatjele emaciniso laseBhayibhelini. Yini lengakusita kutsi utfutfukise kuloku?

Simiso lesikuFiliphi 2:4 silusito. Sikhutsatwa kutsi ‘singaticabangeli tsine kuphela, kodvwa sicabangele nalabanye.’ Asewucabange ngaloku: Nangabe ucala kubona umuntfu lotsite, naye usuke angakwati. Ungamenta njani kutsi ative akhululekile? Kuyasita kumoyitela ngemusa kanye nekumbingelela ukhombise bungani. Kepha kunyenti lokufanele ukukhumbule.

Kungenteka kutsi umphazamisile kuloko labekucabanga. Nangabe wetama kumenta akhulume ngentfo lesengcondvweni yakho ungakucabangeli loko lokusengcondvweni yakhe, ucabanga kutsi angakuphendvula kahle yini? Yini Jesu layenta eSamariya ngesikhatsi ahlangana nalomunye make emtfonjeni? Lomake abecabanga ngekukha emanti. Jesu wasebentisa loko kuze acoce naye, futsi wayishintja ngekushesha indzaba wase ukhuluma ngetintfo letimayelana naNkulunkulu.​—Joh. 4:7-26.

Nangabe unaka, nawe ungakwati kubona loko bantfu labakucabangako. Lomuntfu ubonakala ajabulile yini nobe akhatsatekile? Sewukhulile yini nobe mhlawumbe ubutsakatsaka? Kukhona yini lokukhombisa kutsi kulelikhaya kunebantfwana? Kubonakala shengatsi lomuntfu uphila kahle yini nobe uyahlupheka? Imihlobiso yendlu nobe tintfo latigabile tikhombisa kutsi utsandza inkholo letsite yini? Nangabe ukhuluma ngaleto tintfo nawumbingelela, lomuntfu utakutsatsa njengemuntfu lomkhatsalelako nalotsandza tintfo naye latitsandzako.

Nangabe ungakhoni kubonana nemnikati welikhaya buso nebuso, mhlawumbe uva liphimbo lakhe nje kuphela umnyango ube ukhiyiwe, yini longase uphetse ngayo? Kungenteka kutsi lomuntfu kukhona lakwesabako. Ungakusebentisa yini loko kute ucocisane naye usemnyango?

Kuletinye tindzawo ungakhona kwenta umuntfu akhulume ngekutsi umtjele lokutsite ngawe​—kutsi usukaphi, kungani umvakashele, kungani ukholelwa kuNkulunkulu, yini leyakwenta kutsi utadishe liBhayibheli nekutsi likusite njani wena. (Imis. 26:4-23) Kuliciniso kutsi loko kudzingeka ukwente ngekuhlakanipha futsi ube unemgomo locacile engcondvweni yakho. Loku kutawukwenta kutsi lomuntfu naye akutjele lokutsite ngaye aphindze akutjele nendlela lacabanga ngayo.

Kuletinye tindzawo, kwemukela tivakashi kulisiko. Bantfu bakwemukela ngekukhululeka kutsi ungene endlini futsi uhlale phansi. Nasewuhleti phansi, kudzingeka ubabute imphilo futsi ulalelisise nasebakuphendvula. Nawenta njalo, umnikati welikhaya utakulalela nawe nasewumtjela lote ngako. Labanye bantfu batijabulela kakhulu tivakashi, ngako-ke ningase nitsatse sikhatsi nibingelelana. Kuleso sikhashana, bangatfola nekutsi kukhona tintfo lofanana ngato nabo. Loko kungaholela ekucocisaneni ngetintfo letiseBhayibhelini ngendlela lephumelelako.

Kutsiwani nangabe linyenti lebantfu endzaweni yakini likhuluma letinye tilwimi longatati wena? Ungacoca njani nalabo bantfu? Nangabe ufundza kubingelela ngemagama lamelula aleto tilwimi, labantfu batawucaphela kutsi uyabakhatsalela. Loko kungavula indlela yekutsi uphindze ucoce nabo esikhatsini lesitako.

Indlela Yekucoca

Kute ugcine kucocisana kuchubeka, khombisa kutsi uyayikhatsalela imicabango yemuntfu lokhuluma naye. Mkhutsate kutsi akhulume ngekukhululeka nangabe afisa kukhuluma. Imibuto lekhetfwe kahle ingaba lusito. Imibuto ledzinga kutsi umuntfu asho imibono yakhe incono kakhulu ngobe imenta angagcini nje ngekuphendvula ngayebo nobe cha. Asesibekise: Ngemuva kwekusho intfo lekhatsata bantfu kuleyo ndzawo, mhlawumbe ungambuta: “Ucabanga kutsi yini lebangele lenkinga?” nobe “Ucabanga kutsi siyini sisombululo sayo?”

