Areka ya Noe

Ha nako e ntse e ya, batho ba ile ba ata lefatsheng. Bongata ba bona ba ne ba etsa dintho tse mpe. Le mangeloi a mang a ile a etsa dintho tse mpe. A ile a tloha lehodimong moo a dulang teng yaba a tla lefatsheng. Na o a tseba hore ke hobaneng ha a ile a tloha lehodimong? A ne a batla ho iphetola batho e le hore a nyale basadi.

Mangeloi ao a ile a nyala mme a ba le bana. Bana bao ba ile ba hola, ya eba dinatla mme ba ne ba hlorisa batho. Ba ne ba otla batho. Jehova o ne a sa batle hore boemo bona bo tswele pele. Ka hoo, a etsa qeto ya ho fedisa batho ba kgopo ka morwallo.

Empa ho ne ho ena le monna e mong ya lokileng. O ne a rata Jehova. Lebitso la hae e ne e le Noe. O ne a ena le mosadi le bara ba bararo e leng Sema, Kama le Jafeta. Bara ba hae le bona ba ne ba ena le basadi. Jehova o ile a re Noe a hahe areka e le hore yena le ba lelapa la hae ba pholohe Morwallo. Areka ke lebokose le leholo le phaphamalang ka hodima metsi. Jehova o ile a re Noe a kenye le diphoofolo tse ngata ka arekeng e le hore le tsona di pholohe.

Hanghang Noe o ile a qala ho haha areka. Yena le ba lelapa la hae ba nkile dilemo tse ka bang 50 ba ntse ba e haha. Ba ile ba e haha hantle feela Jwalo ka ha Jehova a ba laetse. Ka nako eo, Noe o ne a ntse a bolella batho hore Morwallo o a tla empa ha ba a ka ba mo mamela.

Nako ya ho kena arekeng e ile ya fihla. Kgaolong e latelang, re tlo utlwa hore na ho ile ha etsahalang.