Tikhombo Tencwajana Yekubhalela Emhlanganweni Wekuphila KwemaKhristu Nemsebenti Wawo
MARCH 6-12
UMCEBO LOSEVINI LANKULUNKULU | JEREMIYA 1-4
“Mine Nginawe, Futsi Ngiyawukuphephisa”
(Jeremiya 1:6) Mine ngaphendvula ngatsi: “Awu, Nkhosi Simakadze, mine angikwati kukhuluma; ngisengumntfwana.”
Hlala Uphapheme, NjengaJeremiya
4 Kungenteka kutsi Jeremiya abesasondzela eminyakeni lengu-25 budzala ngesikhatsi Jehova amniketa sabelo sekuba ngumlindzi. (Jer. 1:1, 2) Nanobe kunjalo, yena watibona angumfanyana nje, futsi angakufanelekeli kukhuluma embikwalabadzala besive, lobekubantfu labakhulile futsi labebasemagunyeni. (Jer. 1:6) Abenemilayeto lehlabako kanye netehlulelo letesabekako lobekufanele atimemetele, ikakhulukati kubaphristi, baphrofethi bemanga, babusi, kanye nakulabo ‘labebatihambela ngendlela yabo’ futsi ‘bahlubuka njalo.’ (Jer. 6:13; 8:5, 6) Lithempeli lelikhatimulako leNkhosi Solomoni, lebeliyindzawo yekukhonta kweliciniso sikhatsi lesingaba ngemakhulu lamane eminyaka, belitawubhujiswa. EJerusalema nakaJuda bekutawusala kute muntfu, futsi takhamuti takhona betitawutfunjwa. Kuyacaca-ke kutsi umlayeto lobekufanele Jeremiya awumemetele bewuphutfuma!
(Jeremiya 1:7-10) Kodvwa Simakadze wakhuluma kimi, watsi: “Ungasho kutsi, ‘ngisengumntfwana.’ Kufanele uhambe uye kubo bonkhe bantfu lengikutfuma kubo, ufike usho loko lengikutfuma kona. 8 Ungabesabi, ngobe mine nginawe, futsi ngiyawukuphephisa,” kusho Simakadze. 9 Simakadze wase welula sandla sakhe watsintsa umlomo wami, watsi kimi: “Manje-ke, sengifake emavi ami emlonyeni wakho. 10 Buka la, lamuhla ngikubeka etikwetive nasetikwemibuso kutsi usiphule ubuye uhhihlite; ubhidlite ubuye uketule, nekutsi wakhe ubuye uhlanyele.”
(Jeremiya 1:17-19) “Tilungiselele! Sukuma ukhulume kubo konkhe loko lengikutfume kona. Ungabesabi, ngobe ngingahle ngikwetfuse lapha embikwabo. 18 Lamuhla ngikwente waba lidolobha leliyinqaba, waba yinsika yensimbi nelubondza lwelitfusi kutsi utewumelana nalo lonkhe live; umelane nemakhosi akaJuda, netiphatsimandla takhona, nebaphristi bakhona kanye nesive sonkhe sakulelo live. 19 “Bayakulwa nawe, kodvwa bangeke bakwehlule, ngobe mine nginawe, futsi ngiyawukwelekelela,” kusho Simakadze.
w05 12/15 23 ¶18
Ulalela Bani—Nkulunkulu Noma Bantfu?
18 Nkulunkulu watjela umphrofethi Jeremiya watsi: “Mine nginawe, futsi ngiyawukuphephisa.” (Jeremiya 1:8) Lamuhla Jehova angasikhulula njani nasiphatfwa kabi? Angase avuse umehluleli lonengcondvo levulekile njengaGamaliyeli. Noma angase ente kutsi sikhundla sesikhulu lesitsite lesikhohlakele noma lesiphikisako sitsatfwe ngulomunye loncono kunaso. Ngaletinye tikhatsi Jehova angahle akuvumele kuphatfwa kabi kwebantfu bakhe kutsi kuchubeke. (2 Thimothi 3:12) Nangabe Nkulunkulu avuma kutsi siphatfwe kabi, utasinika emandla ekubeketelela loko. (1 Khorinte 10:13) Noma yini Nkulunkulu layivumelako, siyati kutsi itawuba nesiphetfo lesihle: Labo labalwa nebantfu baNkulunkulu kufana nekutsi balwa naNkulunkulu, futsi labalwa naNkulunkulu ngeke bancobe.
jr 88 ¶14-15
“Ngiyawubahlumelelisa Labo Lasebadzangele”
UTAWUBAHLUMELELISA YINI LABADZANGELE?
14 Senta kahle kunaka indlela Jeremiya lakhutsatwa ngayo nendlela labakhutsata ngayo labanye ‘lebebadzangele.’ (Jer. 31:25) Lomphrofethi wakhutsatwa nguJehova ngalokucondzile. Cabanga nje kutsi bewutawukhutsateka njani nawuva Jehova atsi kuwe: “Lamuhla ngikwente waba lidolobha leliyinqaba . . . Bayakulwa nawe, kodvwa bangeke bakwehlule, ngobe mine nginawe, futsi ngiyawukwelekelela.’” (Jer. 1:18, 19) Kungako Jeremiya aba nesizatfu lesihle sekutsi kuJehova ‘ungemandla akhe nesiphephelo sakhe, nencaba yakhe ngesikhatsi sekuhlupheka.’—Jer. 16:19.
15 Kuyanakeka kutsi Jehova watsi kuJeremiya: “Mine nginawe.” Uyabona kutsi yini longayenta nangabe umuntfu lomatiko adzinga sikhutsato? Kuhle kunaka kutsi umzalwane noma dzadze longumKhristu nobe sihlobo sidzinga sikhutsato; kodvwa kukahle kakhulu kwenta lokutsite lokutawubasita. Esikhatsini lesinyenti, lokuphumelela kakhulu kwenta loko Nkulunkulu lakwentela Jeremiya—kuba nesikhatsi naye. Ngemuva kwesikhashana, ungabese uyamkhutsata, kodvwa ungakhulumi indendende. Emavi lambalwa nje lacatjangwe kahle, kukhulu latakufeza kuze amcinise futsi amkhutsate. Akudzingeki kutsi uze ube ligagu ekukhulumeni. Shano emavi lamelula lakhombisa kutsi unendzaba naye, uyamkhatsalela futsi uyamtsandza. Emavi lanjalo angafeza lokukhulu.—Fundza Taga 25:11.
