Inkinga Yekucindzeteleka Lehlasele Umhlaba Wonkhe
“Ngihlale ngitiva ngikhatsatekile ngisho nobe ngitihlalele ngedvwa endlini.”
“Ngisho nobe konkhe kuhamba kahle, ngibese ngiyakhatsateka. Ngiyati kutsi ‘nangijabulile’ kutawubese kwenteka lokutsite lokutangivisa ‘buhlungu.’”
“Njalo ngelilanga ngetama kunaka loko lokwenteka ngalelo langa nje kuphela, kodvwa ngalamanye emalanga ngikhatsateka ngetintfo letinyenti ngasikhatsi sinye.”
Uyayicondza yini indlela labantfu labalwisana nekucindzeteleka labativa ngayo? Ulwisana nekucindzeteleka yini nobe ukhona umuntfu lomatiko lolwisana nako?
Ciniseka kutsi awusiwedvwa. Bantfu labanyenti lamuhla balwisana nekucindzeteleka nobe kukhona labamatiko lolwisana nako.
Asingabati kutsi siphila “etikhatsini letibucayi lokumatima kubhekana nato,” letibangela tinhlobo letehlukahlukene tekucindzeteleka. (2 KuThimothi 3:1) Kulolunye lucwaningo lolwentiwe emhlabeni wonkhe kuvetwe kutsi umuntfu munye kulabangu-8 ulwisana nesifo sekucindzeteleka. Ngenca yesifo se-COVID-19, nga-2020 lizinga lebantfu lebebalwisana nekukhatsateka lenyuka ngemaphesenti langu-26, kantsi lebantfu lebebalwisana nekucindzetelaka lona lenyuka ngemaphesenti lang-28.
Kubalulekile kwati kutsi bangakanani bantfu lamuhla labalwisana nekukhatsateka kanye nekucindzeteleka, kodvwa lokubaluleke nakakhulu kwati kutsi yini wena kanye nebantfu lobatsandzako leningayenta kuze nitive nincono.
Kushoni kuba nengcondvo lengalwisani nekukhatsateka nobe kucindzeteleka?
Ngalokuvamile kuba nengcondvo lephile kahle kusho kutiva uphilile, futsi ungalwisani nekucindzetela nobe kukhatsateka. Uyakhona kubhekana nekukhatsateka lokuvamile, usebente kahle, futsi wenetiseke ekuphileni.
Ingcondvo lelwisana nekukhatsateka nobe kucindzeteleka . . .
AYIBANGELWA buntfu lobubutsakatsaka.
IKUGULA lokwenta umuntfu akhatsateke kakhulu, angakhoni kulawula indela lativa ngayo, iphatamise indlela lenta ngayo tintfo kanye nalacabanga ngayo.
Ngalokuvamile ikwenta kube matima ngemuntfu kwakha bungani nalabanye, kanye nekubhekana netinkinga tamalanga onkhe.
Ihlasela bantfu labaneminyaka leyehlukahlukene, labafundzile nalabangakafundzi, labanjingile nalabaphuyile, labanemasiko, buhlanga kanye netinkholo letehlukahlukene.
Tfola lusito nawunenkinga yekucindzeteleka
Ngalesinye sikhatsi indlela umuntfu lativa ngayo ingashintja ngekushesha, acale kuba nebutfongo lobunyenti nobe aphelelwe butfongo, adle kakhulu nobe kancane, akhatsateke kakhulu futsi angajabuli. Nakwenteka loku, lomuntfu kudzingeka ayotfola lusito kuze acondze kutsi kubangelwa yini nekutsi angelashwa njani. Angalutfola kuphi lusito?
Jesu Khristu, indvodza lehlakaniphe kakhulu leyake yaphila, watsi “Bantfu labaphilile abamdzingi dokotela, kodvwa ngulabagulako labamdzingako.” (Matewu 9:12) Nangabe umuntfu lolwisana nekucindzeteleka atfola lusito lwadokotela, loko kungamsita anciphise timphawu talokucindzetelaka, kuphindze kumsite aphile imphilo leyenetisako futsi ajabule. Kubalulekile kutsi elashwe ngekushesha nangabe sekuphele sikhatsi lesidze anetimphawu tekucindzeteleka.a
Ngisho nobe liBhayibheli lingesiyo incwadzi yetekwelapha, kodvwa lelikushoko kungabasita labalwisana nekucindzeteleka. Ngemusa sikumema kutsi uhlole letihloko letilandzelako letikhuluma ngendlela liBhayibheli lelingasisita ngayo kuze sibhekane nenkinga yekucindzeteleka.
a Le-Sicongosekulindza asihambisi embili indlela letsite yekwelashwa. Nguloyo naloyo kufanele ahlole ngekucophelela tindlela tekwelashwa langatisebentisa ngaphambi kwekutsi ente sincumo.