Ungalokotsi ‘Umtfukutselele Jehova’

1, 2. Kungani kungakafaneli sisole Jehova ngetinkinga letehlela bantfu? Fanekisa.

ASE sitsi uyindvodza leseyishade iminyaka leminyenti futsi lejabulile. Kodvwa ngalelinye lilanga nawufika ekhaya utfola kutsi konkhe endlini yakho kubheke lena nalena. Ifenisha iphuliwe, tinkomishi, emasoso, nemapulete kutse sakalala kufile nekhaphethi imoshekile. Likhaya lakho lolitsandzako ligucuke laba yinhlekelele. Bewungasho yini kutsi: “Kungani umfati wami ente loku?” Nome bowungahle ubute: “Ngubani lowente loku?” Ngalokungangabateki umbuto wesibili nguwo lobowungafika engcondvweni yakho. Kungani? Kungobe uyati kutsi umfati wakho lomtsandzako abengeke ente lesento sebudlova lesibi kangaka.

² Lamuhla sibona emakhaya ebantfu kugcwele budlova nekutiphatsa lokubi. Njengebafundzi beliBhayibheli, siyati kutsi Jehova angeke abe yimbangela yato tonkhe letinkinga. Wadala umhlaba kute ube lipharadisi lelijabulisako. (Gen. 2:8, 15) Jehova nguNkulunkulu lolutsandvo. (1 Joh. 4:8) Kutadisha kwetfu imiBhalo kusisite kutsi sitfole imbangela sibili yetinkinga letinyenti letentekako emhlabeni. Akekho lomunye lobangela letinkinga ngaphandle kwaSathane Develi “umbusi walelive.”—Joh. 14:30; 2 Khor. 4:4.

3. Kucabanga kwetfu kungase kuphatamiseke ngayiphi indlela?

³ Nobe kunjalo, angeke sisole Sathane ngalo lonkhe lusizi lwetfu. Kungani kunjalo? Kungobe letinye tinkinga tetfu tingumphumela wemaphutsa etfu. (Fundza Dutheronomi 32:4-6.) Nobe singalivuma lelociniso, kuba kwetfu nesono kungaphatamisa kucabanga kwetfu futsi kusibangele sitsatse indlela leholela enhlekeleleni. (Taga 14:12) Ngayiphi indlela? Kunekutsi sitisole tsine nobe Sathane ngenkinga letsite, singahle sicale kusola Jehova. Singadzimate ‘simtfukutselele Jehova.’—Taga 19:3.

4, 5. UmKhristu ‘amngamtfukutselela njani Jehova’?

⁴ Kungenteka yini vele kutsi ‘simtfukutselele Jehova’? Kuliciniso kutsi kwenta njalo kungaba lite. (Isa. 41:11) Yini lesicabanga kutsi singayitfola nasimtfukutselela? Lenye imbongi yatsi: “Sandla sakho sifisha kakhulu kutsi singalwa naNkulunkulu.” Kungenteka singakhoni kubonana naJehova sikhulume naye umlomo nemlomo ngetikhalo tetfu. Umbhalo weTaga 19:3 utsi umuntfu losiphukuphuku “ulimata imphilo yakhe yonkhe; kodvwa usuka lapho [atfukutselele] Simakadze.” Umuntfu angamtfukutselela Nkulunkulu enhlitiyweni yakhe. Simo sengcondvo lesinjalo singasitsikameta ngetindlela letinyenti. Umuntfu angabambela Jehova emagcubu. Umphumela waloko ungaba kutsi loyo muntfu angase ashiye libandla nobe angasawasekeli emalungiselelo ekukhonta Jehova.

⁵ Yini lengasibangela kutsi ‘simtfukutselele Jehova’? Singalubalekela njani lolugibe? Kubalulekile kutsi sitati timphendvulo talemibuto. Ngobe buhlobo betfu naNkulunkulu Jehova bubalulekile.

YINI LENGASIBANGELA KUTSI ‘SITFUKUTSELELE JEHOVA’?

6, 7. Kungani ema-Israyeli ngesikhatsi saMosi acala kukhonona ngaJehova?

⁶ Yini lengabangela inhlitiyo yenceku yaJehova leyetsembekile kutsi icale kukhonona ngaNkulunkulu? Ase sicoce nganati tindlela letisihlanu futsi sihlole netibonelo teliBhayibheli letigcamisa kutsi labanye bangena njani kulolugibe endvulo.—1 Khor. 10:11, 12.