Funisisa Umcebo EVini LaNkulunkulu
(Jeremiya 2:13) “Sive sami sente tono letimbili: Singishiyile mine, mtfombo wemanti ekuphila, satimbela ticojana taso emadvwaleni, ticojana letinetimbobo letingeke tiwemise emanti.”
(Jeremiya 2:18) Manje niyelani eGibhithe kuyawunatsa emanti aseShihori? Kona niyeleni e-Asiriya kuyawunatsa emanti alowo Mfula?
w07 3/15 9 ¶8
Emaphuzu Lagcamile Encwadzi YaJeremiya
2:13, 18. Ema-Israyeli langaketsembeki enta tono letimbili. Ashiya Jehova, longumtfombo wesibusiso, wesicondziso nesivikelo. Futsi atimbela imitfombo yawo lengekwemfanekiso ngekufuna kwenta bungani neGibhithe neSiriya. Nasishiya Nkulunkulu weliciniso lamuhla futsi sikhetse emafilosofi nemibono yebantfu neyetepolitiki sisuke sishiya ‘umtfombo wemanti ekuphila’ satigubhela ‘ticojana tetfu emadvwaleni.’
(Jeremiya 4:10) Ngakhuluma ngatsi: “Yebo, Nkhosi Simakadze, maye, usiyengile lesive kanye nebantfu baseJerusalema, watsi: ‘Niyawuba nekuthula,’ kwabe kungulapho inkemba isemiphinjeni yetfu.”
w07 3/15 9 ¶4
Emaphuzu Lagcamile Encwadzi YaJeremiya
4:10; 15:18—Kungayiphi indlela Jehova ‘ayenge’ bantfu bakhe? Ngesikhatsi laphila ngaso Jeremiya, bekunebaphrofethi ‘lebabephrofetha emanga.’ (Jeremiya 5:31; 20:6; 23:16, 17, 25-28, 32) Jehova akazange abayekelise kumemetela imilayeto ledukisako.
Kufundvwa KweliBhayibheli
(Jeremiya 4:1-10) “Awu, Israyeli, nawungamane uphendvuke nje, ubuye kimi,” kusho Simakadze. “Nawungesusa letithico takho Ietitinengiso, lapha embikwami, ungabe usanhlanhlatseka, 2 nawungafunga futsi kimi ngekweliciniso nangekulunga, utsi: ‘Ngifunga kuphila kwaSimakadze,’ tive-ke tiyawubusiswa ngaye tidvumise kuye futsi.” 3 Naku lokushiwo nguSimakadze emadvodzeni akaJuda newaseJerusalema, utsi: “Limani umhlaba wenu longakalinywa, ningahlanyeli nje ekhatsi emanyeveni. 4 Tisokeni nine kuSimakadze, sokani tinhlitiyo tenu, nitinikele kuye ngalokuphelele, nine madvodza akaJuda nesive saseJerusalema. Ngaphandle kwaloko lulaka lwami lutawucitseka luvutse njengemlilo ngenca yebubi lenibentile, luvutse, kubete nalongalucisha.” 5 “Memetelani kaJuda nibatjele nebaseJerusalema, nitsi: ‘Shayani licilongo kulo lonkhe live!’ Memetani kakhulu nitsi: ‘Butsanani ndzawonye! Asibalekeni siye emadolobheni labiyelwe.’ 6 Hlabani inyandzaleyo kuyiwe eSiyoni! Balekani nitewusindza, ningephutisi. Ngobe ngiletsa inhlekelele lechamuka ngasenyakatfo, Naku lokushiwo nguSimakadze emadvodzeni akaJuda newaseJerusalema, utsi: “Limani umhlaba wenu longakalinywa, ningahlanyeli nje ekhatsi emanyeveni.yebo, imbhubhiso leyesabekako.” 7 Libhubesi liphumile emhumeni walo; umbhubhisi wetive sewuphumele ngephandle. Selisukile endzaweni yalo, litewuphundla lelive lenu. Emadolobha enu atawuba tindzala, abete bantfu labahlala kuwo. 8 Ngako yembatsani emasaka, khalani, nilile, ngobe intfukutselo leyesabekako yaSimakadze ayikesuki kitsi. 9 Simakadze utsi: “Ngalelo langa, inkhosi netindvuna bayawuphelelwa ngemandla, baphristi bayawukwesaba, nebaphrofethi bayawutfutfumela.” 10 Ngakhuluma ngatsi: “Yebo, Nkhosi Simakadze, maye, usiyengile lesive kanye nebantfu baseJerusalema, watsi: ‘Niyawuba nekuthula,’ kwabe kungulapho inkemba isemiphinjeni yetfu.”
MARCH 13-19
UMCEBO LOSEVINI LANKULUNKULU | JEREMIYA 5-7
“Bebangasayenti Intsandvo YaNkulunkulu”
(Jeremiya 6:13-15) “Kusukela kulomncane kakhulu kuye kulomkhulu kakhulu, bonkhe babogubhela kwesabo; baphrofethi nebaphristi bayafanana, bonkhe bayayengana. 14 Babopha emanceba ebantfu bami kube shangatsi yintfo nje lengenamsebenti, babe batsi: ‘Kuthula, kuthula,’ kube kantsi kute nalokuthula. 15 Kantsi banawo yini emahloni ngemanyala abo labawentako? Cha, bate nalamancane nje emahloni, abakwati ngisho nekukhophota. Ngako batakuwela kulabawile, bayawukwehliselwa phansi nangibajezisa,” kusho Simakadze.
w88 4/1 11-12 ¶7-8
Jeremiya—Umphrofethi Wetehlulelo TaNkulunkulu Longatsandzeki
7 Jehova wecwayisa watsi: “Bayakulwa nawe, kodvwa bangeke bakwehlule.” (Jeremiya 1:19) Kungani emaJuda nebabusi bawo bebafuna kulwa nalomphrofethi? Kungobe umlayeto wakhe bewuhlasela kunganaki kwabo nendlela yabo yekukhonta ngobe beyiyekugcina umtsetfo nje. Jeremiya wavele washo ngalokucondzile watsi: “Ngubani lotangilalela? Tindlebe tabo tivalekile, kuze bangetikuva. Livi laSimakadze lisikhubekiso kubo, abajabuli ngalo. Kusukela kulomncane kakhulu kuye kulomkhulu kakhulu, bonkhe babogubhela kwesabo; baphrofethi nebaphristi bayafanana, bonkhe bayayengana.”—Jeremiya 6:10, 13.
