Ke Bomang ba ileng ba Mamela Nakong ya Morwallo o Moholo? Ke Bomang ba sa Kang ba Mamela?

Mehleng ya Noe batho ba bangata ba ne ba etsa dintho tse mpe. Genese 6:5

Adama le Eva ba ile ba ba le bana mme batho ba ile ba ngatafala lefatsheng. Ha nako e ntse e feta, mangeloi a mang le ona a ile a fetohela Modimo jwaloka Satane.

A ile a tla lefatsheng mme a apara mmele ya nama e le hore a tsebe ho nyala basadi. Basadi bao ba ile ba e ba le bana ba difonthwane ba neng ba le mabifi ba bile ba le matla.

Lefatshe le ile la tlala batho ba neng ba etsa dintho tse mpe. Bibele e re ‘bobe ba motho bo ne bo le bongata lefatsheng mme . . . menahano ya pelo ya hae e ne e le mebe feela ka dinako tsohle.’

Noe o ile a mamela Modimo yaba o haha areka. Genese 6:13, 14, 18, 19, 22

Noe e ne e le motho ya lokileng. Jehova o ile a bolella Noe hore O ne a tlilo timetsa batho ba kgopo ka morwallo o moholo.

Modimo o ile a boela a bolella Noe hore a hahe sekepe se seholo se bitswang areka, le hore a kenye lelapa la hae le diphoofolo tsa mefuta yohle ka ho sona.

Noe o ile a hlokomedisa batho ka Morwallo o moholo o neng o tla, empa ha ba a ka ba mamela. Ba bang ba ile ba tsheha Noe, athe ba bang bona ba ne ba mo hloile.

Ha areka e se e fedile, Noe o ile a kenya diphoofolo ka ho yona.