Tikhombo Tencwajana Yekubhalela Emhlanganweni Wekuphila KwemaKhristu Nemsebenti Wawo
SEPTEMBER 5-11
UMCEBO LOSEVINI LANKULUNKULU | TIHLABELELO 119
‘Hamba NgeMitsetfo YaJehova’
(Tihlabelelo 119:1-8) Babusisiwe labo labatindlela tabo timsulwa, labo labahamba ngemitsetfo yaNkulunkulu. 2 Babusisiwe labo labagcina imiyalo yaSimakadze, bamfunisise ngayo yonkhe inhlitiyo yabo. 3 Labo-ke abakwenti lokungakalungi, kodvwa bahamba ngetindlela takhe. 4 Wena, Simakadze, usinike imiyalo yakho, wasiyala kutsi siyitfobele ngenhlonipho. 5 Shangatsi tindlela tami tingacondza njalo ekutigcineni timiso takho. 6 Nangingayigcina yonkhe imiyalo yakho, ngingeke ngihlazeke. 7 Ngiyawukudvumisa ngenhlitiyo lecotfo ngesikhatsi ngifundza tehlulelo takho letilungile. 8 Timiso takho ngitawutilalela; ungangishiyi nakancane.
w05 4/15 10 ¶3-4
Yetsemba LiVi LaJehova
Lalela LiVi LaNkulunkulu, Ujabule
3 Injabulo sibili siyitfola ngekulalela imitsetfo yaNkulunkulu. (Tihlabelelo 119:1-8) Nangabe siyilalela, Jehova utasitsatsa ‘njengalabo labatindlela tabo timsulwa.’ (Tihlabelelo 119:1) Kuba msulwa akusho kutsi sesiphelele; kunaloko, kukhombisa kutsi silwela kwenta intsandvo yaJehova Nkulunkulu. Nowa “abelungile amsulwa esitukulwaneni sakhe, ahamba naNkulunkulu.” Nowa lowetsembekile wasindza kuZamcolo nemndeni wakhe ngobe wamlalela Jehova. (Genesisi 6:9; 1 Phetro 3:20) Ngendlela lefanako, kute sisindze ekupheleni kwalelive kufanele ‘siyitfobele ngenhlonipho imiyalo yaNkulunkulu futsi sente intsandvo yakhe.—Tihlabelelo 119:4.
4 Jehova angeke asishiye nangabe ‘simdvumisa ngenhlitiyo lecotfo futsi sitilalela timiso takhe.’ (Tihlabelelo 119:7, 8) Nkulunkulu akazange amshiye Joshuwa umholi wema-Israyeli, lowalalela seluleko ‘sekucabangisisa ujule ngemtsetfo waNkulunkulu busuku nemini, kuze ukhone kukwenta konkhe loku lokubhalwe kuwo.’ Loko kwamenta waphumelela, futsi wenta ngekuhlakanipha. (Joshuwa 1:8) Nasekatawufa Joshuwa wachubeka amdvumisa Nkulunkulu, futsi wakhumbuta ema-Israyeli: “Nani niyati ngenhlitiyo yenu yonkhe nangemphefumulo wenu wonkhe kutsi kute nome sinye setsembiso lesingazange sifezeke kuto tonkhe letetsembiso letinhle Simakadze Nkulunkulu wenu laninike tona.” (Joshuwa 23:14) NjengaJoshuwa nembhali weTihlabelelo 119, natsi singatfola injabulo nempumelelo nangabe sidvumisa Jehova, futsi sitsembela eVini lakhe.
(Tihlabelelo 119:33-40) Ngifundzise, Simakadze, kuhamba ngetimiso takho, khona ngiyawuhamba ngato, kuze kubesekupheleni. 34 Ngiphe ingcondvo yekwati umtsetfo wakho, kuze ngiwugcine kahle, ngiwulalele ngenhlitiyo yami yonkhe. 35 Ngiholele endleleni yemiyalo yakho, ngobe lendlela iyinjabulo yami. 36 Condzisa inhlitiyo yami ekutfobeleni timiso takho, ingalitjatiswa yingcebo. 37 Fulatselisa emehlo ami ekubukeni tintfo letingenamsebenti; ngiphe kuphila ngekwelivi lakho. 38 Gcina setsembiso sakho, lowanginika sona, mine nceku yakho. Lesetsembiso salabo labakwesabako. 39 Ngiphephise ehlazweni lengilesabako, ngobe timiso takho tilungile. 40 Maye, ngiyatilangatelela timiso takho! Hlumelelisa kuphila kwami ngekulunga kwakho.
w05 4/15 12 ¶12
Yetsemba Livi LaJehova
LiVi LaJehova Liniketa Sibindzi
12 Kulalela sicondziso seliVi laNkulunkulu kusinika sibindzi lesisidzingako kuze sikhone kubeketelela tinkinga tekuphila. (Tihlabelelo 119:33-40) Ngekutfobeka, sifuna sicondziso saJehova kute sikwati kugcina umtsetfo wakhe ‘ngenhlitiyo yonkhe.’ (Tihlabelelo 119:33, 34) Njengemhlabeleli, sicela Nkulunkulu sitsi: “Condzisa inhlitiyo yami ekutfobeleni timiso takho, ingalitjatiswa yingcebo.” (Tihlabelelo 119:36) Njengemphostoli Pawula, ‘sitiphatsa ngekwetsembeka kuto tonkhe tintfo.’ (Hebheru 13:18) Nangabe umcashi afuna singetsembeki entfweni letsite, siba nesibindzi sinamatsele eticondzisweni taNkulunkulu—futsi Jehova uyasibusisa nasenta njalo. Ecinisweni, uyasisita kute sikhone kulwisana nato tonkhe tifiso letimbi. Ngako-ke, asithantaze sitsi: “Fulatselisa emehlo ami ekubukeni tintfo letingenamsebenti.” (Tihlabelelo 119:37) Ngeke sititsandze tintfo letenyanywa nguNkulunkulu. (Tihlabelelo 97:10) Loku kutawusenta sigweme kubuka titfombe letikhombisa kungcola nekusebentelana nemimoya.—1 Khorinte 6:9, 10; Sembulo 21:8.