8 Kuliciniso kutsi lababusi bebahola sive nasenta imihlatjelo. Bebakhombisa kutsi basekukhonteni kweliciniso kodvwa tinhlitiyo tabo betingekho lapho. Kugcina emasiko bekubaluleke kwendlula kutiphatsa kahle. Ngesikhatsi lesifanako, baholi benkholo bebasikhohlisa lesive kuze sicabange kutsi sivikelekile, bebatsi, “ ‘Kuthula, kuthula,’ kube kantsi kute nalokuthula.” (Jeremiya 6:14; 8:11) Bebabakhohlisa bantfu kuze bacabange kutsi banekuthula naNkulunkulu. Bebeva shengatsi kute lokufanele bakhatsateke ngako, ngobe babantfu baJehova labasindzisiwe, futsi banemuti longcwele nelithempeli lawo. Kodvwa Jehova bekabatsatsa kanjalo yini?
(Jeremiya 7:1-7) Leli livi laSimakadze lelefika kuJeremiya, latsi: 2 “Mani esangweni lendlu yaSimakadze; ushumayele umemetele nankha emavi: “ ‘Vanini livi laSimakadze, nonkhe nine sive sakaJuda leningena kulamasango kuyawukhonta Simakadze. 3 Naku lokushiwo nguSimakadze longuSomandla, Nkulunkulu wema-Israyeli, utsi: Guculani tindlela tenu kanye netento tenu tilunge, khona ngiyawunivumela kutsi nihlale kulendzawo. 4 Ningawetsembi lamagama langemanga nitsi: “Leli lithempeli laSimakadze, lithempeli laSimakadze, lithempeli laSimakadze!” 5 Nanitigucula ngempela tindlela tenu netento tenu, niphatsane ngekwemtsetfocotfo, 6 naningabacindzeteli labo bekuhamba, nalabangenaboyise, nebafelokati, ningayicitsi nengati lengenacala kulendzawo, ningabalandzeli labanye bonkulunkulu kutsi nitilimate nine, 7 mine-ke ngiyawunenta nihlale kulendzawo, eveni lengalipha boyihlomkhulu kutsi libe labo phakadze naphakadze.
w88 4/1 12 ¶9-10
Jeremiya—Umphrofethi Wetehlulelo TaNkulunkulu Longatsandzeki
9 Jehova wayala Jeremiya kutsi eme abonakale ngasesangweni lelithempeli bese umemetela umlayeto wakhe kubantfu bebangena lapho. Bekufanele atsi: “Ningawetsembi lamagama langemanga nitsi: ‘Leli lithempeli laSimakadze, lithempeli laSimakadze, lithempeli laSimakadze!’ . . . Nine netsembele emavini langemanga nalangenamsebenti.” EmaJuda abehamba ngekubona hhayi ngekukholwa, njengobe abetigcabha ngelithempeli lawo. Abesawakhohliwe emavi aJehova ekuwacwayisa latsi: “Lizulu lisihlalo sami sebukhosi , umhlaba usenabelo setinyawo tami. Iphi-ke lendlu leningangakhela yona?” Jehova, iNkhosi lenguMbusi wako konkhe abengakavaleleki ekhatsi ethempelini lawo, ngisho nobe belilihle kanjani.—Jeremiya 7:1-8; Isaya 66:1.
10 Jeremiya wachubeka nemavi akhe lahlabako ekubasola latsi: “Nisetakweba yini, nibulale, niphinge, nifungele emanga, nitfuncise imphepho kuBhali, nilandzele labanye bonkulunkulu leningazange senibati, . . . nitsi: ‘Siphephile,’—kambe niphephele kutsi nente tonkhe letintfo letisinengiso?” EmaJuda, abecabanga kutsi Jehova utawuvumela noma nguluphi luhlobo lwekutiphatsa kuphela nje nabaletsa imihlatjelo yabo ethempelini, njengobe babantfu baNkulunkulu ‘labaligugu.’ Nangabe bebamcabanga njengababe lonemusa nalotototisa umntfwana lokuphela kwakhe, bebashaye phansi.—Jeremiya 7:9, 10; Eksodusi 19:5, 6.
(Jeremiya 7:8-15) Kodvwa bukani la, nine netsembele emavini langemanga nalangenamsebenti. 9 “‘Nisetakweba yini, nibulale, niphinge, nifungele emanga,” nitfuncise imphepho kuBhali, nilandzele labanye bonkulunkulu leningazange senibati, 10 bese niyeta nitewuma lapha embikwami kulendlu leneLibito lami, nitsi: “Siphephile,” kambe niphephele kutsi nente tonkhe letintfo letisinengiso? 11 Kungabe lendlu, leneLibito lami, seyigucuke yaba ngumhume wabosidlani yini lapha kini? Kodvwa bengisolomane ngibuka! Kusho Simakadze. 12 “ ‘Hambani nyalo niye endzaweni leseShilo, lapho ngacala khona kwenta indzawo yekubeka Libito lami, nibone kutsi ngentani kuyo ngenca yebubi besive sami, ema-Israyeli. 13 Ngesikhatsi nenta tonkhe letintfo, bengikhuluma kini njalonjalo ngaletintfo, kodvwa anikangilaleli; nginibitile, kodvwa anikasabeli, kusho Simakadze. 14 Ngako-ke loko lengakwenta eShilo, ngisetakwenta nanyalo kulendlu lebitwa ngeLibito lami, lelithempeli lenetsembele kulo, nendzawo lengayipha nine kanye naboyihlomkhulu. 15 Ngitanikhipha lapha ebukhoneni bami nginilahle, njengaloku ngenta kubomnakenu, sonkhe sive saka-Efrayimu.’“
jr 21 ¶12
Kukhonta Encenyeni Yekugcina ‘Yemalanga’
12 Jehoyakimi nakacala kubusa, Jehova watjela Jeremiya kutsi aye ethempelini ayoveta bubi bebantfu baseJudiya. Bebatsatsa lithempeli laJehova njengentfo letabavikela. Kube bebangakuyeki ‘kweba, kubulala, kuphinga, kufungela emanga, kutfuncisa imphepho kuBhali, kulandzela labanye bonkulunkulu labangazange sebabati,’ Jehova abetalishiya lithempeli lakhe. Abengeke abayeke nebatentisi lebebakhulekela kulo, njengobe nje alishiya nelithabenakele eShilo ngemalanga a-Eli umPhristi Lomkhulu. Live lakaJuda “liyawusala likhala libhungane.” (Jer. 7:1-15, 34; 26:1-6) Jeremiya abedzinga sibindzi kuze amemetele lomlayeto! Lomlayeto wawumemetela kubantfu labatiwako nalabahlonishwako. Labanye bazalwane nabodzadzewetfu lamuhla nabo bayasidzinga sibindzi kuze bashumayele etindzaweni tawonkhe wonkhe, kubantfu labatigwili nakulabatiwako. Siyaciniseka kutsi Nkulunkulu utasisekela njengobe nje amsekela naJeremiya.—Heb. 10:39; 13:6.