⁷ Tinkhulumo letingakhi talabanye tingaba nemtselela kitsi. (Fundza Dutheronomi 1:26-28.) Ema-Israyeli asandza kukhululwa ebugcilini baseGibhithe. Ngalokusimangaliso Jehova uletse tishayo letilishumi kulesive lebesigcilata bantfu bakhe futsi ngemuva kwaloko wabhubhisa Faro nelibutfo lakhe eLwandle Lolubovu. (Eks. 12:29-32, 51; 14:29-31; Hla. 136:15) Bantfu baNkulunkulu bebakulungele kungena eVeni Lesetsembiso. Ngalokudzabukisako, kuleso sikhatsi lesimatima, ema-Israyeli acala kukhonona ngaJehova. Yini leyabangela kutsi abe bete kukholwa? Ngesizatfu sekuva imibiko lengasiyo ngetinhloli letatitfunywe kuyewuhlola live, ema-Israyeli aba madvolo matima. (Num. 14:1-4) Waba yini umphumela? Sonkhe situkulwane asizange sivunyelwe kutsi singene ‘kulelive lelihle.’ (Dut. 1:34, 35) Kufanele yini ngaletinye tikhatsi sivumele tinkhulumo talabanye letingakhi kutsi tisente sibe butsakatsaka ekukholweni futsi sikhonone ngendlela yaJehova yekusebentelana natsi?

8. Yini leyabangela bantfu ngesikhatsi sa-Isaya kutsi bacale kusola Jehova ngetinkinga labebabhekene nato?

⁸ Kuhlupheka nebumatima kungasicedza emandla. (Fundza Isaya 8:21, 22.) Ngesikhatsi sa-Isaya, sive sakaJuda satitfola sisebumatimeni. Sasitungeletwe titsa. Bekumatima kutfola lokuya etfunjini. Bantfu bebafa yindlala. Lokubaluleke kakhuku kutsi bebalambele livi laNkulunkulu. (Amo. 8:11) Kunekutsi bafune lusito lwaJehova kulobo bumatima labebabhekene nabo, bacala ‘kucalekisa’ inkhosi yawo kanye naNkulunkulu wabo. Bebasola Jehova ngetinkinga tabo. Nangabe sehlelwa tinhlekelele nobe tinkinga tekuphila, singasho yini natsi enhlitiyweni yetfu sitsi: ‘Bekakuphi Jehova nasimdzinga?’

9. Kungani ema-Israyeli ngesikhatsi saHezekiya acala kuba nesimo sengcondvo lesibi?

⁹ Asiwati onkhe emaciniso. Ngesizatfu sekungawati onkhe emaciniso, ema-Israyeli ngesikhatsi saHezekiya eva shengatsi “indlela yaSimakadze ayikalungi.” (Hez. 18:29) Abenta shengatsi anelilungelo lekwehlulela Nkulunkulu, abona timiso tawo tincono kwendlula taJehova futsi amehlulela ngendlela wona lacondza ngayo tintfo letentekako. Nangabe ngaletinye tikhatsi singaticondzi ngalokugcwele tincenye teliBhayibheli nobe indlela tintfo letenteka ngayo ekuphileni kwetfu, singahle yini sive shengatsi indlela yaJehova “ayikalungi”?—Jobe 35:2.

10. Lomunye angase asilandzele njani sibonelo sa-Adamu lesibi?

¹⁰ Sisola labanye ngetono nangemaphutsa etfu. Ekucaleni kwemlandvo webantfu, Adamu wasola Nkulunkulu ngesono sakhe. (Gen. 3:12) Nanobe Adamu abeyati kahle imiphumela yekwephula umtsetfo waNkulunkulu, wasola Jehova. Ecinisweni watsi Jehova umnikete umfati lomubi. Kusukela ngaleso sikhatsi, labanye balandzele sibonelo sa-Adamu sekusola Nkulunkulu ngemaphutsa abo. Senta kahle ngekutibuta lombuto: ‘Kudvumateka nekukhatsateka ngemaphutsa lengiwentile kungangibangela yini kutsi ngingenetiseki ngetimiso taJehova?’

11. Ngusiphi sifundvo lesisifundza kuJona?

¹¹ Siticabangela tsine kakhulu. Umphrofethi Jona waba nenkinga yekusola sincumo semusa waJehova lasentela bantfu base Nineve. (Jona 4:1-3) Kungani? Wacabanga ngelihlazo latawubhekana nalo nangabe loko labekakumemetele ngembhubhiso kungenteki. Jona abekhatsateke ngekutsi bantfu batawucabangani ngaye kunekutsi acabange ngalesive saseNineve lesasesiphendvukile. Kungenteka yini ngatsi siticabangele tsine size sitfukutselele Jehova ngekungababhubhisi ngekushesha bantfu lababi? Nangabe sesishumayele iminyaka leminyenti kutsi lilanga laJehova selisedvute, kufanele yini siphelelwe kubeketela ngaJehova nangabe labanye basiphukuta ngekushumayela ngaloko lokushiwo liBhayibheli?—2 Phet. 3:3, 4, 9.

