Bacha Baa Botsa . . .

Ke Joang Nka Thusang Motsoali oa ka Ea se Nang Molekane?

“Ho ba motsoali ea se nang molekane ho tšoana le ho ba sebapali sa letjeketjane. Ka mor’a likhoeli tse tšeletseng tsa ho ikoetlisa, u khona ho kapa liketo tse ’nè ka nako e le ’ngoe. Empa hang ha u finyelletse seo, e mong o u akhela keto e ’ngoe!”—Motsoali ea se nang molekane.

MOSEBETSI oa motsoali ea se nang molekane oa khathatsa, hangata o thata. ’Me haeba ’mè oa hao e le motsoali ea se nang molekane, ha ho pelaelo hore ua elelloa hore o hloka thuso e itseng.a Empa joaloka mocha, u talimane le seo mongoli e mong a ileng a se bitsa “nako ea khatello le matsoalo bophelong.” U ka ’na ua bona eka ho sebetsana le mathata a bocha ho lekane.

Ho sa tsotellehe hoo, joaloka motsoali ea se nang molekane ea qotsitsoeng qalong, nako le nako ’mè oa hao a ka ’na a ikutloa a ferekanngoa ke ho leka ho ba ’mè le ntate oa hao ka nako e le ’ngoe. Ke ’nete, Jehova ha a lebella hore motho a etse se mo sitang. Joalokaha molao-motheo o mong oa Bibele o bolela: “Ntho ea bohlokoa ke ho ikemisetsa ho fana ka sohle seo re ka khonang ho fana ka sona—ke sona seo Molimo o se amohelang.” (2 Ba-Korinthe 8:12, Phillips) Empa ho ntse ho le joalo a ka ’na a ikutloa a le tlas’a khatello e matla. Na u lokela ho hlokomoloha bothata ba hae, kapa na ho na le lebaka le letle leo ka lona u ka lekang ho mo thusa?

“Ho ba Buseletsa”

Ho 1 Petrose 3:8, Bakreste baa bolelloa: “Ha e le ka ho hong, ke re: Bohle le be le khopolo e le ’ngoe, le hauhelane.” Kahoo ke hobane’ng ha bonyane kutloelo-bohloko bakeng sa motsoali oa hao e sa u susumetse hore u mo thuse? Ruri, hoa “amoheleha mahlong a Molimo” ha bacha ba Bakreste ba “buseletsa batsoali ba bona.”—1 Timothea 5:4, NW.

Le hoja ho se pelaelo hore temana ena e bua ka ho fana ka thuso ea lichelete ho motsoali ea shoetsoeng ke molekane, re boetse re ithuta molao-motheo oa bohlokoa: Re kolota batsoali ba rōna se sengata ho feta seo re ka khonang ho ba buseletsa sona. ’Me ha ba hloka, re tšoanela re bile re lokela ho leka ho ba buseletsa. Ka mohlala, bacha ba bang ba sebelisa karolo e itseng ea moputso oa bona kapa moputso oohle oo ba o amohelang mosebetsing oa nakoana bakeng sa ho thusa ho lefa likoloto tsa lelapa. Sena se bontša teboho le kananelo ea sebele!

Leha ho le joalo, thuso ea lichelete, ke tsela e le ’ngoe feela ea ho “buseletsa” motsoali oa hao. Eseng hore u ka leka ho nka sebaka sa motsoali ea sieo—seo se ke ke sa etsahala—kapa hona hore ho hlokahala hore u tšoenyehe boikutlong, ka ho ikutloa hore ua ikarabella bakeng sa sohle se etsahalang lapeng leno. Oo e ntse e le mosebetsi oa ’mè oa hao joaloka motsoali. (Bapisa le Liproverbia 31:27.) Empa ho na le mekhoa e mengata e sebetsang eo ka eona u ka ipakang u le motho oa bohlokoa ho ’mè oa hao haeba a se na molekane.

Kutlo e Bebofatsa Moroalo oa Hae

Tsela e ’ngoe ke ea ho latela taelo e ho Ba-Kolosse 3:20: “Bana, utloang batsoali ba lōna nthong tsohle; hobane ke taba e khahlisang Morena.” U ka ’na ua khona ho pheta temana ena ka hlooho. Empa na ka linako tse ling u hlōleha ho e ela hloko?