Funisisa Umcebo EVini LaNkulunkulu
(Jeremiya 6:16) Naku lokushiwo nguSimakadze, utsi: “Manini emahlanganweni etindlela, nibuke, butani tindlela takadzeni, butani kutsi nguyiphi indlela lelungile, bese nihamba ngayo, niyawutfola kuphumula kwemiphefumulo yenu. Kodvwa nine natsi: ‘Singeke sihambe ngayo.’
w05 11/1 23 ¶11
Utawuhamba NaNkulunkulu Yini?
11 Siyalivumela yini liVi laNkulunkulu kutsi lisicondzise kulesikwentako? Kuyasita kutsi ngaletinye tikhatsi sitihlolisise. Cabanga ngelivesi lelitasisita sitihlole: “Naku lokushiwo nguSimakadze, utsi: ‘Manini emahlanganweni etindlela, nibuke, butani tindlela takadzeni, butani kutsi nguyiphi indlela lelungile, bese nihamba ngayo, niyawutfola kuphumula kwemiphefumulo yenu. Kodvwa nine natsi: ‘Singeke sihambe ngayo.’” (Jeremiya 6:16) Lamavi angasikhumbuta ngemuntfu loseluhambweni loma lakuphambana khona imigcwaco kuze abute indlela. Ngemcondvo waNkulunkulu, bantfu baJehova labavukelako baka-Israyeli bekudzingeka bente intfo lefanako. Bekudzingeka babuyele ‘etindleleni takadzeni.’ ‘Lendlela lelungile’ bekuyindlela bokhokho babo labetsembekile bebahamba ngayo, indlela lesive lesaphambuka kuyo. Lokubuhlungu kutsi ema-Israyeli awazange asemukele lesikhumbuto lesivela kuJehova. Lelivesi lichubeka litsi: “Kodvwa nine natsi: ‘Singeke sihambe ngayo.’” Lamuhla bantfu baNkulunkulu benta ngendlela leyehlukile, bayasilalela seluleko.
(Jeremiya 6:22, 23) Naku lokushiwo nguSimakadze, utsi: “Buka, kuta imphi, lechamuka eveni langasenyakatfo, sive lesikhulu sichukulutiwe, sisukela emikhawulweni yemhlaba. 23 Bahlome ngebutjoki nangesikhali; banelulaka, abanamusa. Bevakala njengelwandle loludvumako, nabagijima ngemahhashi abo; beta njengebantfu labavivele imphi, batewuhlasela wena, awu, Ndvodzakati yaseSiyoni.”
w88 4/1 13 ¶15
Jeremiya—Umphrofethi Wetehlulelo TaNkulunkulu Longatsandzeki
Juda Uyabhadala
15 Nga-632 B.C.E., i-Siriya beseyiwele kumaKaledi nemaMidiyani, futsi iGibhithe yancishiswa yaba ngumbuso lomncane longaseningizimu yakaJuda. Kusongelwa kwemaJuda bekuyochamuka eveni langasenyakatfo. Ngako, Jeremiya bekufanele atjele emaJuda akubo tindzaba letimbi! “Buka, kuta imphi, lechamuka eveni langasenyakatfo . . . banelulaka, abanamusa, . . . batewuhlasela wena, awu, Ndvodzakati yaseSiyoni.” Umbuso lobewutfole emandla ngaleso sikhatsi bekuyiBhabhulona. Bewutawuba lithulusi Jehova abetalisebentisa nakajezisa Juda lote kukholwa.—Jeremiya 6:22, 23; 25:8, 9.
Kufundvwa KweliBhayibheli
(Jeremiya 5:26-6:5) “Emkhatsini wesive sami kukhona emadvodza lamabi labahlala bagadzile njengebantfu labetsiya tinyoni, nanjengalabo lababekela bantfu tingibe tekubabamba. 27 Tindlu tabo tigcwele emacebo njengetindlu tetinyoni letigcwele tinyoni; sebaze banjinga baba nemandla, 28 sebakhuluphele baze bamanyatela. Tento tabo letimbi atinamkhawulo, ababameleli labo labate boyise kutsi bangalahlwa licala, abawalweli nemalungelo alabamphofu.” 29 Simakadze utsi: “Akukafaneli yini kutsi ngibajezise ngaloku? Akukafaneli yini kutsi ngitenanele kulesive lesinje? 30 “Kwenteke intfo lembi naleshacisako eveni: 31 Baphrofethi baphrofetha emanga, baphristi baphetse ngeligunya labo, nebantfu bami bakutsandza ngaleyo ndlela. Kodvwa nitakwenta njani ekupheleni?”
