Kwetama Kufinyelela Inhlitiyo

NGETULU kwekufakaza kubantfu, kufanele wetame kufinyelela tinhlitiyo tabo. EBhayibhelini, inhlitiyo yehlukile kuloko umuntfu labonakala angiko ngephandle. Inhlitiyo lengumfanekiso imelela loko umuntfu langiko ngekhatsi, lokuyindlela lativa ngayo, konkhe lacabanga ngako, kutsi kungani acabanga ngaleto tintfo, nekutsi leyo micabango ikutsintsa njani loko lakwentako. Kukulenhlitiyo lengumfanekiso lapho inhlanyelo yeliciniso ihlanyelwa khona. (Mat. 13:19) Kulalela Nkulunkulu nako kufanele kusuke enhlitiyweni.​—Taga 3:1; Rom. 6:17.

Kuze kufundzisa kwakho kufinyelele inhlitiyo, naka lemigomo lelandzelako: (1) Tfola kutsi yini leseyivele itsintse inhlitiyo yaloyo lokhuluma naye. (2) Mkhutsate kutsi akhombise buntfu lobuzuzisako, njengelutsandvo nekwesaba Nkulunkulu. (3) Mkhutsate kutsi ahlatiye tizatfu takhe tekwenta tintfo kuze akhone kujabulisa Jehova.

Kusebentisa Kucondza. Tizatfu letenta bantfu bangawemukeli emaciniso atifani. Nawuchuba sifundvo seliBhayibheli sasekhaya, kungase kudzingeke wetame kususa lubandlululo futsi uvete emaciniso kuze ulungise imibono leliphutsa umfundzi lanayo, nobe kungase kudzingeke uvete bufakazi nje kuphela. Tibute: ‘Lomuntfu uyati yini kutsi kudzingeka anake tintfo letiphatselene naNkulunkulu? Kungakanani lasavele akukholelwa? Ngukuphi langakukholelwa? Yini lembangele kutsi aphetse ngaleyo ndlela? Uyaludzinga yini lusito kuze ancobe tifiso letingamvimbela kutsi emukele imitfwalo lehambisana nekwati liciniso?’

Akusimelula ngaso sonkhe sikhatsi kutfola kutsi kungani bantfu bakholelwa tintfo letitsite. Taga 20:5 titsi: “Tinjongo tenhlitiyo yemuntfu tifanana nekujula kwemanti emtfombo; kodvwa lonekucondza angatikhipha,” (catsanisa ne-NW). Kucondza likhono lekutfola loko lokungabonakali melula. Loku kudzinga kunakisisa kanye nelutsandvo.

Akusito tonkhe tintfo letishiwo ngemlomo. Indzaba letsite ingase yente umfundzi ashintje ebusweni nobe ashintje livi. Nangabe ungumtali, kungenteka ubone lushintjo endleleni umntfwana wakho lenta ngayo tintfo, futsi loko kungase kukhombise kutsi kunalokutsite lokutsintsa kuphila kwakhe. Ungatitsatseli phansi letimphawu. Tingakukhombisa loko umuntfu langiko ngekhatsi.

Imibuto lekhetfwe kahle ingakusita kutsi utfole loko lokusenhlitiyweni yemuntfu. Ungase ubute: “Utiva njani nge . . . ?” “Yini leyakwenta waciniseka kutsi . . . ?” “Ungenta njani nangabe . . . ?” Nobe kunjalo, kufanele unake kutsi awubuti imibuto leminyenti ngesikhatsi sinye. Mhlawumbe ngekuhlakanipha ungetfula imibuto yakho ngekutsi: “Ungangivumela yini kutsi ngibute . . . ?” Kutfola loko lokusenhlitiyweni kuyintfo lokufanele yentiwe ngekucophelela futsi ingajakwa. Etimeni letinyenti, kufanele ucale wente umuntfu akwetsembe ngaphambi kwekutsi akhululeke kuveta loko lokusenhlitiyweni yakhe. Nanobe kunjalo, kufanele ucaphele kuze umuntfu angeva shengatsi sewubuta tindzaba letingakutsintsi.​—1 Phet. 4:15.

