Ungakukhetsa Njani Kuba Nelikusasa Lelihle?

UNGAYITFOLA njani imphumelelo lengiyo ekuphileni? Lenye indlela longayitfola ngayo kucabanga ngemiphumela yetincumo lotenta nyalo.

Kuliciniso kutsi ungase ukukhandze kumatima kwenta tincumo letitakuzuzisa kuphila kwakho konkhe. Kungani kunjalo? Kungobe bantfu labanyenti lamuhla bafuna kutsi tintfo labatifisako tenteke ngekushesha. Sibonelo saloko kutsi ungase ubone kutsi kusebentisa seluleko seliBhayibheli kungakusita wakhe buhlobo lobucinile nemndeni wakini. (Efesu 5:22–6:4) Kute ukhone kwenta loko, kufanele utinikete sikhatsi sekuba nemndeni wakini kunekutsi ucitse sikhatsi lesinyenti usemsebentini nome utilibatisa. Ekuphileni kwetfu kufanele sikhetse emkhatsini wekutijabulisa sikhashana nemphumelelo letawutsatsa sikhatsi lesidze. Yini lengakusita kutsi ube nesibindzi sekuyikhetsa kahle indlela yekuphila? Yenta naku lokulandzelako.

1 Cabanga Ngemiphumela Yetincumo Takho

Nakufanele wente sincumo, cabangisisa ngemiphumela yaso. LiBhayibheli liseluleka litsi: “Umuntfu lohlakaniphile ingoti uyibona iseta, bese uyayibalekela.” (Taga 22:3) Nawucabangisise kahle ngemiphumela yesincumo sakho, ngeke wente sincumo lokungenteka sikuletsele imiphumela lebuhlungu. Ngakulokunye, nawucabanga ngetinzuzo tesikhatsi lesitako tesincumo lesikhombisa kutsi uhlakaniphile, utawukhona kwenta sincumo lesinengcondvo.

Tibute: ‘Utawuba yini umphumela wesincumo sami kusukela nyalo, kulomnyaka, eminyakeni lengu-10 nobe lengu-20 letako? Sitayitsintsa njani imiva nemphilo yami? Lengitakukhetsa kutawutsintsa njani umndeni wakitsi nalabanye bantfu lengibatsandzako?’ Umbuto lobaluleke kakhulu longatibuta wona ngulotsi: ‘Sincumo sami sitamjabulisa yini Nkulunkulu? Sitabutsintsa njani buhlobo bami naye?’ Njengobe liBhayibheli liphefumulelwe nguNkulunkulu, lingakusita kutsi ukwati lokumjabulisako futsi likucwayise ngetingoti lokungenteka awukatinaki.—Taga 14:12; 2 Thimothi 3:16.

2 Kuhlolisise Lokukhetsako

Bantfu labanyenti benta loko lababona labanye bakwenta kunekutsi batentele bona tincumo. Indlela letsite yekuphila ngeke ikuphumelelise ngesizatfu nje sekutsi yetayelekile. Kuhlolisise lokukhetsako. Cabanga ngaNatalie.a Utsi: “Bengifuna umshado lotangenta ngijabule kodvwa ngabona kutsi indlela lebengitiphatsa ngayo beyitawungenta ngingawutfoli. Ekolishi, bonkhe bangani bami bebaphumelela etifundvweni tabo kodvwa bebenta tincumo litimbi ekuphileni kwabo. Bafana bebashintjashintja emantfombatana, nemantfombatana ashintjashintja bafana, baganana. Nami benginjalo, bengibashintjashintja bantfu lebengitsandzana nabo. Lemphilo lebengiyiphila yangivisa buhlungu lobukhulu.”

Natalie wacala kufundza liBhayibheli naboFakazi BaJehova. Watsi: “KuboFakazi, ngabona bantfu labasha labajabulile nebantfu labashadile labajabulako emishadweni yabo. Nanobe bekungesimelula kimi, kancane kancane ngayishintja indlela lebengiphila ngayo.” Waba yini umphumela? Natalie utsi: “Bekusolo kusifiso sami kushada nemuntfu lengimtsandza mbamba. Ngekuhamba kwesikhatsi, ngashada nelijaha lelinetinkholelo letifanana netami. Ngiyabona kutsi Nkulunkulu ungiphe kuphila kwemndeni lokumnandzi kwendlula loko lebengikufisa.”