(Tihlabelelo 119:41-48) Shangatsi ungangiphatsa ngemusa wakho, Simakadze; ungigone ngensindziso yakho njengekwesetsembiso sakho. 42 Khona-ke ngiyawukwati kubaphendvula labo labangetfukako, ngobe livi lakho ngiyaletsemba. 43 Ngiphe emandla ekukhuluma liciniso, ngobe litsemba lami ngilibeke etimisweni takho. 44 Umtsetfo wakho ngiyakuwugcina phakadze naphakadze. 45 Ngiyawuhamba ngekukhululeka, ngobe ngetamile kuhlonipha imitsetfo yakho. 46 Imiyalo yakho, Nkulunkulu, ngiyawuyimemetela nasembikwemakhosi, ngingeke ngibe nemahloni ngayo. 47 Ngiyatfokota ngemiyalo yakho, ngobe ngiyayitsandza. 48 Imiyalo yakho ngiyayihlonipha ngiyitsandze futsi; ngiyawuhlala ngizindla ngetimiso takho.
w05 4/15 13 ¶13-14
Yetsemba Livi LaJehova
13 Lwati lolungulonalona lweliVi laNkulunkulu liyasicinisa kuze sishumayele ngesibindzi. (Tihlabelelo 119:41-48) Siyasidzinga sibindzi kuze ‘siphendvule labo labasetfukako.’ (Tihlabelelo 119:42) Ngaletinye tikhatsi, singase sibe njengebafundzi baJesu labebashushiswa, labathantaza batsi: “Manje Jehova, yenta tinceku takho tichubeke tikhuluma livi lakho ngesibindzi.” Waba yini umphumela? “Bonkhe bagcwala umoya longcwele, bakhuluma livi laNkulunkulu ngesibindzi.” Natsi iNkhosi lenguMbusi isinika sibindzi sekukhuluma livi layo singesabi.—Imisebenti 4:24-31.
14 Natsi sitawuba nesibindzi lesisidzingako kuze singabi nemahloni ekushumayela nangabe silatisa “liciniso” futsi ‘siwugcina njalo umtsetfo waNkulunkulu.’ (Tihlabelelo 119:43, 44) Kulidadisha ngekutimisela liVi laNkulunkulu kuyasihlomisa kuze ‘simemetele imiyalo yakhe nasembikwemakhosi.’ (Tihlabelelo 119:46) Umthantazo nemoya waJehova kutawusisita sikhone kusho tintfo letifanele ngendlela lekahle. (Matewu 10:16-20; Kholose 4:6) Pawula wakhuluma ngesibindzi ngemiyalo yaNkulunkulu kubabusi bangelikhulu lekucala. Nasi sibonelo, washumayela kuFeliksi umbusi waseRoma ‘lowamlalela nakakhuluma ngekukholwa kwakhe kuKhristu Jesu.’ (Imisebenti 24:24, 25) Pawula waphindze washumayela naphambi kwaFestu uMbusi naseNkhosini Agripha. (Imisebenti 25:22–26:32) Ngekusekelwa nguJehova, natsi singashumayela ngesibindzi, futsi singabi ‘nemahloni ngetindzaba letimnandzi.’—Roma 1:16.
Funisisa Umcebo EVini LaNkulunkulu
(Tihlabelelo 119:71) Kwaba kuhle kutsi ngihlushwe kuze ngifundze timiso takho.
w06 9/1 14 ¶4
Emaphuzu Lagcamile Encwadzi Yesihlanu YeTihlabelelo
119:71—Kukhona yini lokuhle ngekuhlushwa? Bumatima bungasifundzisa kutsembela ngalokuphelele kuJehova, kuthantaza ngebucotfo kuye kanye nekulidadisha ngekutimisela liBhayibheli nekukusebentisa loko lelikushoko. Ngetulu kwaloko, indlela lesenta ngayo nasihlushwa ingembula emaphutsa lesinawo lesingabese siyawalungisa. Kuhlushwa ngeke kusicasule nangabe sikuvumela kutsi kwembule emaphutsa lesinawo.
(Tihlabelelo 119:96) Yonkhe intfo, nome iyinhle kanganani, inemkhawulo; kodvwa imiyalo yakho ite umkhawulo.
w06 9/1 14 ¶5
Emaphuzu Lagcamile Encwadzi Yesihlanu YeTihlabelelo
119:96—Asho kutsini lamavi latsi: “Yonkhe intfo, nome iyinhle kanganani, inemkhawulo”? Umhlabeleli ukhuluma ngebuhle ngekwembono webantfu. Kungenteka bekacabanga kutsi umbono wemuntfu ngebuhle ulinganiselwe. Ngalokuphambene naloko, umyalo waNkulunkulu awunamkhawulo. Sicondziso sawo sisebenta kuto tonkhe tici tekuphila.
SEPTEMBER 12-18
UMCEBO LOSEVINI LANKULUNKULU | TIHLABELELO 120-134
‘Lusito Lwami Luchamuka KuJehova’
(Tihlabelelo 121:1, 2) Ngiphakamisela emehlo ami etintsabeni; lusito lwami luyawuchamuka kuphi? 2 Lusito lwami luchamuka kuSimakadze lowenta lizulu nemhlaba.
w04 12/15 12 ¶3
Jehova UnguMsiti Wetfu
UMtfombo Welusito Longadvumati
3 Umhlabeleli wacala ngekuveta kutsi Jehova singametsemba ngobe unguMdali: “Ngiphakamisela emehlo ami etintsabeni; lusito lwami luyawuchamuka kuphi? Lusito lwami luchamuka kuSimakadze lowenta lizulu nemhlaba.” (Tihlabelelo 121:1, 2) Umhlabeleli akawaphakamiselanga kunoma nguyiphi intsaba emehlo akhe ngesikhatsi lamavi abhalwa, lithempeli laJehova laliseJerusalema. Lelidolobha lalisetulu etintsabeni takaJuda, laliyindzawo yekuhlala yaJehova lengumfanekiso. (Tihlabelelo 135:21) Kungenteka umhlabeleli waphakamisela emehlo akhe etintsabeni taseJerusalema lapho kwakwakhiwe khona lithempeli laJehova, abeciniseka kutsi utawutfola lusito kuJehova. Kungani umhlabeleli abeciniseka kangaka kutsi Jehova angamsita? Ngobe nguye “lowenta lizulu nemhlaba.” Kufana nekutsi umhlabeleli bekatsi, ‘Kute lokungavimba uMdali lonemandla kutsi angisite!’—Isaya 40:26.