INDLELA LESINGAKUBALEKELA NGAYO ‘KUTFUKUTSELELA JEHOVA’

12, 13. Nangabe sesicala kusola leminye imisebenti yaJehova, yini lokufanele singayikhohlwa?

¹² Yini lesingayenta nangabe sicala kungabata leminye imisebenti yaJehova? Khumbula kutsi akusiko kuhlakanipha kwenta njalo. Lenye indlela umbhalo weTaga 19:3 lohunyushwe ngayo itsi: “Umuntfu nakadidwe tinkinga takhe utfukutselela Jehova.” (Byington) Sinaloko engcondvweni ase sicoce ngetindlela letisihlanu letitasisita kutsi singavumeli kukhatsateka ngetinkinga tekuphila kusente sisole Jehova.

¹³ Ungabutsatseli phansi buhlobo bakho naJehova. Singakubalekela kutfukutselela Nkulunkulu nasigcina buhlobo betfu naye busedvute. (Fundza Taga 3:5, 6.) Kufanele setsembele kuJehova. Kufanele futsi sikubalekele kutenta tihlakaniphi nobe kutenta labalunge kakhulu. (Taga 3:7; Shu. 7:16) Nasenta loko angeke sisole Jehova ngetintfo letimbi letentekako.

14, 15. Yini lengasisita kute tinkhulumo letingakhi talabanye tingasiphatamisi?

¹⁴ Ungavumeli tinkhulumo letingakhi kutsi tikutsikamete. Esikhatsini saMosi ema-Israyeli abenetizatfu letinyenti tekukholelwa kutsi Jehova utawangenisa eVeni Lesetsembiso. (Hla. 78:43-53) Kodvwa ngesikhatsi atfola imibiko lengasiyo yetinhloli letilishumi letingakatsembeki, ‘abengayikhumbuli imisebenti yemandla akhe.’ (Hla. 78:42) Nasizindla ngemisebenti yaJehova, sikhumbula tonkhe tintfo letinhle lasentele tona, sitawucinisa buhlobo betfu naye. Ngekwenta njalo, angeke sivumele tinkhulumo letingakhi talabanye kutsi tisehlukanise naJehova.—Hla. 77:11, 12.

¹⁵ Kutsiwani-ke nangabe sinesimo sengcondvo lokungasiso ngemakholwa lesikanye nawo? Etimeni letinjalo, buhlobo betfu naJehova bungatsintseka. (1 Joh. 4:20) Ngesikhatsi ema-Israyeli angenetiseki ngekubekwa kwa-Aroni nangemsebenti wakhe, Jehova wabona loko njengesento sekukhonona kuYe. (Num. 17:10) Ngendlela lefanako, nangabe besingacala kuvukela nobe kukhonona ngalabo Jehova labasebentisako kutsi bacondzise incenye yenhlangano yakhe lelapha emhlabeni, sitawube sikhonona ngaJehova.—Heb. 13:7, 17.

16, 17. Yini lokufanele siyikhumbule nasibhekene netinkinga?

¹⁶ Khumbula kutsi Jehova akatibangeli tinkinga tetfu. Nanobe ema-Israyeli ngesikhatsi sa-Isaya amshiya Jehova, abesolo afuna kuwasita. (Isa. 1:16-19) Nobe singabhekana nayiphi inkinga, singatfola indvudvuto ngekwati kutsi Jehova uyasikhatsalela futsi ufuna kusisita. (1 Phet. 5:7) Ecinisweni, utsembisa kusipha emandla lesiwadzingako kute sichubeke sibeketela.—1 Khor. 10:13.

¹⁷ Nangabe sibhekene nekuhlupheka lokutsite lokungalungi—njengobe naJobe indvodza letsembekile enta—kufanele sitikhumbute kutsi Jehova akasiyo imbangela yaloko. Jehova uyakwenyanya kungalungi; ungumtsandzi wekulunga. (Hla. 33:5) Shengatsi singafana nemngani waJobe Elihu, lowatsi: “Akube khashane naNkulunkulu kuba ngumenti walokubi, kwenta bubi akube khashane naSomandla.” (Jobe 34:10) Kunekutsi asibangele tinkinga, Jehova usipha “tonkhe tipho letinhle.”—Jak. 1:13, 17.

