Esaia
17 Phatlalatso khahlanong le Damaseka:+ “Bonang! Damaseka ha e sa le motse, ’me e fetohile qubu, lithako tse senyehang.+ 2 Metse ea Aroere+ e siiloeng e fetoha libaka tsa mehlape, moo e bothang teng, ho se ea etsang hore e thothomele.+ 3 Motse o etselitsoeng qhobosheane o felisitsoe Efraime,+ le ’muso Damaseka;+ ’me ba setseng ba Syria ba tla tšoana le khanya ea bara ba Iseraele,” ho bolela Jehova oa mabotho.+
4 “Letsatsing leo khanya ea Jakobo e tla theoloa,+ esita le nama ea hae e nonneng e tla etsoa hore e be e otileng.+ 5 Etlare ha mokotuli a bokella lijo-thollo tse ntseng li le mahlakeng ’me letsoho la hae le kotula liqoapi tsa lijo-thollo,+ o tla tšoana le ea khoahlapisang liqoapi tsa lijo-thollo khohlong ea Barefaime.+ 6 Ho eona ho tla sala se khoahlapisitsoeng joalokaha ho hlohloroa sefate sa mohloaare: mehloaare e ’meli kapa e meraro e butsoitseng holim ’a lekala; mehloaare e mene kapa e mehlano makaleng a behang litholoana,” ho bolela Jehova Molimo oa Iseraele.+
7 Letsatsing leo motho oa lefatše o tla talima ho Moetsi oa hae, ’me mahlo a hae a tla talima Mohalaleli oa Iseraele.+ 8 A ke ke a talima ho lialetare,+ mosebetsi oa matsoho a hae;+ ’me a ke ke a talima seo menoana ea hae e se entseng, ebang ke lipalo tse halalelang kapa liluloana tsa libano.+ 9 Letsatsing leo metse ea hae ea qhobosheane e tla ba joaloka sebaka se tlohetsoeng ka ho feletseng morung, lekala leo ba le tlohetseng ka ho feletseng ka lebaka la bara ba Iseraele; ’me e tla fetoha lesupi.+ 10 Etsoe u lebetse+ Molimo oa poloko ea hao;+ ha ua hopola Lefika+ la qhobosheane ea hao. Ke ka lebaka leo u lemang libaka tse khahlehang tse lenngoeng, ’me u hloma letlōbō la motho osele ho tsona. 11 Motšehare u ka ’na ua etsetsa sebaka sa hao se lenngoeng motero ka hloko, ’me hoseng u ka ’na ua etsa hore peō ea hao e mele, empa ka sebele kotulo e tla baleha letsatsing la lefu le la bohloko bo sa phekoleheng.+
12 Jo! moferefere oa lichaba tse ngata, tse morusu joaloka morusu oa maoatle! Le lerata la lichaba, tse etsang molumo o moholo o joaloka molumo oa metsi a matla!+ 13 Lichaba+ li tla etsa molumo o moholo o joaloka molumo oa metsi a mangata. Ka sebele O tla li khalemela ka matla,+ ’me li tla balehela hōle ’me li lelekisoe joaloka ’mōkō oa lithaba ha o fefoloa ke moea le joaloka setsokotsane sa meutloa ka pel’a moea oa sefefo.+ 14 Ka shoalane, bonang! ho na le tšabo ea tšohanyetso. Pele e e-ba hoseng—ha e sa le eo.+ Ena ke kabelo ea ba re nkelang thepa ka mahahapa, le karolo ea ba re tlatlapang.+