THUTO YA 18

Puo e Rutang

1 Bakorinthe 9:19-23

KAKARETSO: Etsa hore bamamedi ba hao ba nahane ka taba eo o buang ka yona le hore ba ithute dintlha tsa bohlokwa.

Nahana ka seo bamamedi ba hao ba seng ba ntse ba se tseba. Ho ena le hore o phete dintho tseo ba seng ba ntse ba di tseba, ba thuse hore ba shebe sehlooho sa hao ka tsela e fapaneng.

Fokotsa lebelo la lentswe la hao ha o ba bolella dintlha tse ntjha ho feta ha o ba bolella tseo ba di tsebang.
Etsa dipatlisiso o be o nahanisise ka tsona. Ha ho kgoneha, ba bolelle dintlha tseo ba sa di tsebeng kapa tseo ba so kang ba nahana ka tsona, ho ba thusa ho utlwisisa taba eo o buang ka yona. Nahana ka ho teba hore na taba eo o batlang ho bua ka yona e amana jwang le dintlha tseo o batlang ho e tshehetsa ka tsona.

Ha o ntse o nahana ka taba eo o tla bua ka yona, ipotse dipotso tse kang, ‘Hobaneng, kae, keng, neng, mang kapa jwang.’ Hlakisa dintlha tsa hao ha o ruta ka hore o arabe tse ding tsa dipotso tsena ha o ntse o fana ka puo ya hao.
Bontsha bohlokwa ba puo ya hao. Ba hlalosetse hore na Bibele e ka ba thusa jwang bophelong ba bona. Bua ka dintho tse tobileng, mekgwa le diketso tseo bamamedi ba hao ba di tsebang.