6 “Balekani niyewubhaca, sive sakaBhenjamini! Sukani eJerusalema nibaleke! Shayani impalampala eThekhowa! Phakamisani siboniso semlilo eBhethi Hakheremu! Ngobe kulunguta inhlekelele, ichamuka ngasenyakatfo, yebo, imbhubhiso lenkhulu. 2 Ngiyawuyibhubhisa iNdvodzakati yaseSiyoni, lenhle kangaka naleyincelencele kangaka. 3 Iyawusukelwa belusi kanye nemihlambi yabo balwe nayo, bayawumisa emathende abo bayitungelete, ngulowo nalowo anakekele indzima yakakhe.” 4 Batsi: “Tilungiseleleni imphi yekubhekana nayo! Sukumani nihlasele kusesemini! Kodvwa bukani, kukhanya kwelilanga sekuyafiphala, nematfunti akusihlwa semadze. 5 Ngako-ke sukumani, asihlasele ebusuku, sibhubhise tinqaba tayo!”
MARCH 20-26
UMCEBO LOSEVINI LANKULUNKULU | JEREMIYA 8-11
“Bantfu Bangaphumelela Kuphela Ngekucondziswa NguJehova”
(Jeremiya 10:2-5) Naku lokushiwo nguSimakadze, utsi: “Ningatifundzi tindlela tebetive nome-ke netfuswe tibonakaliso letisesibhakabhakeni, nome ngabe tive tiyatfutfumela ngato. 3 Ngobe emasiko etive akanamsebenti, bajuba sihlahla ehlatsini, bese kutsi umbati usibata ngelishizolo lakhe, 4 bakuhlobise ngesiliva nangegolide, bakutsekeletele ngehhamela nangetipikili, kuze kungetiwuntengetela. 5 Njengemlindzansimi esivandzini semajoti, letithico tabo atikwati kukhuluma, kudzingeka tize tetfwalwe, ngobe atikwati kutihambela. Ningatesabi, tingeke tinente lutfo lolubi, kantsi futsi kute naloluhle letingalwenta.”
(Jeremiya 10:14, 15) Bonkhe abanangcondvo, futsi abanalwati, bonkhe babumbi betegolide bahlazekile ngetithico tabo. Titfombe tabo tiyinkhohliso, atinamphefumulo. 15 Atinamsebenti walutfo, tintfo nje tekuhlekisa, kuyawutsi nakufika kwehlulelwa kwato, tibhubhe.
it-1 555
Emajoti
Umphrofethi Jeremiya wafananisa tithico lebetikhontwa sive lesikhonta titfombe, netingodvo, kanye naletinye tintfo letifaka ekhatsi tithico ‘nemlindzansimi esivandzini semajoti.’—Jer 10:5.
(Jeremiya 10:6, 7) Awu, Simakadze umkhulu, kute lonjengawe; nemandla eLibito lakho makhulu kakhulu. 7 Ngubani longete akuhlonipha wena, awu, wena Nkhosi yetive? Lolu ludvumo lolufanele wena. Kute namunye lofanana nawe, kuto tonkhe tihlakaniphi tetive, nakuyo yonkhe imibuso yato.
(Jeremiya 10:10-13) Kodvwa Simakadze nguyena Nkulunkulu sibili, unguNkulunkulu lophilako, iNkhosi yaphakadze. Nakatfukutsele yena, kutfutfumela umhlaba, tive atikhoni kumelana nelulaka lwakhe. 11 “Batjele naku: ‘Labonkulunkulu labangazange sebalibumbe lizulu nemhlaba, batawubhubha baphele emhlabeni, ngisho nangaphansi kwemazulu.’ “ 12 Kodvwa Nkulunkulu wawudala umhlaba ngemandla akhe lamakhulu; wesekela umhlaba ngekuhlakanipha kwakhe, weneka emazulu ngekucondza kwakhe. 13 Utsi nakabhavumula, emanti asemazulwini advume; ukhuphula emafu emikhawulweni yemhlaba. Utfumela imibane kanye nemvula, akhiphe umoya lohhushako etingungwini takhe.
w04 10/1 11 ¶10
Bobani Labadvumisa Nkulunkulu Lamuhla?
10 Nobe ungabuka emazulu nobe tintfo letidaliwe lapha emhlabeni, kuyacaca kutsi ukhona uMdali. (Jeremiya 10:12) Kufanele sihambisane netidalwa tasezulwini letimemeta titsi: “Kukufanele Jehova Nkulunkulu wetfu kwemukela inkhatimulo, ludvumo, nemandla, ngobe wadala tonkhe tintfo, nangentsandvo yakho taba khona futsi tadalwa.” (Sembulo 4:11) Nobe kunjalo, bososayensi labanyenti bayehluleka kubona lobufakazi ‘ngemehlo etinhlitiyo tabo’ ngisho nobe ingahle ibamangalise indlela letentiwe ngayo tintfo labatibona ngemehlo abo enyama. (Efesu 1:18) Singakufanisa kanje: Kudvumisa indlela tintfo letidalwe ngayo bese uyaphika kutsi ukhona uMdali wato akunangcondvo, kufana nekudvumisa umdvwebo lomuhle kakhulu kodvwa ngesikhatsi lesifanako uphike kutsi ukhona umdvwebi lowatsatsa indvwangu lengenalutfo wayenta umdvwebo lomuhle. Akumangalisi kutsi labo labangafuni kukholwa kuNkulunkulu kutsiwa “bete taba”!
(Jeremiya 10:21-23) Belusi abanangcondvo, abambuti naSimakadze; ngako abaphumeleli, nayo yonkhe imihlambi yabo isakatekile. 22 Lalelani! Livi lembiko liyasondzela, siphitsiphitsi lesikhulu, lesivela eveni langasenyakatfo! Utakwenta emadolobha akaJuda asale akhala libhungane, angumgedze wetimphungutja. 23 Awu, Simakadze, ngiyati kutsi kute umuntfu lotiphatsele yena imphilo yakhe. Akusiko kwemuntfu kutsi aticondzisele yena tinyatselo takhe.
Ungamtfukutseleli Nkulunkulu
Tinkinga letikhona emhlabeni lamuhla tibufakazi bekutsi bantfu behlulekile kutibusa. Kute ngisho munye hulumende walamhlabeni lokhonile kuletsa kuthula, injabulo nekucedza bugebengu. Kunaloko kubonakala ngatsi siya eweni. Loku kukhombisa kuba liciniso kwemavi laseBhayibhelini latsi: “Akusiko kwemuntfu kutsi aticondzisele yena tinyatselo takhe.” (Jeremiya 10:23) NguMbuso waNkulunkulu kuphela longenta kutsi bantfu baphumelele nalongaletsa kuthula, nenjabulo, ngobe vele nguloko lebekakuhlosile.—Isaya 45:18.
