Jesu e ba Mesia

Johanne o ne a ntse a ruta a re: ‘Ho na le e moholo ho nna ya tlang.’ Ha Jesu a le dilemo di ka bang 30, o ile a tloha Galilea a ya Nokeng ya Jordane, moo Johanne a neng a ntse a kolobetsa batho teng. Jesu o ne a batla hore Johanne a mo kolobetse empa Johanne a re: ‘Ha ke a lokela ho o kolobetsa. Ke wena ya lokelang ho nkolobetsa.’ Yaba Jesu o re ho yena: ‘Jehova o batla hore o nkolobetse.’ Ka hoo, ba kena ka Nokeng ya Jordane mme Johanne a qwedisa Jesu ka metsing.

Ha Jesu a tswa ka metsing a rapela. Yaba lehodimo le a buleha mme moya o halalelang o theohela ho yena jwalo ka leeba. Jehova a bua a le lehodimong a re: “O Mora wa ka eo ke mo ratang, ya nkgahlisang.”

Ka mora hore moya o halalelang o theohele ho Jesu, e ile ya eba Kreste kapa Mesia. Jwale o ne a ka etsa mosebetsi oo Jehova a mo fileng wona.

Hang ka mora hore Jesu a kolobetswe, o ile a ya lefeelleng mme a qeta matsatsi a 40 moo. Ha a kgutla, a ya ho Johanne. Ha Johanne a mo bona, a re: ‘Enwa ke Konyana ya Modimo e tlosang sebe lefatsheng.’ Ka tsela eo, o ne a bolella batho hore Jesu ke Mesia. Na o a tseba hore na ho ile ha etsahalang ha Jesu a ntse a le lefeelleng? A re bone.