3 Cabanga Ngemiphumela Yalokukhetsako

Kute ubalekele kucabanga ngemiphumela yamanje kuphela, kufanele uphindze ucabangisise ngelikusasa lolifunako futsi uhlele nendlela yekulitfola. (Taga 21:5) Ungacabangi ngeminyaka lengu-70 nome lengu-80 kuphela levame kuphilwa bantfu. Esikhundleni saloko, ticabange ujabulela likusasa laphakadze liBhayibheli lelikhuluma ngalo.

LiBhayibheli litsi ngekufa kwaJesu Khristu, Nkulunkulu wente indlela yekutsi bantfu batfole kuphila lokuphakadze. (Matewu 20:28; Roma 6:23) Nkulunkulu wetsembisa kutsi injongo yakhe yasekucaleni ngebantfu itawugcwaliseka. Bantfu labatsandza Nkulunkulu batawujabulela kuphila lokuphakadze emhlabeni, sewumuhle ulungisiwe. (Tihlabelelo 37:11; Sembulo 21:3-5) Ungaba nalo likusasa lelinjalo nawucabangisisa ngemiphumela yalokukhetsako.

4 Sebentela Emigomeni Yakho

Yini longayenta kute utfole lelikusasa lesetsenjisiwa lona? Cala ngekufundza ngaNkulunkulu. (Johane 17:3) Lwati lolungulonalona lweliBhayibheli lutakwenta uciniseke kutsi likusasa Nkulunkulu lasetsembise lona utalitfola. Kukholwa lokunjalo kutakusita kutsi wente tingucuko letidzingekako kute wemukeleke kuNkulunkulu.

Cabanga ngalokwenteka kuMichael. Utsi: “Ngacala kunatsa tjwala nekudla tidzakamiva ngineminyaka lengu-12. Ngajoyina licembu letigebengu ngilindzele kutsi ngitakufa ngingakefiki eminyakeni lengu-30. Intfukutselo nekucasuka kwangenta ngetama kanyenti kutibulala. Bengicabanga kutsi kunalokuncono ekuphileni, kodvwa angizange ngikutfole.” Ngalesikhatsi Michael asesesikolweni, lomunye kulelicembu letigebengu wacala kufundza liBhayibheli naboFakazi BaJehova. Naye Michael wavuma kufundza liBhayibheli.

Tintfo latifundza eBhayibhelini tashintja indlela labecabanga ngayo ngelikusasa. Watsi: “Ngafundza kutsi esikhatsini lesitako umhlaba utawuba lipharadisi nekutsi bantfu batawuhlala ngekuthula bangakhatsateki. Ngacala kubona loko njengelikusasa lami. Ngase ngiba nemgomo wekwakha buhlobo lobuhle naJehova kodvwa bengingakhoni kumjabulisa ngaso sonkhe sikhatsi. Ngisho nangemuva kwekucala kufundza liBhayibheli, bengidzakwa ngaletinye tikhatsi futsi ngake ngaya ecasini nentfombatane.”

Michael wakhona njani kuyekela letintfo lebetimphazamisa nekushintja indlela yakhe yekuphila? Utsi: “Fakazi lobekangifundzisa liBhayibheli wangikhutsata kutsi ngilifundze onkhemalanga liBhayibheli ngiphindze ngitihlanganise nebantfu labafuna kujabulisa Nkulunkulu. Ngabona kutsi laba lebengikanye nabo kulelicembu letigebengu bebangenta ngingakhoni kuyekela lemikhuba lemibi. Nanobe besengibatsatsa njengemndeni wami kodvwa ngayekela kutihlanganisa nabo.”

Michael watibekela imigomo yesikhatsi lesifishane lehambisana netintfo lebetitamsita kutsi afeze imigomo yakhe yesikhatsi lesidze lebeyitakwenta kuphila kwakhe kuvumelane netimiso taNkulunkulu. Nawe ungamlingisa. Bhala imigomo yakho yesikhatsi lesidze netinyatselo letitakusita kutsi uyifeze. Coca nebantfu labatakusekela kute uyifeze lemigomo uphindze ubacele bakusite utibone kutsi uyalwenta yini lushintjo.

Ungatitjeli kutsi uyawucala kufundza ngaNkulunkulu nekwenta lakushoko ekuphileni kwakho ngalelinye lilanga. Tsatsa tinyatselo nyalo kute ube nelutsandvo ngaNkulunkulu neliVi lakhe liBhayibheli. Nalichaza umuntfu lophila ngetimiso teliBhayibheli, liVi lakhe litsi: “Konkhe lakwentako kuyaphumelela.”—Tihlabelelo 1:1-3.

[Umbhalo longentansi]