KE’NG E KA RE THUSANG HO MAMELLA MATHATA?

4 | E-ba le Tšepo ea Hore Lintho li Tla Loka

SEO E LENG SA BOHLOKOA

Ho tšoenyeha ka mathata a lefatše ho ka ama batho ’meleng le kelellong. Batho ba bangata ba ileng ba angoa ke liketsahalo tsena ha ba na tšepo ea hore lintho li tla loka. Ba etsa’ng ha boemo boo bo hlaha?

Batho ba bang ba tšaba le ho nahana ka bokamoso.
Batho ba bang ba sebelisa tahi le lithethefatsi e le ho itebatsa mathata a bona.
Ha ba bang ba nahana hore ho shoa ho molemo ho feta ho phela. Ba ipotsa hore na ba sa phelela’ng ebe ba etsa qeto ea ho ipolaea.

Seo U Lokelang ho se Tseba

A mang a mathata a hao e ka ba a nakoana ’me a ka fetoha u sa lebella.
Le haeba boemo ba hao bo sa fetohe ho na le lintho tseo u ka li etsang tse ka u thusang hore u mamelle.
Bibele ea tšepisa hore ho na le tharollo bakeng sa mathata ’ohle a moloko oa batho.

Seo U ka se Etsang Hona Joale

Seo Bibele e se buang: “Kahoo, le ka mohla le se ke la tšoenyeha ka letsatsi le hlahlamang, etsoe letsatsi le hlahlamang le tla ba le matšoenyeho a lona. Letsatsi ka leng le lekanoa ke bobe ba lona.”—Matheu 6:34.

U se ke oa tšoenyeha ka bokamoso hoo u sitoang ho etsa lintho tseo u lokelang ho li etsa.

Ho tšoenyeha ka lintho tse mpe tse ka ’nang tsa u etsahalla ho ka u bakela khatello ea maikutlo ’me ha fokolisa tšepo eo u nang le eona bakeng sa bokamoso.

U KA THUSOA KE’NG? Lintho Tse ka U Thusang

LULA U NAHANA LINTHO TSE HANTLE

Seo Bibele e se buang: “Matsatsi ‘ohle a ea hlorileng a mabe empa ea pelo e ntle o ba le mokete kamehla.” (Liproverbia 15:15) Ha u lula u nahana ka bothata, u ka qetella u sa bone hore ho na le tharollo. Leha ho le joalo, ho nahana ka lintho tse hantle ho tla u thusa hore u sebetsane le bothata ba hao.

Fokotsa nako eo u e qetang u bala kapa u mametse litaba.
Pele u robala nahana ka lintho tse peli kapa tse tharo tse u thabisang.
Ngola lintho tseo u lokelang ho li etsa letsatsing lena. Etsa lintho hanyane-hanyane e le hore u bone hore u sebelitse ha kae pele letsatsi le likela.

KOPA THUSO

Seo Bibele e se buang: “Ea itšehlang thajana . . . o tla phasoloha khahlanong le bohlale bohle bo sebetsang.” (Liproverbia 18:1) U ke ke oa khona ho intša ka sekoting se tebileng empa ha u fumana thuso u ka khona.

Kopa thuso ho ba lelapa le metsoalle.
Batla lintho tseo u ka li etsang e le hore le uena u thuse metsoalle ea hao. Ha u thusa ba bang, hoo ho ka u thusa hore u tsebe ho bona mathata ao u nang le ’ona ka moo a leng ka teng.
Haeba u utloa eka u feletsoe ke tšepo ebile u se u sa thabele bophelo, e ka ba hantle hore u ee ngakeng. Ka linako tse ling ha u ikutloa u imetsoe haholo, seo e ka ba letšoao la khatello ea maikutlo. Batho ba bangata ba ile ba thusoa ke ho ea ngakeng.a

a Makasine ena ea Tsoha! ha e buelle mofuta o itseng oa phekolo.

Bibele e Fana ka Tšepo

Mopesaleme ha a rapela Molimo o ile a re: “Lentsoe la hao ke lebone la leoto la ka, ke leseli tseleng ea ka.” (Pesaleme ea 119:105) Ke joang Bibele e leng lebone le leseli?

Bosiu lebone le re thusa ho bona moo re tsamaeang teng. Ka tsela e tšoanang, Bibele e ka re fa bohlale bo ka re thusang ha re lokela ho etsa liqeto tse boima.

Leseli le ka re khantšetsa tsela e le hore re bone moo re eang. Ka tsela e tšoanang, Bibele e ka re thusa hore re be le tšepo ka bokamoso.

Bibele ke buka e tsoang ho Molimo e sa bueng feela ka pale ea batho ho tloha qalong empa e boetse e fana ka tšepo ka bokamoso. E araba lipotso tsena:

Mahlomola a qalile joang?

Bibele e re “sebe se ile sa kena lefatšeng ka motho a le mong le lefu la kena ka sebe, ’me kahoo lefu la namela ho batho bohle hobane kaofela ba ne ba entse sebe.”—Baroma 5:12.

Ke hobane’ng ha mebuso ea batho e sa khone ho rarolla mathata a rona?

Bibele e re “ha ho matleng a motho ea tsamaeang hore a tsamaise mehato ea hae.” (Jeremia 10:23) Mathata a teng lefatšeng a bontša hore lengolo lena le bua ’nete .

Molimo o tla etsa’ng ho rarolla mathata?

Bibele e re “o tla hlakola meokho eohle mahlong a bona, lefu ha le sa tla hlola le e-ba teng, ’me ho siama kapa ho bokolla kapa bohloko ha li sa tla hlola li e-ba teng.”—Tšenolo 21:4.