Tshehetsa Moetapele wa Rona Jesu

1. Thato ya Jehova ke efe mehleng ee?

KE THATO ya Modimo hore ditaba tse molemo tsa Mmuso wa hae di bolelwe lefatsheng lohle mehleng ena. (Mar. 13:10; 1 Tim. 2:3, 4) Mosebetsi ona ke wa Jehova mme ke wa bohlokwa haholo hoo a kgethileng Mora wa hae eo a mo ratang hore a o tataise. Ka ha Jesu o a re tataisa, re ka kgodiseha hore mosebetsi wa boboledi o tla etswa lefatsheng lohle pele bofelo bo fihla jwalo ka ha Jehova a batla.​—Mat. 24:14.

2. Re tla ithutang sehloohong see?

² Sehloohong sena re tlo ithuta ka moo Jesu a sebedisang “lekgoba le tshepahalang le le masene” ka teng ho re kwetlisa le sebedisa Lentswe la Modimo le ka moo Jesu a tataisang balatedi ba hae ka teng ho etsa mosebetsi o moholo wa boboledi. (Mat. 24:45) Re tla boela re bone seo e mong le e mong wa rona a ka se etsang ho tshehetsa Jesu le lekgoba le tshepahalang.

JESU O ETELLA PELE MOSEBETSI WA BOBOLEDI

3. Jesu o fuwe matla a ho etsang?

³ Jesu o etella pele mosebetsi wa boboledi. Re kgodiswa keng? Nakwana pele a nyolohela lehodimong o ile a kopana le balatedi ba hae thabeng ya Galilea. O ile a re ho bona: “Ke filwe matla ohle lehodimong le lefatsheng.” Hlokomela hore na o ile a reng ka mora moo. O ile a re: “Ka hona eyang mme le etse batho ba ditjhaba tsohle barutuwa.” (Mat. 28:18, 19) Ka hoo, e nngwe ya dintho tseo Jesu a filweng matla hodima yona, ke ho tataisa mosebetsi wa boboledi.

4. Ke hobaneng ha re kgodisehile hore Jesu o ntse a tataisa mosebetsi wa boboledi?

⁴ Jesu o ile a re mosebetsi wa ho bolela le ho etsa barutuwa o tla etswa ‘ditjhabeng tsohle’ mme o tla ba le balatedi ba hae “ka matsatsi ohle ho fihlela qetellong ya tsamaiso ya dintho.” (Mat. 28:20) Mantswe ao a bontsha hantle hore Jesu o ne a tla tataisa mosebetsi wa boboledi ho fihlela mehleng ya rona.

5. Re thusa jwang ho phethahatsa Pesaleme ya 110:3?

⁵ Jesu o ne a sa tshwenyeha ka hore na ho tla ba le basebetsi ba lekaneng matsatsing a ho qetela kapa tjhe. O ne a tseba hore boprofeta ba mopesaleme bo tla phethahala bo reng: “Batho ba hao ba tla itlhahisa ka ho rata letsatsing la lebotho la hao la sesole.” (Pes. 110:3) Haeba le wena o bolela ditaba tse molemo, o tshehetsa Jesu le lekgoba le tshepahalang ho phethahatsa boprofeta boo. Mosebetsi o tswela pele le hoja ho e na le ditshitiso.

6. Ke bothata bofe boo baboledi ba Mmuso wa Modimo ba kopanang le bona mehleng ee?

⁶ Bothata boo baboledi ba ditaba tse molemo ba kopanang le bona ke ho hanyetswa. Bakwenehi, baetapele ba bodumedi le boradipolotiki ba boleletse batho ba bangata mashano ka mosebetsi wa rona. Haeba beng ka rona, batho bao re ba tsebang le batho bao re sebetsang le bona ba thetsitswe ke mashano ana, ba ka re susumeletsa ho kgaotsa ho sebeletsa Jehova le ho kgaotsa ho bolela. Dinaheng tse ding, dira tsa rona di tshosa bara le baradibabo rona, di a ba hlasela, di a ba tshwara ebile di ba isa tjhankaneng. Ha re makale ha re tshwarwa ka tsela ena. Jesu o ile a re: “Le tla hlouwa ke ditjhaba tsohle ka lebaka la lebitso la ka.” (Mat. 24:9) Ho hlouwa ka tsela ena ke bopaki ba hore Jehova o a re amohela. (Mat. 5:11, 12) Diabolose ke yena ya etsang hore re hanyetswe. Empa Jesu o matla haholo ho feta Satane. Ka ha Jesu o a re tshehetsa, ditaba tse molemo di bolelwa ho batho ba ditjhaba tsohle. Nahana ka bopaki ba sena.

