Chubekani ‘Nenta Loku’—Sikhumbuto Sitawuba Nga-April 5
1. Kungani umkhosi weSikhumbuto ubalulekile?
1 “Yentani loku kuze kube sikhumbuto ngami.” (Luk. 22:19) Ngalamavi, Jesu watjela balandzeli bakhe kutsi bakhumbule kufa kwakhe lokusihlengo. Ngesizatfu sako konkhe lokufezwe sihlengo, alikho lilanga lelibalulekile nobe leliligugu kakhulu kumaKhristu kwendlula lemkhosi weSikhumbuto waminyaka yonkhe. Njengobe umkhosi weSikhumbuto walomnyaka lotawuba nga-April 5 usondzela, singambonga njani Jehova?—Khol. 3:15.
2. Singakuveta njani kubonga lesinako ngemkhosi weSikhumbuto ngekutadisha kanye nekuzindla?
2 Lungiselela: Tintfo letibalulekile kitsi sivame kutilungiselela. Singatilungisa tinhlitiyo tetfu kute silungele Sikhumbuto ngekutsi sihlolisise njengemndeni tintfo letenteka emalangeni ekugcina ekuphila kwaJesu emhlabeni futsi sizindle ngato. (Ezra 7:10) Luhla lwemiBhalo luyatfolakala kukhalenda kanye nakubhukwana lotsi Kuhlolisisa ImiBhalo Malanga Onkhe, futsi luhla loluphelele lwemiBhalo kanye netehluko letihambisana nayo letisencwadzini letsi “Umuntu Omkhulu” lusemakhasini 23-24 eSicongosekulindza sa-February 1, 2011, lesitfolakala ngesiZulu.
3. Singakuveta njani kubonga lesinako ngeSikhumbuto ngekutsi sandzise incenye yetfu emsebentini wekushumayela?
3 Shumayela: Singaphindze sivete kubonga kwetfu ngekutsi sibe nencenye lenkhulu emsebentini wekushumayela. (Luk. 6:45) NgeMgcibelo, nga-March 10, kutawuba Lilanga Lamagazini lelikhetsekile, futsi kusukela ngeMgcibelo, March 17, kutawucala umkhankaso wemhlaba wonkhe wekumemela labanye eSikhumbutweni. Ungakwati yini kulungisa timo takho kute ube nesikhatsi lesinyenti emsebentini wekushumayela, mhlawumbe ube lihlahlandlela lelisitako? Kungani ningacoci ngalendzaba ndzawonye njengemndeni, eKukhonteni Kwemndeni kwakusihlwa lokulandzelako?
4. Ngutiphi tinzuzo lesingatitfola ngekuba khona eSikhumbutweni?
4 Sizuza kakhulu ngekuba khona emkhosini weSikhumbuto minyaka yonkhe! Injabulo yetfu kanye nelutsandvo lesinalo ngaNkulunkulu kuyakhula njengobe sizindla ngemusa lawukhombisa ngekusiniketa iNdvodzana yakhe letelwe yodvwa kutsi ibe sihlengo. (Joh. 3:16; 1 Joh. 4:9, 10) Loku kusenta kutsi singasatiphileli tsine. (2 Khor. 5:14, 15) Kuphindze kucinise sifiso setfu sekudvumisa Jehova embikwelinyenti. (Hla. 102:19-21) Tinceku taJehova letinekubonga tiyalilangatelela litfuba lelitawuba khona eSikhumbutweni nga-April 5 ‘lekufakazela kufa kweNkhosi.’—1 Khor. 11:26.