Ungakwati Yini Kubona Nkulunkulu Longabonakali?

“NKULUNKULU unguMoya,” bantfu angeke bakhone kumbona ngemehlo. (Johane 4:24) Nanobe kunjalo, liBhayibheli libika kutsi kukhona bantfu labake bambona Nkulunkulu ngandlela tsite. (Hebheru 11:27) Ingenteka njani intfo lenjalo? Kungenteka yini vele kutsi ubone ‘Nkulunkulu longabonakali’?​—Kholose 1:15.

Asewucatsanise simo setfu nesemuntfu lowatalwa ayimphumphutse. Kungaboni kwakhe kungamvimbela yini kutsi acondze tintfo letenteka lapha emhlabeni? Ngeke kumvimbele. Umuntfu longaboni utfola imininingwane yalokwentekako ngetindlela letehlukehlukene, lokumsita kutsi akhone kucondza bantfu, acondze tintfo kanye nako konkhe lokwentekako edvutane naye. Lomunye umuntfu longaboni watsi: “Kubona akukho emehlweni, kusengcondvweni.”

Ngendlela lefanako, ngisho ungeke ukhone kumbona ngemehlo Nkulunkulu, ungasebentisa ‘emehlo enhlitiyo’ yakho kute umbone. (Efesu 1:18) Cabanga nganati tindlela letintsatfu letingakusita ukwente loko.

“BUVETWE NGALOKUCACILE KUSUKELA EKUDALWENI KWELIVE”

Titfo tekuva netekutsintsa temuntfu longaboni tinemandla kakhulu, lokumsita akwati kucondza tintfo langakhoni kutibona. Ngendlela lefanako, ungatisebentisa titfo takho letehlukehlukene kute ucondze tintfo letisemhlabeni futsi ubone Nkulunkulu longabonakali lotidalile. “Bunguye bakhe lobungabonakali buvetwe ngalokucacile kusukela ekudalweni kwelive kuchubeke, ngobe bubonakala etintfweni letidaliwe.”​—Roma 1:20.

Nasi sibonelo: Cabanga ngemhlaba. Umhlaba udalwe ngendlela lemangalisako kute sikujabulele kuphila, hhayi nje kutsi simane sibe khona kuwo. Nasiva umoya loshaya kamnandzi, sijabulela nekutsamela lilanga lelishisa kamnandzi, sinambitsa bumnandzi besitselo nobe silalele ingoma lemnandzi yekukhala kwetinyoni, sijabula kakhulu. Letipho atikuveti yini kucabangela kwaNkulunkulu, kukhatsalelela kwakhe kanye nekuphana kwakhe?

Yini longayifundza ngaNkulunkulu nawubuka yonkhe indalo yakhe? Asewucabange njengaloku, emazulu embula emandla aNkulunkulu. Luhlolo lwakamuva lwesayensi lubonisa kutsi ticheme tetinkhanyeti tiyachubeka tikhweshelana futsi loku kwenteka ngelizinga lelisetulu. Ebusuku nawubuka esibhakabhakeni cabanga nganaku: Ngubani umtfombo walamandla langaka labangela kukhweshelana kwaleticheme tetinkhanyeti ngesivini lesingaka? LiBhayibheli lisitjela kutsi uMdali ‘unemandla lamakhulu.’ (Isaya 40:26) Indalo yaNkulunkulu isikhombisa kutsi ‘unguSomandla’​—unguLoyo ‘lophakeme ngemandla.’​—Jobe 37:23.

‘LOYO LOWAMCHAZA KAHLE’

Make webantfwana lababili labangaboni kahle utsi: “Kukhuluma kuyindlela lemcoka kakhulu labafundza ngayo. Batjele ngayo yonkhe intfo loyibonako naloyivako, futsi ukulungele kuhlala uchaza. Nguwe longemehlo abo.” Ngendlela lefanako, ngisho nome “kute umuntfu loke wabona Nkulunkulu,” iNdvodzana yaNkunkulu lenguJesu ‘lehlala eceleni kweYise ngiyo lemchazile.’ (Johane 1:18) Njengobe Jesu ayindalo yekucala yaNkulunkulu futsi ayiNdvodzana letelwe yodvwa, nguye lowaba “liso” letfu lekubuka emazulwini. Nguye longumtfombo loncono kakhulu welwati ngaNkulunkulu longabonakali.

Njengobe Jesu acitsa iminyaka leminyenti aneYise, asewubone nati tintfo latisho ngaNkulunkulu:

• Nkulunkulu uhlala asebenta. “Babe solo usasebenta nanyalo.”​—Johane 5:17.

