Buka e Ikhethang e Pholohileng Litlhaselo
“Ha ho na buka e kileng ea hanyetsoa joaloka eona . . . , empa e pholohile tlhaselo e ’ngoe le e ’ngoe e ’nileng ea etsoa ke batho ba matla, ba bohlale le ba buang ka tsela e susumetsang.”
KE HOBANE’NG ha u lokela ho hlahloba Bibele? Lebaka le leng ke hore, e bolela hore e jere molaetsa oa Molimo o eang ho batho. (2 Timothea 3:16) Haeba seo e se bolelang ke ’nete, ka sebele u tla be u fetoa ke ntho ea bohlokoa ha u sa e bale.
Lebaka le leng leo ka lona u lokelang ho hlahloba Bibele, ke hore ke buka ea khale ka ho fetisisa e kileng ea e-ba teng ’me e fetoleloa le ho ajoa ka ho pharaletseng ho feta buka leha e le efe e ’ngoe. Ke buka e rekoang ka ho fetisisa ’me e lula e itlhomme pele lethathamong la libuka tse rekoang ka ho fetisisa selemo le selemo.
Seo Bibele e se bolelang, nako eo e bileng teng ka eona le tsela eo e ajoang ka eona e tsoteha haholo, ha re nahana ka boiteko bo ’nileng ba etsoa ho tloha khale ba ho e thibela. Setsebi sa thuto ea bolumeli sa lekholong la bo19 la lilemo, e leng Albert Barnes, se re: “Ha ho na buka e kileng ea hanyetsoa joaloka eona; empa e pholohile tlhaselo e ’ngoe le e ’ngoe e ’nileng ea etsoa ke batho ba matla, ba bohlale le ba buang ka tsela e susumetsang.”
Mongoli eena eo, o boletse hore ka tlhaho batho ba thahasella ntho leha e le efe e ’nileng ea ema e tiile khahlanong le litlhaselo. Barnes o phaella ka hore: “Empa ha ho lebotho le kileng la pholoha lintoa tse ngata joaloka Bibele, ha ho lerako le tiileng la tšireletso la mehleng ea boholo-holo le kileng la lula le le teng ka mor’a lithibello tse ngata, lintoa tse kupang le ho feta ha nako; ’me ha ho lefika le kileng la hoholoa ke metsi a mangata a phallang empa la lula le sa sisinyehe.”
Libuka tse ngata tsa boholo-holo li ’nile tsa lahleha, tsa senngoa kapa tsa lebaloa, empa ho sa tsotellehe litlhaselo tse mabifi, Bibele eona e ’nile ea pholoha. Batho ba bang ba loanne, ba beha bophelo ba bona kotsing, e le hore batho bohle ba ka e fumana. Ka lehlakoreng le leng, batho ba bang ba ’nile ba e phamola matsohong a babali ba labalabelang ho e bala ’me ba chesa Libibele le beng ba tsona.
Ke hobane’ng ha buka ee e ’nile ea ratoa haholo empa ka lehlakoreng le leng e ’nile ea hlouoa? E pholohile litlhaselo life? Ke bo-mang ba lekileng ho e felisa? Habohlokoa le ho feta, ke hobane’ng ha e pholohile? Ke hobane’ng ha molaetsa oa eona o le bohlokoa ho uena? Lipotso tsena li tla tšohloa maqepheng a latelang.
[Chate/Litšoantšo tse maqepheng a 2, 3]
(Ha u batla ho bona boitsebiso bo hlophisitsoeng hantle, sheba sengoliloeng)
TATELLANO EA LINAKO TSA HO HATISOA HA BIBELE
1513 B.C.E.–hoo e ka Bible e ngoloa ka Seheberu, Searame le Segerike
bang ka 98 C.E.
100 E etsoa hore e be codex e nkehang habonolo
405 Jerome o e fetolela ka Selatine
1380 Wycliffe o e fetolela ho tloha Selatineng ho ea Senyesemaneng
1455 Gutenberg o hatisa Bibele ea pele
1525 Tyndale o e fetolela ka Senyesemane
1938 E hatisoa ka lipuo tse fetang 1 000
2011 E fumaneha ka lipuo tse fetang 2 500