Funisisa Umcebo EVini LaNkulunkulu
(Jeremiya 9:24) Kodvwa lowo lotigabatisako akatigabatise ngaloku: Kwekutsi uyangicondza, futsi uyangati mine, kutsi nginguSimakadze lophatsana ngemusa, ehlulele ngekwemtsetfocotfo, abuse nangekulunga emhlabeni, ngobe ngiyajabula-ke kuloko,” kusho Simakadze.
Chubeka Usondzela KuJehova
16 Kutigcabha ngetintfo letifanele, kungaba kuhle. Sibonelo saloku kutsi kufanele sitigcabhe ngekuba boFakazi BaJehova. (Jer. 9:24) Kutihlonipha ngendlela lefanele kungasisita sente tincumo letinhle futsi singatibukeli phansi. Kantsi kucabanga kutsi imibono yetfu nobe sikhundla setfu sibaluleke kakhulu, kungasehlukanisa naJehova.—Hla. 138:6; Rom. 12:3.
(Jeremiya 11:10) Babuyela etonweni tabokhokho babo, labala kulalela emavi ami. Balandzele labanye bonkulunkulu, bakhonta bona. Indlu yaka-Israyeli nendlu yakaJuda, totimbili tisephulile sivumelwane lengasenta nabokhokho bato.
w07 3/15 9 ¶2
Emaphuzu Lagcamile Encwadzi YaJeremiya
3:11-22; 11:10-12, 17—Kungani Jeremiya amemetela nangembuso wasenyakatfo wetive letilishumi, ngisho noma iSamariya beseyibhujisiwe nga-740 B.C.E.? Kungenca yekutsi kubhujiswa kweJerusalema nga-607 B.C.E. bekukhombisa kukhishwa kwesehlulelo saJehova kuso sonkhe sive saka-Israyeli, hhayi nje esiveni sakaJuda kuphela. (Hezekeli 9:9, 10) Ngetulu kwaloko, ngemva kwekuwa kwembuso wetive letilishumi, lombuso wachubeka umelelwa yiJerusalema, ngobe umlayeto webaphrofethi baNkulunkulu wachubeka waze wefika ngisho nakulamanye ema-Israyeli.
Kufundvwa KweliBhayibheli
(Jeremiya 11:6-16) Simakadze wakhuluma kimi, watsi: “Wamemetele onkhe lamavi emadolobheni akaJuda nasetitaladini taseJerusalema, utsi: ‘Lalelani timiso talesivumelwane, nitilandzele. 7 Kusukela ngesikhatsi lengakhipha ngaso bokhokho benu eGibhithe kuze kube ngulamuhla, ngangibayala njalo nje, ngitsi: Ngilaleleni. 8 Kodvwa abazange bangilalele, abazange sebanginake nekunginaka, esikhundleni saloko bonkhe balandzela inkhani yetinhlitiyo tabo letimbi. Ngako ngehlisela etikwabo tonkhe ticalekiso talesivumelwane lengangibayale ngaso kutsi basilandzele kodvwa labangazange basigcina.’ “ 9 Ngako Simakadze wakhuluma kimi, watsi: “Kukhona luzungu emkhatsini wesive sakaJuda nakulabo labahlala eJerusalema. 10 Babuyela etonweni tabokhokho babo, labala kulalela emavi ami. Balandzele labanye bonkulunkulu, bakhonta bona. Indlu yaka-Israyeli nendlu yakaJuda, totimbili tisephulile sivumelwane lengasenta nabokhokho bato. 11 Ngako-ke naku lokushiwo nguSimakadze, utsi: ‘Ngiyakwehlisela etikwabo inhlekelele labangeke bakhone kuyibalekela. Nome bangakhala bacele lusito kimi, ngingeke ngibalalele. 12 Emadolobha akaJuda kanye nebantfu baseJerusalema bayawuhamba bayewukhala kubonkulunkulu labatfuncisa kubo imphepho, kodvwa bangeke babasite nakancane nje nase behlelwa ngulenhlekelele. 13 Ninabonkulunkulu labanyenti labangangalamadolobha enu, nine maJuda; nalamalati leniwamisele kutfuncisa imphepho kuwo, niyitfuncisele sithico lesilihlazo lesinguBhali, manyenti angangetitaladi taseJerusalema.’ 14 “Wena-ke Jeremiya, ungabathandazeli labantfu, ungabaceleli, futsi ungabancuseli, ngobe ngingeke ngilalele nase bangibita ngesikhatsi selusizi lwabo. 15 “Lotsandzekako wami wentani ethempelini lami, ngesikhatsi enta emacebo akhe ebubi nalabanyenti? Inyama lenikelwe ingasijikisa yini sijeziso sakho? Nase wenta bubi bakho uyajabula.” 16 Simakadze wakubita ngekutsi wena usihlahla semncumo lesikhula kahle, lesitsela titselo letihle impela. Kodvwa ngekubhodla kwesivunguvungu lesinemandla uyakusilumeka ngemlilo, emagala aso ayakwephuka.
MARCH 27–APRIL 2
UMCEBO LOSEVINI LANKULUNKULU | JEREMIYA 12-16
Ema-Israyeli Amkhohlwa Jehova
(Jeremiya 13:1-5) Naku lokwashiwo nguSimakadze kimi, watsi: “Hamba uyewutsenga libhande lelineni ulivunule elukhalweni lwakho, kodvwa lingawatsintsi emanti.” 2 Ngako ngavele ngatsenga libhande, njengobe Simakadze abeshito, ngabe sengilivunula elukhalweni. 3 Livi laSimakadze lase liyefika kimi kwesibili, latsi: 4 “Tsatsa lelibhande lolitsengile lolivunule elukhalweni lwakho uhambe nyalo uye eYufrathe, ufike ulifihle khona elufantfwini lwemadvwala.” 5 Ngako ngahamba ngafike ngalifihla eYufrathe, njengobe Simakadze abengitjelile.