• Nkulunkulu uyatati tintfo lesitidzingako. “Ngobe Nkulunkulu longuYihlo uyatati tintfo lenitidzingako ngisho nisengakaticeli.”​—Matewu 6:8.

• Nkulunkulu usentela tintfo letinhle ngesihle. ‘UYihlo losezulwini . . . wenta lilanga liphumele bantfu lababi nalabahle, aphindze ente imvula inele bantfu labalungile nalabangakalungi.’​—Matewu 5:45.

• Umuntfu nemuntfu ubalulekile kuNkulunkulu. “Bojolwane lababili abatsengiswa yini ngemali yelinani lelincane? Nome kunjalo, ngeke kuwele ngisho namunye wabo emhlabatsini angaboni uYihlo. Futsi tonkhe tinwele letisetinhloko tenu tibaliwe. Ngako-ke ningesabi, nine nibaluleke kwendlula bojolwane labanyenti.”​—Matewu 10:29-31.

UMUNTFU LOWAVETA BUNGUYE BANKULUNKULU LONGABONAKALI

Bantfu labangaboni bacondza tintfo ngendlela leyehlukile kunebantfu lababonako. Nabacabanga ngesitfunti, bantfu labangaboni basitsatsa njengendzawo nje lepholile lesitsekile ekushiseni kwelilanga hhayi njengendzawo lemnyama lete lilanga. Njengemuntfu loyimphumphutse longakwati kubona sitfunti nobe kukhanya kwelilanga, natsi ngeke sikhone kucondza Jehova ngaphandle kwekutsi sisitwe. Ngako-ke, Jehova watfumela umuntfu lowabuveta kahle bunguye baKhe.

Loyo muntfu bekunguJesu. (Filiphi 2:7) Jesu akazange nje agcine ngekukhuluma ngeYise kodvwa waphindze wasikhombisa nekutsi unjani. Filiphi umfundzi waJesu watsi: “Nkhosi, sikhombise uYihlo.” Jesu wamphendvula watsi: “Loyo longibonile mine umbonile naBabe.” (Johane 14:8, 9) Yini “longayibona” ngeYise kuloko lokwentiwa nguJesu?

Jesu abenelutsandvo, atfobekile futsi angeneka. (Matewu 11:28-30) Buntfu bakhe lobuhle bebenta bantfu basondzele kuye. Jesu abebuva buhlungu lobuviwa ngulabanye, futsi abejabula kanye nabo. (Lukha 10:17, 21; Johane 11:32-35) Nawufundza tindzaba letiseBhayibhelini letimayelana naJesu, nobe uva ngato, sebentisa imiva yakho futsi ukubone ngeliso lengcondvo loko lokwenteka. Nangabe uzindla ngendlela Jesu labephila ngayo nebantfu, utawukhona kubona bunguye baNkulunkulu lobuhle ngendlela lecacile futsi usondzele kuYe.

KUTAKHELA SITFOMBE NGAJEHOVA

Mayelana nendlela umuntfu longaboni latati ngayo tintfo letenteka emhlabeni, lomunye umbhali watsi: “Umuntfu longaboni utfola imininingwane kancane kancane, ngetindlela letehlukahlukene (ngekubamba, kunuka, kuva ngetindlebe, nangaletinye tindlela), ngemuva kwaloko kudzingeka ayihlanganise ndzawonye lemininingwane kuze ati kutsi kwentekani.” Ngendlela lefanako, nawubona imisebenti yaNkulunkulu, ufundza ngaloko Jesu lakusho ngeYise, futsi ucabangisisa ngendlela Jesu labekabuveta ngayo buntfu baNkulunkulu, utabubona buhle baJehova. Utawumati kahle Nkulunkulu.

Nguloko Jobe labephila endvulo lakubona. Ekucaleni wakhuluma ‘ete kucondza.’ (Jobe 42:3) Kodvwa ngemuva kwekucabangisisa ngendalo yaNkulunkulu lemangalisako, wakhutsateka kutsi atsi: “Tindlebe tami setike teva ngawe, kodvwa nyalo emehlo ami asakubonile.”​—Jobe 42:5.

Loko kungenteka nakuwe. “Nawumfuna [Jehova], utamtfola.” (1 Tikhronike 28:9) BoFakazi BaJehova bangakujabulela kukusita kutsi ufune Nkulunkulu longabonakali futsi umtfole.