Rahaba o Pata Dihlwela

Ha dihlwela tsa Baiseraele di fihla motseng wa Jeriko, di ile tsa dula ha mosadi e mong ya bitswang Rahaba. Morena wa Jeriko o ile a tseba hore di teng, yaba o romela masole ha Rahaba. Rahaba o ile a pata dihlwela tseo ka marulelong mme a supisa masole ao tsela esele. A re ho dihlwela tseo: ‘Ke tla le thusa ka ha ke a tseba hore Jehova o na le lona le hore le tlo hapa naha ena. Ke kopa le ntshepise hore le tla sireletsa ba lelapa leso.’

Dihlwela tseo tsa re ho Rahaba: ‘Re a o tshepisa hore bohle ba ka tlung ya hao ba tla sireletseha.’ Tsa boela tsa re: ‘O tlame thapo ena e kgubedu fensetereng ya hao mme ba lelapa leno ba tla sireletseha.’

Rahaba o ile a ntsha dihlwela tseo ka fensetere mme tsa theoha ka thapo. Tsa balehela dithabeng. Di ile tsa ipata moo ka matsatsi a mararo, yaba di kgutlela ho Joshua. Yaba Baiseraele ba tshela Noka ya Jordane mme ba itokisetsa ho hapa naha. Jeriko ke motse wa pele oo ba ileng ba o hapa. Jehova o ile a re ba pote motse oo hanngwe ka letsatsi ka matsatsi a tsheletseng. Ka letsatsi la bosupa ba o pota ka makgetlo a supileng. Ka mora moo, baprista ba letsa diterompeta tsa bona mme masole a hweletsa. Marako a motse a ile a wa. Empa ntlo ya Rahaba, e neng e itshetlehile ka lebota, ha ya ka ya wa. Jehova a sireletsa Rahaba le ba lelapa labo ka ha Rahaba o ne a mo tshepile.