Indlela lotsintseka ngayo nawuva loko lakushoko nayo idzinga kutsi ube nekucondza. Khumbula kutsi umgomo wakho kutsi ubati kahle bantfu kuze utewubona kutsi ngukuphi kwatiswa lokusekelwe eBhayibhelini lokungabakhutsata. Sheshe utibambe, ungaveti kutsi imibono yemuntfu iliphutsa. Kunaloko, hlala ukulungele kucondza loko lokumbangele kutsi asho lawo mavi. Nawenta njalo, utawukwati kutsi kufanele uphendvule njani, futsi njengobe loyo muntfu lokhuluma naye abona kutsi uyayicondza indlela lativa ngayo, kutawuba melula kutsi acabangisise ngaloko lokushoko.​—Taga 16:23.

Ungakhona kukhutsata umuntfu ngamunye ngisho nobe ukhuluma nelicembu lelikhulu. Nangabe ubabuka labo lokhuluma nabo, usinaka simo sabo sebuso, futsi ubuta imibuto letawubenta bacabange, utawukhona kubona kutsi bativa njani ngaloko lokushoko. Nangabe ubati kahle labo labakulalele, khombisa kutsi uyaticabangela timo tabo. Cabanga ngesimo sengcondvo salo lonkhe libandla njengobe wetama kubonisana nabo ngeliVi laNkulunkulu.​—Gal. 6:18.

Kutsintsa Imiva Lengaba Lusito. Nasewukucondza loko umuntfu lakukholelwako, loko langakukholelwa, nekutsi kungani kunjalo, utawukhona kusekela lokushoko kuleto tintfo. Ngemuva kwekuvuswa kwakhe, Jesu watsintsa tinhlitiyo tebafundzi bakhe ngekutsi ‘abachazele imiBhalo’ lebeyimayelana netintfo lebetisandza kwenteka. (Luk. 24:32) Nawe kufanele uzame kukhombisa kuhlobana lokukhona emkhatsini waloko umuntfu lahlangabetene nako, loko lakufisako, kanye naloko lakubona eVini laNkulunkulu. Inhlitiyo yemfundzi itawube itsintseke mbamba nasekalibona ngalokucacile liciniso, aze atsi: “Leli LICINISO!”

Nawugcizelela kulunga kwaJehova, lutsandvo lwakhe, umusa wakhe, kanye nekutsi tindlela takhe tilungile, usuke usita labo lobafundzisako kutsi bamtsandze Nkulunkulu. Nawutinika sikhatsi sekukhombisa labo labakulalele buntfu lobuhle Nkulunkulu labubonako kuloyo naloyo kubo, ubaniketa sizatfu sekukholelwa kutsi bangaba nebuhlobo naNkulunkulu. Loku ungakwenta ngekutsi ucabange ngemibhalo lenjengeTihlabelelo 139:1-3, Lukha 21:1-4, kanye naJohane 6:44, futsi usite labo labakulalele kutsi bakucondze kujula kwelutsandvo Jehova lanalo ngetinceku takhe letetsembekile. (Rom. 8:38, 39) Chaza kutsi Jehova ubuka ngale kwemaphutsa etfu futsi ukubona konkhe kuphila kwetfu, inshisekelo yetfu ekukhonteni kweliciniso, kanye nelutsandvo lesinalo ngelibito lakhe. (2 Khr. 19:2, 3; Heb. 6:10) Ukhumbula ngisho nemininingwane lemincane yekwakheka kwetfu, futsi utawubabuyisela ekuphileni ngendlela lemangalisako “bonkhe labasemathuneni.” (Joh. 5:28, 29; Luk. 12:6, 7) Njengobe bantfu bentiwe ngemfanekiso waNkulunkulu, kucoca ngebunguye bakhe kungase kutsintse loko umuntfu langiko ngekhatsi.​—Gen. 1:27.

