Kwenta Sikhatsi Sekutadisha Sibe Ngulesijabulisa Kakhulu Kanye Nalesizuzisako
Singayitfola njani injabulo leyengetiwe ekutadisheni liBhayibheli? Singasenta njani sikhatsi setfu sekutadisha sibe ngulesizuzisa kakhulu? Ase sihlole kafishane tinyatselo letintsatfu letibalulekile, letingasisita sizuze kakhulu esifundvweni seliBhayibheli lesitichubela sona.
1 THANDAZA: Sinyatselo sekucala lokufanele sisitsatse, kuthandaza. (Hla. 42:8) Kungani kunjalo? Kufanele sitsatse kutadisha kwetfu liVi laNkulunkulu njengencenye yekukhonta kwetfu. Ngako-ke, kudzingeka sicele Jehova kutsi asente sibe nesimo sengcondvo lesihle, futsi asiphe umoya wakhe longcwele. (Luk. 11:13) Barbara, losekanesikhatsi lesidze asitfunywa seliVangeli, utsi: “Ngaso sonkhe sikhatsi ngembikwekutsi ngifundze nobe ngitadishe liBhayibheli, ngicala ngekuthandaza. Ngemuva kwaloko, ngiyeva kutsi Jehova unami futsi uyakujabulela loko lengikwentako.” Kuthandaza ngembikwekutadisha kuvula tingcondvo kanye netinhlitiyo tetfu, kutente temukele inala yekudla kwakamoya lokusuke kusembikwetfu.
2 ZINDLA: Ngesizatfu sekutsi bete sikhatsi, labanye bantfu bamane balifundze nje liVi laNkulunkulu. Nanobe kunjalo, loku kubenta balahlekelwe tinzuzo labebangatitfola ngekutadisha liBhayibheli. Carlos, losakhonte Jehova iminyaka lengetulu kwa-50, ukucaphele kubaluleka kwekubekela eceleni sikhatsi sekuzindla kute ente kutadisha kwakhe kube ngulokuzuzisa kakhulu. Utsi: “Nyalo sengifundza emakhasi lambalwa eliBhayibheli—emakhasi langaba mabili ngelilanga. Kwenta njalo kungisita kutsi ngicitse sikhatsi lesengetiwe ngizindla ngaloko lengikufundzile kute ngitfole tifundvo letibalulekile.” (Hla. 77:12) Ngekwakha sikhatsi sekuzindla, sikhulisa lwati lwetfu kanye nendlela lesiyicondza ngayo intsandvo yaNkulunkulu.—Khol. 1:9-11.
3 KUSEBENTISE LOKUFUNDZAKO: Sizuza kakhulu emsebentini lotsite nangabe sikubona kubaluleka kwawo. Loko kuliciniso nangekutadisha liBhayibheli. Gabriel, longumzalwane losemusha, futsi loneluhlelo lwekutadisha liBhayibheli njalo, utsi: “Kutadisha kungisita ngincobe tinkinga lengihlangabetana nato malanga onkhe, futsi kungenta ngikwati kusita nalabanye.” Uphindze atsi: “Ngetama kukusebentisa ekuphileni kwami konkhe loko lengikufundzako.” (Dut. 11:18; Josh. 1:8) Kuliciniso kutsi kunekwatiswa lokunyenti lokuvela kuNkulunkulu, lesingakutfola siphindze sikusebentise.—Taga 2:1-5.
KUBUKETA: Sinelitfuba lelihle kakhulu lekuhlolisisa lwati lesiniketwa lona nguJehova, longuMtfombo wekuhlakanipha. (Rom. 11:33) Ngako-ke, esikhatsini lesitako nawutadisha, ciniseka kutsi ucala ngekuthandaza kuJehova, umcele akunike simo sengcondvo lesihle, futsi akuphe nemoya wakhe longcwele. Ngemuva kwaloko, bani nesikhatsi sekuzindla ngaloko lokufundzako. Phindze wetame kusebentisa tintfo lotifundzako ekuphileni kwakho kwamalanga onkhe. Nawutilandzela letinyatselo letibalulekile, utawutfola kutsi kutadisha kwakho liBhayibheli kutawuba ngulokujabulisa kakhulu kanye nalokuzuzisako.