Na Batho ba ile ba Fetolela Bibele ka Tsela eo e Neng e sa Ngolwa ka Yona Pele?

Tjhe. Meqolo ya kgale ha e bapiswa e bontsha hore Bibele ha e a fetoha ho sa tsotellehe hore na e ile ya ngolwa ka makgetlo a makae.

Na see se bolela hore ha hona moo ho nang le diphoso ha e ntse e fetolelwa dikoping tse ding?

Ho fumanwe meqolo ya kgale ya Bibele e dikete. E meng ya yona e na le moo e fapaneng teng, e leng se bontshang hore ho na le diphoso tse ileng tsa etsahala ha e ntse e kopitswa. Meqolo ena ha e a ngolwa ka ho tshwana empa seo ha se bolele hore moelelo o fetohile. Le ha ho le jwalo, ho fumanwe hore ho na le ho se tshwane ho hoholo, moo batho ba bang ba ileng ba fetola molaetsa wa Bibele ka boomo. Nahana ka mehlala e mmedi:

1. Ho 1 Johanne 5:7, diphetolelo tse ding tsa Bibele di na le mantswe a reng: “Ntate, Lentswe le Moya o halalelang ke ntho e le nngwe lehodimong.” Le ha ho le jwalo, meqolo e meng e tshepahalang e netefaditse hore mantswe a jwalo ha a yo ho latela kamoo Bibele e neng e ngotswe kateng pele. Mantswe a jwalo a ikenyeditswe hamorao.a Kahoo, diphetolelo tse ding tsa Bibele tse tshepahalang ha di a kenya mantswe ao.

2. Lebitso la Modimo le hlaha ka makgetlo a dikete meqolong ya kgale ya Bibele. Le ha ho le jwalo, diphetolelo tse ding tse mmalwa tsa Bibele di nketse lebitso la Modimo sebaka ka ditlotla tse ka reng “Morena” kapa “Modimo.”

Re ka kgodiseha jwang hore ha ho na diphoso tse ding hape tse ka fumanwang ka Bibeleng?

Hona jwale, ho fumanwe meqolo e mengata e entseng hore ho be bonolo ho fumana diphoso.b Keng seo meqolo e mengata e ileng ya fumanwa e se bontshang ka Bibele eo re e balang mehleng ena hore e nepahetse?

• William H. Green eo e neng e le seithuti, o ile a re ha a bua ka Mangolo a Seheberu (a bitswang “Testamente ya Kgale”): “Ho loketse ho bolela hore ha ho na mosebetsi o mongata tjena o kileng wa etswa ka tsela e tswileng matshoho.”

• F. F. Bruce eo e leng seithuti sa Bibele ha a ngola ka Mangolo a Bakreste a Segerike kapa “Testamente e Ntjha” o ile a re: “Ho na le bopaki bo bongata ka dibuka tsa Testamente e Ntjha ho feta bopaki bo teng ba bangodi ba neng ba tumme empa le ha ho le jwalo, ha ho na motho ya batlisisang hore na ebe ba ne ba nepile ka seo ba se ngotseng.”

• Mongodi e mong ya tsebahalang, e leng Frederic Kenyon o re “motho a ka nka Bibele kaofela ka letsohong la hae ebile a se na pelaelo kapa yona tshabo ya hore o nkile Lentswe la Modimo la nnete, leo e leng kgale le le teng ho tloha molokong o mong ho ya ho o mong.”

Ke mabaka afe a mang hape a ka pakang hore Bibele e fetoletswe ka tsela e nepahetseng?

• Bajuda le Bakreste ba ile ba etsa bonnete ba hore ha ba etsa dikopi, ba kenyelletsa le ditlaleho tsa diphoso tse tebileng tseo batho ba Modimo ba ileng ba di etsa.c (Numere 20:12; 2 Samuele 11:​2-4; Bagalata 2:​11-​14) Ka tsela eo, ba ile ba kenyelletsa le dikarolo tse neng di hanyetsa ho se mamele ha ditjhaba tsa Bajuda le ho pepesa dithuto tse qapilweng ke batho. (Hosea 4:2; Malakia 2:​8, 9; Matheu 23:​8, 9; 1 Johanne 5:​21) Ka ho etsa jwalo, ba ile ba bontsha hore seo ba se ngotseng ke nnete le hore ba a tshepahala hape ba hlompha Lentswe le halalelang la Modimo.

• Na ha se taba e utlwahalang hore ebe Modimo jwalo ka ha e le yena mongodi wa Bibele, o ne a ke ke a etsa bonnete ba hore e fetolelwe ka tsela e nepahetseng?d (Esaia 40:8; 1 Petrose 1:​24, 25) Ho feta moo, o ne a sa ngolla batho ba kgale feela Bibele empa o e ngolletse hore le rona batho ba mehleng ena re ruwe molemo. (1 Bakorinthe 10:11) Ha e le hantle, “dintho tsohle tse ileng tsa ngolwa nakong e fetileng di ile tsa ngollwa ho re laya, e le hore ka mamello ya rona le ka matshediso a tswang Mangolong re ka ba le tshepo.”​—Baroma 15:4.

• Jesu le balatedi ba hae ba ne qotsa ho tswa Mangolong a Seheberu ntle le ho ba le pelaelo ya hore mangolo ao ha a nepahala.​—Luka 4:​16-​21; Liketso 17:​1-3.