18, 19. Kungani kungafanele singabate Jehova? Fanekisa.

¹⁸ Ungamngabati Jehova. Nkulunkulu ute sono, futsi imicabango yakhe iphakeme kakhulu kuneyetfu. (Isa. 55:8, 9) Kutfobeka nebucotfo kufanele kusisite sivume kutsi sinekucondza lokulinganiselwe. (Rom. 9:20) Akukavami kutsi siwati onkhe emaciniso ngesimo lesitsite. Akungabateki kutsi ukubonile kuba liciniso kwalesaga lesitsi: “Loyo losho licala lakhe kucala ubonakala acinisile, kuze kube ngulapho kuta lomunye ambute.”—Taga 18:17, New International Version.

¹⁹ Nangabe umngani lesimetsembako ente intfo letsite lesingayicondzi nobe lengakavami, singavele ngaleso sikhatsi simsole yini ngaloko lokubi lakwentile? Nobe singavele sikwendlulise yini loko lakwentile, ikakhulukati nangabe sekuphele iminyaka leminyenti simati? Nasisebentelana nebangani betfu labanesono ngalendlela yelutsandvo, sitametsemba kakhulu Babe wetfu wasezulwini, lonetindlela nemicabango lephakeme kuneyetfu.

20, 21. Kungani kubalulekile kutsi sisole loyo lofanele?

²⁰ Sola lofanele. Kungani kufanele sente njalo? Kungenteka kutsi tinkinga lesinato sitibangele tsine. Nangabe kunjalo, kufanele silivume lelociniso. (Gal. 6:7) Ungetami kusola Jehova ngaletinkinga. Kungani kwenta njalo kungaba kungacabangi kahle? Cabanga nganasi sibonelo: Imoto ingase yakhiwe ngendlela yekutsi ihambe ngelitubane lelisetulu. Umshayeli wayo ayigijimise yendlule litubane lelibekiwe emgwacweni nakajika likona bese iyashayisa. Singamsola yini umakhi walemoto ngalengoti? Angeke simsole. Ngendlela lefanako, Jehova usidale ngendlela yekutsi sikwati kutikhetsela. Kodvwa usinikete neticondziso tekutsi singatenta njani tincumo letihlakaniphile. Ngako-ke singamsolelani uMdali wetfu ngemaphutsa etfu?

²¹ Kuliciniso kutsi akusito tonkhe tinkinga letingumphumela wemaphutsa etfu nobe tento tetfu letimbi. Letinye tintfo tenteka ngenca ‘yesikhatsi nematfuba.’ (Shu. 9:11) Asingakhohlwa kutsi Sathane Develi ungumbangeli loyinhloko webubi. (1 Joh. 5:19; Semb. 12:9) Nguye lositsa setfu hhayi Jehova.—1 Phet. 5:8.

BUJABULELE BUHLOBO BAKHO LOBULIGUGU NAJEHOVA

22, 23. Yini lokufanele siyikhumbule nangabe tinkinga tetfu tisicedza emandla?

²² Nawubhekene nekuhlupheka netinkinga, khumbula sibonelo saJoshuwa naKhalebi. Ngalokungafani naletinye tinhloli letilishumi, lamadvodza lamabili letsembekile aletsa imibiko leliciniso. (Num. 14:6-9) Akhombisa kukholwa kuJehova. Nobe kunjalo kwadzingeka kutsi azulazule ehlane iminyaka lengu-40 kanye nema-Israyeli. Joshuwa naKhalebi bakhonona yini nobe bangajabuli, bacabanga kutsi abakufanelekeli kuzulazula lapho? Cha. Betsembela kuJehova. Babusiswa yini? Yebo babusiswa. Nanobe sonkhe lesitukulwane safa ehlane, womabili lamadvodza agcine angenile eVeni Lesetsembiso. (Num. 14:30) Ngendlela lefanako, natsi sitawutfola tibusiso taJehova nangabe ‘singadzinwa’ ekwenteni intsandvo yakhe.—Gal. 6:9; Heb. 6:10.

²³ Yini longayenta nangabe tinkinga tikucedza emandla, kuba nesono kwalabanye nobe kuba nesono kwakho? Naka bunguye baJehova lobumangalisako. Cabanga ngematsemba Jehova lakunikete wona. Tibute, ‘Bengingaba kuphi ngaphandle kwaJehova?’ Hlale usondzelene naye futsi ungayivumeli inhlitiyo yakho kutsi imtfukutselele.