“Liphupho Lami Bekukuba Ngumphristi”

KUPHILA KWAMI:

Ngatalelwa edolobheni lelincane iTexcoco. Ngaleso sikhatsi, titaladi takhona letinyenti betigcwele lutfuli, tingakalungiswa. Bekuyintfo levamile kutsi ubone bantfu labasuka etindzaweni letisedvute beta kulelidolobha bachuba timbongolo tabo, titfwele tintfo labayotidayisa. Umndeni wakitsi bewuphuyile. Besibantfwana labayimfica, mine ngiwesikhombisa. Kute ondle umndeni wakitsi, babe abelungisa tincabule (guaraches). Washona ngesikhatsi ngineminyaka lesikhombisa budzala. Kusukela ngaleso sikhatsi, make abesokola kuze ondle umndeni wakitsi.

Mkhulu abedlala i-violin futsi ahlabelisa licembu lebaculi labadlala tinsimbi temculo, ikakhulukati umculo wenkholo. Cishe onkhe emalunga emndeni wakitsi abedlala tinsimbi temculo. Make abehlabela ekwayeni yelisontfo, malume yena ahlabela umculo we-opera, futsi adlala nephiyano. Besiyitsandza inkholo—mine bengisebenta elatini, futsi liphupho lami bekukuba sitfunywa selivangeli semaKatolika. Bengiphindze ngitsandza kakhulu emafilimu ekarati. Bekutsi nangiwabukela kakhulu lamafilimu, ngibe nebudlova kakhulu.

Ngangena esikolweni senkholo ePuebla lebesisebenta njengesikolwa sekucecesha bafundisi. Umgomo wami bekukuba ngumphristi wemaKatolika. Kodvwa ngemnyaka wami wekugcina kuleso sikolwa, ngadvumateka mayelana neLisontfo LemaKatolika. Lelinye lisisitela leliselisha lake langisoma. Ngasincoba leso silingo, kodvwa loko kwangenta ngaba nesifiso sekushada. Ngetulu kwaloko, ngabona kutsi baphristi labanyenti bebaphila kuphila lokumphacambili. Ekugcineni angizange ngisachubeka nemgomo wami wekuba ngumphristi.

Ngancuma kufundzela umculo e-National Conservatory of Music eMexico City. Ngesikhatsi ngicedza, ngashada, futsi ngekushesha mine nemkami saba nebantfwana labane. Umndeni wami bengiwondla ngekuhlabela ngesikhatsi seMisa eSontfweni LemaKatolika.

Kusukela ekucaleni, umshado wetfu bewunetinkinga. Mine nemkami besiphatsana ngebudlova, futsi sizatfu lesikhulu saloko kutsi besifukamela umona. Ekucaleni besihlaselana ngemavi, futsi ekugcineni sishayane. Ngemuva kweminyaka lengu-13, sancuma kwehlukana, futsi ekugcineni sancuma kudivosa.

INDLELA LIBHAYIBHELI LELAYIGUCULA NGAYO IMPHILO YAMI:

Kuhlangana kwami kwekucala naboFakazi BaJehova kwaba ngembikwekutsi sehlukane nemkami. BoFakazi lababili banconcotsa emnyango wetfu futsi bacela kucoca natsi ngeliBhayibheli. Bengicabanga kutsi kunyenti lengikwatiko ngenkholo, ngako ngafuna kubabonisa loko. Ngababuta imibuto leminyenti lematima lebengicabanga kutsi ite timphendvulo. Kodvwa ngamangala ngobe banginiketa timphendvulo letinhle lebebatisekela eBhayibhelini. Ngacala kubona kutsi kuncane kakhulu lengikwatiko. Kodvwa-ke umkami abebaphatsa kabi laboFakazi, futsi mine ngimatasatasa kakhulu, ngako babese bayayekela kusivakashela.

Ngemuva kweminyaka lesihlanu, ngaphindze ngahlangana naboFakazi futsi besengihlala nalomunye umfati, ligama lakhe kungu-Elvira. Elvira abengabaphikisi laboFakazi, ngako kwaba melula kutsi ngifundze nabo liBhayibheli njalo. Nanobe kunjalo, kwangitsatsa iminyaka leminyenti kutsi ngishintje indlela yami yekuphila.

Ngabona kutsi nangabe ngifuna kukhonta Jehova ngenhlitiyo yonkhe, kufanele ngente lushintjo lolukhulu. Kwekucala, kwadzingeka kutsi ngiyekele umsebenti wami wekuhlabela ngesikhatsi seMisa eSontfweni LemaKatolika, futsi loko bekusho kutsi sekufanele ngifune lenye indlela yekutiphilisa. (Sembulo 18:4) Lokunye lokwadzingeka, kutsi siwubhalise ngalokusemtsetfweni umshado wetfu na-Elvira.

Lushintjo lokwaba lukhuni kakhulu kulwenta bekukulawula intfukutselo yami. Ngulawa emavesi lamabili langisita kakhulu: Tihlabelelo 11:5, letiveta kutsi Jehova uyabutondza budlova, kanye na-1 Phetro 3:7, lowangifundzisa kutsi nangabe ngifuna Jehova alalele imithantazo yami kufanele ngimphatse ngenhlonipho umkami. Lapho ngizindla ngalawo mavesi futsi ngithantaza kuJehova ngicela lusito, ngagcine ngikhonile kulawula intfukutselo yami.

INDLELA LENGIZUZE NGAYO:

Nyalo kunenjabulo lenkhulu emndenini wami. Ngenta konkhe lokusemandleni ami kutsi ngilungise buhlobo lenginabo nemadvodzana ami lengawatfola emshadweni wekucala, nekutsi ngisite umndeni wami lenginawo nyalo kutsi uhlale unekukholwa lokucinile.

Ngesikhatsi ngisesemncane, bengineliphupho lekuba ngumphristi futsi ngisite bantfu. Nyalo ngiyeva kutsi kuphila kwami kunenjongo sibili. Umndeni wami ngiwondla ngekufundzisa umculo. Ngibonga kakhulu ngekutsi Jehova wangibeketelela, wanginiketa litfuba lekutsi ngishintje ngibe ngumuntfu loncono!