Motsoali e mong ea se nang molekane ea nang le mora ea ka tlaase ho lilemo tse mashome a mabeli o sebetsa lihora tse ngata ho hlokomela lelapa la hae. ’Me ka ho feheloa o re: “Mora oa ka o nthatafalletsa bophelo ha a sa nkutloe.” Mora oa hae oa mo hanyetsa: “Ke ’na feela ea motona ka tlung. Ke moholo ho ’mè, kahoo ka linako tse ling ho thata haholo hore ke mo utloe le ho mo hlompha joaloka hlooho ea lelapa.”

Sebōpeho sa ’mele oa hao kapa ho ba motho e motona ha li u lokolle hore u se ke ua utloa taelo ea Jehova: “U se ke ua furalla thuto ea ’m’ao.” (Liproverbia 6:20) Molimo o nehile ’mè oa hao matla a ho etsa melao, kapa litaelo bakeng sa lelapa. U mo kolota hlompho le kutlo. Haeba u le motona, ’Mè oa hao ka lerato a ka ’na a u bitsa ntate oa lelapa. Empa ke eena hlooho ea lelapa! ’Me ka ho mo utloa—o sa mo phehise khang nako le nako ha a u kōpa hore u mo etsetse ho hong—u mo bebofaletsa moroalo le ho tlisa khotso ka lapeng leno.

Thusa ka ho Etsa Mosebetsi oa Ntlo

Tsela e ’ngoe ea ho bebofatsa moroalo oa motsoali oa hao ke ea ho thusa ka mesebetsi ea ntlo—u sa emele hore u khannoe hore u e etse. U ka ’na ua hana: ‘Empa ’Mè ha a nkōpe hore ke mo etsetse eng kapa eng.’ Hoa makatsa hore e be hangata ho joalo. Joalokaha Carol V. Murdock a ngola: “’Mè kapa Ntate ea se Nang Molekane o thekesela a feta ka kamoreng ea ho lula ka moroalo oa liaparo tseo a il’o li hlatsoa o moholo hoo o kobang mangole a matla ka ho fetisisa—’me bana ba hae ba bararo ba tonetse thelevishene mahlo.”—Single Parents Are People, Too!

Ke hobane’ng ha batsoali ba bangata ba se nang balekane ba hloka ho honyenyane hakaale ho bana ba bona? ’Mè e mong ea se nang molekane o ile a bea mabaka: “Ha ke batle hore morali oa ka a tlamehe ho fetoa ke monyaka ofe le ofe hobane ke tlameha ho sebetsa. Ke tšaba hore hoo ho ka etsa hore a ntlhonamele.” E mong o itse: “U batla ho koala sekheo sa motsoali ea sieo ka ho nolofalletsa bana bophelo.” Leha ho le joalo, sesosa sa maikutlo ao e ka ’na eaba hore motsoali o ikutloa a le molato. A ka ’na a ikutloa a le molato hobane ho tsoela pele ho sebetsa ho mo tlosa ho uena. Kapa a ka ’na a ikutloa a le molato oa ho hlōleha ha lenyalo la hae, a bea lebaka la hore o ikarabella bakeng sa hore e be u tlameha ho phela lelapeng la motsoali a le mong.

Ho latela Dr. Richard A. Gardner, mongoli oa The Boys and Girls Book About Divorce, bacha ba bang ba nka monyetla ka boemo bona. Ba batla ho utloeloa bohloko ’me ba hana ho etsa mesebetsi ea lelapa. Leha ho le joalo, sena se re hopotsa ka ho hloka kutloelo-bohloko ho bontšitsoeng ke baeta-pele ba bolumeli ba nakong ea Jesu. Jesu o itse ka bona: ‘Ba hlophisa meroalo e boima, empa ha ba ea ikemisetsa le ho e phahamisa ka monoana ho thusa hore e jaroe.’—Mattheu 23:4, Today’s English Version.

Bontša boikutlo bo fapaneng. U hane ho eketsa moroalo oa ’mè oa hao; u se ke ua itokolla ho etseng mesebetsi ea lelapa.

Ho Nka Khato Pele

Sena se ka ’na sa bolela ho etsa seo ho hlokahalang hore se etsoe u sa kōpuoe. Hlokomela kamoo Tony e mocha a befofatsang moroalo oa ’mè oa hae ka teng. O re: “’Mè o sebetsa sepetlele, ’me seaparo sa hae sa mosebetsi se lokela ho aenoa. Kahoo ke mo aenela sona.” Empa na oo hase mosebetsi oa basali? Tony oa arabela: “Ba bang ba nahana joalo, empa hoo ho thusa ’mè, kahoo kea ho etsa.”