Inhlitiyo ingaphindze itsintseke nangabe umuntfu afundza kutsatsa labanye bantfu ngendlela Jehova labatsatsa ngayo. Kunengcondvo kuphetsa ngekutsi nangabe Nkulunkulu wetfu akhombisa umusa kumuntfu ngamunye, uphindze abacabangele ngendlela lefanako nalabanye bantfu, ngisho nobe bahlala kuyiphi indzawo, banabuphi buve, nobe babaluphi luhlanga. (Imis. 10:34, 35) Nangabe umuntfu sekakucondza loko, kutawuba nesisekelo lesicinile lesisemiBhalweni sekutsi asuse yonkhe inzondo kanye nelubandlululo enhlitiyweni yakhe. Loku kutawumenta kutsi abe nekuthula nalabanye bantfu njengobe afundza kwenta intsandvo yaNkulunkulu.

Kufanele uphindze usite bantfu kutsi besabe Nkulunkulu. (Hla. 111:10; Semb. 14:6, 7) Inhlonipho lejulile nobe kwesaba Nkulunkulu kungamkhutsata umuntfu kutsi akhone kufeza loko labekangeke akhone kukufeza ngemandla akhe. Ngekucoca ngemisebenti lemangalisako yaJehova kanye nelutsandvo lwakhe lolukhulu, ungakhona kusita bantfu kutsi besabe kumjabhisa Nkulunkulu.​—Hla. 66:5; Jer. 32:40.

Ciniseka kutsi wenta labo labakulalele bacondze kutsi kutiphatsa kwabo kubalulekile kuJehova. Naye unemiva, futsi indlela lesisemukela ngayo sicondziso sakhe, ingambangela kutsi eve buhlungu nobe ajabule. (Hla. 78:40-42) Bakhombise kutsi kungani kutiphatsa kwabo kungaba nesandla ekuphendvuleni insayeya Sathane layibekela Nkulunkulu.​—Taga 27:11.

Sita labo labakulalele babone kutsi kwenta loko Nkulunkulu lakufunako kuzuzisa bona. (Isa. 48:17) Lenye indlela yekukwenta loku kutsi usho imiphumela yekungakwemukeli kuhlakanipha kwaNkulunkulu umuntfu labhekana nayo, ngisho nobe kusikhashana nje. Chaza kutsi sono sisikhweshisa njani kuNkulunkulu, sivimbele labanye kutsi bafundze emaciniso kitsi, futsi sibemuke lilungelo labanalo. (1 Thes. 4:6) Basite bakubone kuba ligugu kwetibusiso lesebavele batijabulela ngenca yekutsi bagcina imitsetfo yaNkulunkulu. Bente babe nekubonga lokukhulu ngekutsi kuhamba etindleleni taJehova tekulunga kuyasivikela etinkingeni letinyenti. Nangabe umuntfu asakholelwa kutsi tindlela taNkulunkulu tihlakaniphile, utakubalekela ngato tonkhe tindlela kumelana nato. (Hla. 119:104) Kulalela ngeke akubone kungumtfwalo, kodvwa utakubona kuyindlela yekukhombisa kutsi sitinikele ngelutsandvo kuJehova.

Sita Labanye Kutsi Batihlole. Kuze bachubeke bakhula ebuhlotjeni babo naNkulunkulu, bantfu kudzingeka bente lokutsite ngaloko lokusetinhlitiyweni tabo. Bachazele kutsi liBhayibheli lingabasita njani kuze bente loku.

Sita labo labakulalele babone kutsi liBhayibheli alisiyo nje incwadzi yemitsetfo, yeteluleko, umlandvo, kanye netiphrofetho. Liphindze livete kucabanga kwaNkulunkulu. KuJakobe 1:22-25, liVi laNkulunkulu lifaniswa nesibuko. Umlayeto weliBhayibheli uveta loko lokusetinhlitiyweni tetfu ngendlela lesitsintseka ngayo kuloko lelikushoko kanye nasendleleni Jehova lafeza ngayo injongo yakhe. Ngako liveta indlela Nkulunkulu ‘lovivinya tinhlitiyo tebantfu’ lasibona ngayo. (Taga 17:3) Khutsata labo labalalele kutsi bakukhumbule loku. Bakhutsate bazindle ngaloko Nkulunkulu lasilondvolotele kona eBhayibhelini nekutsi nguluphi lushintjo lokudzingeka balwente ekuphileni kwabo kuze bamjabulise. Basite kutsi kufundza liBhayibheli bakutsatse njengendlela yekucondza indlela Jehova lahlola ngayo “imicabango netinhloso tenhlitiyo,” kuze batewukwenta lushintjo loludzingekako njengobe nje naNkulunkulu afuna.​—Heb. 4:12; Rom. 15:4.

