O ka Ikgethela Hore na o Batla Hore Bokamoso ba Hao bo be Jwang

Hoo e ka bang dilemo tse 3 500 tse fetileng, Jehova o ile a bolella batho ba batlang ho mo sebeletsa hore na ba lokela ho etsang e le hore ba dule ba thabile: “Ke behile bophelo le lefu ka pela lona, tlhohonolofatso le thohako; le kgethe bophelo e le hore le tswele pele le phela, lona le bana ba lona.”​—Deuteronoma 30:19.

E le hore batho bao ba dule ba thabile, ba ne ba lokela ho etsa qeto e nepahetseng. Le rona kajeno re na le kgetho eo. Bibele e a hlalosa hore na ke jwang re ka bang le bophelo bo thabisang: “Ka hore le rate Jehova Modimo wa lona, le mamele lentswe la hae.”​—Deuteronoma 30:20.

KE JWANG RE KA RATANG JEHOVA LE HO MAMELA LENTSWE LA HAE?

ITHUTE BIBELE: E le hore o rate Jehova, o lokela ho qala pela ka ho ithuta ka yena ka Bibeleng. Ha o ntse o ithuta ka yena, o tla hlokomela hore ke Modimo ya lerato, ya o batlelang se molemo. O batla hore o mo rapele ‘hobane o a o tsotella.’ (1 Petrose 5:7) Bibele e tshepisa hore haeba o etsa boiteko ba ho atamela ho Modimo le yena ‘o tla atamela ho wena.’​—Jakobo 4:8.

SEBEDISA SEO O ITHUTANG SONA: Ho mamela Modimo ho bolela ho latela tataiso ya hae e bohlale e hlahang ka Bibeleng. Ha o etsa jwalo, “o tla atlehisa tsela ya hao mme . . . o tla etsa ka bohlale.”​—Joshua 1:8.