jr 51 ¶17
Yigadze Inhlitiyo Leyenganako
17 Umsebenti labenikwe wona Jeremiya wawufaka ekhatsi kulalela ticondziso taNkulunkulu. Kube bewunguJeremiya, bewutatilalela yini leticondziso? Jehova wake watjela Jeremiya kutsi atsatse libhande lelineni aligcoke. Ngemuva kwaloko Nkulunkulu wamyala kutsi aye eYufrathe. Nawubuka libalave, utawubona kutsi lelibanga lalingemakhilomitha langaba ngu-500. Nakefika khona, Jeremiya kwakufanele alifihle emfantfwini welidvwala bese uhamba yonkhe leyo ndlela abuyele eJerusalema. Ngemva kwesikhatsi, Nkulunkulu watsi akabuyele emuva ayolandza lelibhande. (Fundza Jeremiya 13:1-9.) Kubonakala shengatsi luhambo lwaJeremiya lwaba ngemakhilomitha langu-1 900 selulonkhe. Bantfu labangalitsandzi liBhayibheli abakholwa sanhlobo kutsi abengahamba libanga lelidze kangaka ngetinyanga nje letimbalwa. (Ezra 7:9) Nobe kunjalo, nguloko Nkulunkulu lakusho futsi Jeremiya wakwenta.
(Jeremiya 13:6, 7) Emvakwemalanga lamanyenti Simakadze wakhuluma kimi, watsi: “Hamba- ke manje uye eYufrathe, ufike utsatse lelibhande lengakutjela kutsi uyekulifihla khona.” 7 Ngako ngahamba ngaya eYufrathe, ngafike ngemba lelibhande ngalitsatsa kulendzawo lapho bengilifihle khona, kodvwa manje lase libhudluke kakhulu selingenamsebenti.
jr 52 ¶18
Yigadze Inhlitiyo Leyenganako
18 Mbone ngeliso lengcondvo lomphrofethi acanca tintsaba taseJudiya, ajuba ekhatsi ehlane lelingaseYufrathe, kuye ngekutsi ukhetsa kuhamba ngakuphi. Uyofihla libhande lelineni njalo. Kungenteka bomakhelwane bakhe bebatibuta kutsi uyephi njengoba anyamalele sikhatsi lesidze. Wabuya angakaligabi libhande lelineni. Nkulunkulu wase utsi akajike abuyele emuva ayolandza lelibhande nanobe lase libhudluke kakhulu “selingenamsebenti.” Asewucabange kutsi kwakungaba melula kanjani ngaye kutsi atsi: ‘Ngeke ngikhone. Kutangisita ngani loku.’ Kodvwa ngobe abebunjwe nguNkulunkulu, akazange asho njalo. Esikhundleni sekukhonona, wenta njengobe abetfunyiwe.
(Jeremiya 13:8-11) Livi laSimakadze lase liyefika kimi, latsi: 9 “Naku lokushiwo nguSimakadze, utsi: ‘Ngalokufananako ngitalibhidlita ligcabho lakaJuda kanye neligcabho lelikhulu laseJerusalema. 10 Labantfu lababi labalako kulalela emavi ami balandzele inkhani yetinhlitiyo tabo, balandzele labanye bonkulunkulu kutsi batewubasebentela babakhonte, bayawufanana nalelibhande, bangabi namsebenti walutfo ngalokuphelele! 11 Ngobe njengobe libhande livunulwa elukhalweni lwendvodza, kanjalo indlu yonkhe yaka-Israyeli kanye neyakaJuda ngitibophele kimi,’ kusho Simakadze, ‘kutsi babe sive sami lengitakwatiwa ngaso, ngibatjatwe ngaso ngidvunyiswe ngaso. Kodvwa abakangilaleli.’“
jr 52 ¶19-20
Yigadze Inhlitiyo Leyenganako
19 Kwaba ngemuva kweluhambo lwesibili lapho Nkulunkulu akuchaza khona konkhe loku. Loko Jeremiya lakwenta kwamenta walungela kumemetela umlayeto lonemandla lotsi: “Labantfu lababi labalako kulalela emavi ami balandzele inkhani yetinhlitiyo tabo, balandzele labanye bonkulunkulu kutsi batewubasebentela babakhonte, bayawufanana nalelibhande, bangabi namsebenti walutfo ngalokuphelele!.” (Jer. 13:10) Jehova ubafundzisa kahle bantfu bakhe. Kulalela kwaJeremiya ngalokusuka enhlitiyweni, entfweni leyayibonakala ingasho lutfo, kwadlala indzima lebalulekile emetamweni yaJehova yekutsintsa tinhlitiyo tebantfu.—Jer. 13:11.
20 EmaKhristu lamuhla awacelwa kutsi ahambe emakhilomitha lamanyenti kuze Nkulunkulu awafundzise sifundvo lesitsite. Nobe kunjalo, kungenteka yini kutsi indlela lophila ngayo ingenta bomakhelwane nobe bantfu lobajwayele badideke nobe bahlekise ngawe? Kungase kube yindlela logcoka futsi utilungise ngayo, imfundvo loyikhetsako, umsebenti lokhetsa kuwenta, ngisho nendlela lotiva ngayo ngetjwala. Utawuvumela Nkulunkulu akucondzise njengaJeremiya yini? Tincumo lotenta ngenca yekutsi uvumela inhlitiyo yakho ibunjwe nguNkulunkulu tingahle tikwente ufakaze ngephandle kwemavi. Nobe kungazange kube njalo, kulalela sicondziso saJehova lesiseVini lakhe nekwemukela siyalo lesisinikwa sisebenti lesitsembekile kwentelwe kusisita phakadze. Ungavumeli inhliziyo lekhohlisako ikulawule. NjengaJeremiya, timisele kuvumela Nkulunkulu akubumbe, akwente ube sitja seludvumo latasisebentisa njalo.
it-1 1121 ¶2
Lukhalo
Jehova wafanisa ema-Israyeli kanye nemaJuda nelibhande leliselukhalo kangangekutsi wawabophela kuye kutsi abe sive sakhe labetawatiwa ngaso futsi advunyiswe ngaso. (Jer 13:11) Ngekwesiphrofetho, Jesu Khristu ubonakala abusa ngekulunga lokulibhande lakhe, kwetsembeka kungumbhenso welukhalo lwakhe. Loku kusho kutsi Jesu akashintji, ubusa ngekulunga nangekwetsembeka. Njengobe libhande libopha kucine, nekulunga kumenta abe ngumehluleli locinile.—Isa 11:1, 5.
