Kamehla Jehova o a re Hlohonolofatsa ha re Etsa Seo a se Batlang

KE HLAHILE ka 1923, toropong ya Hemsworth e Yorkshire, England. Ke na le abuti e moholo ya bitswang Bob. Ntate o ne a hloile dintho tse mpe tse neng di etsahala dikerekeng. Ha ke le dilemo di 9, ntate o ile a fumana dibuka tse neng di pepesa bodumedi ba bohata. O ile a kgahlwa ke seo a neng a se bala. Dilemo tse mmalwa hamorao, Robert Atkinson o ile a etela lapeng mme a re bapalla rekoto ya puo ya Morabo rona Rutherford ka keramafono. Re ile ra lemoha hore molaetsa wa puo eo o ne o tshwana le wa dibuka tsane tseo ntate a neng a di bala! Batswadi ba ka ba ile ba mema Morabo rona Atkinson hore a tlo ja le rona mantsiboya a mang le a mang le ho araba dipotso tsa rona tsa Bibele. Re ile ra memelwa dibokeng ha morabo rona e mong, dikhilomitara tse mmalwa ho tloha lapeng. Ha re a ka ra hlola re emisa ho ya dibokeng mme hamorao phutheho e nyenyane e ile ya thehwa moo Hemsworth. Kapele re ile ra qala ho amohela bapotolohi le ho mema bopulamadiboho ho tla ja le rona. Ho tlwaelana le bona ho ile ha ntswela molemo haholo.

Ho ne ho na le kgwebo lapeng, empa ntate o ile a re ho abuti Bob: “O ka nna wa ba pulamadiboho haeba o lakatsa. Kgwebo ena re ka e kwala.” Abuti Bob o ile a dumela yaba o tloha lapeng ho lo ba pulamadiboho a le dilemo tse 21. Dilemo tse pedi hamorao, ke ile ka ba pulamadiboho ke le dilemo di 16. Ke ne ke atisa ho sebetsa ke le mong hara beke, ke sebedisa dikarete tsa ho paka le keramafono. Le ha ho le jwalo, Jehova o ile a thusa moithuti eo ke neng ke bala le yena ho hatela pele. Ba bangata lelapeng la bo moithuti eo le bona e ile ya qetella e le Dipaki. Selemong se latelang ke ile ka kgethwa ho ba pulamadiboho ya kgethehileng hammoho le moradiwabo rona Mary Henshall. Re ile ra romelwa karolong e ka thoko ya naha ya Cheshire.

Nakong ya Ntwa ya II ya Lefatshe, basadi ba ile ba laelwa hore ba etse mesebetsi e neng e tshehetsa ntwa. Kaha baruti ba ne ba dumellwa ho se ye ntweng, le rona re ne re lebelletse hore re se ke ra sebediswa. Empa makgotla a dinyewe a ne a sa dumellane le seo, mme ka ahlolelwa ho ya teronkong matsatsi a 31. Selemong se latelang, ha ke le dilemo tse 19, ke ile ka ya lekgotleng la dinyewe habedi hobane letswalo la ka le ne le ntse le sa ntumelle hore ke tshehetse ntwa. Empa nyewe ya ka e ile ya qhalwa. Nakong eo yohle, ke ne ke kgodisehile hore Jehova o sebedisa moya o halalelang ho nthusa le ho mmatlafatsa.—Esa. 41:10, 13.

MOSEBETSI MMOHO E MOTJHA

Ke ile ka kopana le Arthur Matthews ka 1946. Arthur o ile a kwallwa teronkong dikgwedi tse tharo hobane a ne a sa batle ho ya ntweng. Hang feela ha a lokollwa, o ile a ya Hemsworth ho ya sebetsa le ngwanabo ya bitswang Dennis, eo e neng e le pulamadiboho e kgethehileng. Ntate wa bona o ile a ba ruta ka Jehova ho tloha ha esale masea mme ba kolobetswa ha ba le dilemo tse ka bang 16. Nakwana ka mora moo, Dennis o ile a abelwa ho ya sebeletsa Ireland mme Arthur a sala a le mong. Batswadi ba ka ba ile ba kgahlwa ke boitshwaro ba Arthur mme ba mo kopa hore a tlo dula le bona. Ha ke tlile hae, nna le Arthur re ne re ithaopela ho hlatswa dijana ka mora hore ho jewe. Re ile ra qetella re se re ngollana mangolo. Ka 1948, Arthur o ile a boela a ahlolelwa dikgwedi tse tharo teronkong. Re ile ra nyalana hamorao ka January 1949 mme re ne re ikemiseditse ho dula re le bopulamadiboho. Re ne re sebedisa matsatsi a rona a phomolo ho etsa mosebetsi wa boiphediso, mme Jehova a re thusa ka tjhelete eo hore re tswele pele re le bopulamadiboho.

