POTSO YA 7
Nka Etsang Haeba ke Hatellwa ho Etsa Thobalano?
O NE O TLA ETSANG?
Nahana ka sena: E se e le dikgwedi tse pedi feela Heather le Mike ba ratana, empa Heather o utlwa eka ke kgale ba tsebana. Ba dula ba romellana melaetsa, ba qeta dihora tse ngata ba bua founung ebile ba kgona ho tseba seo e mong a se nahanang le pele a bua!
Dikgweding tsena tse pedi, Heather le Mike ba ne ba tshwarana ka matsoho feela le ho sunana. Empa jwale Mike o batla hore ba etse se fetang seo. Heather yena ha a batle. Empa le teng ha a batle hore Mike a mo lahle. Mike o etsa hore a ikutlwe e le motho wa bohlokwa. Ho feta moo, Heather o ipolella hore yena le Mike ba a ratana.
Haeba o se o le dilemong tsa ho ratana, o ne o tla etsang?
NAHANISISA HANTLE!
Thobalano ke mpho eo Modimo a e fileng banyalani feela. Ha o etsa thobalano pele ho lenyalo, o senya mpho eo. Ho tshwana feela le haeba o nka seaparo se setle seo o se filweng ebe o koropa ka sona
Haeba o ka hlwella sefate se se lelele ebe o leka ho fofa jwaloka nonyana, o tla lemala. Ho a tshwana le haeba o sa mamele molao wa Modimo o reng ‘re ile bohlola.’—1 Bathesalonika 4:3.
Ho tla etsahalang haeba o tlola molao oo? Bibele e re: “Ya tlwaetseng ho etsa bohlola o sitelwa mmele wa hae.” (1 Bakorinthe 6:18) Seo ke nnete hakae?
Bafuputsi ba fumane hore batjha ba bangata ba etsang thobalano pele ho lenyalo ba fumana ditlamorao tse latelang:
HO TSHWENYEHA. Batjha ba bangata ba entseng thobalano pele ho lenyalo ba re ba a itshola ka ketso eo.
HO SE TSHEPANE. Ka mora ho etsa thobalano, ka bobedi ba qala ho ipotsa, ‘Ebe o robetse le mang hape?’
HO SWETSEHA. Ha e le hantle, banana ba bangata ba ka rata hore ba be le mohlankana ya tla ba sireletsa, eseng ya amehileng ka se batlwang ke yena feela. Bashanyana ba bangata ha ba kgahlwe ke ngwanana ya ileng a dumela ho robala le bona.
Nnete ke hore: Haeba o etsa thobalano pele ho lenyalo, o itheola seriti ka hore o lahle letlotlo la bohlokwa. (Baroma 1:24) Mmele wa hao ke wa bohlokwa haholo hore o ka o silafatsa ka tsela eo!
Bontsha hore o mamela melao ya Modimo ka hore o qobe ho etsa bohlola. (1 Bathesalonika 4:3) Jwale haeba o ka kena lenyalong ka le leng, o tla etsa thobalano, mme o tla e thabela ka ho feletseng ho se letho le o tshwenyang, le etsang hore o itshole le ho ikutlwa o sa sireletseha, e leng se atisang ho hlahela batho ba etsang thobalano pele ho lenyalo.—Liproverbia 7:22, 23; 1 Bakorinthe 7:3.
O NAHANANG KA SEE?
Na motho ya o ratang e le kannete a ka batla ho o utlwisa bohloko?
Na motho ya o kgathallang e le kannete a ka batla ho senya kamano ya hao le Modimo?—Baheberu 13:4.