(Tihlabelelo 121:3, 4) Angeke avume kutsi lunyawo lwakho lushelele, lowo longumlondvoloti wakho aketeli. 4 Ngempela lowo longumlondvoloti waka-Israyeli aketeli, akalali.
w04 12/15 12 ¶4
Jehova UnguMsiti Wetfu
4 Umhlabeleli wabese uyachaza kutsi Jehova uhlale atiphaphamele tidzingo tetinceku takhe: “Angeke avume kutsi lunyawo lwakho lushelele, lowo longumlondvoloti wakho aketeli. Ngempela lowo longumlondvoloti waka-Israyeli aketeli, akalali.” (Tihlabelelo 121:3, 4) Angeke kwenteke Nkulunkulu avumele labo labametsembako ‘bashelele’ nobe bawe bangasakhoni kuvuka. (Taga 24:16) Leni? Ngobe Jehova unjengemelusi lophapheme, loweluse timvu takhe. Akudvudvuti yini loko? Angeke ayekele kunaka tidzingo tebantfu bakhe. Uhlala abagadzile.
(Tihlabelelo 121:5-8) Simakadze ngumlondvoloti wakho, ungumtfunti wakho esandleni sakho sekudla. 6 Lilanga lingeke likubhadlise emini nenyanga ebusuku. 7 Simakadze uyawukuvikela kuko konkhe lokubi, alondvolote imphilo yakho. 8 Simakadze uyawulondvolota kuphuma kwakho nekungena kwakho, kusukela manje kuze kube phakadze.
w04 12/15 13 ¶5-7
Jehova UnguMsiti Wetfu
5 Aciniseka kutsi Jehova unguMvikeli locotfo webantfu bakhe, umhlabeleli wabhala watsi: “Simakadze ngumlondvoloti wakho, ungumtfunti wakho esandleni sakho sekudla. Lilanga lingeke likubhadlise emini nenyanga ebusuku.” (Tihlabelelo 121:5, 6) Kumuntfu lohamba ngetinyawo eMpumalanga Lesekhatsi, indzawo lenemtfunti beyiba sivikelo lesihle elangeni lelishisako. Jehova unjengemtfunti kubantfu bakhe, ubavikela ekushiseni lokukhulu kwekucindzeteleka. Naka kutsi Jehova kutsiwa ‘usesandleni sekudla.’ Emphini yasendvulo, sihlangu sasingasivikeli kangako sandla sangesekudla selisotja ngobe sasibanjwa ngesandla sangesencele. Umngani sibili abengalivikela ngekutsi eme ngesekudla salo. Njengalomngani, Jehova uma eceleni kwetikhonti takhe, akulungele kutisita.
6 Jehova uyoke ayekele yini kusita bantfu bakhe? Cha. Umhlabeleli waphetsa ngekutsi: “Simakadze uyawukuvikela kuko konkhe lokubi, alondvolote imphilo yakho. Simakadze uyawulondvolota kuphuma kwakho nekungena kwakho, kusukela manje kuze kube phakadze.” (Tihlabelelo 121:7, 8) Naka kutsi umbhali wabese ukhuluma ngalokutawenteka. Evesini 5, abetsite: “Simakadze ngumlondvoloti wakho.” Kodvwa kulamavesi, umhlabeleli utsi: ‘Simakadze uyawukulondvolota.’ Ngako, tikhonti teliciniso tiyacinisekiswa kutsi Jehova utawuchubeka atisita nasesikhatsini lesitako. Noma bangayaphi, noma bangabhekana nanobe ngubuphi bumatima, uyawuhlale abavikela.—Taga 12:21.
7 Ngempela, umbhali weTihlabelelo 121 abeciniseka kutsi uMdali lonemandla uvikela tinceku takhe njengemelusi lokhatsalelako nanjengemlindzi lophapheme. Sinesizatfu lesihle sekuciniseka njengemhlabeleli, ngobe Jehova akashintji. (Malakhi 3:6) Loku kusho kutsi Jehova utawuhlale asivikela yini? Cha, kodvwa nangabe sisatsembele kuye njengeMdali wetfu, uyosivikela kuko konkhe lokungalimata buhlobo betfu naye. Siye sitibute kutsi, ‘Jehova usisita njani?’ Ase sicoce ngetindlela letine lasisita ngato. Kulesihloko, sitawucoca ngetindlela latisita ngayo tinceku takhe ngetikhatsi teBhayibheli. Kulesilandzelako, sitawucoca ngetindlela lasita ngato bantfu bakhe lamuhla.
Funisisa Umcebo EVini LaNkulunkulu
(Tihlabelelo 123:2) Yebo, njengobe inceku yencike enkhosini yayo, nanjengobe umzanyana encike kumphatsi wakhe, natsi-ke sincike kuSimakadze, longuNkulunkulu wetfu, aze abe nesihawu kitsi.
w06 9/1 15 ¶4
Emaphuzu Lagcamile Encwadzi Yesihlanu YeTihlabelelo
123:2—Nguliphi liphuzu lelivetwa ngumfanekiso ‘wemehlo etinceku’? Timbili tizatfu letenta tinceku tibuke tandla teNkhosi: kute ticondze tifiso teNkhosi futsi titfole sivikelo kanye netidzingo tekuphila. Ngalokufananako, natsi sibuka Jehova kuze sicondze intsandvo yakhe futsi sitfole umusa wakhe.
(Tihlabelelo 133:1-3) Maye, kuhle kumnandzi kuhlalisana kwebazalwane ngekuvana. 2 Kuhle kufana nemakha, lanuka kamnandzi, nakatselwe enhloko, ageleta, adzimate ehlela esilevini, yebo, esilevini sa-Aroni atfontsela nasetiphikeni tetingubo takhe. 3 Kufana nematolo eNtsaba iHemoni, nakehlela eNtsabeni iSiyoni. Kulapho-ke lapho Simakadze ehlisela khona tibusiso takhe, yebo, nekuphila, kuze kube phakadze.
w06 9/1 16 ¶3
Emaphuzu Lagcamile Encwadzi Yesihlanu YeTihlabelelo
133:1-3. Bunye bebantfu baJehova buyasidvudvuta, buyasivuselela futsi buyasicabula. Akufaneli sibungcolise ngekufunana nemaphutsa alabanye, ngekucabana nobe ngekukhonona.