Funisisa Umcebo EVini LaNkulunkulu
(Jeremiya 12:1, 2) Yebo Simakadze, wena uhlala ungcwele, nangiletsa indzaba embikwakho. Noko ngifuna kukhuluma nawe macondzana nekwehlulela kwakho. Kwentiwa yini kutsi indlela yalomubi iphumelele? Kwentiwa yini kutsi labangaketsembeki bahlale kahle bakhululekile? 2 Ubahlanyele, bamila; bayakhula batsele titselo. Sonkhe sikhatsi uhlala usetindzebeni temilomo yabo, kodvwa ukhashane netinhlitiyo tabo.
(Jeremiya 12:14) Naku-ke lokushiwo nguSimakadze, utsi: “Bonkhe labomakhelwane bami labakhohlakele labatsatsa ngendlovuyangena lifa lami lengalipha sive sami, ema-Israyeli, ngitabazuphuna kulamave abo, ngiphindze ngizuphune nendlu yakaJuda emkhatsini wabo.
jr 118 ¶11
Uyatibuta Yini Kutsi, “Uphi Simakadze?”
11 Jeremiya abekhatsateka nakabona lababi baphumelela. (Fundza Jeremiya 12:1, 3.) Nanobe abeciniseka kutsi Jehova ulungile, wafuna impendvulo ‘yesikhalo’ sakhe. Kutsandza lokulungile kwakhe kwenta kwacaca kutsi abenebuhlobo lobucinile naNkulunkulu, njengebudlelwane lobubakhona emkhatsini wemntfwana nababe wakhe lamtsandzako. Abetibuta kutsi kwentiwa yini kutsi emaJuda lamanyenti aphumelele kantsi mabi. Jeremiya wayitfola yini impendvulo leyenetisako? Jehova wamcinisekisa kutsi abetawubasusa bantfu lababi. (Jer. 12:14) Njengobe Jeremiya abona setenteka tintfo labetithantazele kuJehova, wametsemba kakhulu. Ngenca yaloko, Jeremiya abethantaza njalo kuNkulunkulu, aveta indlela lativa ngayo.
(Jeremiya 15:17) Angizange sengihlale emkhambatsini webatsandzi bemadzili, angizange sengitijabulise kanye nabo. Ngahlala ngedvwana, ngobe sandla sakho sasisetikwami, wawungigcwalise ngentfukutselo enhlityweni.
w04 5/1 12 ¶16
Bani Nesibindzi NjengaJeremiya
Asikhetse Bantfu Lesitihlanganisa Nabo
16 Jeremiya wakhuluma ngalokunye lokwamsita waba nesibindzi. Watsi: “Angizange sengihlale emkhambatsini webatsandzi bemadzili, angizange sengitijabulise kanye nabo. Ngahlala ngedvwana, ngobe sandla sakho sasisetikwami, wawungigcwalise ngentfukutselo enhlityweni.” (Jeremiya 15:17) Jeremiya abekhetsa kuba yedvwa kunekutsi oniswe bangani lababi. Asisikhohlwa secwayiso semphostoli Pawula lesitsi “kutihlanganisa nebantfu lababi kona imikhuba lemihle,” ngisho nemikhuba lemihle lesekuphele iminyaka leminyenti sinayo.—1 Khorinte 15:33.
Kufundvwa KweliBhayibheli
(Jeremiya 13:15-27) Vanini, nilalelisise, ningatigabatisi, ngobe Simakadze sewukhulumile. 16 Mnikeni ludvumo Simakadze Nkulunkulu wenu, asengakabuletsi bumnyama, tinyawo tenu tisengakakhubateli emagcumeni lahwalalisako. Netsembele ekukhanyeni, kodvwa utakugucula, akwente kube bumnyama lobuphatsekako, yebo, akwente kube lusizi lolujulile. 17 Kodvwa naningalaleli, ngiyawukhala emasitseleni ngenca yeligcabho lenu. Emehlo ami ayawukhala kabuhlungu kabi agobhote tinyembeti, ngobe umhlambi waSimakadze uyawube utfunjiwe. 18 Khuluma enkhosini nasendlovukazini, utsi: “Yehlani etihlalweni tenu tebukhosi, ngobe lemichele yenu lemanyatelako itawudzilika lapha etinhloko tenu.” 19 Emadolobha aseNegevu ayawuvalwa, futsi kuyawubate loyakuwavula. Juda wonkhe uyawutfunjwa, ayiswe ekudzingisweni, atsatfwe wonkhe. 20 Phakamisani emehlo enu nibone labo labaphuma enyakatfo. Uphi lomhlambi lebewubekwe etandleni tenu, timvu lebenitigabatisa ngato? 21 Uyawutsini-ke ngesikhatsi Simakadze asabeka etikwakho labo lebewubetayeta kutsi babe bangani bakho? Buhlungu bungeke yini bukubambise kwemfati nakabeleka? 22 Nawutibuta utsi: “Loku kwentekeleni kimi?” phela kungenca yetono takho letinyenti, lokutsi tidvwaba takho tidzatjulwe, nemtimba wakho uphatseke kabi. 23 UmTopiya angasigucula yini sikhumba sakhe nome ingwe emabala ayo? Nani ningeke nikwente lokuhle, ngobe senetayele kwenta lokubi. 24 “Ngitanisakata njengemakhoba wona lapheshulwa ngumoya wasehlane. 25 Loku ngulokusabelo sakho, sabelo lese ngikumisele sona, ngobe sewungikhohliwe, wetsemba bonkulunkulu,” kusho Simakadze. 26 “Ngitawugwabula tidvwaba takho tibuye ebusweni, khona kutewubonakala bungcunu bakho: 27 konkhe kuphinga kwakho, nako konkhe kushangashangiswa kwakho yinkhanuko, nebugwadla bakho lobulihlazo! Ngitibonile tento takho letisinengiso emagcumeni nasetikhotseni. Awu, nako kuwe, Jerusalema! Uyawuhlala ungcolile kuze kube ngunini?”