Ho Ba Le Mamello

HO BA LE MAMELLO HO BOLELANG?

Motho ya nang le mamello, ke motho ya sa duleng a utlwisitswe bohloko ke dintho tse mpe tse mo hlahetseng. Ho hlokahala hore motho a be le tsebo e le hore a etse sena. Feela jwalo ka ha ngwana a ke ke a kgona ho ithuta ho tsamaya ntle le hore a we, ka tsela e tshwanang a ke ke a atleha bophelong ntle le hore a hlahelwe ke mathata.

KE HOBANENG HA E LE HA BOHLOKWA HORE RE MAMELLE?

Bana ba bang ba a nyahama haeba ba kopana le mathata, ba sa atlehe dinthong tse ding ebile ho fumanwa diphoso ho bona, ba bang bona ba nyahama ka ho felletseng. Le ha ho le jwalo, ba lokela ho hopola dintlha tsena tse latelang:

• Re ke ke re atleha nthong e nngwe le e nngwe eo re e etsang.​—Jakobo 3:2.

• Bohle re hlahelwa ke mathata.​—Moeklesia 9:11.

• Kgalemelo e re thusa hore re ithute diphosong tsa rona.​—Liproverbia 9:9.

Ha ngwana wa hao a amohela ha a hlahetswe ke mathata, seo se tla mo thusa hore le nakong e tlang a kgone ho a hlola.

KE JWANG O KA RUTANG NGWANA WA HAO HORE A MAMELLE?

Haeba ngwana wa hao a sa atlehe.

MOLAOMOTHEO WA BIBELE: “Ya lokileng a ka nna a wa esita le ka makgetlo a supileng, mme ka sebele o tla ema.”​—Liproverbia 24:16.

Thusa ngwana wa hao ho ithuta hore ha a hlahelwa ke bothata, a nahane hore na ke bo ka lokisehang kapa tjhe. Ka mohlala, o tla etsang haeba a feitse tlhahlobo sekolong? A ka nna a nyahama mme a re: “Ho a tshwana, ha hona ntho eo ke kgonang ho e etsa!”

Ruta ngwana wa hao ho kgaotsa ho dula a utlwile bohloko, ka hore o bone hore na ke dintho dife tseo a ka di etsang hantle nakong e tlang. Sena se tla mo thusa hore a hlole bothata boo mme a kgaotse ho utlwa bohloko.

O se ke wa mo bolella hore na a etseng ho rarolla mathata a hae. Ho ena le hoo, o mo thuse ho re a ipatlele hore na a ka rarolla bothata boo jwang. O ka nna wa mo botsa hore na o ikemiseditse ho etsang e le hore a sebetse hantle dithutong tsa hae.

Ha re etsahallwa ke dintho tse bohloko.

MOLAOMOTHEO WA BIBELE: “Ha le tsebe hore na bophelo ba lona bo tla ba jwang hosasane.”​—Jakobo 4:14.

Bophelo ba a fetofetoha. Motho ya ruileng a ka futsaneha hosane mme motho ya phetseng hantle a ka tsoha a kula. Bibele e re: “Ba lebelo ha ba hlole peisong, le ha e le hore ba matla ba a hlola ntweng, hobane bohle ba hlahelwa ke nako le ketsahalo e sa lebellwang.”​—Moeklesia 9:11.

Motswadi o etsa sohle seo a se ka kgonang ho sireletsa ngwana wa hae dinthong tse ka mo utlwisang bohloko. Empa ke nnete hore motswadi a ke ke a kgona ho sireletsa ngwana wa hae nthong e nngwe le e nngwe e ka mo utlwisang bohloko.

E ka nna yaba ngwana wa hao o sa le monyane hore a ka kopana le mathata a ho fellwa ke mosebetsi kapa mathata a ditjhelete. Empa o ntse o ka nna wa mo thusa ka mathata a mang a kang ho lahlehelwa ke motswalle le ho hlokahallwa ke motho eo a mo ratang.a

Ha ngwana a bontshwa diphoso tsa hae.

MOLAOMOTHEO WA BIBELE: “Mamela keletso . . . e le hore o ka hlalefa bokamosong ba hao.”​—Liproverbia 19:20.

Ha motho a kgalemela ngwana wa hao, seo ha se bolele hore ha a mo rate empa se bontsha hore o batla ho mo thusa hore a etse dintho tse molemo.

Haeba motswadi a kgalemela ngwana wa hae, seo se tla ba tswela molemo ba le babedi. Ntate e mong ya bitswang John o re: “Haeba ngwana a sa kgalemelwe, a ke ke a ithuta diphosong tsa hae. Empa o tla dula a etsa diphoso mme batswadi ba tla tlameha ho ikarabella diphosong tseo. Ebile seo se ka etsa hore motswadi le ngwana ba sulafallwe ke bophelo.”

O ka thusa ngwana wa hao jwang hore a rue molemo ha a kgalemelwa? Haeba ngwana a kgalemelwa sekolong kapa ke motho e mong, o se ke wa re ho yena o ne a sa lokelwa ho kgalemelwa. Ho e na le hoo, o ka nna wa re:

• “O nahana hore ke hobaneng ha motho eo a ile a o kgalemela?”

• “O ka lokisa bothata boo jwang?”

• “O tla etsang nakong e tlang ha o kopana le boemo boo?”

Hopola hore ha ngwana wa hao a kgalemelwa, seo se tla mo tswela molemo hona jwale le ha a se a hodile.