Ka mora selemo, re ile ra koptjwa ho ya sebeletsa naheng ya Northen Ireland. Re ile ra qala ka ho ya Armagh mme hamorao ra ya Newry, e leng ditoropo tse nang le Makhatholike a mangata. Re ne re lokela ho ba hlokolosi ha re paka kaha batho ba moo ba ne ba rata bodumedi ba bona haholo. Re ne re tshwarela diboka lelapeng la banyalani ba bang, ba neng ba dula dikhilomitara tse 16 ho tloha moo re dulang. Re ne re ka ba 8 ka palo. Ha banyalani bao ba re kopa ho robaletsa, re ne re robala fatshe ebe ka le hlahlamang re ja dijo tsa hoseng tse hlabosang. Hona jwale ho se ho na le Dipaki tse ngata sebakeng seo.

“RE TLA ETSA JWALO!”

Abuti wa ka le mosadi wa hae Lottie, e ne e le bopulamadiboho ba kgethehileng Northern Ireland, mme ka 1952 re ile ra ya le bona kopanong ya setereke toropong ya Belfast. Re ile ra robala ha morabo rona e mong, re na le Pryce Hughes, eo e neng e le mohlanka wa lekala le Britain ka nako eo. Bosiung bo bong re ile ra tshohla bukana ya God’s Way Is Love e neng e sa tswa lokollwa kopanong ebile e etseditswe batho ba Ireland ka ho kgetheha. Morabo rona Hughes o ile a bua kamoo ho neng ho le thata kateng ho pakela Makhatholike naheng ya Ireland. Baruti ba ne ba susumetsa batho ho lwantsha barababo rona ebile ba ba leleka matlong a bona. Morabo rona Pryce o ile a re: “Re hloka banyalani ba nang le dikoloi, hore re ilo etsa phutuho e kgethehileng ya ho aba bukana ena naheng yohle.”a Re ile ra araba kapele ra re: “Re tla etsa jwalo!” Ke kahoo re ileng ra bua mantswe a qalong ya pale ena.

Re ile ra ya Dublin mme ra dula nakwana ha Mme Rutland, eo e neng e le Paki ya kgale mme a rata ho amohela baeti. Ha re le moo, re ile ra rekisa dintho tse ding tsa rona. Ka letsatsi le leng, re ile ra tloha re palame sethuthuthu sa abuti Bob re le bane, re ilo reka koloi. Motho e mong o ile a re rekisetsa koloi ya hae mme ra mo kopa hore a re tlisetse yona, kaha re ne re sa tsebe ho kganna. Mantsiboyeng ao, Arthur o ne a dutse hodima bethe mme a etsa eka o ntse a kganna. Ka le hlahlamang, Moradiwabo rona Mildred Willett (eo hamorao a ileng a nyalwa ke Morabo rona John Barr) o ile a fihla Arthur a ntse a leka ho ntsha koloi ka karatjheng. Yena o ne o tseba ho kganna! Kahoo, o ile a re ruta ho kganna yaba re a tsamaya.

Jwale re ne re batla moo re ka dulang. Re ne re eleditswe hore re se sebedise dikharavene tse kgolo hobane bahanyetsi ba ne ba ka di tjhesa. Bosiung boo, re ile ra robala ka koloing re le bane jwalo. Letsatsing le latelang, re ile ra reka kharavene e nyenyane e nang le dibethe tse pedi. Ho thabisang ke hore borapolasi ba bang ba ne ba se na bothata ha re e beha dipolasing tsa bona. Re ile ra sebetsa sebaka se ka etsang dikhilomitara tse 16 ho ya ho tse 24. Le ha re ne re se re fetetse sebakeng se seng, re ne re etsa maeto a ho boela dibakeng tseo re neng re ile ra paka kharavene ho tsona.

Re ile ra etela matlo ohle a ka borwa botjhabela ba Ireland ntle le ditshitiso. Re ile ra tsamaisa dibukana tse ka hodimo ho 20 000, ra ba ra romela mabitso a batho ba thahasellang ofising ya lekala e Britain. Ho a thabisa hore hona jwale ho se ho na le Dipaki tse ngata Ireland!

RE KGUTLELA ENGLAND, HAMORAO RE FETELA SCOTLAND

Ha nako e ntse e ya, re ile ra iswa borwa ho London. Ka mora dibeke tse mmalwa, ofisi ya lekala e Britain e ile ya founela Arthur ho mo kopa hore a qale mosebetsi wa potoloho letsatsing le hlahlamang! Re ile ra qeta beke re kwetliswa mme ka mora moo ra ilo potoloha Scotland. Le hoja Arthur a ne a se na nako e lekaneng ya ho lokisetsa dipuo, ke ile ka kgothala ha ke bona kamoo a neng a ikemiseditse kateng ho phetha dikabelo tsa hae. Re ile ra thabela mosebetsi wa potoloho haholo. Ho ne ho thabisa ho ba hara bara le baradibabo rona ba bangata kaha re ne re qetile dilemo re le masimong a ka thoko.

