KAROLO YA 9
Rapelang Jehova le le Lelapa
“Le rapele Ya entseng lehodimo le lefatshe.”—Tšenolo 14:7
Jwalokaha le ithutile bukaneng ena, Bibele e na le melao e mengata e tla le thusa le le lelapa. Jehova o batla hore le thabe. O le tshepisa hore haeba le etelletsa borapedi ba hae pele, “dintho tsena tse ding tsohle le tla di ekeletswa.” (Matheu 6:33) Ruri o batla hore le be metswalle ya hae. Kahoo, etsang sohle seo le ka se kgonang ho matlafatsa setswalle sa lona le Modimo. Ena ke tlotla e kgolo ka ho fetisisa eo le ka bang le yona.—Matheu 22:37, 38.
1 MATLAFATSA KAMANO YA HAO LE JEHOVA
SEO BIBELE E SE BUANG: “‘Ke tla ba ntata lona, mme le tla ba bara le baradi ba ka,’ ho bolela Jehova.” (2 Bakorinthe 6:18) Modimo o batla hore o be motswalle wa hae wa sebele. E nngwe ya dintho tse ka o thusang ho etsa seo ke thapelo. Jehova o o mema hore o ‘rapele o sa phetse.’ (1 Bathesalonika 5:17) O labalabela ho utlwa maikutlo a hao a tebileng le dintho tse o tshwenyang. (Bafilipi 4:6) Ha o rapela hammoho le ba lelapa la hao, ba tla hlokomela hore ruri Modimo ke motho wa sebele ho wena.
Ho phaella tabeng ya ho buisana le Modimo, o lokela ho mo mamela. O ka etsa sena ka ho bala Lentswe la hae le dingolwa tse thehilweng Bibeleng. (Pesaleme ya 1:1, 2) Thuisa ka seo o ithutang sona. (Pesaleme ya 77:11, 12) Ho mamela Modimo ho boetse ho akarelletsa hore o ye dibokeng tsa Bokreste kamehla.—Pesaleme ya 122:1-4.
Tsela e nngwe ya bohlokwa eo ka yona o ka matlafatsang kamano ya hao le Jehova ke ka ho bolella ba bang ka yena. Ha o bua ka yena kamehla, o tla ba le kamano e haufiufi le yena.—Matheu 28:19, 20.
SEO LE KA SE ETSANG:
Ipheng nako ya ho rapela le ho bala Bibele letsatsi le letsatsi
Le le lelapa, etsang hore mesebetsi e amanang le borapedi e tle pele ho boithabiso le boikgathollo
2 THABELANG BORAPEDI BA LELAPA
SEO BIBELE E SE BUANG: “Atamelang ho Modimo, mme o tla atamela ho lona.” (Jakobo 4:8) Le lokela ho ba le kemiso ya kamehla ya borapedi ba lelapa mme le e kgomarele. (Genese 18:19) Empa ho hlokahala ho fetang hoo. Le lokela ho ameha ka Modimo bophelong ba lona kamehla. Matlafatsang kamano ya ba lelapa la lona le Modimo ka hore le bue ka yena ‘ha le dutse ka tlung le ha le tsamaya tseleng le ha le robala le ha le tsoha.’ (Deuteronoma 6:6, 7) E bang le sepheo se tshwanang le sa Joshua ya ileng a re: “Ha e le nna le ba ntlo ya ka, re tla sebeletsa Jehova.”—Joshua 24:15.
SEO LE KA SE ETSANG:
Ebang le lenaneo la ka mehla la ho ithuta le buang ka mathata ao e mong le e mong ka lapeng a tobanang le ona