‘Intsandvo YaNkulunkulu Ayentiwe’
1. Sitsini sihloko semhlangano lokhetsekile wemnyaka wemsebenti wa-2012, futsi kungani kufaneleka kuyihlolisisa lendzaba?
1 Sadalwa ngentsandvo yaJehova. (Semb. 4:11) Ngaleso sizatfu, kungaba lukhuni kufeza injongo yekudalwa kwetfu ngaphandle kwekufundza kanye nekwenta intsandvo yakhe. Loko akusimelula ngobe silwisana nebutsakatsaka lesinabo bekwenta “intsandvo yenyama neyengcondvo yetfu” nobe loko “lokutsandvwa ngemahedeni.” (Ef. 2:3; 1 Phet. 4:3; 2 Phet. 2:10) Ngaphandle kwelusito lwaNkulunkulu, singaba sengotini ‘yekugcilatwa [nguDeveli] kuze sente intsandvo yakhe.’ (2 Thim. 2:26) Luhlelo lwemhlangano lokhetsekile wemnyaka wemsebenti wa-2012 lutawusita ngamunye wetfu kutsi etame kuphila ngekuvumelana nesicelo sesitsatfu lesiyinhloko semthandazo losibonelo lesitsi, “intsandvo yakho ayentiwe.”—Mat. 6:9, 10.
2. Ngumiphi imibuto letawuphendvulwa kulomhlangano?
2 Imibuto Letawuphendvulwa: Njengobe ulalela loluhlelo, yetama kutfola timphendvulo talemibuto lelandzelako: Yini lebaluleke njengekuva liVi laNkulunkulu? Singachubeka njani sibona kutsi iyini intsandvo yaNkulunkulu ngatsi? Kungani kufanele sihlale sikulungele kusita bantfu bato tonkhe tinhlobo? Singayitfola njani imphilo lejabulisako naleyenetisako? Bantfu labasha, yini lokufanele niyifakazele kuJehova? Ngutiphi tibusiso letitfolakala ngekwenta intsandvo yaNkulunkulu? Kungani kuphutfuma kutsi sakhe futsi sikhutsate labanye?
3. Singazuza njani ngalokugcwele kulomhlangano?
3 Ciniseka kutsi uba khona futsi uyalalelisisa nakusachubeka umhlangano. Kungenteka nivakashelwe lilunga laseBethel nobe umbonisi lojikeletako. Ngembikwekutsi luhlelo lucale kanye nangemuva kwalo, tive ukhululekile kukhuluma nalomzalwane kanye nemfati wakhe nangabe ashadile. Nanibuyela emakhaya, ningabi ‘tilaleli letikhohlwako,’ kodvwa buketani loluhlelo njengemndeni bese nicoca ngendlela leningatfutfukisa ngayo ekuphileni ngekuvumelana nentsandvo yaNkulunkulu.—Jak. 1:25.
4. Kungani kubalulekile kutsi kwenta intsandvo yaNkulunkulu kute kucala ekuphileni kwetfu?
4 Madvutane, bonkhe labo labalandzela tifiso tabo futsi bangafuni kutitfoba entsandvweni yaJehova, batawubhujiswa. (1 Joh. 2:17) Ngesizatfu saloko, sibonga kakhulu ngekutsi Jehova usilungiselele lokwatiswa lokufike ngesikhatsi kute asisite kutsi sibeke kwenta intsandvo yakhe kucala ekuphileni kwetfu!