SEPTEMBER 19-25
UMCEBO LOSEVINI LANKULUNKULU| TIHLABELELO 135-141
‘Sentiwe Ngendlela Lemangalisako’
(Tihlabelelo 139:14) Ngiyakudvumisa ngobe ngentiwe ngendlela leyesabekako nalemangalisako. Imisebenti yakho iyamangalisa, loko ngikwati kahle kamhlophe.
w07 6/15 21 ¶1-4
‘Sentiwe Ngendlela Lemangalisako’
UMHLABA ugcwele indalo lemangalisako. Yaba khona njani? Labanye bakholelwa kutsi yaba khona ngaphandle kweMdali lohlakaniphile. Labanye bakholelwa kutsi kumane sale kutsi uMdali ukhona kusinciphisela ematfuba ekuyicondza kahle imvelo. Bakholelwa kutsi indalo lesemhlabeni iyinkimbinkimbi kakhulu, yehlukahlukene futsi imangalisa kakhulu kutsi ngabe yativelela. Bantfu labanyenti, lokufaka ekhatsi nabososayensi labatsite, bayavuma kutsi bufakazi bubonisa kutsi indzawo yonkhe yentiwa nguMdali lohlakaniphile, lonemandla nalonemusa.
2 INkhosi Davide yaka-Israyeli wasendvulo nayo yayiciniseka kutsi uMdali kufanele advunyiswe ngenca yendalo yakhe lemangalisako. Nanobe Davide aphila kadzeni basengekho bososayensi, wacondza kutsi tintfo letinyenti letimangalisako tibufakazi bemsebenti waNkulunkulu wekudala. Davide bekudzingeka acabange ngemtimba wakhe kuze likhono laNkulunkulu lelimangalisako lekudala limjabulise. Wabhala watsi: “Ngiyakudvumisa ngobe ngentiwe ngendlela leyesabekako nalemangalisako. Imisebenti yakho iyamangalisa, loko ngikwati kahle kamhlophe.”—Tihlabelelo 139:14.
3 Kucabangisisa kwaDavide kwamsita waciniseka kakhulu. Lamuhla, etikolweni, kumathelevishini nakumabhayisikobho kugcwele timfundziso letingemanga mayelana nemvelaphi yemuntfu futsi letingalimata kukholwa kwetfu. Kuze sibe nekukholwa njengaDavide, kufanele sicabangisise. Akufanele sivumele labanye basicabangele, ikakhulukati etindzabeni letibalulekile njengekuba khona kweMdali nendzima yakhe.
4 Ngetulu kwaloko, kucabanga ngemisebenti yaJehova kwenta simbonge kakhulu futsi siciniseke ngetetsembiso takhe ngelikusasa. Loko kungasenta simati kancono Jehova futsi simkhonte. Ase sicoce ngendlela bososayensi labawacinisekise ngayo emavi aDavide laphetsa ngawo latsi ‘sentiwe ngendlela lemangalisako.’
(Tihlabelelo 139:15, 16) Ematsambo ami abengakafihlakali kuwe, ngesikhatsi ngibunjwa ekusitsekeni ngelukwa esiswini samake. 16 Wangibona ngiselihlwili. Onkhe emalanga ami abhalwa encwadzini yakho, ajutjwa, lisengakefiki nalinye lawo.
w07 6/15 22-23 ¶7-11
‘Sentiwe Ngendlela Lemangalisako’
7 “Ematsambo ami abengakafihlakali kuwe, ngesikhatsi ngibunjwa ekusitsekeni ngelukwa esiswini samake.” (Tihlabelelo 139:15) Inhlayiya yekucala yehlukana yakha tinhlayiya letinsha nato tachubeka tehlukana. Ngekushesha, letinhlayiya tacala kutihlukanisa, noma kutihlela, ngekwemisebenti yato yaba tinhlayiya temiva, temisipha, tesikhumba, njalonjalo. Tinhlayiya teluhlobo lolufanako tahlangana takha titfo temtimba. Nasi sibonelo, ngeliviki lesitsatfu kusukela ukhulelwe, wacala kuba nematsambo. Nasewunemaviki langu-7 futsi ucishe ube ngemasentimitha langu-2,5 budze, besewunematsambo langu-206 nanobe abesengakacini.
8 Lokukhula lokumangalisako kwenteka esinyeni, labangaboni khona bantfu kube shengatsi kusematfunjini emhlaba. Ecinisweni, kunyenti lesingakwati mayelana nendlela lesikhula ngayo. Ngekwesibonelo, ngubani lowatjela takhi telufuto kutsi aticale kuhlela tinhlayiya ngekwemsebenti yato? Mhlawumbe bososayensi bayogcine bakutfolile loko, kodvwa njengobe Davide asho evesini lelilandzelako kutsi, uMdali wetfu—Jehova—abesolo akucondza kahle loku.
9 “Wangibona ngiselihlwili. Onkhe emalanga ami abhalwa encwadzini yakho, ajutjwa, lisengakefiki nalinye lawo.” (Tihlabelelo 139:16) Inhlayiya yakho yekucala beyinemininingwane lemayelana nekutsi umtimba wakho utawuba njani. Lemininingwane yasita nawakhiwa esinyeni tinyanga letingu-9 ungakatalwa nalapho ukhula. Kuleso sikhatsi, umtimba wakho wadlula etigabeni letinyenti, usitwa ngulemininingwane lebeyikule nhlayiya yekucala.
10 Davide abengati lutfo ngetinhlayiya kanye nangetakhi telufuto futsi ,bekete ngisho ne-microscope. Kodvwa bekakucondza kahle kutsi kukhula kwemtimba wakhe kwakukhombisa kutsi kuneluhlelo lolutsite lolwaluhlelwe kusengaphambili. Kungenteka kutsi Davide bekanelwati lolutsite ngendlela umbungu lokhula ngayo, ngobe bekacabanga kutsi sigaba ngasinye sekukhula kufanele silandzele luhlelo lolutsite loseluvele lukhona. Ngelulwimi lolusankondlo, wachaza kutsi loluhlelo ‘lubhalwe encwadzini’ yaNkulunkulu.
11 Nalamuhla, siyati kutsi nangabe ufute batali bakho nobe bokhokho bakho,ngebudze bakho, ngekuma kwebuso bakho, noma ngemehlo akho nobe ngembala wetinwele takho nangaletinye tici letinyenti—loko kwancunywa takhi takho telufuto. Inhlayiya yakho ngayinye inetakhi telufuto letingamashumi etinkulungwane, futsi sakhi ngasinye siyincenye yeliketamu lelidze le-DNA (deoxyribonucleic acid). Imininingwane yekwakheka kwemtimba wakho ‘ibhalwe’ ku-DNA yakho. Sikhatsi ngasinye lapho tinhlayiya takho tehlukana—kuze takhe letinsha nobe kwakheke letinye esikhundleni saletindzala—i-DNA yakho indlulisela leyomininingwane, ngekwenta njalo ikugcine uphila futsi ubukeka ngendlela lefanako. Lesi sibonelo lesihamba embili semandla nekuhlakanipha kweMdali wetfu losezulwini!