Labanye bantfu labafundzelwa liBhayibheli bangase bafune kutsatsa sinyatselo ngaloko labakufundzako, kodvwa bakhatsateke kakhulu ngekutsi labanye bantfu batawutsini. Kungenteka balwisana netifiso letitsite tenyama letinemandla. Nobe kungenteka bafuna taba tekutsi bakhonte Nkulunkulu kodvwa babe basebambelele emikhubeni yalelive. Veta kutsi ngutiphi tingoti tekwenta kanjalo. (1 Khos. 18:21) Bakhutsate kutsi bathantaze kuNkulunkulu bamcele kutsi ahlolisise futsi avivinye tinhlitiyo tabo.​—Hla. 26:2; 139:23, 24.

Bakhombise kutsi Jehova uyayicondza inkinga labakuyo nekutsi liBhayibheli liyakhuluma ngayo. (Rom. 7:22, 23) Basite bacaphele kutsi bangavumi kubuswa tifiso tenhlitiyo lenesono.​—Taga 3:5, 6; 28:26; Jer. 17:9, 10.

Khutsata ngamunye wabo kutsi ahlole tizatfu takhe tekwenta tintfo. Mfundzise kutsi atibute nayi imibuto: ‘Kungani ngifuna kwenta loku? Kutamkhombisa yini Jehova kutsi ngibonga mbamba ngako konkhe langentele kona?’ Bente bakukholelwe ngalokucinile kutsi buhlobo lobuhle naJehova buyintfo leligugu kakhulu umuntfu langaba nayo.

Sita labo lokhuluma nabo kutsi bacondze kubaluleka kwekukhonta Jehova ‘ngenhlitiyo yabo yonkhe.’ (Luk. 10:27) Loku kusho kutsi yonkhe imiva yabo, tifiso, kanye netizatfu tabo tekwenta tintfo kufanele tivumelane netindlela taJehova. Ngako-ke fundzisa labo labakulalele kutsi bangahlatiyi nje kuphela loko labakwentako, kodvwa bahlatiye nendlela labativa ngayo ngaloko Nkulunkulu lakufunako kanye nekutsi tiyini tizatfu tekukhonta kwabo Jehova. (Hla. 37:4) Njengobe labo lofundza nabo babona lapho kufanele bente khona tingucuko, bakhutsate kutsi bathantaze kuJehova, batsi: “Yenta inhlitiyo yami ihlose intfo yinye: kutsi ilesabe libito lakho.”​—Hla. 86:11.

Lapho umfundzi aba nebuhlobo naJehova, utawulalela Nkulunkulu ngesizatfu sekutsi unekukholwa hhayi ngobe wena umkhutsata kutsi ente njalo. Ngako ‘utawuchubeka aciniseka kutsi yini leyemukelekako eNkhosini,’ futsi loku utawutentela yena. (Ef. 5:10; Fil. 2:12) Kulalela Nkulunkulu lokunjalo nalokusuka enhlitiyweni kuyamjabulisa Jehova.​—Taga 23:15.

Khumbula kutsi Jehova nguye lohlola tinhlitiyo futsi ente bantfu babe nebuhlobo naye. (Taga 21:2; Joh. 6:44) Tsine kufanele sibambisane naye. (1 Khor. 3:9) Kuba “shengatsi Nkulunkulu uncenga ngatsi.” (2 Khor. 5:20; Imis. 16:14) Jehova akaphoceleli muntfu kutsi emukele liciniso, kodvwa nasisebentisa imiBhalo, yena angenta kutsi labo labasilalele babone kutsi loko labakuvako kuyimphendvulo yemibuto yabo, nobe imithantazo yabo. Kukhumbule loku nobe nini lapho ufundzisa labanye, futsi ngebucotfo ucele sicondziso nelusito lwaJehova.​—1 Khr. 29:18, 19; Ef. 1:16-18.