Ka ntle le ho fana ka thuso e sebetsang, u ka etsa ho hongata ho hlasimolla ’mè oa hao maikutlo ka ho bua mantsoe a kananelo. Motsoali e mong ea se nang molekane o ngotse: “Ke atisa ho fumana hore ha ke hlile ke ikutloa ke nyahame kapa ke halefisitsoe ke letsatsi le lekang haholo mosebetsing ’me ke khutlela hae—ka fumana hore leo ke letsatsi leo morali oa ka a ikhethetseng ho teka tafole le ho lokisa lijo tsa mantsiboea ka lona.” Oa eketsa: “Mora oa ka o nkopa ka letsoho ’me o re, ‘U ’mè ea ratehang ea molemohali lefatšeng.’” Liketso tse joalo tse bontšang tlhokomelo li mo ama joang? O tsoela pele: “Boikutlo bohle ba ka boa fetoha ’me bo ba molemo haholoanyane hape.”

‘Tsoela Pele ho Tsamaea ’Neteng’

“Ho ’na ha ho thabo e fetisang ena, ea ho utloa hoba bana ba ka ba tsamaea ’neteng.” (3 Johanne 4) Mona moapostola Johanne o ne a bua ka bana ba hae ba moea. Haeba ’mè oa hao ke Mokreste, ha ho pelaelo hore o ikutloa ka tsela e tšoanang ka uena; o batla hore u tsamaee ’neteng. Ho finyella seo a ka ’na a lokisetsa thuto ea ka mehla ea lelapa ea Bibele le uena.

A ka ’na a se ke a nolofalloa ho khanna thuto eo ka mor’a mosebetsi o khathatsang oa letsatsi. ’Me haeba u sa sebelisane le eena kapa u belaela, thuto ea lelapa e ka ba ntho e tenang ho bohle ba amehang. Kahoo sebelisana le motsoali! E-ba ea loketseng ho ithuta ha nako ea thuto e fihla. Lokisetsa thuto esale pele. Ho sebelisana le motsoali oa hao ho ka mo fa khothatso eo a e hlokang ho etsa hore thuto eo e be teng ka mehla. Ha u kopanela libokeng tsa Bokreste le boboleling ba ntlo le ntlo u sa khannoe, u boetse u bontša hore u tsamaea ’neteng. (Mattheu 24:14; Ba-Heberu 10:24, 25) Ka tsela ena u kholisa ’mè oa hao hore boiteko ba hae hase ba lefeela!

Melemo

Liproverbia 3:27 e re: “Ea nang le tokelo, u se ke ua lesa ho mo etsa ka molemo, ha ho le matleng a hao.” Ho hlakile hore, u kolota motsoali oa hao ho nahanela ho joalo. ’Me ha u mo nea hona, ha u thabise eena feela empa u thabisa le Jehova Molimo ka boeena. Molemo o mong ke ona: Motsoali oa hao o tla ba boemong bo molemo haholoanyane ba kelello hore a ka u fa thuso ha u e hloka.

Qetellong, ho thusa ba bang ho haha ka ho rōna litšoaneleho tse molemo. Joalokaha sengoli se seng se ile sa lemoha: “Bacha ba batla menyetla ea ho ikutloa hore ba thusa ba bang le ho ba fa ho hong. Ha ba sa etse joalo, ba ke ke ba tseba matla a bona le ho tšoarella ha bona ho seo ba se etsetsang ba bang [ho tlang] le ho tseba hore u motho ea molemo le ea thusang ba bang.” Joalokaha Jesu ka boeena a itse: “Ho nea ke leseho le fetisang la ho fuoa.” (Liketso 20:35) ’Me u ka thaba haholo haeba u tsotella ho thusa motsoali oa hao ea se nang molekane.

[Mongolo o botlaaseng ba leqephe]

[Setšoantšo se leqepheng la 14]

Mocha ea botsoa kapa ea sa tsotelleng o eketsa khatello ea maikutlo bophelong ba motsoali oa hae . . . Ea thusang ka mosebetsi oa lelapa o mo bebofaletsa moroalo