(Tihlabelelo 139:17, 18) Imicabango yakho ijulile, Nkulunkulu! Maye, bukhulu bunyenti bayo! 18 Nangingayibala, ingaba minyenti kwendlula tinhlavu tesihlabatsi. Nangivuka, wena usenami.
w07 6/15 23 ¶12-13
‘Sentiwe Ngendlela Lemangalisako’
Ingcondvo Yetfu Lemangalisako
12 “Imicabango yakho ijulile, Nkulunkulu! Maye, bukhulu bunyenti bayo! Nangingayibala, ingaba minyenti kwendlula tinhlavu tesihlabatsi.” (Tihlabelelo 139:17, 18a) Netilwane tentiwe ngalokumangalisako, futsi letinye tinemiva kanye nemakhono lendlula ebantfu. Kodvwa Nkulunkulu waniketa bantfu emakhono nengcondvo leyehlukile kuneyetilwane. Lenye incwadzi yesayensi itsi: “Nanobe tsine bantfu sifana naletinye tintfo letiphilako, sihlukile kuto ngekutsi sinelikhono lekucabanga nelekukhuluma. Sehlukile nangekuba nesifiso lesikhulu sekutati kutsi: Sakheke njani? Sentiwa njani?” Lena yimibuto Davide lazindla ngayo.
13 Lokubaluleke kakhulu, lesehluke ngako etilwaneni kutsi sinelikhono lekucabanga njengaNkulunkulu. Lesipho lesikhetsekile singulenye yetindlela letikhombisa kutsi sentiwe ‘ngemfanekiso waNkulunkulu.’ (Genesisi 1:27) Davide wasisebentisa kahle lesipho. Wazindla ngebufakazi bekuba khona kwaNkulunkulu nangetimfanelo letinhle letibonakala emhlabeni. Davide bekanetincwadzi tekucala temiBhalo Lengcwele Nkulunkulu abetembule kuto kanye nemisebenti yakhe. LemiBhalo lephefumulelwe yasita Davide kutsi acondze imicabango, buntfu kanye nenjongo yaNkulunkulu. Kuzindla ngemiBhalo, indalo nendlela Nkulunkulu lasebentelana ngayo naye kwamenta wadvumisa uMdali wakhe.
w06 9/1 16 ¶8
Emaphuzu Lagcamile Encwadzi Yesihlanu YeTihlabelelo
139:17, 18. Lwati lesinalo ngaJehova luyasijabulisa yini? (Taga 2:10) Nangabe kunjalo, sinemtfombo wenjabulo longashi. Imicabango yaJehova “minyenti kwendlula tinhlavu tesihlabatsi.” Kuyohlale kukunyenti lokufanele sikufundze ngaye.
Funisisa Umcebo EVini LaNkulunkulu
(Tihlabelelo 136:15) Wacitsa Faro nemphi yakhe ngalo, ngobe umusa wakhe ume kuze kube phakadze.
it-1 783 ¶5
Luhambo Lwekuphuma EGibhithe
Ngekukhombisa emandla akhe, Jehova waphakamisa libito lakhe ngekutsi akhulule ema-Israyeli. Njengobe ema-Israyeli abesavikelekile aselusentseni lweLwandle Lolubovu, Mosi wawahola ngengoma kwase kutsi Miriyamu umphrofethikati watsatsa umntjingo wawudlala ahlabela nabo bonkhe labasikati futsi bagidza bavuma lengoma. (Eks 15:1, 20, 21) Ema-Israyeli besekahlukene ngalokuphelele netitsa tawo. Ngesikhatsi aphuma eGibhithe awazange ahlushwa ngumuntfu nobe silwane sasendle futsi ngisho nenja ayizange iwahhongela nobe iwalume. (Eks 11:7) Nanobe umbhali wa-Eksodusi angazange asho kutsi Faro waya matfupha elwandle nelibutfo lakhe futsi wabhujiswa, Tihlabelelo 136:15 tiyasho kutsi Jehova “wacitsa Faro nemphi yakhe” eLwandle Lolubovu.
(Tihlabelelo 141:5) Ngingamane ngijeziswe ngumuntfu lolungile, loko kungumusa kimi; angamane angitsetsise, loko kungemafutsa enhloko yami, kodvwa umkhuleko wami uphambene netento letimbi talababi.
Kungani Kuyekeliswa Kuba NguFakazi Kulilungelo Lelutsandvo
Kute sisite umuntfu loyekelisiwe kuba nguFakazi kutsi abuye ebandleni, kufanele sikhombise kutsi siyamtsandza ngekuhlonipha lelilungiselelo. Nasi sibonelo: Cabanga ngebacanci lababili betintsaba labalindzele kutfola lusito ngelilanga lelishubisa umnkantja lasebusika. Ngesizatfu sekutsi kubandza kakhulu, munye kulabacanci uyadzinwa futsi afune kulala. Kodvwa nakalala echweni, utakufa. Kute amsite ahlale aphapheme, umngani wakhe umshaya ngemphama ebusweni. Ngisho nobe loku kubuhlungu, kungakusindzisa kuphila kwakhe. Davide washo intfo lefanako ngesikhatsi atsi: “Ngingamane ngijeziswe ngumuntfu lolungile, loko kungumusa kimi.” (Tihlabelelo 141:5) Davide wabona kutsi ngisho nobe sijeziso sibuhlungu, sitamsita.
SEPTEMBER 26–OCTOBER 2
UMCEBO LOSEVINI LANKULUNKULU | TIHLABELELO 142-150
‘Jehova Mkhulu Futsi Ufanele Kubongwa Kakhulu’
(Tihlabelelo 145:1-9) Ngiyawuphakamisa wena, Nkulunkulu wami neNkhosi yami, ngituse libito lakho phakadze naphakadze. 2 Ngiyawukubabata onkhe emalanga, ngidvumise libito lakho phakadze naphakadze. 3 Mkhulu Simakadze, ufanele kudvunyiswa kakhulu, bukhulu bakhe abuphenyisiseki. 4 Titukulwane ngekwelamana kwato tiyawubikelana ngemisebenti yakho; tiyawumemetela ngemisebenti yakho yemandla. 5 Tiyawukhuluma ngenkhatimulo yakho, tikhulume ngebukhosi bakho; mine ngiyawuzindla ngemisebenti yakho lemangalisako. 6 Bantfu bayawubabata bukhulu bemandla akho, nami ngibabate bukhulu bakho. 7 Bayawubalisa ngeludvumo lwakho, nangebukhulu betento takho letinhle, bahlabele ngekulunga kwakho. 8 Simakadze unemusa nesihawu, uyephuta kutfukutsela andze ngemusa. 9 Simakadze muhle kubo bonkhe, uyayihawukela imisebenti yakhe yonkhe.
