Lebitso le Bolela Eng?

NA U tseba lebaka leo batsoali ba hao ba u rehileng lebitso leo u nang le lona? Hangata mehleng ea Bibele mabitso a batho a ne a bontša tumelo ho Molimo le litšepiso tsa oona. Ka mohlala, lebitso Abrahama, leo Molimo o mo rehileng lona, le bolela “Ntat’a Letšoele (Bongata).” Ishmaele e bolela “Molimo oa Utloa (Mamela).” ’Me Jesu e bolela “Jehova ke Poloko.”

Linaheng tsa Afrika kajeno, hangata ho reha mabitso ho bontša litumelo tsa bolumeli le lintho tsa bohlokoa. Ho joalo le har’a Lipaki tsa Jehova tsa Maafrika.

Nigeria, mosali e mong e mocha oa hlalosa: “Ntate o ile a ithuta ’nete ea Bibele le Lipaki tsa Jehova selemo pele ke hlaha. Selemong sona seo buka The Truth That Leads to Eternal Life [’Nete e Isang Bophelong bo sa Feleng] e ile ea lokolloa ka Senyesemane. Hamorao hoo e batlang e le ka nako eo ke hlahileng ka eona, buka Truth [’Nete] e ile ea lokolloa ka puo ea rōna ea Seyoruba. Ka lebaka leo, ntate o ile a nahana hore ho loketse ho mpha lebitso Truth [’Nete].”

Monna e mong oa Paki ea Jehova oa tlaleha: “Ntate ebile Paki selemo pele ke hlaha. O ne a sebetsa sebakeng se laoloang ke Mak’hatholike a khomaretseng bok’hatholike haholo, ’me ka baka la litumelo tsa hae, o ile a lahleheloa ke mosebetsi. Ha ke hlaha o ne a sa sebetse ’me o ne a e-na le chelete e fokolang haholo. Empa o ne a sa nyahama. O itse: ‘Ke hloka mosebetsi ka baka la ho tšepahala ’Musong oa Molimo.’ Kahoo o ile ntheha lebitso la Kingdom [’Muso].”

Monna e mong e mocha o itse: “Batsoali ba ka ba ile ba ntheha lebitso la Seigbo, Ifeanyichukwu, lebitso leo le le lelele haholo ho batho ba sa bueng Seigbo, kahoo ke ne ke batla lebitso le bonolo haholoanyane. Hape ke ne ke batla ho sebeletsa Bethele [ofisi ea lekala ea Mokhatlo oa Watch Tower], ’me ke ne ke e-na le motsoalle eo lebitso la hae e neng e le Bethel [Bethele]. Kahoo ke ile ka kōpa batsoali ba ka hore na nka ipitsa ‘Bethel.’ Ba ile ba lumela.”

Monna e mong oa Nigeria oa tlaleha: “Batsoali ba ka e ne e le bo-pula-maliboho [basebeletsi ba nako e tletseng]. Ntate o ne a batla ho rehella e mong oa bana ba hae ka mosebetsi oa bona. Ke kamoo ke ileng ka fumana lebitso Pioneer [Pula-maliboho]. Ba ne ba e-na le tšepo ea hore le ’na ke tla thabela mahlohonolo a enneng a tšebeletso ea nako e tletseng.”

Ha setho se seng sa Sehlopha se Busang sa Lipaki tsa Jehova se ne se le Côte d’Ivoire ka December 1978, se ile sa kopana le khaitseli ea neng a e-na le lesea le bitsoang Victorious Faith (Tumelo e Hlōlang) ka baka la hobane a ile a hlaha ha ’mè oa hae a ne a ile Kopanong ea Setereke ea “Tumelo e Hlōlang.”

Truth [’Nete], Kingdom [’Muso], Bethel [Bethele], le Pioneer [Pula-maliboho] kaofela ha bona ba sebetsa ofising ea lekala ea Mokhatlo oa Watch Tower Nigeria. Hape ho na le Lipaki tse ling tse sebetsang teng tse nang le mabitso a joaloka Bible (Bibele), Wisdom (Bohlale), Christian (Mokreste), Love (Lerato), Innocent (Ea se Nang Molato), Genesis (Genese), le Blessing (Lehlohonolo). Basebetsi bana ba Bakreste kaofela ba sebetsa ka thata ho boloka botumo bo botle, kapa lebitso le letle le Jehova Molimo, eo lelapa le leng le le leng leo le leng leholimong le lefatšeng le bitsoang ka eena.—Bapisa le Ba-Efese 3:14, 15.