Ka 1962, Arthur o ile a fumana memo ya ho ya Sekolong sa Gileade se nkang dikgwedi tse 10 mme ho ne ho se bonolo ho e amohela. Empa re ile ra etsa qeto ya hore Arthur a amohele memo eo, le hoja nna ke ne ke tlo sala. Ha Arthur a tsamaya, nna ke ile ka abelwa ho ya Hemsworth ke le pulamadiboho e kgethehileng. Ha a kgutla re ile ra fuwa kabelo ya mosebetsi wa setereke mme ra ya Scotland, England leboya, le Northern Ireland.

KABELO E NTJHA IRELAND

Ka 1964, Arthur o ile a fumana kabelo e ntjha ya ho ba mohlanka wa lekala le Ireland. Kaha ke ne ke rata mosebetsi wa potoloho, ke ne ke sa lokoloha ha ke nahana hore re ya Bethele. Ha ke sheba morao, hona jwale ke ananela tokelo eo ke e filweng ya ho sebeletsa Bethele. Ke nahana hore ha o amohela kabelo e itseng le hoja o sa e thabele, kamehla Jehova o tla o hlohonolofatsa. Ke ne ke etsa mosebetsi wa ofising, ke paka dingolwa, ke pheha ebile ke hlwekisa. Ho pholletsa le Ireland, re ile ra qeta nako e itseng re le balebedi ba setereke mme re ne re kopana le barababo rona ba bangata. Ho bona batho bao re ithutileng le bona Bibele ba hatela pele ho ile ha matlafatsa kamano ya rona le barababo rona ba moo Ireland. Eo e bile tlhohonolofatso e kakaang!

DIKETSAHALO TSA BOHLOKWA HISTORING YA DIPAKI TSA JEHOVA TSA IRELAND

Kopano ya pele ya matjhaba e ileng ya tshwarwa Dublin e bile ka 1965.b Le hoja ho ne ho na le ditshitiso, kopano e ile ya tswella hantle. Batho ba 3 948 ba ile ba ba teng kopanong mme ba 65 ba kolobetswa. Baeti bohle ba 3 500 ba tswang dinaheng tse ding ba ileng ba fuwa bodulo, ba ile ba siya mangolo a teboho ho batho ba neng ba ba amohetse. Beng ba matlo le bona ba ile ba babatsa boitshwaro ba baeti bao. Eo e bile ketsahalo ya bohlokwa Ireland.

Ka 1966 Ireland e borwa le e leboya di ile tsa kopana hore e be lekala le le leng le Dublin. Momahano eo e ne e sa tlwaeleha kaha batho ba Ireland ba ne ba arohile bodumeding le dipolotiking. Re ile ra thaba haholo ha re bona Makhatholike a mangata a fetoha ho ba Dipaki mme ba sebetsa hammoho le barababo rona bao e kileng ya ba Maprostanta.

KABELO YA RONA E FETOHA KA HO FELLETSENG

Bophelo ba rona bo ile ba fetoha ka ho felletseng ka 2011 ha makala a mabedi, la Britain le la Ireland, a ne a kopangwa ho ba lekala le le leng mme rona re ile ra romelwa Bethele e London. Sena se ile sa etsahala ka nako eo ke neng ke tshwenyehile ka ho kula ha Arthur. Ho ile ha fumanwa hore o tshwerwe ke lefu le hlaselang karolo ya boko e laolang boitshisinyo ba mmele wa motho. Arthur o ile a hlokahala ka la 20 May 2015, ka mora hore re qete dilemo tse 66 re nyalane.

Dilemong tse mmalwa tse fetileng ke ile ka tobana le kgatello ya maikutlo le ho sarelwa haholo. Ha Arthur a sa phela, o ne a ntshehetsa haholo. Ruri ke ya mo hlolohelwa! Empa ho feta maemong ana, ho nthusitse ho atamela haufi le Jehova haholwanyane. Hape ebile ho kgothatsang ho lemoha hore Arthur o ne a na le metswalle e mengata e mo ratang. Ke ile ka amohela mangolo a mangata ho tswa ho metswalle e Ireland, Britain, le United States. Ke ile ka boela ka kgothatswa haholo ke abuti wa Arthur e leng Dennis, mosadi wa hae Mavis le batjhana ba ka e leng Ruth le Judy.

Lengolo le ileng la nkgothatsa haholo ke la Esaia 30:18. Le re: “Jehova o tla lebella hore a le bontshe mohau, ka hona o tla ema hore a le bontshe mohau. Etswe Jehova ke Modimo wa kahlolo. Ho thaba bohle ba mo lebeletseng.” Ke kgothala haholo ha ke nahana hore Jehova o ikemiseditse ho lokisa boemo le ho re fa dikabelo tse kgotsofatsang lefatsheng le letjha.

Ha ke nahana ka nako eo re e qetileng Ireland, ke bona ka ho hlaka tsela eo Jehova a tataisitseng le ho hlohonolofatsa mosebetsi ka yona. Ruri ke ikutlwa ke le motlotlo hore ebe ke ile ka kenya letsoho mosebetsing ona. Ke ithutile hore kamehla Jehova o a re hlohonolofatsa ha re etsa seo a se batlang.