Pono ea Bibele

Pono e Leka-lekaneng ka Meetlo e Tloaelehileng

“HA HO TSELA EA BOITŠOARO E SA KANG EA NYATSUOA KA NAKO E ITSENG LE SEBAKENG SE ITSENG LE E SA KANG EA NKOA E LE TLAMO KA NAKO E ’NGOE LE SEBAKENG SE SENG.”

KA POLELO ena, rahistori oa Leaerishe William Lecky o akaretsa sebōpeho se sa tsitsang sa batho. Litlhaloso tsa hae li ka ’na tsa boela tsa sebetsa tabeng ea meetlo le lineano ho theosa le lilemo. Ha e le hantle, litloaelo tse ngata tseo ka nako e ’ngoe li kileng tsa nkoa e le karolo ea bohlokoa ea bophelo ba letsatsi le letsatsi hamorao li ile tsa nyatsuoa. Sena ha se makatse, etsoe moapostola oa Mokreste Pauluse o ile a hlokomela hore “pono ea lefatše lena ea fetoha.”—1 Bakorinthe 7:31.

E, mokhatlo oa batho o lula o ntse o fetoha. Hangata sena se bonahatsoa ke liphetoho tse khōlō boitšoarong le mekhoeng ea sechaba. Bakreste e lokela ‘ho se be karolo ea lefatše’—ke hore, ba lula ba arohile mokhatlong oa batho o ikarotseng ho Molimo. Ho ntse ho le joalo, Bibele ea lumela hore Bakreste ‘ba lefatšeng,’ ’me ha e laele hore e be majela-thōko. Ka hona, pono e leka-lekaneng ka meetlo ke ea bohlokoa.—Johanne 17:11, 14-16; 2 Bakorinthe 6:14-17; Baefese 4:17-19; 2 Petrose 2:20.

Meetlo ke Eng?

Meetlo ke litloaelo tse sebelisoang bophelong ba sechaba le tse tloaelehileng sebakeng se itseng kapa sehlopheng se itseng sa batho. Meetlo e meng, e kang mekhoa e metle ea tafoleng le mekhoa e hlomphehang, e ka ’na eaba e hlahisitsoe ke tlhokahalo ea ho laola boitšoaro ba batho ha ba sebetsa e le sehlopha, ho ba nolofalletsa ho sebelisana ka ho nahanelana le ka tlhomphano. Maemong a joalo, mekhoa e metle ea sechaba e ka tšoantšoa le oli, ka hore e etsa hore likamano tsa batho li tsamaee bolacha.

Meetlo e ’nile ea susumetsoa haholo ke bolumeli. Ha e le hantle, e mengata e tsoa litumela-khoeleng tsa boholo-holo le likhopolong tsa bolumeli tse sa tsoeng Bibeleng. Ka mohlala, e ka ’na eaba ho fa beng ka mofu lipalesa ho qalile tumela-khoeleng ea bolumeli.a Ho feta moo, ho ne ho nahanoa hore ’mala o moputsoa—oo hangata o amahanngoang le masea a bashemane—o leleka bademona ka ho ba tšosa. Mascara e ne e sebeletsa e le tšireletso khahlanong le ho sheba ka leihlo le lebe, ha lipstick eona e ne e sebelisetsoa ho thibela bademona ho kena molomong oa mosali le ho mo tšoara. Esita le moetlo o se nang kotsi joaloka ho koahela molomo ha motho a elimola e ka ’na eaba e tsoa khopolong ea hore moea oa motho o ka ’na oa tsoa ka molomo o ahlameng haholo. Leha ho le joalo, ha lilemo li ntse li feta ho amahanngoa ha tsona le bolumeli ho ile ha nyamela, ’me kajeno litloaelo tsena le meetlo ena ha li sa na moelelo oa bolumeli.

Seo Bakreste ba Amehileng ka Sona

Ha Mokreste a tlameha ho etsa qeto mabapi le ho latela kapa ho se latele moetlo o itseng, seo a lokelang ha ameha ka sona haholo ke hore na, Pono ea Molimo ke efe joalokaha e boletsoe ka Bibeleng? Nakong e fetileng Molimo o ile a nyatsa litloaelo tse itseng tseo mohlomong li neng li lumelleha lichabeng tse ling. Li ne li akarelletsa ho etsoa ha bana mahlabelo, tšebeliso e mpe ea mali le litloaelo tse sa tšoaneng tsa likamano tsa botona le botšehali. (Levitike 17:13, 14; 18:1-30; Deuteronoma 18:10) Ka ho tšoanang, ho hlakile hore meetlo e meng e itseng e tloaelehileng kajeno ha e lumellane le melao-motheo ea Bibele. E meng ea eona ke lineano tse sa tsoeng Bibeleng tse amanang le matsatsi a phomolo a bolumeli a kang a Keresemese le Easter kapa le litloaelo tsa tumela-khoela tse amanang le tšebelisano le meea.