7. Re na le bopaki bofe ba hore Tšenolo 14:6, 7 e a phethahala?

⁷ Bothata bo bong boo re kopanang le bona ha re bolela ke hore batho ba bua dipuo tse ngata tse fapaneng. Jesu o ile a senolela moapostola Johanne hore mehleng ya rona bothata bona bo ne bo tla hlolwa mme ditaba tse molemo di bolelwe. (Bala Tšenolo 14:6, 7.) Seo se ne se tla etsahala jwang? Re fa batho ba bangata ka hohle ka moo ho ka kgonehang monyetla wa hore ba utlwe molaetsa wa Mmuso. Kajeno batho lefatsheng lohle ba ka bala dingolwa tse thehilweng Bibeleng tse fumanehang websaeteng ya rona ya jw.org ka ha e fetoletswe ka dipuo tse fetang sekete. Sehlopha se Busang se fane ka tumello ya hore ho fetolelwe buka ya O ka Thaba ka ho sa Feleng! ka dipuo tse fetang 700. Buka ena ke yona e ka sehloohong eo re e sebedisang ho etsa batho barutuwa. Ho boetse ho na le divideo tse thehilweng Bibeleng bakeng sa batho ba sa utlweng le dingolwa tsa braille bakeng sa ba sa boneng. Re bona ka mahlo ha boprofeta ba Bibele bo phethahala. Batho “ba tswang dipuong tsohle tsa ditjhaba” ba ithuta ho bua ‘puo e hlwekileng’ ya Bibele. (Zak. 8:23; Sof. 3:9) Sena sohle se finyellwa tlasa boetapele bo tswileng matsoho ba Jesu Kreste.

8. Mosebetsi wa rona wa ho bolela o finyelletse eng?

⁸ Mehleng ena batho ba ka hodimo ho dimilione tse robedi dinaheng tse 240 ke karolo ya mokgatlo wa Jehova mme selemo le selemo ho kolobetswa batho ba dikete tse mashome. Empa ntho ya bohlokwa ke “botho bo botjha” kapa makgabane a Bokreste ao barutuwa bana ba batjha ba sebeletsang ho ba le ona. (Bakol. 3:8-10) Ba bangata ba ile ba kgaotsa ho phela ka boitshwaro bo bobe, ho rata ntwa, ho ba leeme le ho rata naha ka ho feteletseng. Boprofeta bo hlahang ho Esaia 2:4 bo a phethahala hobane ‘ha ba sa ithuta ntwa.’ Ka ha re sebetsa ka thata ho apara botho bo botjha, re etsa hore batho ba batle ho kena ka mokgatlong wa Modimo mme re bontsha hore re latela moetapele wa rona Kreste Jesu. (Joh. 13:35; 1 Pet. 2:12) Dintho tsena ha di iketsahalle feela tjee. Jesu o re fa thuso eo re e hlokang.

JESU O KGETHA LEKGOBA

9. Ho ya ka Matheu 24:45-47, Jesu o ile a re ho tla etsahalang mehleng ya bofelo?

⁹ Bala Matheu 24:45-47. Jesu o ile a bolela esale pele hore matsatsing a ho qetela, o tla kgetha “lekgoba le tshepahalang le le masene” ho fa balatedi ba hae kwetliso e tswang Lentsweng la Modimo. Ka hoo, re ne re ka lebella hore lekgoba leo le sebetse ka thata mehleng ena. Sena ke sona se hlileng se etsahalang. Moetapele wa rona Jesu o sebedisa sehlopha sena se senyenyane sa barababo rona ba tlotsitsweng ho fa batho ba Modimo le ba bang ba thahasellang ‘dijo ka nako e tshwanetseng.’ Bara bana babo rona ha ba nke hore ba lokela ho laola tumelo ya batho ba bang. (2 Bakor. 1:24) Ho ena le hoo, ba nka Jesu Kreste e le yena “moetapele le molaodi” wa batho ba hae.​—Esa. 55:4.

