Litsini Libhayibheli?

Nkulunkulu uyiphendvula yonkhe yini imithantazo?

UCABANGA KUTSI YABOBANI IMITHANTAZO NKULUNKULU LAYIPHENDVULAKO?

• Yabo bonkhe

• Yalabanye bantfu

• Kute layiphendvulako

LOKUSHIWO LIBHAYIBHELI

“Simakadze usedvute nabo bonkhe . . . labambita ngeliciniso.”​—Tihlabelelo 145:18.

KUKHONA YINI LOKUNYE LOKUSHIWO LIBHAYIBHELI NGALENDZABA?

• Nkulunkulu akayilaleli imithantazo yebantfu labangamhloniphi. (Isaya 1:15) Noma kunjalo, bangalungisa ngekutsi bashintje tindlela tabo.​—Isaya 1:18.

• Kute Nkulunkulu aphendvule imithantazo yetfu, kufanele ihambisane nentsandvo yakhe letfolakala eBhayibhelini.​—1 Johane 5:14.

Kufanele sibe sesimeni semtimba lesikhetsekile yini nasithantaza?

LABANYE BANTFU BATSI nawuthantaza kufanele uguce ngemadvolo, ukhotsamise inhloko, noma uhlanganise tandla. Wena ucabangani?

LOKUSHIWO LIBHAYIBHELI

Nkulunkulu abeyilalela imithantazo yebantfu ‘labebahleli phansi,’ ‘labebamile’ ‘labebabhabhalele’ kanye ‘nalabebaguce ngemadvolo.’ (1 Tikhronike 17:16; 2 Tikhronike 30:27; Ezra 10:1; Imisebenti 9:40) Jehova akasho kutsi kunesimo semtimba lesikhetsekile lokufanele sibe kuso nasithantaza.

KUKHONA YINI LOKUNYE LOKUSHIWO LIBHAYIBHELI NGALENDZABA?

• Nkulunkulu uyabalalela bantfu labatitfobako.​—Tihlabelelo 138:6.

• Ungathantaza nganoma nguluphi lulwimi futsi ungathantaza ngisho nangenhlitiyo.​—2 Tikhronike 6:32, 33; Nehemiya 2:1-6.