Empa ho thoe’ng ka meetlo eo mohlomong pele e neng e amahanngoa le litloaelo tse belaetsang empa kajeno e se e talingoa e le mekhoa e hlomphehang sechabeng? Ka mohlala, meetlo e mengata e atileng ea machato—ho akarelletsa ea ho roesana lireng le ho ja kuku ea lenyalo—e ka ’na eaba e qalile boheteneng. Na see se bolela hore Bakreste ha baa lokela ho latela meetlo e joalo? Na Bakreste ba lokela ho phenya-phenya moetlo o mong le o mong oa sechaba e le hore ba bone haeba ho na le kae-kae moo o kileng oa fana ka maikutlo a fosahetseng kapa hore ho na le nako eo ka eona o neng o fana ka maikutlo a fosahetseng?

Pauluse o bolela hore “moo moea oa Jehova o leng teng, ho na le tokoloho.” (2 Bakorinthe 3:17; Jakobo 1:25) Molimo o batla hore re sebelise tokoloho ena, eseng e le tlhohlelletso ea litakatso tsa boithati, empa e le hore re koetlise matla a rōna a temoho bakeng sa ho khetholla se nepahetseng ho se fosahetseng. (Bagalata 5:13; Baheberu 5:14; 1 Petrose 2:16) Kahoo, tabeng eo ho eona ho hlakileng hore ha ho melao-motheo ea Bibele e tlōloang, Lipaki tsa Jehova ha li etse melao e thata-thata. Ho e-na le hoo, Mokreste e mong le e mong o tlameha ho sekaseka maemo a amehang ’me a etse qeto ea botho.

Batla se Molemong oa ba Bang

Na see se bolela hore kamehla ho loketse ho etsa moetlo o itseng hafeela o sa hanane ka ho toba le lithuto tsa Bibele? Che. (Bagalata 5:13) Pauluse o ile a bontša hore Mokreste ha aa lokela ho batla se molemong oa hae feela empa o lokela ho batla se molemo “ho ba bangata.” O lokela ho ‘etsa lintho tsohle bakeng sa khanya ea Molimo’ ’me ha ea lokela ho ba sesosa sa khopiso. (1 Bakorinthe 10:31-33) Kahoo motho ea batlang ho amoheleha ho Molimo o tla batla ho ipotsa: ‘Ba bang ba talima moetlo oo joang? Na batho ba motse ba o amahanya le tlhaloso leha e le efe e sa amoheleheng? Na ho kopanela ha ka ho oona ho tla fana ka maikutlo a hore ke lumellana le mekhoa kapa likhopolo tse sa khahliseng Molimo?’—1 Bakorinthe 9:19, 23; 10:23, 24.

Le hoja ka kakaretso meetlo e meng e se na kotsi, e ka ’na ea sebelisoa ka litsela tse hananang le melao-motheo ea Bibele sebakeng sa heno. Ka mohlala, liketsahalong tse itseng tse ikhethang ho fana ka lipalesa ho ka ’na ha fana ka moelelo o itseng o hananang le lithuto tsa Bibele. Kahoo, ke’ng seo Mokreste a lokelang ho ameha ka sona haholo-holo? Le hoja ho ka ’na ha e-ba le lebaka le ka etsang hore motho a hlahlobe hore na moetlo o itseng o qalile joang, maemong a mang habohlokoa le ho feta ke ho hlahloba seo moetlo oo o se bolelang ho batho ka nako eo le sebakeng seo motho a phelang ho sona hona joale. Haeba moetlo o hanana le Mangolo kapa ka litsela tse itseng o fana ka maikutlo a fosahetseng nakong e itseng ea selemo kapa maemong a itseng, ka bohlale Bakreste ba ka khetha ho o qoba ka nako eo.

Pauluse o ile a rapella hore Bakreste ba etse hore lerato la bona le ’ne le ate ka tsebo e nepahetseng le temoho e feletseng. Ka ho ba le pono e leka-lekaneng ka meetlo e tloaelehileng, Bakreste ba “nepisisa lintho tsa bohlokoa haholoanyane, e le hore [e] ka ba ba se nang sekoli le hore [e] se ke [ea] ba ba khopisang ba bang.” (Bafilippi 1:9, 10) Ka nako e tšoanang, ba tla etsa hore ‘ho ba le kahlolo e molemo ha bona ho tsejoe ke batho bohle.’—Bafilippi 4:5.

[Mongolo o botlaaseng ba leqephe]

[Litšoantšo tse leqepheng la 15]

Meetlo e meng ea boholo-holo, e kang ea ho koahela molomo ha motho a elimola le ho fa beng ka mofu lipalesa, e feletsoe ke moelelo oa eona oa qalong