Genese 1:26—“A re Etse Motho ya Tshwanang le Rona”

“Yaba Modimo o re: ‘A re etse motho ya tshwanang le rona mme a laole ditlhapi tsa lewatle, dibopuwa tse fofang, diphoofolo tse ruuwang le phoofolo e nngwe le e nngwe e hahabang lefatsheng.’ ”​—Genese 1:​26, Bibele Phetolelo ya Lefatshe le Letjha.

“Modimo wa ntoo re: ‘A re etseng motho ka setshwantsho sa rona le ka ho tshwana ha rona mme a buse dihlapi tsa leoatle, le tse rurang tsa mahodimo, le makgomo, le lefatshe lohle, le dihahabi tsohle tse hahabang lefatsheng.’ ”​—Genese 1:​26, Bibele ya Sesotho.

Genese 1:26 e Bolela Eng?

Batho ba entswe ba tshwana le Modimo, mme ba kgona ho bontsha makgabane a tshwanang le ao Modimo a nang le ona, jwalo ka lerato, kutlwelo bohloko le toka.Ke ka hoo batho ba ka kgonang ho etsisa Modimo.

“Yaba Modimo o re: ‘A re etse motho ya tshwanang le rona.’ ” Pele Jehova Modimoa a bopa batho kapa ntho le ha e le efe e nngwe, o ile a bopa lengeloi le matla le ileng la tsebahala e le Jesu. Ka Jesu, “dintho tse ding tsohle tse lehodimong le lefatsheng di ile tsa boptjwa.” (Bakolose 1:​16) Jesu o na le botho bo tshwanang le ba Jehova, ke ka hoo ‘a tshwanang le Modimo ya sa bonahaleng.’ (Bakolose 1:​15) Ke ka hoo, Modimo a neng a ka re ho Jesu: “A re etse motho ya tshwanang le rona.”

“A laole ditlhapi tsa lewatle, dibopuwa tse fofang, diphoofolo tse ruuwang . . . lefatsheng.” Modimo ha a bopa diphoofolo hore di tshwane le yena. Ha di a boptjwa di na le ditshobotsi tseo batho ba bang le tsona, jwalo ka ho ba le letswalo le ho bontsha lerato. Le ha ho le jwalo, Modimo o ntse a tsotella diphoofolo. Ke ka hoo, a ileng a laela batho hore ba “laole” diphoofolo mme taelo ena e ka boetse ya bolela ho di “busa” kapa ho di “hlokomela.” Jehova o ne a fa batho boikarabelo ba ho hlokomela diphoofolo. (Pesaleme ya 8:6-8; Diproverbia 12:10) Jehova o lebeletse hore batho ba hlokomele lefatshe le dintho tsohle tse phelang ho lona.

Ditemana Tse Potolohileng Genese 1:26

Dikgaolo tse pedi tse qalang tsa Genese di hlalosa ka moo ho ileng ha boptjwa bokahohle le polanete eo re phelang ho yona le ka moo bophelo bo ileng ba eba teng lefatsheng. Ntho e nngwe le e nngwe eo Jehova a e bopileng ya hlolla, empa batho ba a ikgetha hara dintho tsohle tseo a di bopileng lefatsheng. Ha Modimo a qeta ho bopa, o ile “a bona hore ntho e nngwe le e nngwe eo a e entseng e molemo haholo.”—Genese 1:31.

Shebella video ena e kgutshwanyane e buang ka tlaleho ya popo e hlahang ho Genese.

Maikutlo a fosahetseng ka Genese 1:26

Shebella video ena e kgutshwanyane e bontshang kakaretso ya buka ya Genese.