w04 1/15 10 ¶3-4
Timfanelo TaNkulunkulu Tiphakeme
‘Ngiyawuphakamisa Nkulunkulu INkhosi’
3 Nanobe Davide abeyinkhosi lemiswe nguNkulunkulu, kodvwa abetsatsa Jehova njengeNkhosi yaka-Israyeli. Davide watsi: “Yebo, Simakadze, umbuso nawo wakho. Wena uphakeme wengamela konkhe.” (1 Tikhronike 29:11) Davide abematisa Nkulunkulu njengeMbusi. Wahlabela watsi: “Ngiyawuphakamisa wena, Nkulunkulu wami neNkhosi yami, ngituse libito lakho phakadze naphakadze. Ngiyawukubabata onkhe emalanga, ngidvumise libito lakho phakadze naphakadze.” (Tihlabelelo 145:1, 2) Bekusifiso saDavide kudvumisa Jehova Nkulunkulu lilanga lonkhe kuze kube phakadze.
4 Tihlabelelo 145 tiyimphendvulo lenemandla yaloko Sathane lakusho ngaNkulunkulu kutsi ungumbusi lonebugovu logodlela tidalwa takhe inkululeko. (Genesisi 3:1-5) Letihlabelelo tiphindze tivete emanga aSathane ekutsi labo labalalela Nkulunkulu bamlalela ngobe kukhona labatakutfola, hhayi ngobe bamtsandza. (Jobe 1:9-11; 2:4, 5) NjengaDavide, emaKhristu eliciniso lamuhla aniketa imphendvulo kulokumangalelwa nguDeveli lokungemanga. Alitsatsa njengaleliligugu litsemba lawo lekuphila phakadze lapho sekubusa uMbuso ngobe afisa kudvumisa Jehova phakadze. Tigidzi seticalile kumdvumisa ngekuba nekukholwa emhlatjelweni waJesu loyinhlawulo nangekukhonta Jehova ngekutfobeka nangekutitsandzela njengetikhonti takhe letitinikele futsi tabhajatiswa.—Roma 5:8; 1 Johane 5:3.
w04 1/15 11 ¶7-8
Timfanelo TaNkulunkulu Tiphakeme
Tibonelo Tebukhulu BaNkulunkulu
7 Tihlabelelo 145:3 tisiniketa sizatfu lesiyinhloko sekudvumisa Jehova. Davide uyahlabela atsi: “Mkhulu Simakadze, ufanele kudvunyiswa kakhulu, bukhulu bakhe abuphenyisiseki.” Bukhulu baJehova abunamkhawulo. Bantfu angeke bakhone kubuphenya, kubucondza nobe kubulinganisa ngalokuphelele. Kodvwa sitawuzuza ngekuhlola tibonelo tebukhulu baJehova lobungaphenyeki.
8 Yetama kukhumbula sikhatsi lapho wawukhashane nemalambu asedolobheni futsi ubuka etulu esibhakabhakeni ebusuku. Takumangalisa yini tinkanyeti letinyenti lowatibona? Kungenteka wativa ufisa kudvumisa Jehova ngebukhulu bakhe nangekudala tonkhe tintfo letisezulwini. Loko lowakubona bekumane nje kuyincenye lencane yetinkanyeti letisemtsaleni umhlaba loyincenye yawo. Ngetulu kwaloko, kulinganiselwa kutsi kukhona imitsala lengetulu kwetigidzi letitinkulungwane letilikhulu, ungakhona kubona lemitsatfu ungasebentisi i-telescope. Ecinisweni, tinkanyeti kanye nemitsala leminyenti ifakazela emandla aJehova ekudala kanye nebukhulu bakhe lobungaphenyeki.—Isaya 40:26.
w04 1/15 14 ¶20-21
Timfanelo TaNkulunkulu Tiphakeme
Timfanelo TaNkulunkulu Tekutiphatsa Tiphakeme
20 Njengobe sibonile, emavesi ekucala lasitfupha eTihlabelelo 145 asinika tizatfu letivakalako tekudvumisa Jehova ngenca yetintfo letihlobene nebukhulu bakhe lobungaphenyeki. Emavesi 7 kuya ku-9 acacisa bukhulu baNkulunkulu ngekukhuluma ngetimfanelo takhe letiphakeme. Davide wahlabela watsi: “Bayawubalisa ngeludvumo lwakho, nangebukhulu betento takho letinhle, bahlabele ngekulunga kwakho. Simakadze unemusa nesihawu, uyephuta kutfukutsela andze ngemusa. Simakadze muhle kubo bonkhe, uyayihawukela imisebenti yakhe yonkhe.”
21 Lapha Davide ucale agcizelele buhle nekulunga kwaJehova—lokutimfanelo Sathane Develi latingabata. Letimfanelo tibatsintsa njani labatsandza Nkulunkulu nalabasekela bukhosi bakhe? Phela, buhle baJehova nendlela yakhe lelungile yekubusa yenta tikhonti takhe tijabule kakhulu kangangekutsi atiyekeli kumdvumisa. Ngetulu kwaloko, buhle baJehova bufinyelela “kubo bonkhe.” Siyetsemba kutsi loku kutawusita labanyenti kutsi baphendvuke futsi babe tikhonti taNkulunkulu weliciniso kungakephuti.—Imisebenti 14:15-17.
w04 1/15 15 ¶2
Lutsandvo LwaJehova Lolucotfo Lukhulu
2 Jehova ukhombisa kutsi utitsandza kakhulu tikhonti takhe futsi lutsandvo lwakhe alupheli. Lolutsandvo luchazwe ngeligama lesiHebheru lelihunyushwe ngekutsi “umusa” nobe “lutsandvo lolucotfo.” INkhosi Davide yaka-Israyeli wasendvulo, beyiwatisa ngalokujulile umusa waNkulunkulu. Ngenca yaloko lokwenteka kuye nangekuzindla ngendlela Nkulunkulu lasebentelana ngayo nalabanye, Davide wahlabela watsi: “Simakadze unemusa nesihawu, uyephuta kutfukutsela andze ngemusa.”—Tihlabelelo 145:8.