Nangabe ubuta umbuto, yilalelisise imphendvulo. Khombisa ngemavi akho, ngekuvuma ngenhloko nobe lokunye kute uvete kutsi uyamkhatsalela. Ungamngeni emlonyeni. Naka futsi ucabangisise ngalakushoko. ‘Kufanele usheshe kulalela, wephute kukhuluma, wephute nekutfukutsela.’ (Jak. 1:19) Nasewumphendvula, khombisa kutsi bewumlalelisisile nakakhuluma.

Kodvwa-ke khumbula nekutsi akusibo bonkhe bantfu labatayiphendvula imibuto lobabuta yona. Labanye babo, batawumane baphakamise emashiya nobe bamoyitele. Labanye bangamane nje batsi yebo nobe cha. Ungacansuki kodvwa bani nesineke. Ungetami kuphocelela umuntfu kutsi akhulume. Nangabe umuntfu atimisele kulalela, sebentisa lelo tfuba kute ucoce naye ngetintfo letakhako letisemiBhalweni. Ngekuhamba kwesikhatsi, lowo muntfu angase akutsatse njengemngani. Mhlawumbe utawubese uyakhululeka kutsi avete imibono yakhe nawucoca naye.

Nawucoca nebantfu, lungiselela kutsi uphindze ubuyele kubo. Nangabe umuntfu abuta imibuto leminyenti, mphendvule leminye yayo kodvwa ushiye munye nobe mibili kute uwuphendvule nawubuyela kuye. Cela kwenta lucwaningo bese ucoca naye ngemphendvulo loyitfolile. Nangabe lococa naye angakubuti, ungase uphetse ngekumbuta umbuto locabanga kutsi angawutsandza. Cela kutsi nicoce ngawo nawubuya. Emaphuzu longawasebentisa ungawatfola encwadzini letsi “Ukubonisana NgemiBhalo,” nakubomagazini labasandza kuphuma, Sicongosekulindza kanye ne-“Phaphama!”

Nasikanye Nalesikholwa Nabo

Nawucala kuhlangana nalomunye waBoFakazi BaJehova, uyasitsatsa yini sinyatselo kucala kute umati nome umane nje utithulele? Lutsandvo ngebazalwane betfu kufanele lusente sifune kubati. (Joh. 13:35) Ungacala njani kumcocisa? Ungase umtjele libito lakho bese uyambuta kutsi yena ungubani. Kumbuta kutsi wawatfola njani emaciniso kungaholela ekucocisaneni lokumnandzi futsi kutanisita kutsi natane. Ngisho kungatsiwa loko lokushoko akuvakali kahle, imetamo yakho itamkhombisa kutsi uyamkhatsalela futsi nguloko lokubalulekile.

Yini lengenta kutsi kucoca nelilunga lelibandla kuzuzise? Khombisa kulikhatsalela ngebucotfo lona kanye nemndeni walo. Nakusandza kuphela imihlangano, ungacoca ngemaphuzu lotfole kutsi angaba lusito. Loko kunganisita nobabili. Ungase usho lokutsandzile ku-Sicongosekulindza nobe ku-“Phaphama!” yamuva. Loko akukafaneli kwentiwe ngenjongo yekubukisa nobe kuhlola kutsi labanye banelwati lolungakanani. Kwente ngenjongo yekusho lokutsite lokutsandze kakhulu. Ningase nicoce ngesabelo lokungenteka kutsi lomunye wenu unaso eSikolweni Semsebenti WemaKhristu kanye nendlela langasenta ngayo. Ningase nicoce nangalokuhlangenwe nako kwasensimini.

Kuliciniso kutsi kukhatsalela bantfu kuvamise kuholela ekukhulumeni ngetintfo labanye bantfu labatishoko nalabatentako. Singacoca nangetintfo letihlekisako. Kuyakha yini loko lesicoca ngako? Nangabe sisinaka seluleko seliVi laNkulunkulu futsi silawulwa lutsandvo lwakhe, lesikushoko kutawuba ngulokwakhako.​—Taga 16:27, 28; Ef. 4:25, 29; 5:3, 4; Jak. 1:26.

Ngembikwekutsi siye ensimini siyalungiselela. Kungani ungalungiseleli indzatjana lemfishane lemnandzi kute uyicocele bangani bakho? Nangabe ufundza nobe uva tintfo letitsite letimnandzi, wagcine engcondvweni emaphuzu lofuna kuwacocela labanye. Ngekuhamba kwesikhatsi utawuba netintfo letinyenti longacoca ngato. Kwenta njalo kutakusita ucoce ngaletinye tintfo hhayi nje kuphela ngetintfo letivamile tamalanga onkhe. Ngetulu kwako konkhe, shengatsi loko lokukhulumako kungakhombisa indlela liVi laNkulunkulu leliligugu ngayo kuwe!​—Hla. 139:17.