10. Dibukeng tsee tse hlahileng ditshwantshong ke efe e ileng ya o thusa hore o qale ho sebeletsa Jehova?

¹⁰ Ho tloha ka 1919, haesale lekgoba le tshepahalang le hatisa dingolwa tse fapafapaneng ho fa batho ba qalang ho ithuta monyetla wa ho tseba nnete e ka Lentsweng la Modimo. Ka 1921, lekgoba le tshepahalang le ile la lokolla buka ya The Harp of God ho thusa batho ba thahasellang e le hore ba ithute dithuto tsa motheo tsa Bibele. Ha mehla e ntse e fetoha, ho ile ha lokollwa dingolwa tse ding. Wena ke sengolwa sefe se o thusitseng ho tseba le ho rata Ntate wa rona ya lehodimong? Mohlomong ke “Nnete e be ya Modimo,” Nnete e Isang Bophelong bo sa Feleng, O ka Phela ka ho sa Feleng Paradeiseng Lefatsheng, Tsebo e Isang Bophelong bo sa Feleng, Ha e le Hantle ke Eng Seo Bibele e se Rutang? Bibele e re Rutang? kapa buka ya rona e ntjha ya O ka Thaba ka ho sa Feleng! Dingolwa tsena kaofela di ne di reretswe ho re thusa ho etsa barutuwa mme di ile tsa fela tsa phetha morero oo ha di ne di lokollwa.

11. Ke hobaneng ha e le ha bohlokwa hore kaofela ha rona re ithute Bibele re be re ithute ka Jehova?

¹¹ Ha se batho ba qalang ho ithuta feela ba hlokang ho ba le tsebo e tebileng ka Jehova le ka Bibele. Kaofela ha rona re a e hloka. Moapostola Pauluse o ile a ngola a re: “Dijo tse tiileng ke tsa batho ba hodileng ka ho feletseng.” O ile a boela a re ho sebedisa seo re ithutileng sona Bibeleng ho tla re thusa “ho kgetholla se nepahetseng le se fosahetseng.” (Baheb. 5:14) Mehleng ena, ha ho bonolo ho mamela melao ya Jehova hobane boitshwaro ba batho ba bangata bo bobe haholo. Empa Jesu o etsa bonnete ba hore re ithuta dintho tse tla re thusa ho dula re ena le tumelo e matla. Thuto ena e tswa ka Lentsweng la Modimo le buduletsweng e leng Bibele. Jesu o tataisa lekgoba le tshepahalang hore le re fe thuto ena.

12. Jwalo ka Jesu, re bontshitse jwang hore re hlompha lebitso la Modimo?

¹² Jwalo ka Jesu, le rona re fa lebitso la Modimo tlotla e le tshwanetseng. (Joh. 17:6, 26) Ka mohlala, ka 1931 re ile ra qala ho ipitsa ka lebitso le thehilweng Bibeleng e leng Dipaki Tsa Jehova. Ka ho etsa jwalo, re ile ra bontsha hore lebitso la Ntate wa rona ya lehodimong le bohlokwa haholo ho rona le hore re batla ho tsejwa ka lona. (Esa. 43:10-12) Haesale ho tloha ka October selemong sona seo, lebitso lena le hlaha sekwahelong sa kgatiso e nngwe le e nngwe ya Tora ya ho Lebela. Ho feta moo, Phetolelo ea Lefatše le Lecha ea Mangolo a Halalelang e kgutliseditse lebitso la Modimo sebakeng sa lona se nepahetseng. Dikereke tse sa ruteng nnete ka Modimo tsona di entse ntho e fapaneng ka ho feletseng hobane di tlositse lebitso la Jehova diphetolelong tsa tsona tse ngata tsa Bibele.