(Tihlabelelo 145:10-13) Yonkhe indalo netidalwa takho tiyawubonga tidvumise wena, Simakadze, nalabangcwele bonkhe bakudvumise. 11 Bayawudvumisa ngenkhatimulo yebukhosi bakho, bashumayele ngemandla akho; 12 kuze bonkhe bantfu emhlabeni bayati imisebenti yakho yemandla, kanye nenkhatimulo yebukhosi bembuso wakho. 13 Umbuso wakho ungumbuso lome kuze kube phakadze, lombuso uyawuhlala ukhona, titukulwane ngetitukulwane. Simakadze wetsembekile kuto tonkhe tetsembiso takhe. Unemusa kuyo yonkhe imisebenti yakhe.
w04 1/15 16 ¶3-6
Lutsandvo LwaJehova Lolucotfo Lukhulu
Kubona Labangcwele BaNkulunkulu
3 Akhuluma ngaJehova Nkulunkulu, Hana, unina wemphrofethi Samuweli, watsi: “Uyakwelusa tinyawo talabangcwele bakhe.” (1 Samuweli 2:9) Babobani laba “labangcwele”? INkhosi Davide iyaphendvula. Ngemuva kwekudvumisa timfanelo taJehova letimangalisako, yatsi: “Labangcwele bonkhe bakudvumise.” (Tihlabelelo 145:10) Ungase utibute kutsi bantfu bangamdvumisa njani Nkulunkulu. Bamdvumisa ngekutsi bakhulume kahle ngaye.
4 Labangcwele baJehova ngulabo labasebentisa imilomo yabo kuze bakhulume kahle ngaye. Yini labakhuluma kakhulu ngayo nabahlangene? Bakhuluma ngeMbuso waJehova! Tinceku taNkulunkulu leticotfo titiva njengaDavide lowahlabela watsi: “Bayawudvumisa ngenkhatimulo yebukhosi bakho, bashumayele ngemandla akho.”—Tihlabelelo 145:11.
5 Jehova uyabona yini nangabe labacotfo bakhe bamdvumisa? Yebo, uyakunaka loko labakushoko. Esiphrofethweni lesiphatselene nekukhonta kweliciniso lamuhla, Malakhi wabhala watsi: “Nalabo-ke labesaba Nkulunkulu bakhulumisana bodvwana, Simakadze walalela weva. Incwadzi legocotwako yesikhumbuto yabhalwa embikwakhe macondzana nalabo labesaba Simakadze bahloniphe Libito lakhe.” (Malakhi 3:16) Kumjabulisa kakhulu Jehova kubona labacotfo bakhe bakhuluma kahle ngaye, futsi uyabakhumbula.
6 Tinceku taJehova leticotfo tingaphindze tibonakala ngekuba nesibindzi sekukhuluma nebantfu labangamkhonti Nkulunkulu weliciniso. Ecinisweni labacotfo baNkulunkulu batjela ‘bonkhe bantfu emhlabeni ngemisebenti yakhe yemandla, kanye nenkhatimulo yebukhosi bembuso wakhe.’ (Tihlabelelo 145:12) Uyakhuluma yini nebantfu ngebukhosi baJehova nawutfola litfuba? Ngalokungafani nabohulumende bebantfu labatondlula ngekushesha, bukhosi bakhe buyohlala phakadze. (1 Thimothi 1:17) Kuyaphutfuma kutsi bantfu bafundze ngebukhosi baJehova futsi babusekele. Davide wahlabela watsi: “Umbuso wakho ungumbuso lome kuze kube phakadze, lombuso uyawuhlala ukhona, titukulwane ngetitukulwane.”—Tihlabelelo 145:13.
(Tihlabelelo 145:14-16) Simakadze uyabaphasa bonkhe labawako, abaphakamise bonkhe labatfotjisiwe. 15 Emehlo endalo yonkhe abheke kuwe, uyipha kudla ngesikhatsi lesifanele. 16 Uvula sandla sakho, wesutsise tonkhe tifiso talokuphilako.
w04 1/15 17-18 ¶10-14
Lutsandvo LwaJehova Lolucotfo Lukhulu
10 Kuliciniso kutsi labanye babusi bayayikhatsalela inhlalakahle yebantfu babo. Kodvwa ngisho labaneluvelo ababati kahle bantfu babo. Singatibuta: Ukhona yini umbusi lonendzaba nabo bonkhe bantfu bakhe kangangekutsi uyashesha kusita umuntfu ngamunye nakanetinkinga? Yebo, ukhona. Davide wabhala watsi: “Simakadze uyabaphasa bonkhe labawako, abaphakamise bonkhe labatfotjisiwe.”—Tihlabelelo 145:14.
11 Labacotfo baJehova Nkulunkulu bayahlupheka futsi bavelelwa tinhlekelele ngobe abakapheleli futsi baphila eveni lelisemandleni aSathane, “lomubi.” (1 Johane 5:19; Tihlabelelo 34:19) EmaKhristu ayashushiswa. Lamanye anebuhlungu bekugula lokungemahlala khona nobe bekufelwa. Ngaletinye tikhatsi, emaphutsa alabacotfo baJehova angase ababangele kutsi ‘batfotjiswe’ kudvumateka. Nanobe babhekene netimo letimatima, Jehova uhlale akulungele kubadvudvuta nekubasita bacinise buhlobo babo naye. INkhosi Jesu Khristu nayo iyabatsandza labacotfo baNkulunkulu.—Tihlabelelo 72:12-14.
Kudla Lokwenetisako Ngesikhatsi Lesifanele
12 Ngenca yemusa wakhe lomkhulu, Jehova unakekela tonkhe tidzingo tetinceku takhe. Loku kufaka ekhatsi kutenetisa ngekudla lokunemsoco. INkhosi Davide yabhala yatsi: “Emehlo endalo yonkhe abheke kuwe, uyipha kudla ngesikhatsi lesifanele. Uvula sandla sakho, wesutsise tonkhe tifiso talokuphilako.” (Tihlabelelo 145:15, 16) Ngisho nangetikhatsi tenhlekelele, Jehova angabangela kutsi tintfo tenteke ngendlela yekutsi labacotfo bakhe batfole ‘sinkhwa salamuhla.’—Lukha 11:3; 12:29, 30.
13 Davide watsi “konkhe lokuphilako” kuyenetiseka. Loku kufaka ekhatsi netilwane. Kube bekute tihlahla emhlabeni netitjalo letiselwandle, tilwane betingeke tibe nawo umoyamphilo nobe kudla. (Tihlabelelo 104:14) Nanobe kunjalo, Jehova uyaciniseka kutsi tonkhe tidzingo tato tiyenetiswa.
