POTSO YA 10
Bibele e ka Nthusa Jwang?
O NE O TLA ETSANG?
Nahana ka sena: Thabang o kganna koloi sebakeng seo a sa se tsebeng. Matshwao a diterata le dintho tse ding tseo a di bonang di bontsha hore o sebakeng se fosahetseng. Thabang o hlokomela hore o lahlehile. Mohlomong o ile a tjeka moo a neng a sa lokela ho tjeka teng.
Haeba e ne e le wena, o ne o tla etsang?
NAHANISISA HANTLE!
O ka kgetha ho etsa e nngwe ya dintho tsena:
O ka botsa batho tsela.
O ka sheba mmapa kapa wa sebedisa GPS.
O ka tswela pele, o tshepile hore o tla fumana tsela ya moo o yang.
Ho hlakile hore ho tswela pele o kganna ho ne ho ke ke ha o tswela molemo.
Ho sheba mmapa kapa ho sebedisa GPS ho molemo ho feta ho botsa batho. Lebaka ke hore o tla dula o e na le mmapa le GPS ha o ntse o tsamaya, mme di tla o thusa hore o fihle moo o yang.
Bibele e ka o thusa ka tsela e tshwanang!
Buka ena e rekwang ka ho fetisisa e leng Bibele e ka
o thusa ha o na le mathata
o thusa hore o itsebe le ho ntlafatsa botho ba hao
o thusa hore o phele bophelo bo kgotsofatsang
DIKARABO TSA DIPOTSO TSA BOHLOKWA BOPHELONG
Re botsa dipotso ho tloha feela ha re qala ho bua.
Bana ba tswa kae?
Modimo o dula kae?
Ha nako e ntse e ya, re botsa dipotso ka dintho tse etsahalang lefatsheng.
Ke hobaneng ha ho etsahala dintho tse bohloko?
Ke hobaneng ha batho ba e shwa?
Na o ne o tseba hore haesale dikarabo tsa dipotso tseo di le teng ka Bibeleng?
Batho ba bangata ba re Bibele e tletse ditshomo, e siilwe ke nako kapa ho thata ho e utlwisisa. Empa na Bibele ke yona e nang le bothata kapa bothata bo ho seo batho ba se utlwileng ka yona? Na ho ka etsahala hore ebe ba boleletswe mashano?
Ka mohlala, batho ba nahana hore Bibele e re Modimo ke yena ya busang lefatshe. Empa na seo ke nnete? Lefatshe lena le tswile taolong! Le tletse ka dintho tse re utlwisang bohloko le mathata, ho kula le lefu, bofutsana le dikoduwa. Ke jwang Modimo ya lerato a ka bakang dintho tsee tsohle?
Na o ka rata ho fumana karabo? O ka nna wa makala ha o utlwa hore na Bibele e re ke mang ya busang lefatshe!
Mohlomong o hlokometse hore keletso eo bukana ena e fanang ka yona e thehilwe Bibeleng. Dipaki Tsa Jehova di kgodisehile hore Bibele ke yona e fanang ka tataiso eo re ka e tshepang. Lebaka ke hobane ‘e buduletswe ke Modimo mme e molemo bakeng sa ho ruta, bakeng sa ho kgalemela, bakeng sa ho otlolla dintho.’ (2 Timothea 3:16, 17) E ka ba hantle hore o hlahlobisise buka ena eo le hoja e ngotswe kgale, molaetsa wa yona o ntseng o le nakong!