JESU O HLOPHISA BALATEDI BA HAE

13. O kgodiswa ke eng hore Jesu o sebedisa “lekgoba le tshepahalang le le masene” mehleng ee? (Joh. 6:68)

¹³ Jesu o sebedisitse “lekgoba le tshepahalang le le masene” ho haha mokgatlo o ikgethang lefatsheng o etelletsang pele borapedi bo hlwekileng. O ikutlwa jwang ka mokgatlo oo? Mohlomong o ikutlwa jwalo ka moapostola Petrose ya ileng a re ho Jesu: “Re tla tloha re ye ho mang? Ke wena ya nang le dipolelo tsa bophelo bo sa feleng.” (Joh. 6:68) Re ka be re le hokae hoja ha re a ka ra tseba ka mokgatlo wa Jehova? Ke ka hona Kreste a etsang bonnete ba hore re na le ntho e nngwe le e nngwe eo re e hlokang hore re dule re tshepahalla Modimo. Hape o re kwetlisetsa ho etsa mosebetsi wa ho bolela ka tsela e atlehang. Ho feta moo, o re thusa hore re apare “botho bo botjha” e le hore re kgahlise Jehova.​—Baef. 4:24.

14. O ruile molemo jwang ka ho ba karolo ya mokgatlo wa Jehova nakong ya sewa sa COVID-19?

¹⁴ Jesu o fana ka tataiso e bohlale ha ho ena le mathata. Re bone melemo ya tataiso eo ha sewa sa COVID-19 se qala. Ha batho ba bangata lefatsheng ba ne ba sa tsebe hore na ba etseng, Jesu o ile a etsa bonnete ba hore re fumana tataiso e hlakileng e le hore re dule re sireletsehile. Re ile ra kgothalletswa ho rwala dimonkwana ha re le hara batho le hore re se ke ra atamela pela batho ba bang. Baholo ba ile ba hopotswa hore ba dule ba buisana le bahweletsi bohle ka phuthehong le ho fumana hore na ba hloka eng hore ba dule ba sireletsehile, ba phetse hantle ebile ba ena le tumelo e matla. (Esa. 32:1, 2) Ditlaleho tsa Sehlopha se Busang di ile tsa re kgothatsa tsa ba tsa re fa tataiso e eketsehileng.

15. Nakong ee ya sewa, re ile ra fuwa tataiso efe bakeng sa ho tshwara diboka le ho etsa mosebetsi wa boboledi, hona diphello e bile dife?

¹⁵ Nakong ya sewa sena, re ile ra boela ra fuwa tataiso e hlakileng ya hore na re ka tshwara diboka jwang le ho etsa mosebetsi wa boboledi. Kapele feela re ile ra qala ho tshwara diboka le dikopano tse kgolo le tse nyenyane ka marangrang. Re ile ra boela ra qala ho sebedisa mangolo le difono haholo ho bolela ditaba tse molemo. Jehova o ile a hlohonolofatsa boiteko ba rona. Makala a mangata a tlalehile hore palo ya bahweletsi e eketsehile haholo. Batho ba bangata ba na le dipale tse kgothatsang tseo ba ka di phetang tsa dintho tse ba etsahaletseng nakong ena.​—Sheba lebokose le reng “Jehova o Hlohonolofatsa Mosebetsi wa Rona wa ho Ruta Batho Bibele.”

16. Re ka kgodiseha ka eng?

¹⁶ E ka nna yaba batho ba bang ba ne ba utlwa eka mokgatlo o feteletsa dintho ka hore re be hlokolosi haholo nakong ena ya sewa. Empa nako le nako re dula re bona hore tataiso eo re ileng ra e fuwa e ne e le bohlale. (Mat. 11:19) Ha re ntse re nahanisisa ka tsela e lerato eo Jesu a etellang batho ba hae pele ka yona, re kgodisehile hore ho sa tsotellehe hore na ka moso ho tla etsahalang, Jehova le Mora wa hae ya ratwang ba tla dula ba ena le rona.​—Bala Baheberu 13:5, 6.

17. O ikutlwa jwang ka hore ebe Jesu ke moetapele wa hao?

¹⁷ Re thabile haholo hore ebe Jesu ke moetapele wa rona. Re ka hara mokgatlo o sa arolweng ke setso, botjhaba kapa dipuo. Re fumana thuto e ngata e tswang Lentsweng la Modimo mme re kwetliswa ka hohle hore re etse mosebetsi wa ho bolela. Re le batho ka bomong, re rutwa ho apara botho bo botjha le ho ratana. Re na le mabaka a ho ba motlotlo hore ebe Jesu ke moetapele wa rona.