14 Ngalokungafani netilwane, bantfu banesidzingo setintfo letiphatselene naNkulunkulu. (Matewu 5:3) Jehova utenetisa kahle kakhulu tidzingo talabacotfo bakhe! Ngaphambi kwekufa kwakhe, Jesu watsembisa kutsi ‘sisebenti lesetsembekile nalesihlakaniphile’ sasiyoniketa balandzeli bakhe ‘kudla ngesikhatsi lesifanele.’ (Matewu 24:45) Labagcotjiwe labasele emhlabeni basisebenti lesetsembekile nalesihlakaniphile lamuhla. Jehova usebentisa bona kuze basilungiselele kudla ngesikhatsi lesifanele.
Funisisa Umcebo EVini LaNkulunkulu
(Tihlabelelo 143:8) Ngivise umusa wakho ekuseni nakudzabuka kusa, ngobe litsemba lami lonkhe likuwe. Ngifundzise indlela lekufanele ngihambe ngayo, ngobe umphefumulo wami ngiwuphakamisela kuwe.
w10 1/15 21 ¶1-2
Lilanga Ngalinye Phila Ngendlela Lekhatimulisa Nkulunkulu
UMHLABELELI Davide wathantaza kuJehova watsi: “Ngivise umusa wakho ekuseni nakudzabuka kusa, ngobe litsemba lami lonkhe likuwe. Ngifundzise indlela lekufanele ngihambe ngayo.” (Hla. 143:8) Nawuvuka ekuseni futsi ubonga Jehova ngekutsi uyaphila, njengaDavide, uyamcela yini Jehova kutsi akucondzise nawenta tincumo nalapho ukhetsa indlela lekahle yekwenta tintfo? Asingabati kutsi wenta kanjalo.
Njengetinceku taJehova letitinikele, ‘ngisho nobe sidla, nobe sinatsa, nalapho senta nobe yini lenye, tonkhe tintfo sitentela kukhatimulisa Nkulunkulu.’ (1 Khor. 10:31) Siyati kutsi indlela lesiphila ngayo lilanga ngalinye ingase ikhatimulise Jehova nobe ingamkhatimulisi. Siyakhumbula nekutsi liVi laNkulunkulu litsi Sathane umangalela bomnakabo Khristu nato tonkhe tinceku taNkulunkulu emhlabeni “imini nebusuku.” (Sem. 12:10) Ngako-ke, sitimisele kuphendvula kulokumangalela kwaSathane lokungemanga futsi sente Jehova ajabule ngekwenta umsebenti wakhe longcwele “busuku nemini.”—Sem. 7:15; Taga 27:11.
(Tihlabelelo 150:6) Konkhe lokuphilako akudvumise Simakadze. Haleluya, dvumisani Simakadze!
it-2 448
Umlomo
Sitfo semtimba lesadalwa nguNkulunkulu kuze sidle ngaso siphindze sikhulume. Konkhe lesikushoko kufanele kumdvumise. (Hla 34:1; 51:15; 71:8; 145:21) Umhlabeleli watsi konkhe lokuphefumulako kufanele kudvumise Jehova; ngako bantfu kufanele basebentise imilomo yabo kuze bente loku nangabe bafuna kuphila. Umphostoli Pawula wachaza kutsi kukholwa kuNkulunkulu kanye naseNdvodzaneni yakhe akukeneli. Kufanele kuhambisane nekuvuma ngemlomo embikwebantfu bese uyasindziswa.—Hla 150:6; Rom 10:10.
Ngesizatfu sekutsi Jehova unguMdali lonemandla neligunya angakhona kwenta inceku yakhe ikhulume emavi lakahle kuze afeze injongo yakhe. Loku wakwenta ngalokusimangaliso kubaphrofethi bakhe ngekubaphefumulela. (Eks 4:11, 12, 15; Jer 1:9) Jehova waze wabangela ngisho nembongolo lokusilwane lesingakhulumi kutsi sikhulume. (Num 22:28, 30; 2Ph 2:15, 16) Lamuhla tinceku taNkulunkulu tingaba nawo emavi akhe emilonyeni yato, hhayi nje ngekuphefumulelwa kodvwa ngekufundza liVi lakhe leliphefumulelwe, tikulungele ngalokuphelele kwenta yonkhe imisebenti lemihle. (2Thim 3:16, 17) Akusadzingeki timele Khristu atewutitjela tindzaba letimnandzi nobe kuya kuleminye imitfombo kuze titfole letingashumayela ngako. Banako futsi kumele bona kutsi bakhulume njengobe batjelwa: “Livi lisedvute nawe, futsi lisemlonyeni nasenhlitiyweni yakho.”—Rom 10:6-9; Dut 30:11-14.
Lunemandla Ekuphila Newekufa. Loku kusho kutsi kubalulekile kulusebentisa kahle lulwimi futsi naJehova usho njalo. LiVi lakhe litsi: “Emavi ebantfu labalungile angumtfombo wekuphila.” (Tag 10:11) Ngako kufanele siyigadze imilomo yetfu (Hla 141:3; Tag 13:3; 21:23), ngobe ingasilimata nasiyisebentisa kabi. (Tag 10:14; 18:7) Bantfu batawulandzisa kuNkulunkulu ngaloko labakukhulumako. (Mat 12:36, 37) Umuntfu angahle akhulume futsi ente sifungo angakacabangi. (Shu 5:4-6) Umuntfu angamlutsa lomunye futsi loku kumlimate. (Tag 26:28) Kubaluleke kakhulu kutsi sikugadze loko lesikushoko nasinebantfu lababi ngobe kuphambuka kancane nje kuloko latsi Nkulunkulu tinceku takhe atikwente kungalihlambalata ligama laNkulunkulu futsi kumlimate loyo muntfu. (Hla 39:1) Jesu wasibekela sibonelo lesihle sekulalela Nkulunkulu ngaphandle kwekukhonona nobe ngekhuluma kabi ngetitsa takhe.—Isa 53:7; Imi 8:32; 1Ph 2:23.
UmKhristu kufanele anakisise inhlitiyo yakhe ngobe unesono. Jesu watsi loko lokungena emlonyeni akumngcolisi umuntfu, kodvwa nguloko lokuphuma kuwo lokumngcolisako, ngobe “umlomo ukhuluma loko lokugcwele enhlitiyweni.” (Mat 12:34; 15:11) Ngako kufanele anake kutsi angakhulumi angakacabangi ngemiphumela lengaba khona. Loku kudzinga kutsi lomuntfu asebentise ingcondvo yakhe kuze akusebentise loko lakufundze eVini laNkulunkulu.—Tag 13:3; 21:23.